ទំនាស់ដីធ្លីនៅតាមស្រុកមួយចំនួនក្នុងខេត្តបាត់ដំបង បានកម្រើកឡើងវិញជាបន្តបន្ទាប់នារយៈពេលចុងក្រោយនេះ។ ស្រុកគោលដៅដែលមានទំនាស់ដីធ្លីខ្លាំងក្លាជាងគេនោះ គឺនៅស្រុកថ្មគោល ស្រុកបវេល និងស្រុកគាស់ក្រឡ។ ករណីទំនាស់ដីធ្លី នៅស្រុកគាស់ក្រឡ គឺមានកងទាហាន ភូមិភាគ៥ជាច្រើននាក់បានដឹកនាំកម្លាំងចុះទៅហាមឃាត់មិនឲ្យអ្នកភូមិជាម្ចាស់ដី ភ្ជួររាស់បង្កបង្កើនផលដំណាំនៅលើដីដែលគាត់មានប័ណ្ណកម្មសិទ្ធិស្របច្បាប់នោះឡើយ។
អ្នកភូមិជាង៥០គ្រួសារ បានអំពាវនាវរកកិច្ចអន្តរាគមន៍ពីរដ្ឋអំណាចមូលដ្ឋាននិងរាជរដ្ឋាភិបាលឲ្យដោះស្រាយ លើករណីជម្លោះដីធ្លីទំហំជាង១រយហិកតារ ដែលកំពុងកើតមានទំនាស់ជាមួយកងទាហានភូមិភាគ៥។ ទាហានភូមិភាគ៥ជាច្រើននាក់ បានដឹកនាំកម្លាំងចុះទៅហាមឃាត់គ្រឿងចក្ររបស់អ្នកភូមិ មិនឲ្យឈូសឆាយនៅលើផ្ទៃដីទំហំជាង១រយហិកតារដើម្បី បង្កបង្កើនផលបាននោះឡើយ។
ដីមានទំនាស់នេះឋិតនៅភូមិគោករកា ឃុំដូនបា ស្រុកគាស់ក្រឡ ខេត្តបាត់ដំបង។ អ្នកភូមិឈ្មោះ នួន ពៅ បញ្ជាក់ថា ដីស្រែចម្ការទំហំជាង១រយហិកតារជាកម្មសិទ្ធិស្របច្បាប់របស់អ្នកភូមិជាង៥០គ្រួសារ។ ដីនោះត្រូវបានក្រុមនិស្សិតស្ម័គ្រចិត្ត និង គណៈកម្មាធិការគ្រប់គ្រងដីរដ្ឋថ្នាក់ខេត្ត ចុះទៅវាស់វែងចេញប្លង់កម្មសិទ្ធិស្របច្បាប់ជូនពួកគាត់រួចរាល់ហើយ ប៉ុន្តែនៅដើមរដូវវស្សានេះក្រុមអ្នកភូមិបានដាក់គ្រឿងចក្រទៅភ្ជួររាស់ ដើម្បីបង្កបង្កើនផលស្រាប់តែមានកងទាហានជាច្រើននាក់ចុះទៅហាមឃាត់៖«មកគំរាមមិនឲ្យយើងភ្ជួររកចាប់អាត្រាក់ ហើយយើងត្រូវការដាំដុះទាហានអត់មានសំអាងអីផងសួរថាប្លង់ដីបង្កាន់ដៃ អត់មានគេថាអាងតែគេទាហានម្សិលមិញ២នាក់ដឹកនាំកម្លាំងជាង១០នាក់ ហាមមិនឲ្យភ្ជួរដាំដុះហើយថតយកអាត្រាក់ដែលខ្ញុំជួលអាត្រាក់គេមកភ្ជួរថតយកអាត្រាក់គេថា អ្នកណាហ៊ានភ្ជួរគេចាប់អាត្រាក់ ម្ចាស់អាត្រាក់គ្នាភ័យខ្លាច។ ខ្ញុំសំណូមពរកុំឲ្យទាហានមកធ្វើបាបប្រជាជនអ្នកភូមិមានកម្មសិទ្ធិដីច្បាស់លាស់អស់ហើយ លោក ហ៊ុន សែន ចារមកឲ្យធ្វើអ៊ីចឹងពេកដូចវាហួសហេតុពេកប្រជាជនរស់នឹងស្រែចម្ការ ដល់មកធ្វើការហាមឃាត់គ្នាអ៊ីចឹងដាច់បាយដាច់ទឹករត់ទៅថៃអស់»។
