អាជ្ញាធរខែត្រក្រចេះ បានដាក់ឱសានវាទឲ្យពលរដ្ឋដែលទៅតាំងទីលំនៅក្នុងបរិវេណដីក្រុមហ៊ុនចម្ការកៅស៊ូមេមត់របស់វៀតណាម ជាង ៤០០គ្រួសារ ត្រូវរុះរើលំនៅឋានចេញឲ្យបានមុនថ្ងៃទី៥ ខែកញ្ញា។ ចំណែកពលរដ្ឋអះអាងថា នឹងលើកគ្នាតវ៉ាទាមទារដីតំបន់នោះ។
ពលរដ្ឋរស់នៅឃុំពីរធ្នូ ស្រុកស្នួល នៅថ្ងៃទី២៧ សីហា អំពាវនាវឲ្យរាជរដ្ឋាភិបាល និងស្ថាប័នពាក់ព័ន្ធ បញ្ឈប់បណ្តេញអ្នកភូមិចេញពីលំនៅឋានទាំងបង្ខំ ពីព្រោះពលរដ្ឋដែលទៅតាំងទីលំនៅនៅតំបន់នោះសុទ្ធសឹងតែជាពលរដ្ឋខ្វះខាតដីរស់នៅ។
ពលរដ្ឋម្នាក់ក្នុងចំណោមពលរដ្ឋច្រើនទៀត លោក ម៉េត ធី ត្អូញថា ពលរដ្ឋភាគច្រើនសម្រេចបដិសេធមិនចេញពីតំបន់នោះ បើទោះបីជាអាជ្ញាធរខែត្រដាក់កម្លាំងប្រដាប់អាវុធក្តី។ លោកថា ពួកគាត់ភាគច្រើនជាពលរដ្ឋក្រីក្រ គ្មានដីរស់នៅ បានទៅរស់នៅតំបន់នោះជាបន្តបន្ទាប់តាំងពីឆ្នាំ២០១០ ម្យ៉ាងដីតំបន់នោះជាដីទំនេរ ទើបពលរដ្ឋក្រីក្រចូលទៅសាងសង់លំនៅឋានរស់នៅ និងធ្វើកសិកម្មលក្ខណៈគ្រួសារចិញ្ចឹមជីវិត៖ « ប្រជាជនខំបោះឆ្នោតឲ្យសម្តេច ហ៊ុន សែន ហេតុអីបានសម្តេច ហ៊ុន សែន ដែលជាប់ឆ្នោតហើយ ចង់រុញផ្ទះប្រជាជនចោល។ ពលរដ្ឋរកតែបាយស៊ីមិនបានផង ពុះឧសលីតិចតួច ហុតទឹកបបរអីទេ ដើម្បីបានដីធ្លី ១២ម៉ែត្រ »។
ក្រុមហ៊ុនដែលទទួលបានដីសម្បទានសេដ្ឋកិច្ចពីរដ្ឋាភិបាលឈ្មោះចម្ការកៅស៊ូមេមត់ របស់កូនស្រីលោកនាយករដ្ឋមន្ត្រី ហ៊ុន សែន គឺអ្នកស្រី ហ៊ុន ម៉ាណា ទទួលសិទ្ធិវិនិយោគដំណាំឧស្សាហកម្មកៅស៊ូតាំងពីឆ្នាំ២០០៨ លើផ្ទៃដីជិត ១ម៉ឺនហិកតារនៅស្រុកស្នួល ខែត្រក្រចេះ រយៈពេល ៥០ឆ្នាំ ក៏ប៉ុន្តែក្រុមហ៊ុននេះបានផ្ទេរសិទ្ធិឲ្យក្រុមហ៊ុនវៀតណាម កាលពីឆ្នាំ២០១៥។
លិខិតជូនដំណឹងរបស់អាជ្ញាធរខែត្រក្រចេះ ចុះថ្ងៃទី២១ សីហា បញ្ជាក់ថា ពលរដ្ឋត្រូវរុះរើរោងស្នាក់នៅចេញពីតំបន់នោះជាបន្ទាន់ បញ្ឈប់ការទន្ទ្រានយកដីរបស់ក្រុមហ៊ុន និងបញ្ឈប់ទិញលក់ដូរដីរបស់ក្រុមហ៊ុន រួមទាំងបញ្ឈប់កាប់បំផ្លាញព្រៃឈើ។ ចំពោះពលរដ្ឋណាដែលទទួលបានដីតាមរយៈបទបញ្ជា០១ របស់រាជរដ្ឋាភិបាល ត្រូវដកខ្លួនចេញពីដីរបស់ក្រុមហ៊ុន ហើយក្នុងករណីពលរដ្ឋខ្វះខាតដីរស់នៅពិតប្រាកដ ត្រូវរៀបចំឯកសារពាក់ព័ន្ធស្នើសុំដីសម្បទានសង្គមកិច្ចតាមរយៈអាជ្ញាធរមូលដ្ឋាន ហើយអាជ្ញាធរខែត្រនឹងដោះស្រាយជូនពលរដ្ឋតាមនីតិវិធីរបស់ក្រសួងសុរិយោដី។
អភិបាលរងខែត្រក្រចេះ ទទួលបន្ទុកដោះស្រាយវិវាទដីធ្លី លោក ខណ្ឌ ចំណាន បដិសេធមិនអធិប្បាយរឿងនេះទេនៅថ្ងៃទី២៨ សីហា ដោយលោកបានផ្តាច់ទូរស័ព្ទនៅពេលសួរអំពីករណីនេះ។ ដោយឡែកអភិបាលរងស្រុកស្នួល លោក សាន់ ណាល់ ក៏បដិសេធមិនបំភ្លឺរឿងនេះដែរ ដោយលោកជំរុញឲ្យសួរអាជ្ញាធរខែត្រក្រចេះ វិញ។
