អាជ្ញាធរស្រុកពេជ្រាដា ខេត្តមណ្ឌលគិរី រៀបចំកម្មវិធីជួបជុំដោះស្រាយការតវ៉ារបស់សហគមន៍ប៊ូស្រាចំនួនបួនចំណុច នៅក្រោយពិធីបុណ្យភ្ជុំបិណ្ឌ ក៏ប៉ុន្តែសហគមន៍អះអាងថា គម្រោងដោះស្រាយនេះ មិនបំពេញលក្ខខណ្ឌសំខាន់ៗដែលសហគមន៍ទាមទារនោះឡើយ។
សហគមន៍ជនជាតិដើមភាគតិចព្នង រស់នៅភូមិចំនួន៧ ក្នុងឃុំប៊ូស្រា ព្រមានថានឹងធ្វើបាតុកម្មលើកទីបី នៅក្រោយបញ្ចប់បុណ្យភ្ជុំបិណ្ឌ ដើម្បីទាមទារឲ្យអាជ្ញាធរពាក់ព័ន្ធដោះស្រាយការតវ៉ារបស់ប្រជាពលរដ្ឋ។
ការព្រមាននេះ ធ្វើឡើងបន្ទាប់ពីអាជ្ញាធរស្រុកពេជ្រាដា កាលពីថ្ងៃទី២០ ខែកញ្ញា បានធ្វើលិខិតរៀបចំកម្មវិធីដោះស្រាយការតវ៉ារបស់ប្រជាពលរដ្ឋ ៤ចំណុច រួមមាន ជម្លោះដីធ្លីរវាងប្រជាពលរដ្ឋ ៥គ្រួសារ ជាមួយក្រុមហ៊ុន ណាវ៉ារ៉ាស៊ី (Navarasy) ករណីក្រុមហ៊ុន ដាក់ឡាក់ (DaclaK) ជីកប្រឡាយកាត់ផ្លូវប្រជាពលរដ្ឋ ករណីប្រជាពលរដ្ឋធ្វើស្រែចម្ការនៅប៉ុស្តិ៍៦ ហើយកម្លាំងការពារមិនអនុញ្ញាត។
ម្យ៉ាងទៀត បុគ្គលិកក្រុមហ៊ុន អិល.ខេ.អិល (LKL) នៅតំបន់នោះគំរាមបាញ់សម្លាប់ប្រជាពលរដ្ឋ និងករណីកែប្រែដោះស្រាយព្រំប្រទល់ដីឃុំប៊ូស្រា និងឃុំដាក់ដាំ ក៏ប៉ុន្តែនៅមានចំណុចតវ៉ាសំខាន់ៗមួយចំនួនទៀត មិនឃើញមាននៅក្នុងកម្មវិធីចុះដោះស្រាយនោះទេ។ ការទាមទារសំខាន់ៗរួមមាន ការទាមទារឲ្យលប់អាជ្ញាប័ណ្ណក្រុមហ៊ុន អិល.ខេ.អិល និងក្រុមហ៊ុន ខេ.ស៊ី (KC) ដែលបង្កផលប៉ះពាល់ប្រជាពលរដ្ឋ និងសំណើលុបដីសម្បទានសង្គមកិច្ច ដែលបង្កឲ្យមានការកាប់បំផ្លាញព្រៃឈើធ្ងន់ធ្ងរ។
តំណាងសហគមន៍ លោក ក្រោះ សុខ នៅថ្ងៃទី២១ ខែកញ្ញា រៀបរាប់ថា អ្នកភូមិបានប្រជុំគ្នា និងមិនយល់ស្របតាមរបៀបវារៈនោះឡើយ ដោយសារបញ្ហាសំខាន់ដែលពលរដ្ឋបានតវ៉ាក្រុមអាជ្ញាធរ មិនបានឆ្លើយតបជាក់លាក់។ លោកកត់សម្គាល់ថា គម្រោងដោះស្រាយរបស់អាជ្ញាធរ គឺជាចេតនាគេចវេសពីបញ្ហាដោះស្រាយផលប៉ះពាល់សំខាន់ៗដែលពលរដ្ឋចង់បាន៖ «ចំណុចដែលយើងចង់បានធំ យើងកំពុងតែរង់ចាំ ឥឡូវនេះគាត់គិតថា បើសិនគេដោះ សុំឲ្យដោះទាំងអស់ ប្រជាពលរដ្ឋគាត់ទាមទារអ៊ីចឹង។ បើនិយាយពីការទាមទារ គាត់អត់ចង់ដូចពីកាលមុនៗដែលគាត់ឆ្លើយថា អត់ស្អីទេ ចាំគាត់ដោះស្រាយៗ គាត់អត់ចង់បានអ៊ីចឹងទេ»។