ការគំរាមកំហែងពីសំណាកយោធាភូមិភាគ៥ ទៅលើក្រុមអ្នកភូមិជាម្ចាស់ដីនេះ បានចាប់កម្រើកឡើងវិញតាំងពីអំឡុងខែមេសា រហូតមកដល់ខែឧសភា ឆ្នាំ២០១៤។ ក្រុមអ្នកភូមិដែលជាម្ចាស់ដី និងទទួលបានប័ណ្ណកម្មសិទ្ធិស្របច្បាប់រួចរាល់ហើយនោះ កំពុងមានការព្រួយបារម្ភ នៅគ្រាដែលពួកគាត់រងការគំរាមកំហែងពីសំណាកកងទ័ព។ ទន្ទឹមគ្នានេះពួកគាត់បានស្នើសុំឲ្យមានកិច្ចអន្តរាគមន៍ពីអាជ្ញាធរខេត្ត ចុះទៅដោះស្រាយជាបន្ទាន់លើបញ្ហាករណីទំនាស់ដីធ្លីនេះដើម្បីជួយឲ្យអ្នកភូមិធ្វើការបង្កបង្កើនផលទាន់ដើមរដូវវស្សា៖ «ដីមានប្លង់រ៉ឹងហើយយើងភ្ជួរអាត្រាក់ គេមកហាមឃាត់ ថា ឲ្យទៅដោះស្រាយជាមួយទាហានសិន គេថាយើងមានប្លង់គេសុំឲ្យអ្នកភូមិយកប្លង់ឲ្យមេទាហានគេមើល ដីហ្នឹងយើងអាស្រ័យផលជារៀងរាល់ឆ្នាំហើយនិស្សិតគាត់បានចុះមកវាស់វែង ដីហ្នឹងអត់មានអស់លោកណាថា ជាដីលោកនេះ លោកនោះទេ ប្រជាពលរដ្ឋបង្កបង្កើនផលដាំដំណាំប្រចាំឆ្នាំ ប្រចាំខែអត់ដែលមានអាក់ខានម្ដងណាទេដល់ពេលយើងទៅភ្ជួរដាំដំឡូងដាំអីគេថា បើសិនយើងដាំគេឈូសឆាយចោល»។
វិទ្យុអាស៊ីសេរីមិនអាចសុំការបញ្ជាក់ពីមន្ត្រីយោធាភូមិភាគ៥ ជុំវិញការលើកឡើងរបស់ក្រុមអ្នកភូមិនេះបានទេ កាលពីថ្ងៃព្រហស្បតិ៍ ទី១៥ ខែឧសភា ឆ្នាំ២០១៤ ប៉ុន្តែ អ្នកសម្របសម្រួលអង្គការសិទ្ធិមនុស្សលីកាដូប្រចាំខេត្តបាត់ដំបង លោក ស៊ុន តឹក យល់ថាទាហានមិនគួរទៅរំលោភលើដីប្រជាពលរដ្ឋដែលមានកម្មសិទ្ធិស្របច្បាប់រួចហើយនោះទេ។ លោកបន្តថា តាមការសិក្សាស្រាវជ្រាវរបស់អង្គការ រកឃើញថាករណីទំនាស់ដីធ្លីនៅក្នុងខេត្តបាត់ដំបង កំពុងកម្រើកឡើងវិញនេះ ទំនងមានជាប់ទាក់ទិនទៅនឹងភាពមិនច្បាស់លាស់នៃការចេញប័ណ្ណកម្មសិទ្ធិ ហើយបញ្ហានេះទាមទារឲ្យអាជ្ញាធរខេត្ត មានការប្ដេជ្ញាចិត្តនិងការទទួលខុសត្រូវខ្ពស់ចំពោះបញ្ហានេះ។ ដើម្បីទប់ស្កាត់នូវបាតុភាពផ្សេងៗដែលអាចកើតមានឡើងនោះ មន្ត្រីអង្គការលីកាដូដដែល