ពលរដ្ឋខេត្តកំពតស្នើស្ថាប័នជំនាញដកហូតដីពីក្រុមហ៊ុន សូ ងួន ដែលទុកដីទំនេរចោល
2018.01.01
ពលរដ្ឋរស់នៅឃុំត្រពាំងភ្លាំង ស្រុកឈូក ខេត្តកំពត ប្រាប់អំពីទំហំដីដែលក្រុមហ៊ុន វើលដ៍ ទ្រីស្តារ អ៊ីនធឺថេនមិន (World Tristar Entertainment Co., Ltd) ទទួលបាន ប៉ុន្តែមិនឃើញមានការអភិវឌ្ឍ កាលពីថ្ងៃទី២២ ខែមករា ឆ្នាំ២០១៧។ RFA/Yang Chandara
RFA/Yang Chandara
ប្រជាពលរដ្ឋជាច្រើនគ្រួសាររស់នៅឃុំត្រពាំងភ្លាំង ស្រុកឈូក ខេត្តកំពត អំពាវនាវយ៉ាងទទូចឱ្យស្ថាប័នជំនាញរបស់រដ្ឋាភិបាល ជាពិសេស ក្រសួងកសិកម្ម ឱ្យចុះមកសិក្សា និងឈានដល់ការដកហូតដីសម្បទានសេដ្ឋកិច្ចពីក្រុមហ៊ុនឯកជនមួយ ដែលទទួលបានដីសម្បទានពីរដ្ឋ ប៉ុន្តែទុកដីទំនេរចោលមិនឃើញមានការអភិវឌ្ឍ។ ក្រុមពលរដ្ឋចង់ឱ្យអាជ្ញាធរវាស់វែងដីទាំងនោះ ចែកជូនពលរដ្ឋក្រីក្រ ដើម្បីឱ្យពួកគាត់អាចមានលទ្ធភាពដាំដុះបង្កបង្កើនផលបានតទៅថ្ងៃមុខ ជាជាងការទុកដីទំនេរចោល។
ការអំពាវនាវម្ដងហើយម្តងទៀត របស់ក្រុមពលរដ្ឋភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពតនេះ ធ្វើឡើងដោយសារតែក្រុមហ៊ុន វើលដ៍ទ្រីស្តារ អ៊ិនធើថេនមិន (World Tristar Entertainment Co., Ltd) ដែលពលរដ្ឋនិយមហៅថា ក្រុមហ៊ុន សូ ងួន នោះ បានបន្តទុកដីទំនេរចោល ដោយគ្មានការអភិវឌ្ឍអ្វីជាដុំកំភួន ដែលជាការអនុវត្តផ្ទុយនឹងគោលការណ៍ណែនាំរបស់រដ្ឋាភិបាល ស្ដីពីសម្បទានដីសេដ្ឋកិច្ច។
ពលរដ្ឋភូមិព្រៃពាយម្នាក់ គឺលោក អ៊ំ សាមិត្ត បញ្ជាក់ថា ក្រុមហ៊ុនបានអនុវត្តផ្ទុយពីគោលការណ៍ច្បាប់ ដូចជា កាប់ឈើក្នុងតំបន់ដីសម្បទានលក់អស់គ្មានសល់ ទុកដីទំនេរចោលមិនធ្វើការអភិវឌ្ឍ ទន្ទ្រានដីបន្ថែម រំលោភបំពានដីប្រជាពលរដ្ឋ និងសហគមន៍ ដុតផ្ទះ និងឈូសបំផ្លាញផលដំណាំកសិកម្មរបស់ពលរដ្ឋអស់រាប់ពាន់ហិកតារ ព្រមទាំងដាក់កុងត្រូលយកលុយពីពលរដ្ឋដែលដឹកអុស ឬដឹកអនុផលកាត់តាមតំបន់ដីសម្បទានរបស់ក្រុមហ៊ុន ហើយមិនឃើញមានការអភិវឌ្ឍអ្វីនៅតំបន់នោះឡើយ។ «»
ពលរដ្ឋម្នាក់ទៀតនៅភូមិព្រៃពាយ គឺលោក ម៉ែន សម្បត្តិ ថ្លែងថា ក្រុមហ៊ុននេះចាប់ផ្ដើមមានវត្តមាននៅក្នុងមូលដ្ឋានរបស់ពួកគាត់នៅឆ្នាំ២០០៥ ហើយផ្ដើមឈូសឆាយប៉ះពាល់ដីធ្លី និងផ្ទះសម្បែងពលរដ្ឋពីនៅឆ្នាំ២០០៦ រហូតមក។ លោកបន្តថា សកម្មភាពរបស់ក្រុមហ៊ុន បានប៉ះពាល់ដល់ពលរដ្ឋជាង ៦០០គ្រួសារ នៅក្នុងភូមិទួលដូនតី ភូមិព្រៃពាយ ភូមិដុំផ្ដៅ នៃឃុំត្រពាំងភ្លាំង និងភូមិតេជោពង្រក ឃុំតេជោអភិវឌ្ឍន៍ ស្រុកឈូក ខេត្តកំពត ហើយមិនឃើញអាជ្ញាធរខេត្តកំពតចុះមកដោះស្រាយឱ្យមានប្រសិទ្ធភាពជូនពួកគាត់នោះទេ។ «»
អាស៊ីសេរីមិនទាន់អាចទាក់ទងសុំការបំភ្លឺអំពីបញ្ហានេះពីអាជ្ញាធរខេត្តកំពតបាននៅឡើយ។
