ប្រជាពលរដ្ឋរស់នៅសង្កាត់កោះរ៉ុង ខេត្តព្រះសីហនុ ដង្ហោយរកកិច្ចអន្តរាគមន៍ពីលោកនាយករដ្ឋមន្ត្រី ហ៊ុន សែន ឲ្យជួយទប់ស្កាត់ក្រុមហ៊ុន រ៉ូយ៉ាល់ គ្រុប (Royal Group) ប្រើគ្រឿងចក្រឈូសឆាយផលដំណាំ។ ក្រុមហ៊ុននេះ ទទួលបានសិទ្ធិវិនិយោគពីរដ្ឋាភិបាល ដើម្បីអភិវឌ្ឍតំបន់នេះរយៈពេល ៩៩ឆ្នាំ។
មន្ត្រីសង្គមស៊ីវិលដែលបានចុះអង្កេតផ្ទាល់ដល់ទីតាំងកើតមានទំនាស់ បានចាត់ទុកសកម្មភាពរបស់ក្រុមហ៊ុន រ៉ូយ៉ាល់ គ្រុប ថាបានអនុវត្តផ្ទុយពីគោលនយោបាយស្បែកខ្លា ដែលប្រមុខដឹកនាំបានដាក់ឲ្យក្រុមហ៊ុន ឬក្រុមការងាររដ្ឋាភិបាល ចុះពិនិត្យដោះស្រាយគម្រោងអភិវឌ្ឍន៍លើកោះរ៉ុង។
ប្រជាពលរដ្ឋរស់នៅភូមិកោះតូច សង្កាត់កោះរ៉ុង ក្រុងព្រះសីហនុ ខេត្តព្រះសីហនុ បានចោទក្រុមហ៊ុន រ៉ូយ៉ាល់ គ្រុប ដែលបានសិទ្ធិវិនិយោគអភិវឌ្ឍកោះរ៉ុង រយៈពេល ៩៩ឆ្នាំ ថាបានប្រើគ្រឿងចក្រឈូសឆាយចម្ការ និងបំផ្លាញដំណាំស្វាយចន្ទី ខ្នុរ ដូង និងដើមស្វាយ ជាដើម រាប់រយដើម ទាំងមិនបានផ្តល់សំណង ឬជួបដោះស្រាយជាមួយពលរដ្ឋជាមុនទេ។
ពលរដ្ឋចោទថា សកម្មភាពប្រើគ្រឿងចក្ររបស់ក្រុមហ៊ុន រ៉ូយ៉ាល់ គ្រុប បានប៉ះពាល់ដីចម្ការពលរដ្ឋចំនួន ៣គ្រួសារមានទំហំផ្ទៃដីជិត ២ហិកតារ និងមានដាំដំណាំចម្រុះ ត្រូវបំផ្លាញទាំងស្រុងចាប់ពីខែមិថុនា បន្តមកដល់ខែសីហា នេះ។
អតីតប្រធានភូមិកោះតូច និងជាចាស់ទុំម្នាក់ឈ្មោះ នាង សំប៊ុន បានប្រាប់វិទ្យុអាស៊ីសេរី ថា សកម្មភាពក្រុមហ៊ុន រ៉ូយ៉ាល់ គ្រុប គឺអនុវត្តផ្ទុយពីអនុក្រឹត្យរបស់លោកនាយករដ្ឋមន្ត្រី ហ៊ុន សែន ដែលបានដាក់ចេញ និងតម្រូវឲ្យក្រុមហ៊ុន ឬមន្ត្រីក្រុមការងារ ពិនិត្យតាមដានការអភិវឌ្ឍនៅលើកោះរ៉ុង។ អនុក្រឹត្យរបស់ប្រមុខដឹកនាំ បានតម្រូវឲ្យផែនការអភិវឌ្ឍន៍នៅលើកោះរ៉ុង ត្រូវអនុវត្តតាមគោលនយោបាយស្បែកខ្លា