មេឃុំពីរធ្នូ លោក ពឹង វិន ឲ្យដឹងថា ពលរដ្ឋបានលើកគ្នាកាប់រានដីក្រុមហ៊ុនរស់នៅ និងធ្វើចម្ការ ភាគច្រើនជាពលរដ្ឋចំណាកស្រុកចំនួន ៤១៨គ្រួសារ ក្នុងនោះពលរដ្ឋនៅមូលដ្ឋាន ២៣២គ្រួសារ ដែលបានមករស់នៅជាបន្តបន្ទាប់នៅប៉ុន្មានឆ្នាំចុងក្រោយនេះ។ លោកកត់សម្គាល់ថា នៅគ្រាដែលក្រុមហ៊ុន និងអាជ្ញាធរពាក់ព័ន្ធចុះសិក្សាផលប៉ះពាល់ បានកាត់ឆ្វៀលដីជូនពលរដ្ឋរងផលប៉ះពាល់ជាង ២០០ហិកតារ ក៏ប៉ុន្តែពលរដ្ឋចំណាកស្រុក និងពលរដ្ឋមូលដ្ឋានបាននាំគ្នាទន្ទ្រានព្រៃយកដីក្នុងបរិវេណដីក្រុមហ៊ុន នៅគ្រាដែលក្រុមហ៊ុនសិក្សាផលប៉ះពាល់រួចហើយ៖ « វាពិបាកណាស់អ្នកចំណូលកាប់បានទៅ បងប្អូននៅហ្នឹង ( ពលរដ្ឋនៅមូលដ្ឋាន ) ចង់បានដែរ ទៅកាប់ដែរ ភាគច្រើនអ្នកចង់បានដីទើបរៀបការថ្មីៗ ប៉ុន្តែមួយចំនួនចាស់ៗ មិនមានបានហើយក៏ទៅដែរ »។
មន្ត្រីស៊ើបអង្កេតនៃសមាគមអាដហុក (ADHOC) ខែត្រក្រចេះ លោក ប៊ី វ៉ាន់នី ដែលបានចុះអង្កេតរឿងនេះយល់ថា អាជ្ញាធរគួរដោះស្រាយវិវាទដីធ្លីដោយសន្តិវិធី ប្រសើរជាងប្រើកម្លាំងប្រដាប់អាវុធដែលអាចនាំឲ្យប៉ះពាល់ជីវភាពពលរដ្ឋ និងផ្ទុះការតវ៉ា។ លោកថា ការប្រើប្រាស់កម្លាំងប្រដាប់អាវុធរុះរើលំនៅឋានពលរដ្ឋដោយបង្ខំ គឺជាការអនុវត្តផ្ទុយពីបទបញ្ជារដ្ឋាភិបាល៖ « សម្បទានឲ្យក្រុមហ៊ុនរាប់ម៉ឺនហិកតារ ចុះហេតុអីមិនអាចកាត់ដីពីក្រុមហ៊ុនសម្បទានឲ្យពលរដ្ឋខ្លួន ក្នុងម្នាក់ក្បាលដីតែ ១០ម៉ែត្រមិនបាន »។
មន្ត្រីអង្កេតជាន់ខ្ពស់នៃសមាគមអាដហុក លោក ស៊ឹង សែនករុណា កត់សម្គាល់ថា រដ្ឋាភិបាលបានផ្តល់ដីសម្បទានសេដ្ឋកិច្ចជាច្រើនដល់ក្រុមហ៊ុនឯកជន និងបានដកហូតអាជ្ញាប័ណ្ណពីក្រុមហ៊ុនមួយចំនួន តែលោកមានមន្ទិលថា ដីដែលរដ្ឋដកពីក្រុមហ៊ុននោះ មិនដឹងថារដ្ឋបានប្រើប្រាស់ដោយរបៀបណាទេ ខណៈបច្ចុប្បន្ន ពលរដ្ឋក្រីក្រនៅតែជួបវិបត្តិគ្មានដីរស់នៅ៖ « រដ្ឋាភិបាលគួរតែពិចារណាលើពលរដ្ឋទាំងឡាយណាដែលខ្វះខាតដី ហើយកំពុងមានបញ្ហាទំនាស់ គួរតែពិចារណាពិនិត្យលទ្ធភាពដើម្បីផ្តល់ដីធ្លីឲ្យពួកគាត់មានសិទ្ធិប្រើប្រាស់ផ្គត់ផ្គង់ជីវភាពគ្រួសារ »។
របាយការណ៍របស់អាជ្ញាធរស្រុកស្នួល ខែត្រក្រចេះ បង្ហាញថា ក្រោយពីរាជរដ្ឋាភិបាលចេញបទបញ្ជា០១ អាជ្ញាធរខែត្រក្រចេះ បានទទួលពលរដ្ឋចំណូលស្រុករាប់ពាន់គ្រួសារមករស់នៅ និងបានកាត់ឆ្វៀលដីជាង ៤ម៉ឺនហិកតារពីក្រុមហ៊ុនសម្បទានសេដ្ឋកិច្ចចំនួន៩ ដើម្បីបម្លែងជាដីសម្បទានសង្គមកិច្ចស្របច្បាប់ ជូនពលរដ្ឋក្រីក្រចំណាកស្រុកមករស់នៅខែត្រនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។