ក្រុមប្រជាពលរដ្ឋមានទីលំនៅក្នុងតំបន់ក្បាលឆាយ ខេត្តព្រះសីហនុ បានអះអាងថា នឹងប្រមូលផ្តុំគ្នាតវ៉ាទ្រង់ទ្រាយធំ និងបិទផ្លូវជាតិលេខ៤ជាបន្តទៀត បើអាជ្ញាធរខេត្តព្រះសីហនុ បន្តរុះរើផ្ទះសម្បែង និងផលដំណាំរបស់ពួកគាត់នាថ្ងៃអនាគត។
ចំណែកអភិបាលរងខេត្តព្រះសីហនុ លោក ស្រ៊ុន ស្រ៊ន់ ចោទថា ពលរដ្ឋបានមកសង់ផ្ទះនៅលើដីប្រភពទឹកនាតំបន់ក្បាលឆាយអនាធិបតេយ្យ ទើបអាជ្ញាធរមានវិធានការរុះរើ ដើម្បីរក្សាដីតំបន់ប្រភពទឹកសម្រាប់បម្រុងដល់ការប្រើប្រាស់។
ការអះអាងរបស់ក្រុមប្រជាពលរដ្ឋបែបនេះ កើតឡើងបន្ទាប់ពីសមត្ថកិច្ចចម្រុះប្រដាប់អាវុធជិត ១០០នាក់ បានលួចឆ្មក់ចូលរុះរើផ្ទះពួកគាត់អស់ចំនួន ៩ខ្នង ក្នុងភូមិ១ សង្កាត់១ ក្រុង និងខេត្តព្រះសីហនុ នៅព្រឹកថ្ងៃសៅរ៍ ទី១ ខែវិច្ឆិកា។
បន្ទាប់ពីត្រូវសមត្ថកិច្ចបំផ្លាញផ្ទះអស់ចំនួន ៩ខ្នង ក្រុមប្រជាពលរដ្ឋក៏ផ្ទុះការតវ៉ា និងប្រមូលផ្តុំគ្នាបិទផ្លូវជាតិលេខ៤ប្រមាណ ២ម៉ោង ចាប់ពីម៉ោង ១០ព្រឹក ដល់ម៉ោង ១២ថ្ងៃត្រង់ ដើម្បីតវ៉ាទាមទារអោយអាជ្ញាធរខេត្តបញ្ឈប់ការរុះរើផ្ទះ និងបំផ្លាញផលដំណាំពួកគាត់។ ការតវ៉ានោះ ក្រុមប្រជាពលរដ្ឋបានលើកបដា និងដុតកង់ឡានផងនៅលើផ្លូវជាតិលេខ៤ ប៉ុន្តែក្រោយមកក៏បានរំសាយការប្រមូលផ្តុំ បន្ទាប់ពីមន្ត្រីសាលាខេត្តព្រះសីហនុ បានចុះមកសម្របសម្រួល និងស្នើឲ្យពលរដ្ឋចាត់តំណាងចូលរួមពិភាក្សាដោះស្រាយ នៅព្រឹកថ្ងៃអាទិត្យ ទី២ ខែវិច្ឆិកា។
យ៉ាងណាក៏ដោយ ក្រុមពលរដ្ឋអះអាងថា នឹងប្រមូលផ្តុំគ្នាតវ៉ាទ្រង់ទ្រាយធំនាថ្ងៃអនាគត បើអាជ្ញាធរគ្មានដំណោះស្រាយ និងមានបំណងរុះរើលំនៅឋានពួកគាត់ទៀតនោះ៖ «សូមឲ្យលោកចៅហ្វាយខេត្ត និងចៅហ្វាយក្រុង គិតមើលផង? គណបក្សប្រជាជនធ្លាក់សំឡេងដោយសារអារឿងហ្នឹង ឲ្យសិក្សាឡើង ហើយមកធ្វើចឹងទៀត មកវ៉ៃចានវ៉ៃឆ្នាំងពលរដ្ឋ និងបំផ្លាញដើមឈើគាត់ តើឲ្យគាត់ទៅរស់នៅទីណា? គាត់ថា លំនៅឋានណាដែលបងប្អូនរស់នៅ គឺរស់នៅចុះខ្ញុំអត់រុះរើទេ ហើយមានដំណាំអីផ្សេងៗ គឺដាំដុះទៅ និងកុំឲ្យរុះរើទៅណា។ កន្លែងណាមានបងប្អូនរស់នៅ គឺរដ្ឋមិនយកទេ មានដើមឈើ មានស្វាយ និងអណ្ដូងទឹក កុំឲ្យរុះរើទៅណា។ គាត់មកនិយាយចឹងបានជាខ្ញុំមានកម្លាំងចិត្តដាំដើមស្វាយ»។