ដើម្បីធានាថា ផែនការអភិវឌ្ឍន៍របស់ក្រុមហ៊ុន រ៉ូយ៉ាល់ គ្រុប កោះរ៉ុង មិនធ្វើឲ្យប៉ះពាល់ដល់ការតាំងលំនៅឋាន និងជីវភាពរស់នៅរបស់ប្រជាពលរដ្ឋក្នុងមូលដ្ឋាននេះ។ ជាងនេះ ក៏តម្រូវឲ្យក្រុមការងារអចិន្ត្រៃយ៍ដើម្បីដោះស្រាយ ជំរុញ និងតាមដានការអភិវឌ្ឍកោះរ៉ុង ត្រូវរកដំណោះស្រាយវិវាទផ្សេងៗជាមួយពលរដ្ឋ ជាមួយក្រុមហ៊ុន ឲ្យស្របតាមអនុក្រឹត្យរបស់ប្រមុខដឹកនាំដាក់ឲ្យអនុវត្ត កាលពីខែសីហា ឆ្នាំ២០១៤។
អតីតប្រធានភូមិកោះតូច លោក នាង សំប៊ុន បានបន្ថែមថា ក្នុងចំណោមពលរដ្ឋជាង ១០០គ្រួសារដែលបានមកតាំងលំនៅក្នុងមូលដ្ឋាននេះ មានពលរដ្ឋខ្លះបានមករស់នៅតាំងពីឆ្នាំ១៩៩៥ និងបានប្រកបមុខរបរនេសាទសមុទ្រ ឬធ្វើចម្ការ មុននឹងចាប់យករបរបម្រើសេវាភ្ញៀវទេសចរក្នុងប៉ុន្មានឆ្នាំចុងក្រោយនេះ។ ប៉ុន្តែលោកថា ទើបមកដល់ឆ្នាំ២០០៨ ដែលមានវត្តមានក្រុមហ៊ុន រ៉ូយ៉ាល់ គ្រុប ដែលរដ្ឋាភិបាលបានផ្តល់សិទ្ធិវិនិយោគនៅលើកោះរ៉ុង ត្រូវក្រុមហ៊ុននេះប្រើកម្លាំងនគរបាល ឬកងរាជអាវុធហត្ថ មកគំរាមពលរដ្ឋមិនឲ្យសង់ផ្ទះ ឬដាំដំណាំ ព្រមទាំងហាមមិនឲ្យពលរដ្ឋកាប់ឆ្ការព្រៃនៅលើដីចម្ការធ្លាប់បង្កបង្កើនផលរបស់ខ្លួន ជាដើម។
មនុស្សវ័យចាស់រូបនេះ បានចោទថា សកម្មភាពក្រុមហ៊ុន រ៉ូយ៉ាល់ គ្រុប ក្នុងប៉ុន្មានខែចុងក្រោយនេះ បានប្រើគ្រឿងចក្រឈូសឆាយផ្លូវ និងស្ថាបនាកំពង់ផែ នាំឲ្យប៉ះពាល់ផលដំណាំ និងដីចម្ការពលរដ្ឋក្នុងតំបន់នេះជិត ២០គ្រួសារ។ ហើយថា ក្នុងចំណោមនេះ គ្រួសារខ្លះបានប៉ះពាល់ដីចម្ការចាប់ពី ៣០អា រហូតដល់ ១ហិកតារ ក្នុងនោះមានពលរដ្ឋចំនួន ៣គ្រួសារត្រូវបាត់បង់ដីចម្ការ មានដាំដើមស្វាយចន្ទី ស្វាយ ខ្នុរ ដូង និងដើមឫស្សីជាដើម អស់ជាង ៤០០ដើម និងបាត់បង់ដីចម្ការសរុបជិត ២ហិកតារ៖ «កន្លងមកហ្នឹងអាជ្ញាធរបានដាក់កម្លាំងបង្ក្រាបពលរដ្ឋមិនឲ្យទៅកាប់ឆ្ការព្រៃ ឬចូលទៅថែទាំផលដំណាំនៅលើដីចម្ការរបស់ពួកគាត់ទេកន្លងមក។ រហូតដល់ពេលខ្លះ សមត្ថកិច្ចនគរបាលជាដើម បានចាប់ប្រជាពលរដ្ឋបញ្ជូនទៅកាន់ក្រសួងបរិស្ថាន ដោយចោទពីបទបំផ្លិចបំផ្លាញព្រៃឈើ ឬបរិស្ថានជាដើម»។
ផ្ដើមពីបញ្ហានេះ អតីតមេភូមិកោះតូច លោក នាង សំប៊ុន បានស្នើដល់លោកនាយករដ្ឋមន្ត្រី ហ៊ុន សែន ឲ្យជួយពិនិត្យសកម្មភាពរំលោភបំពានរបស់ក្រុមហ៊ុន រ៉ូយ៉ាល់ គ្រុប ដែលបានធ្វើទុក្ខបុកម្នេញមកលើការរស់នៅរបស់ប្រជាពលរដ្ឋជាបន្តបន្ទាប់ ឬក៏ឈានដល់ពិចារណាដកហូតសិទ្ធិក្រុមហ៊ុនវិនិយោគមួយនេះនាថ្ងៃអនាគត។
ក្រុមប្រជាពលរដ្ឋផ្សេងទៀតដែលដីចម្ការ និងដំណាំពួកគាត់ត្រូវគ្រឿងចក្ររបស់ក្រុមហ៊ុន រ៉ូយ៉ាល់ គ្រុប ឈូសឆាយកម្ទេចចោលគ្មានសល់ ក៏ស្នើដល់ប្រមុខដឹកនាំ ជួយកាត់ឆ្វៀលដីតាមរូបមន្តស្បែកខ្លា ដែលប្រមុខដឹកនាំបានដាក់ចេញឲ្យមានប្រសិទ្ធភាព ព្រោះកន្លងមក សកម្មភាពរបស់ក្រុមហ៊ុននិងអាជ្ញាធរ មិនបានអនុវត្តតាមគោលនយោបាយនេះទេ។
ត្រង់ចំណុចនេះ ប្រជាពលរដ្ឋភូមិកោះតូច បានចោទសកម្មភាពរបស់ក្រុមហ៊ុន រ៉ូយ៉ាល់ គ្រុប និងក្រុមការងារ ត្រួតពិនិត្យសកម្មភាពអភិវឌ្ឍន៍លើកោះរ៉ុង ថាបានអនុវត្តផ្ទុយពីអនុក្រឹត្យរបស់លោកនាយករដ្ឋមន្ត្រី ហ៊ុន សែន បានដាក់ចេញ។
ទាក់ទិនបញ្ហានេះ កាលពីថ្ងៃទី២២ ខែកក្កដា ប្រជាពលរដ្ឋចំនួន ៣គ្រួសារ មានឈ្មោះ លោក ឡុក វណ្ណា លោកស្រី សំ សុខ និងលោក មាស ណារ៉ា ដែលដីចម្ការរបស់ពួកគាត់ជិត ២ហិកតារ ត្រូវគ្រឿងចក្រក្រុមហ៊ុន រ៉ូយ៉ាល់ គ្រុប ឈូសបំផ្លាញចោលដោយគ្មានផ្តល់សំណង ឬប្រាប់ដំណឹងជាមុន បានផ្ដិតស្នាមមេដៃដាក់ពាក្យសុំកិច្ចអន្តរាគមន៍ពី លោក អ៊ួង និត ចៅសង្កាត់កោះរ៉ុង តាមរយៈ លោក ហាប់ សៀកលី មេភូមិកោះតូច ប៉ុន្តែរហូតមកដល់ពេលនេះ គ្មានចម្លើយឆ្លើយតបទេ។
