ក្រុមអ្នកភូមិបឹងកក់ ៧គ្រួសារ យកញត្តិទៅដាក់ជូនរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងក្រសួងមហាផ្ទៃ នៅព្រឹកថ្ងៃទី១៩ មេសា ដើម្បីទាមទាររកដំណោះស្រាយបញ្ហាដីធ្លីរបស់ពួកគាត់។ ពួកគាត់ខកចិត្ត ពេលដែលមន្ត្រីដែនដីមិនទទួលយកញត្តិរបស់ពួកគាត់។
ក្រុមអ្នកភូមិបឹងកក់ប្រមាណ ៣០នាក់ ដែលអះអាងថាតំណាងឲ្យ ៧គ្រួសារ ដែលមិនទាន់ទទួលបានដំណោះស្រាយសម្រាប់បញ្ហាដីធ្លីពីអាជ្ញាធរ ក្រេវក្រោធជាខ្លាំងពេលមន្ត្រីរដ្ឋបាលក្រសួងរៀបចំដែនដី មិនទទួលញត្តិ ហើយត្រូវកម្លាំងសន្តិសុខទាញទ្វារបិទរារាំងមិនឲ្យចូលក្នុងបរិវេណក្រសួង។
អ្នកភូមិ១ ក្នុងតំបន់បឹងកក់ គឺលោក ដួង ឈើត ថ្លែងថា ពួកលោកដែលមករកដំណោះស្រាយពីក្រសួងរៀបចំដែនដី ព្រោះតែពួកលោកមិនអាចទទួលយកដំណោះស្រាយរបស់អាជ្ញាធរសាលារាជធានីភ្នំពេញ ដែលផ្ដល់ដីឲ្យមិនដល់ ១០% នៃដីធ្លាប់មាន៖ « យើងឲ្យគោរពតាមអនុក្រឹត្យណា។ អនុក្រឹត្យ គឺផ្ទះនៅកន្លែងណា ទំហំប៉ុ នណា គឺបានដដែលវិញ។ ចំណែកខ្ញុំបើថាមិនបានដល់ ថ្នាក់ហ្នឹង ខ្ញុំទាមទារតែ ៥៣ % នៃទំហំដីដែលរបស់ខ្ញុំមាន ហើយទីតាំង ខ្ញុំមិនទៅទាមទារចាស់របស់ខ្ញុំទេ កុំបង្កភាពលំបាកដល់ការអភិវឌ្ឍរបស់គេ។ ពួកខ្ញុំសម្រួលដល់ថ្នាក់ហ្នឹង ហើយហេតុបាន ជាសាលាក្រុង អត់មានឆន្ទៈដោះស្រាយឲ្យពួកខ្ញុំ ? ទំហំដីខ្ញុំ ៩៧០ការ៉េ គេឲ្យខ្ញុំ ១៤៤ការ៉េ » ។
លិខិតថតចម្លងដែលចុះហត្ថលេខាដោយអភិបាលនៃគណៈអភិបាលរាជធានីភ្នំពេញ ថ្ងៃទី២៣ ខែមីនា បានជម្រាបលោកថា ដើម្បីបញ្ចប់ករណីនេះ រដ្ឋបាលរាជធានីភ្នំពេញសម្រេចប្រគល់ដីជូនលោកចំនួន ២ឡូទំហំ ១៤៤ម៉ែត្រក្រឡា។ ចំណែកអ្នកភូមិម្នាក់ទៀត ឈ្មោះ លី ចាន់ណារី រដ្ឋបាលរាជធានីភ្នំពេញ សម្រេចប្រគល់ដីជូនចំនួន ៤ឡូទំហំ ២៨៨ម៉ែត្រក្រឡា។ រដ្ឋបាលរាជធានីភ្នំពេញ កំណត់រយៈពេល ១ខែឲ្យទទួលយកដីនេះ ហើយបើហួសពេលនេះ រដ្ឋបាលរាជធានីភ្នំពេញ នឹងឈប់ពិនិត្យដោះស្រាយ ឬឈប់ទទួលខុសត្រូវការបាត់បង់ផលប្រយោជន៍អ្នកបឹងកក់ទៀតឡើយ។