ទាក់ទិនបញ្ហានេះ លោក ស្រ៊ុន ស្រ៊ន់ អភិបាលរងខេត្តព្រះសីហនុ មានប្រសាសន៍ថា មានពលរដ្ឋជាង ១ពាន់គ្រួសារ បានមកតាំងទីលំនៅនៅប្រភពក្បាលទឹក តំបន់ក្បាលឆាយ ដើម្បីបម្រើការប្រើប្រាស់សម្រាប់ប្រជាពលរដ្ឋខេត្តព្រះសីហនុ។ លោកបន្តថា ពេលថ្មីៗនេះមានពលរដ្ឋជិត ៤០គ្រួសារ បានមកតាំងទីលំនៅថ្មីនៅលើដីប្រភពទឹកតំបន់ក្បាយឆាយ ទើបអាជ្ញាធរមានវិធានការរុះរើសំណង់អនាធិបតេយ្យទាំងនោះ៖ «យើងអត់គិតបញ្ជីចាស់ទេ គឺយើងគិតតែបញ្ជីថ្មីដែលគាត់មកចូលស្នាក់នៅថ្មីៗនេះជាង ៣០គ្រួសារ ដែលគាត់មកទន្ទ្រានថ្មី។ អាហ្នឹងយើងមិននិយាយចាស់ទេ និយាយតែអ្នកថ្មីទេ។ ចំណែកអ្នកចាស់ គឺមានចំនួនជាង ១ពាន់គ្រួសារជាង ហើយអ្នកទាំងអស់ហ្នឹង គឺយើងមិនប៉ះពាល់អីទេ។ ដោយឡែកដែលយើងមានវិធានការថ្ងៃមិញ គឺសម្រាប់តែអ្នកលួចកាប់ទន្ទ្រានថ្មី»។
ទាក់ទិនបញ្ហានេះ លោក ប៊ួន ណារិទ្ធ មន្ត្រីសម្របសម្រួលអង្គការលីកាដូ (Licadho) ប្រចាំខេត្តព្រះសីហនុ ដែលតាមឃ្លាំមើលសកម្មភាពរុះរើលំនៅឋានពលរដ្ឋ បានឲ្យដឹងថា មានពលរដ្ឋខ្លះបានមកតាំងទីលំនៅតំបន់ក្បាលឆាយក្នុងសង្កាត់១ ខេត្តព្រះសីហនុ តាំងពីឆ្នាំ២០០៧ មក។ ហើយក៏មានពលរដ្ឋខ្លះទៀត ទើបបានមកទិញដីធ្លីនៅតំបន់នេះ ដើម្បីសង់លំនៅឋានរស់នៅជាបន្តបន្ទាប់។
លោក ប៊ួន ណារិទ្ធ បញ្ជាក់ថា អាជ្ញាធរខេត្តព្រះសីហនុ គួរមានគោលនយោបាយបែងចែកចំណែកដីមួយផ្នែកជូនពលរដ្ឋ ដែលបានទៅសង់ផ្ទះនៅតំបន់ក្បាលឆាយដែលត្រូវអាជ្ញាធររុះរើផ្ទះពេលនេះ។ លោកបន្តថា ដីនៅតំបន់ក្បាយឆាយនេះ ក៏មានចំណែកដីរបស់អតីតអភិបាលខេត្តព្រះសីហនុ លោក ស្បោង សារ៉ាត មន្ត្រីសាលាក្រុងព្រះសីហនុ និងសមាជិកក្រុមប្រឹក្សាខេត្ត ព្រមទាំងមន្ត្រីស្ថាប័នពាក់ព័ន្ធខេត្តព្រះសីហនុ ជាច្រើនប្លង់ និងច្រៀកលក់ដូរជាបន្តបន្ទាប់រហូតមកដល់ពេលនេះ៖ «ប្រជាពលរដ្ឋរស់នៅទីហ្នឹង គឺទិញដីតៗគ្នា ហើយអ្នកខ្លះរស់នៅយូរឆ្នាំហើយ អ្នកខ្លះទៀតទើបមករស់នៅ។ អ្នកខ្លះសង់ផ្ទះយូរហើយៗ អ្នកខ្លះក៏ទើបនឹងសាងសង់ជាបន្តៗដែរ។ និយាយរួមទៅ គឺតាំងពីឆ្នាំ២០០៧ និងឆ្នាំ២០០៨ គឺនៅពេលដែលដីឡើងថ្លៃ។ ហើយភាគច្រើនទិញដីហ្នឹង គឺទិញពីទាហាន ឬកងកម្លាំងដែលការពារតំបន់ក្បាលឆាយហ្នឹង គឺគាត់ទិញតៗគ្នាមក។ ដីហ្នឹងភាគច្រើនជាដីតំបន់អនុក្រឹត្យលេខ៧០ និងលេខ៧៦ ដែលគេរក្សាទុកជាតំបន់ការពារទឹកស្អាតក្បាលឆាយ»។
អភិបាលរងខេត្តព្រះសីហនុ និងមន្ត្រីសង្គមស៊ីវិល បានឲ្យដឹងថា ក្រុមប្រជាពលរដ្ឋដែលមកតាំងទីលំនៅនាតំបន់ក្បាលឆាយ ដែលរដ្ឋបានហាមឃាត់នេះ សរុបមានចំនួនជាង ១ពាន់គ្រួសារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។