ជនជាតិដើមភាគតិចកួយមួយចំនួន រស់នៅស្រុកត្បែងមានជ័យ និងស្រុកឆែប ខែត្រព្រះវិហារ ត្អូញខ្វះខាតដីធ្វើកសិកម្មចិញ្ចឹមជីវិត ក្រោយពីក្រុមហ៊ុនសម្បទានសេដ្ឋកិច្ចចិន ហេង ហ្វូ ឈូសឆាយ រំលោភយកជាបន្តបន្ទាប់អស់ជាច្រើនហិកតារ។ សកម្មភាពភាពឈូសឆាយនោះ បានរាលដាលដល់តំបន់ព្រៃសហគមន៍មួយចំនួននៅស្រុកឆែប បណ្ដាលឲ្យអ្នកភូមិខឹងសម្បារបាននាំគ្នាឃាត់គ្រឿងចក្រក្រុមហ៊ុនទុក។
ជនជាតិដើមភាគតិចកួយរស់នៅឃុំប្រមេរ ស្រុកត្បែងមានជ័យ និងឃុំម្លូព្រៃពីរ ស្រុកឆែប ខែត្រព្រះវិហារបារម្ភ ពីការបាត់បង់ដីស្រែចម្ការចិញ្ចឹមជីវិត ព្រៃជំនឿ ដើមឈើផលិតជ័រទឹក និងទឹកអូរធម្មជាតិ ក្រោយពីក្រុមហ៊ុនសម្បទានសេដ្ឋកិច្ចចិនឈ្មោះ ហេង ហ្វូ នៅតែបន្តឈូសឆាយរំលោភយកទាំងយប់ទាំងថ្ងៃ បើទោះបីអ្នកភូមិបានបានផ្ដិតមេដៃប្ដឹងទៅអាជ្ញាធររដ្ឋាភិបាលក្តី។
ប្រធានសហគមន៍ជនជាតិដើមភាគតិចកួយ ឃុំប្រមេរ ស្រុកត្បែងមានជ័យ លោក ស៊ុត វ៉ាន់ ឲ្យដឹងនៅថ្ងៃទី១២ កុម្ភៈថា ជនជាតិដើមភាគតិច រស់ពឹងផ្អែកលើស្រែចម្ការ ដីសមូហភាពសហគមន៍ ក៏ប៉ុន្តែត្រូវបានក្រុមហ៊ុនរំលោភយករួចដាំអំពៅ។ លោកថា អ្នកភូមិមួយចំនួនបាត់បង់ដីស្រែទាំងស្រុង និងគ្មានដីធ្វើកសិកម្មចិញ្ចឹមជីវិត ដ្បិតដីដែលពួកគាត់ធ្លាប់ធ្វើស្រែកន្លងទៅត្រូវបានក្រុមហ៊ុនឈូសឆាយយកទាំងអស់ បន្សល់ទុកតែខ្ទមស្រែ។ «»
ជនជាតិដើមភាគតិចកួយម្នាក់ទៀត រស់នៅឃុំប្រមេរ លោកស្រី ស្វាយ យឿង ចោទថា ក្រុមហ៊ុនសម្បទានសេដ្ឋកិច្ចចិន បានឈូសឆាយរំលោភដីរបស់លោកស្រីអស់ ៧ហិកតារ និងបានដាំដំណាំអំពៅកាលពីពេលថ្មីៗនេះ។ លោកស្រីថា ពុំមែនតែគ្រួសារលោកស្រីទេ ដែលកង្វល់រឿងបាត់បង់ដីស្រែចម្ការ រីឯអ្នកភូមិផ្សេងទៀតក៏ជួបវិបត្តិដូចគ្នានេះដែរ ធ្វើឲ្យពួកគាត់គ្មានទីកន្លែងប្រកបរបរចិញ្ចឹមជីវិត។ «»
ចំណែកជនជាតិដើមភាគតិច រស់នៅឃុំម្លូព្រៃពីរ ស្រុកឆែកជាប់ព្រំប្រទល់ស្រុកត្បែងមានជ័យ លោក ថាន់ ថានី ឲ្យដឹងដែរថា ក្រុមហ៊ុនសម្បទានសេដ្ឋកិច្ច ហេង ហ្វូ បានប្រើគ្រឿងចក្រ ២គ្រឿងឈូសឆាយដីព្រៃសហគមន៍ របស់ជនជាតិភាគតិចអស់ ៨ហិកតារកាលពីពេលថ្មីៗនេះ ហើយអ្នកភូមិបាននាំគ្នាឃាត់គ្រឿងចក្រទុក។ លោកថា ទីតាំងដីដែលក្រុមហ៊ុនឈូសឆាយនោះ ជាតំបន់ដែលជនជាតិដើមភាគតិចកួយ អាស្រ័យផលច្រើនឆ្នាំមកហើយ។ «»