អ្នកនាំពាក្យសាលារាជធានីភ្នំពេញ លោក មាន ចាន់យ៉ាដា បញ្ជាក់បន្ថែមថា រដ្ឋបាលរាជធានីភ្នំពេញមិនទាន់មានដំណោះស្រាយអ្វីផ្សេងទេ៖ «នៅពេលនេះនៅសល់ ៧គ្រួសារ គឺយើងទុកលទ្ធភាពឲ្យគាត់ចូលមកយកលទ្ធផល ដែលយើងបានជូនដំណឹងទៅគាត់»។
ក្នុងអនុក្រឹត្យថតចម្លងស្ដីពីការកែសម្រួលក្រឡាផ្ទៃដីតំបន់អភិវឌ្ឍន៍បឹងកក់ នៅឆ្នាំ២០១១ សម្រេចផ្ដល់ជូនពលរដ្ឋទំហំ ១២,៤៤ហិកតារ ហើយដីទំហំ ១១៤,៤១ហិកតារទៅក្រុមហ៊ុនស៊ូកាគូ (Shukaku Inc) សម្រាប់អភិវឌ្ឍ។
អ្នកបឹងកក់សម្រេចរំសាយការតវ៉ារបស់ខ្លួនវិញនៅព្រឹកថ្ងៃទី១៩ មេសា ដដែល បន្ទាប់ពីបានដាក់ញត្តិទៅក្រសួងមហាផ្ទៃ។ អ្នកបឹងកក់មួយរូបទៀត គឺលោកស្រី ហុង សុខខេង ថ្លែងថា មន្ត្រីអគ្គលេខាធិការដ្ឋានក្រសួងមហាផ្ទៃ សន្យាថានឹងជូនដំណឹងតបវិញនៅពេលក្រោយ៖ «គាត់ថា គាត់នឹងព្យាយាមដាក់ទៅដល់សម្ដេចក្រឡាហោម ដូចគាត់ដាក់រាល់ដងអ៊ីចឹង ហើយខ្ញុំប្រាប់គាត់ថា ខ្ញុំចូលមកក្រសួងមហាផ្ទៃ នេះ គឺគាត់ជាអ្នកគ្រប់គ្រងចៅហ្វាយខេត្តចៅហ្វាយក្រុង។ អ៊ីចឹងទីពឹងឲ្យគាត់ជួយទៅ ដើម្បីឲ្យគាត់ដោះស្រាយឲ្យពួកខ្ញុំបញ្ចប់ឲ្យខ្ញុំសម្រេចទៅ កុំឲ្យខ្ញុំដើរអ៊ីចឹងទៀត នៅសល់តែ ៧គ្រួសារទេ។ កុំធ្វើគំរូដូចដែនដី។ ខ្ញុំនឹកសព្វៗទៅ ឯកឧត្ដម ជា សុផារ៉ា មិនសមណាមកធ្វើបន្តិចអាម៉ាស់ជាមួយពួកខ្ញុំ ព្រោះគាត់បង្កើតគណៈកម្មការឲ្យខ្ញុំមកដាក់ញត្តិ បែរជាទាញទ្វារបិទ យកប៉ូលិសមកធ្វើអ៊ីចឹង។ ខ្ញុំសំណូមពរឲ្យនាយករដ្ឋមន្ត្រីរំលាយគណៈកម្មការនៅដែនដីតាមទូរទស្សន៍វិញ ឲ្យប្រជាពលរដ្ឋអស់ចិត្ត»។
ទំនាស់ដីបឹងកក់ ចាប់ផ្ដើមមានការតវ៉ាតាំងពីឆ្នាំ២០១០ គឺពេលដែលក្រុមហ៊ុន ស៊ូកាគូ (Shukaku Inc) បូមខ្សាច់បំពេញបឹងកក់ ហើយលុបផ្ទះអ្នកភូមិ។ អ្នកភូមិបឹងកក់បាត់ទាំងផ្ទះ និងដីបណ្ដាលមកពីការអភិវឌ្ឍនេះ។ ក្នុងអនុក្រឹត្យថតចម្លងស្ដីពីការកែសម្រួលក្រឡាផ្ទៃដីតំបន់អភិវឌ្ឍន៍បឹងកក់ នៅឆ្នាំ២០១១ សម្រេចផ្ដល់ដីទំហំ ១១៤,៤១ហិកតារទៅក្រុមហ៊ុនស៊ូកាគូ (Shukaku Inc) សម្រាប់អភិវឌ្ឍ ហើយផ្ដល់ដីជូនពលរដ្ឋទំហំ ១២,៤៤ហិកតារ។ ប៉ុន្តែរហូតមកដល់បច្ចុប្បន្ន ពលរដ្ឋ ៧គ្រួសារនេះ នៅមិនទាន់ទទួលបានដំណោះស្រាយនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។