បញ្ហានេះ អនុប្រធានភូមិកោះតូច លោក ស៊ុន រឿន បានប្រាប់អ្នកយកព័ត៌មានវិទ្យុអាស៊ីសេរី ដែលចុះផ្ទាល់ដល់កោះរ៉ុង បានចោទថា ក្រុមហ៊ុន រ៉ូយ៉ាល់ គ្រុប បានប្រើគ្រឿងចក្រឈូសឆាយចម្ការដំណាំពលរដ្ឋក្នុងមូលដ្ឋានខ្លួនពិតមែន ក្នុងនោះមានពលរដ្ឋជិត ២០គ្រួសារបានរងផលប៉ះពាល់ ហើយក្រុមហ៊ុននេះមិនជួយដោះស្រាយជាមួយពលរដ្ឋទេ។ បញ្ហានេះ លោកស្នើដល់ប្រមុខដឹកនាំ ជួយអន្តរាគមន៍ទប់ស្កាត់សកម្មភាពប្រើគ្រឿងចក្រឈូសឆាយរបស់ក្រុមហ៊ុន រ៉ូយ៉ាល់ គ្រុប និងជួយអន្តរាគមន៍ឲ្យក្រុមហ៊ុននេះផ្តល់សំណងខូចខាតជូនពលរដ្ឋ។
ជាងនេះទៀត លោក ស៊ុន រឿន អនុប្រធានភូមិកោះតូច ក៏បានស្នើដល់ប្រមុខដឹកនាំរដ្ឋាភិបាល ឲ្យជួយកាត់ឆ្វៀលដីជូនពលរដ្ឋចេញពីគម្រោងវិនិយោគរបស់ក្រុមហ៊ុនឲ្យបានច្បាស់លាស់ជាមុន មុននឹងអនុញ្ញាតឲ្យក្រុមហ៊ុន រ៉ូយ៉ាល់ គ្រុប ប្រើគ្រឿងចក្រឈូសឆាយ។ លោកបញ្ជាក់ថា ភូមិកោះតូច មានពលរដ្ឋរស់នៅចំនួន ១១២គ្រួសារ និងមានមនុស្សគ្រប់វ័យសរុបជាង ៤០០នាក់៖ «ស្នើដល់វិទ្យុអាស៊ីសេរី ជួយផ្សព្វផ្សាយឲ្យបានដឹងឮដល់សម្ដេច ហ៊ុន សែន ឲ្យជួយអន្តរាគមន៍កាត់ឆ្វៀលដី ឬវាស់ដីបែងចែកជូនពលរដ្ឋជាមួយក្រុមហ៊ុនឲ្យរួចរាល់ជាមុនសិន ទើបអនុញ្ញាតឲ្យក្រុមហ៊ុនឈូសឆាយ ឬអភិវឌ្ឍលើគម្រោងរបស់ខ្លួន ទើបគ្មានផលប៉ះពាល់ដល់ពលរដ្ឋ។ សូមរដ្ឋាភិបាលចុះឆ្វៀលដីចែកជូនពលរដ្ឋក្នុងភូមិកោះតូច ត្រឹមណា ឬដីក្រុមហ៊ុនត្រឹមណា ត្រូវកំណត់ឲ្យបានច្បាស់លាស់ និងកុំឲ្យប៉ះពាល់ដល់ដីចម្ការពួកគាត់»។
វិទ្យុអាស៊ីសេរី មិនអាចទាក់ទង លោក ស្រ៊ុន ស្រ៊ន់ អភិបាលរងខេត្តព្រះសីហនុ ដែលទទួលបន្ទុកការងារដីធ្លី និងលោក អ៊ួង និត ចៅសង្កាត់កោះរ៉ុង ដើម្បីបំភ្លឺជុំវិញកង្វល់របស់ពលរដ្ឋភូមិកោះតូច ដែលចោទថា ក្រុមហ៊ុន រ៉ូយ៉ាល់ គ្រុប ប្រើគ្រឿងចក្រឈូសបំផ្លាញផលដំណាំ ឬចម្ការរបស់គាត់បានទេតាមទូរស័ព្ទ នៅថ្ងៃពុធ ទី៥ ខែសីហា។