ជំរុញឲ្យអាជ្ញាធរមូលដ្ឋានគួរមានកិច្ចអន្តរាគមន៍ជួយដល់ក្រុមអ្នកភូមិ៖ «បើនៅតែអ៊ីចឹងប្រជាពលរដ្ឋគាត់អស់ជំនឿលើអាជ្ញាធរ ដែលដោះស្រាយខ្យល់អោយពួកគាត់វាអត់មានអីជាដុំកំភួនទេ មានប្លង់មានដីតែអត់បានធ្វើស្រែនៅលើដីនោះ តើមានន័យអី ហើយមួយទៀតមានប្លង់អត់ដីមានប្រយោជន៍អី ប្រជាពលរដ្ឋនៅបាត់ដំបងក្នុងក្រុងនឹងជនបទទៅថៃចង់អស់ហើយ ដោយសារបញ្ហាអត់ដីធ្វើស្រែចម្ការ»។
ឆ្លើយតបចំពោះបញ្ហានេះ អភិបាលខេត្តបាត់ដំបង លោក ច័ន្ទ សុផល មានប្រសាសន៍ថាអាជ្ញាធរខេត្តកំពុងគិតគូរ និងរៀបចំផែនការធ្វើដំណើរទៅកាន់ទីតាំងដីមានទំនាស់ជាក់ស្ដែងដើម្បីជួយដល់អ្នកភូមិ។ លោកបន្តថាករណីទំនាស់ដីធ្លីរវាងអ្នកភូមិ និងកងទាហាននៅឃុំដូនបា ស្រុកគាស់ក្រឡ ជាបន្ទុកថ្មីមួយបន្ថែមទៀត ក្នុងចំណោមករណីទំនាស់ដីធ្លីជាច្រើនកន្លែងផ្សេងទៀតនៅស្រុកបវេល និងស្រុកថ្មគោល៖ «ចាំខ្ញុំទាក់ទងទៅស្រុកឲ្យពួកខ្ញុំចុះទៅថ្ងៃទី២០នេះ ពួកខ្ញុំចុះទៅស្រុកបវេលដែលមានបាតុភាពដូចគ្នាអ៊ីចឹង ហើយបន្ទាប់ពីថ្ងៃ២០ ខ្ញុំចុះទៅស្រុកថ្មគោល បាតុភាពដូចគ្នាដូច្នេះមានបញ្ហានេះមួយទៀតចាំមើលខ្ញុំលៃកម្មវិធីចុះទៅជួយ»។
ក្នុងរយៈពេលចុងក្រោយនេះ គេសង្កេតឃើញថាមានបាតុភាពជាច្រើនកើតមានឡើងទាក់ទិនបញ្ហាទំនាស់ដីធ្លី នៅតាមស្រុកមួយចំនួនក្នុងខេត្តបាត់ដំបង។ ជាក់ស្ដែងដូច ជាក្រុមអ្នកភូមិ រស់នៅឃុំមួយចំនួននៅស្រុកគាស់ក្រឡ អ្នកខ្លះទទួលបានប័ណ្ណកម្មសិទ្ធិដីធ្លី ស្របច្បាប់ពីរដ្ឋាភិបាលរួចហើយ ប៉ុន្តែពួកគេមិនអាចចុះទៅបង្កបង្កើតផលនៅលើដីនោះបានដោយសារមានក្រុមទាហាន ភូមិភាគ៥ចុះទៅគំរាមហាមឃាត់។ អ្នកភូមិខ្លះទៀតមានឈ្មោះទទួលបានប័ណ្ណកម្មសិទ្ធិដីធ្លីស្របច្បាប់ ហើយប៉ុន្តែ ពុំទទួលបានដីជាក់ស្ដែង សម្រាប់បង្កបង្កើនផលនោះឡើយ។ បញ្ហាទាំងនេះ បានធ្វើពួកគាត់ជួបការលំបាកខ្លាំង លើការងារជីវភាពប្រចាំថ្ងៃ ហើយអ្នកភូមិខ្លះបានបង្ខំចិត្តធ្វើដំណើរទៅរកការងារធ្វើនៅប្រទេសថៃឡង់ដ៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។