ចំណែកភាគីខាងក្រុមហ៊ុន វើលដ៍ទ្រីស្តារ អ៊ិនធើថេនមិន ធ្លាប់បានបញ្ជាក់ប្រាប់អាស៊ីសេរី កាលពីពេលកន្លងទៅថា ក្រុមហ៊ុនកំពុងពិភាក្សាជាមួយក្រសួងកសិកម្ម រុក្ខា ប្រមាញ់ និងនេសាទ អំពីផែនការមេក្នុងការអភិវឌ្ឍដំណាំកសិ-ឧស្សាហកម្មលើដីសម្បទានទាំងនោះ។ តំណាងក្រុមហ៊ុន លោក ឡាយ សាំងលី ថ្លែងថា ក្រុមហ៊ុនបានដាំដុះកូនអាកាស្យាជាបន្តបន្ទាប់ ហើយជំហានបន្ទាប់ ក្រុមហ៊ុនគ្រោងនឹងដាំដូងប្រេងនៅលើដីនោះ ដោយប្រើប្រាស់កម្លាំងពលកម្មរបស់ពលរដ្ឋនៅមូលដ្ឋាន។ «»
ទោះបីជាយ៉ាងណា ការលើកឡើងនេះត្រូវបានច្រានចោលដោយក្រុមពលរដ្ឋ។ ពលរដ្ឋនៅឃុំត្រពាំងភ្លាំង ម្នាក់ទៀត គឺលោកស្រី ចាន់ រឿន ថ្លែងថា ថ្វីត្បិតតែក្រុមហ៊ុនបានឈូសឆាយដីពិតមែន តែក្រុមហ៊ុនបានដាំដើមអាកាស្យាបានប្រមាណ ៥០០ ទៅ ៦០០ហិកតារ ប៉ុណ្ណោះ ចំណែកឯដីនៅសល់មិនត្រូវបានដាំដុះ ឬអភិវឌ្ឍតំបន់នោះទេ ដោយក្រុមហ៊ុនបានទុកដីទាំងនោះឱ្យទំនេរចោល ពិសេសក្រុមហ៊ុនបានទន្ទ្រានដីបន្ថែមដែលប៉ះពាល់លើដីដែលពួកគាត់ធ្លាប់កាន់កាប់ និងបង្កបង្កើនផលកាលពីពេលមុន។ លោកស្រីសំណូមដល់អាជ្ញាធរថ្នាក់ជាតិ និងថ្នាក់ខេត្តឲ្យចុះដោះស្រាយបញ្ហានេះផង កុំឱ្យនៅបន្តរ៉ាំរ៉ៃបែបនេះតទៅទៀត។ «»
ក្រុមហ៊ុន វើលដ៍ទ្រីស្តារ អ៊ិនធើថេនមិន ទទួលបានដីសម្បទានសេដ្ឋកិច្ចចំនួនជិត ១ ម៉ឺនហិកតារ (៩.៨០០) នៅស្រុកឈូក ខេត្តកំពត ពីរដ្ឋាភិបាលកាលពីឆ្នាំ២០០៥ ក្រោមកិច្ចសន្យាសម្បទានរយៈពេល ៧០ ឆ្នាំ។ ក៏ប៉ុន្តែកាលពីខែសីហា ឆ្នាំ២០១៦ រដ្ឋាភិបាលបានធ្វើអនុបយោគដីនេះ មកនៅត្រឹមជាង ៦ ពាន់ហិកតារ (៦.១០៧) វិញ សម្រាប់ឱ្យវិនិយោគដំណាំកសិកម្ម កសិ-ឧស្សាហកម្ម និងចិញ្ចឹមសត្វ។
មន្ត្រីស៊ើបអង្កេតសមាគមអាដហុក (Adhoc) ខេត្តកំពត លោក ហេង ភារៈ ដែលតាមដានករណីនេះ បញ្ជាក់ថា ដីភាគច្រើនដែលក្រុមហ៊ុនទទួលបាន ត្រូវបានក្រុមហ៊ុនទុកទំនេរចោល ដោយគ្មានការអភិវឌ្ឍ ហើយក្រុមហ៊ុនចេះតែបន្តឈូសឆាយដោយមិនឃើញមានការដាំដុះអ្វីឱ្យបានជាក់លាក់ឡើយ។ លោកស្នើសុំឱ្យស្ថាប័នពាក់ព័ន្ធរបស់រដ្ឋ គួរតែចុះស៊ើបអង្កេតករណីនេះដោយយកចិត្តទុកដាក់ ដើម្បីរកដំណោះស្រាយជូនពលរដ្ឋ ចៀសវាងការទុកបណ្ដែតបណ្ដោយ ដែលធ្វើឱ្យពលរដ្ឋ និងក្រុមហ៊ុន បន្តប្រឈមមុខដាក់គ្នា។ ហើយបើរកឃើញថា ក្រុមហ៊ុនមិនអនុវត្តកិច្ចសន្យាមែននោះ រដ្ឋាភិបាលត្រូវនិរាករណ៍កិច្ចសន្យារបស់ក្រុមហ៊ុន។ «»
ច្បាប់ភូមិបាលឆ្នាំ២០០១ ត្រង់មាត្រា៦២ ចែងថា រាល់សម្បទានដីសម្រាប់ដំណាំឧស្សាហកម្ម ត្រូវចាប់ផ្តើមធ្វើអាជីវកម្មក្នុងរយៈពេល ១២ខែ បន្ទាប់ពីការផ្តល់សម្បទាន បើមិនដូច្នោះទេ នឹងត្រូវទុកជាមោឃៈ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