ទោះយ៉ាងណា នៅក្នុងប្លង់អភិវឌ្ឍន៍កោះរ៉ុងទាំងមូលរបស់ក្រុមហ៊ុន រ៉ូយ៉ាល់ គ្រុប កោះរ៉ុង ដែលគេចងព្យួរនៅតាមផ្លូវដែលក្រុមហ៊ុននេះកំពុងឈូសឆាយ បានបង្ហាញថា ផែនទីបង្ហាញទម្រង់ និងទីតាំងក្បាលដីកោះរ៉ុងក្នុងភូមិសាស្ត្រសង្កាត់កោះរ៉ុង ក្រុងព្រះសីហនុ ខេត្តព្រះសីហនុ ទ្រព្យឯកជនរបស់រដ្ឋក្នុងមូលដ្ឋាននេះមានទំហំសរុប ៧.៨២៦ហិកតារ។
យ៉ាងនេះក្តី ក្រុមពលរដ្ឋភូមិកោះតូច ប្រមាណ ៣០នាក់ ដែលបានប្រមូលផ្តុំគ្នាជាថ្មីចុះពិនិត្យមើលសកម្មភាពប្រើគ្រឿងចក្រឈូសឆាយផ្លូវរបស់ក្រុមហ៊ុន រ៉ូយ៉ាល់ គ្រុប ហើយបានប៉ះពាល់ដីចម្ការពលរដ្ឋកាលពីថ្ងៃទី៤ ខែសីហា បានចោទថា សកម្មភាពរបស់ក្រុមហ៊ុន រ៉ូយ៉ាល់ គ្រុប គឺអនុវត្តផ្ទុយពីអនុក្រឹត្យ ឬមិនស្តាប់តាមសេចក្តីសម្រេចរបស់លោកនាយករដ្ឋមន្ត្រី ហ៊ុន សែន ដែលតម្រូវឲ្យក្រុមហ៊ុន ឬអាជ្ញាធរពាក់ព័ន្ធ ត្រូវអនុវត្តទៅតាមគោលនយោបាយស្បែកខ្លា ដើម្បីធានាឲ្យផែនការអភិវឌ្ឍន៍ក្រុមហ៊ុននេះ មិនធ្វើឲ្យប៉ះពាល់ដល់ការតាំងលំនៅឋាន និងជីវភាពរស់នៅរបស់ប្រជាពលរដ្ឋនៅលើកោះរ៉ុង ទេ៖ «ពលរដ្ឋពួកខ្ញុំសំណូមពរថា សូមស្នើដល់រដ្ឋាភិបាលទប់ស្កាត់សកម្មភាពគ្រឿងចក្រក្រុមហ៊ុន រ៉ូយ៉ាល់ គ្រុប បញ្ឈប់សកម្មភាពឈូសឆាយបន្តទៀត ព្រោះបានបំផ្លាញផលដំណាំពលរដ្ឋស្ទើរទាំងស្រុង និងត្រូវងាកមករកដំណោះស្រាយ។ ជាងនេះ ក៏ត្រូវកំណត់ទីតាំងដីក្រុមហ៊ុនជាមួយពលរដ្ឋឲ្យបានត្រឹមត្រូវជាមុនសិន»។