កាលពីថ្ងៃទី៦ កុម្ភៈ សហគមន៍ភូមិបុស្ស ឃុំម្លូព្រៃពីរ ស្រុកឆែបជាង ២០នាក់ បានឃាត់គ្រឿងចក្រ ២គ្រឿង របស់ក្រុមហ៊ុនសម្បទានសេដ្ឋកិច្ច ហេង ហ្វូ ដែលបានឈូសឆាយព្រៃជំនឿរបស់ជនជាតិដើមភាគតិច។ សហគមន៍ព្រមានថា ក្រុមហ៊ុនត្រូវធ្វើកិច្ចសន្យាបញ្ឈប់ការឈូសឆាយ ទើបពួកគាត់ប្រគល់គ្រឿងចក្រនេះឲ្យវិញ។
អាស៊ីសេរីមិនអាចរកប្រភពទាក់ទង តំណាងក្រុមហ៊ុន ហេង ហ្វូ ដើម្បីសុំការបំភ្លឺរឿងនេះបានទេ នៅថ្ងៃទី១២ កុម្ភៈ។
ទោះជាយ៉ាងណា មេឃុំប្រមេរ លោក ធាន ហេង ធ្លាប់ប្រាប់អាស៊ីសេរីថា ពលរដ្ឋជាង ៤០គ្រួសារ បានមកប្ដឹងសុំកិច្ចអន្តរាគមន៍ មកអាជ្ញាធរឲ្យជួយដោះស្រាយរឿងនេះ ក៏ប៉ុន្តែភារកិច្ចដោះស្រាយបញ្ហានេះហួសដែនសមត្ថកិច្ចអាជ្ញាធរឃុំ។ លោកថា អាជ្ញាធរឃុំបានត្រឹមតែធ្វើរបាយការណ៍ហើយរាយការណ៍ទៅថ្នាក់លើតែប៉ុណ្ណោះ។
ក្រុមហ៊ុនសម្បទានសេដ្ឋកិច្ច ហេង ហ្វូ ទទួលសិទ្ធិវិនិយោគពីរដ្ឋាភិបាលលើផ្ទៃដីទំហំជាង ៤ម៉ឺនហិកតារ (៤២.០០០) តាំងពីឆ្នាំ២០១១ វិនិយោគដាំអំពៅ និងកៅស៊ូ។ ក្រុមហ៊ុននេះ ជាក្រុមហ៊ុនមេ និងមានបុត្រសម្ព័ន្ធក្រុមហ៊ុនចំនួន ៥ទៀត ដូចជា ក្រុមហ៊ុន ឡាន ហ្វេង រួយ ហ្វេង ក្រុមហ៊ុន ហេង ណុង ក្រុមហ៊ុន ហេង រួយ និងក្រុមហ៊ុន ហេង យូ។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) លោក ឡោ ចាន់ សង្កេតឃើញថា រដ្ឋាភិបាលបានចេញបទបញ្ជា ០០១ តម្រូវឲ្យក្រុមហ៊ុនសម្បទានសេដ្ឋកិច្ចទាំងអស់ ត្រូវកាត់ឆ្វៀលផលប៉ះពាល់ចេញ ក៏ប៉ុន្តែក្រុមហ៊ុននៅតំបន់នោះ មិនបានអនុវត្តត្រឹមត្រូវនៅឡើយទេ ដែលនាំឲ្យពលរដ្ឋកើតទុក្ខមិនសុខចិត្ត។ លោកយល់ថា អាជ្ញាធរត្រូវយកបញ្ហានេះជជែកគ្នា រវាងតំណាងសហគមន៍ និងតំណាងក្រុមហ៊ុនស្ដីពីការអនុវត្តយុទ្ធសាស្ត្រស្បែកខ្លារបស់ប្រមុខរដ្ឋាភិបាល មិនត្រូវនៅស្ងៀមបណ្ដោយឲ្យក្រុមហ៊ុនយកគ្រឿងចក្រ ឈូសឆាយបន្តទៀតនោះទេ នឹងនាំឲ្យប៉ះពាល់សិទ្ធិរស់នៅជនជាតិដើមភាគតិច។ «»
ជនជាតិដើមភាគតិចកួយឲ្យដឹងទៀតថា ការផ្ដល់ដីសម្បទានសេដ្ឋកិច្ចដ៏ធំសម្បើមនេះ ធ្វើឲ្យបាត់បង់ជម្រកសត្វព្រៃ បឹងត្រពាំងប្រាសាទបុរាណ តំបន់ព្រៃស្រោងសម្បូរដោយដើមឈើធំៗ ធ្លាប់ជាម្លប់បៃតង ធ្វើអោយតំបន់ទាំងនេះបច្ចុប្បន្ននេះក្លាយជាទីវាល និងចម្ការអំពៅដែលគ្រប់គ្រងដោយក្រុមហ៊ុនចិន និងមានអាកាសធាតុក្ដៅបែកផ្សែង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។