ទាក់ទិនបញ្ហានេះដែរ លោក ឃុន សាវឿន មន្ត្រីអង្កេតនៃអង្គការលីកាដូ ប្រចាំខេត្តព្រះសីហនុ ដែលបានចុះដល់ទីតាំងដីកើតមានទំនាស់ដីធ្លីនៅភូមិកោះតូច សង្កាត់កោះរ៉ុង កាលពីថ្ងៃទី៤ ខែសីហា បានចាត់ទុកសកម្មភាពក្រុមហ៊ុន រ៉ូយ៉ាល់ គ្រុប ដែលទទួលបានសិទ្ធិអភិវឌ្ឍន៍នៅលើកោះរ៉ុង រយៈពេល ៩៩ឆ្នាំ ថាបានធ្វើសកម្មភាពបំពានការរស់នៅរបស់ពលរដ្ឋក្នុងមូលដ្ឋាននេះធ្ងន់ធ្ងរ ហើយក្រុមហ៊ុននេះបានអនុវត្តផ្ទុយពីអនុក្រឹត្យ ឬសេចក្តីសម្រេចរបស់លោកនាយករដ្ឋមន្ត្រី ហ៊ុន សែន បានដាក់ចេញឲ្យអនុវត្តដោយសន្តិវិធីកាលពីខែសីហា ឆ្នាំ២០១៤។
មន្ត្រីសិទ្ធិមនុស្សរូបនេះមើលឃើញថា ចាប់តាំងពីក្រុមហ៊ុន រ៉ូយ៉ាល់ គ្រុប បានសិទ្ធិវិនិយោគនៅលើកោះរ៉ុងពីរដ្ឋាភិបាលរួចមក តែងបង្កការភ័យខ្លាច និងគំរាមកំហែងដល់ការរស់នៅរបស់ប្រជាពលរដ្ឋចំនួនជាង ៤០០គ្រួសារ ស្ថិតក្នុងភូមិចំនួន៤ មានទីតាំងក្នុងសង្កាត់កោះរ៉ុង៖ «បំពានត្រង់កន្លែងនេះ គឺបំពានធ្ងន់ធ្ងរទៅលើសម្ដីរបស់លោកនាយករដ្ឋមន្ត្រី ហ៊ុន សែន ដែលថា បើក្រុមហ៊ុនវិនិយោគទទួលបានសិទ្ធិពីរដ្ឋាភិបាល ហើយអភិវឌ្ឍទៅប៉ះទៅលើដីរបស់ប្រជាពលរដ្ឋ ត្រូវតែកាត់ឆ្វៀលដីជូនពលរដ្ឋ ដើម្បីជៀសវាងមានបញ្ហាជាមួយពលរដ្ឋ។ ប៉ុន្តែត្រង់កន្លែងនេះ គឺក្រុមហ៊ុន រ៉ូយ៉ាល់ គ្រុប បានបំពានទៅលើលោកនាយករដ្ឋមន្ត្រី ឬមិនខ្លាចញញើតនូវឫទ្ធិអំណាចរបស់នាយករដ្ឋមន្ត្រីទេ»។
ឆ្លើយតបបញ្ហានេះ លោកឧកញ៉ា ឈុន ប៊ុនថា តំណាងក្រុមហ៊ុន រ៉ូយ៉ាល់ គ្រុប កោះរ៉ុង បានផ្តល់សម្ភាសដល់វិទ្យុអាស៊ីសេរី ដឹងនៅថ្ងៃពុធ ទី៥ ខែសីហា ដោយបដិសេធថា សកម្មភាពឈូសឆាយផ្លូវក្នុងគម្រោងអភិវឌ្ឍន៍កោះរ៉ុងរបស់ក្រុមហ៊ុននេះ មិនបានបំផ្លាញផលដំណាំពលរដ្ឋ ឬប៉ះពាល់ដីចម្ការច្រើនហិកតារដូចការចោទទេ ហើយថា សកម្មភាពប្រើគ្រឿងចក្ររបស់ក្រុមហ៊ុន រ៉ូយ៉ាល់ គ្រុប ដើម្បីស្ថាបនាផ្លូវ និងកំពង់ផែនៅលើកោះរ៉ុង គឺស្ថិតនៅលើផ្ទៃដីដែលក្រុមហ៊ុននេះទទួលបានសិទ្ធិវិនិយោគពីរដ្ឋាភិបាល៖ «ទីតាំងដីចម្ការរបស់ប្រជាពលរដ្ឋនៅភូមិកោះតូច តវ៉ានេះ គឺស្ថិតក្នុងដីវិនិយោគរបស់ក្រុមហ៊ុន រ៉ូយ៉ាល់ គ្រុប កោះរ៉ុង ទាំងអស់»។
ទោះជាបែបនេះក្តី មន្ត្រីសិទ្ធិមនុស្សនៃអង្គការលីកាដូ ប្រចាំខេត្តព្រះសីហនុ លោក ឃុន សាវឿន ដែលបានចុះអង្កេតផ្ទាល់ដល់ទីតាំងលើកោះរ៉ុង បានចាត់ទុកសកម្មភាពរបស់ក្រុមហ៊ុន រ៉ូយ៉ាល់ គ្រុប និងក្រុមការងារដោះស្រាយ តាមដានការអភិវឌ្ឍលើកោះរ៉ុង ថាមានសកម្មភាពផ្គើនអនុក្រឹត្យរបស់លោកនាយករដ្ឋមន្ត្រី ហ៊ុន សែន ដែលតម្រូវឲ្យអនុវត្តតាមគោលនយោបាយស្បែកខ្លា ក្នុងផែនការអភិវឌ្ឍន៍របស់ក្រុមហ៊ុន រ៉ូយ៉ាល់ គ្រុប កោះរ៉ុង ដើម្បីកុំឲ្យប៉ះពាល់ដល់ការរស់នៅរបស់ពលរដ្ឋក្នុងមូលដ្ឋាននេះ៖ «សម្រាប់ខ្ញុំ ខ្ញុំគិតថា លោក គិត ម៉េង នាយកក្រុមហ៊ុន រ៉ូយ៉ាល់ គ្រុប ហ្នឹងខ្លាំងជាងលោកនាយករដ្ឋមន្ត្រី ហ៊ុន សែន ទៅទៀត បានជាបំពានទៅលើដីរបស់ប្រជាពលរដ្ឋនៅភូមិកោះតូច ទាំងមិនទាន់មានដំណោះស្រាយ។ បើសិនជាក្រុមហ៊ុនចង់បានដីនៅតំបន់នេះ គឺគួរណាស់ត្រូវមានការសម្របសម្រួល ប៉ុន្តែក្រុមហ៊ុនមិនទាន់ទាំងបានសម្របសម្រួលជាមួយពលរដ្ឋផង បែរជាមកឈូសបំពានចូលដីប្រជាពលរដ្ឋទៅទៀត»។
យ៉ាងណាក៏ដោយ ប្រជាពលរដ្ឋមួយចំនួនរស់នៅភូមិកោះតូច សង្កាត់កោះរ៉ុង ក្នុងចំណោមពលរដ្ឋជាង ១០០គ្រួសារ បានអះអាងថា កំពុងរៀបចំឯកសារត្រៀមដាក់ជូនថ្នាក់ដឹកនាំសាលាខេត្តព្រះសីហនុ និងត្រៀមដាក់ជូនរដ្ឋសភា ដើម្បីស្នើជួយអន្តរាគមន៍បញ្ឈប់សកម្មភាពក្រុមហ៊ុន រ៉ូយ៉ាល់ គ្រុប កោះរ៉ុង ឲ្យផ្អាកសកម្មភាពប្រើគ្រឿងចក្រឈូសឆាយដីចម្ការពួកគាត់ ហើយងាកមកអនុវត្តតាមគោលនយោបាយស្បែកខ្លា កាត់ឆ្វៀលដីជូនពលរដ្ឋជាមុន មុនក្រុមហ៊ុនអនុវត្តគម្រោងអភិវឌ្ឍន៍របស់ខ្លួននាថ្ងៃអនាគត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។