កាលពីថ្ងៃទី១៥ និងថ្ងៃទី១៧ កញ្ញា កន្លងទៅ ប្រជាពលរដ្ឋជិត ៣០០នាក់ បានធ្វើបាតុកម្មតវ៉ាបញ្ហាទាំងអស់នោះនៅមុខសាលាឃុំប៊ូស្រា និងនៅមុខសាលាស្រុកពេជ្រាដា ក៏ប៉ុន្តែមន្ត្រីអាជ្ញាធរ មិនអាចធ្វើឲ្យប្រជាពលរដ្ឋអ្នកតវ៉ា ទទួលយកដំណោះស្រាយណាមួយនៅឡើយ។ ក្រុមអាជ្ញាធរ សន្យាដោះស្រាយ បញ្ហាណាដែលឋិតក្រោមសមត្ថកិច្ចរបស់អាជ្ញាធរមូលដ្ឋាន ក៏ប៉ុន្តែបញ្ហាឋិតក្នុងចំណាត់ការថ្នាក់ជាតិ។ ក្រុមអាជ្ញាធរអះអាងថា ហួសសមត្ថកិច្ចរបស់ថ្នាក់ខេត្ត។ ចំណែកក្រុមអ្នកតវ៉ាទាមទារឲ្យអាជ្ញាធរធ្វើលិខិតលាយលក្ខណ៍អក្សរ កំណត់ពេលវេលាជាក់លាក់ធានាដោះស្រាយបញ្ហាទាំងអស់ដែលពលរដ្ឋទាមទារ។
ឆ្លើយតបការព្រមាននេះ អភិបាលស្រុកពេជ្រាដា លោក នួន សារ៉ន ថ្លែងថា អាជ្ញាធរខេត្តបានគិតគូរសុខទុក្ខប្រជាពលរដ្ឋខ្លាំង។ ហេតុនេះ អាជ្ញាធរបានកំណត់ពេលវេលាជាក់លាក់ដោះស្រាយបញ្ហាមួយចំនួនជាសមត្ថកិច្ចរបស់អាជ្ញាធរមូលដ្ឋាន។ លោកសំណូមពរឲ្យប្រជាពលរដ្ឋអត់ធ្មត់រង់ចាំការឆ្លើយតបពីក្រសួងមហាផ្ទៃ ទាក់ទិនសំណើសំខាន់របស់ពលរដ្ឋ ដែលជាសមត្ថកិច្ចរបស់អាជ្ញាធរថ្នាក់ជាតិ ធ្វើការដោះស្រាយជូនប្រជាពលរដ្ឋ៖ «ពីថ្ងៃទី១៧ ទាំងឯកឧត្តមអភិបាលរង ទាំងឯកឧត្តមប្រធានក្រុមប្រឹក្សា លោកបានអញ្ជើញមកប្រាប់ច្បាស់ហើយតើ មិនមែនថាអាជ្ញាធរមិនគិតគូរទេ តាំងពីឃុំរហូតដល់ខេត្តនោះ។ បានរាយការណ៍ស្នើសុំយោបល់ទៅឯកឧត្តមរដ្ឋមន្ត្រីក្រសួងមហាផ្ទៃ ហើយ»។
យ៉ាងនេះក៏ដោយ មន្ត្រីឃ្លាំមើលសិទ្ធិមនុស្សសមាគមអាដហុក (adhoc) ខេត្តមណ្ឌលគិរី លោក អៀង ម៉េងលី កត់សម្គាល់ថា ការតវ៉ារបស់សហគមន៍មានហេតុផលជាក់លាក់ ដោយសារក្រុមហ៊ុនសម្បទាននៅតំបន់នោះ បានបង្កផលប៉ះពាល់ធ្ងន់ធ្ងរទៅលើសិទ្ធិរស់នៅរបស់ជនជាតិដើមភាគតិច។ ចំណែកការដោះស្រាយរបស់អាជ្ញាធរ នៅមានកម្រិតស្រាលនៅឡើយ។ លោកអំពាវនាវសុំឲ្យស្ថាប័នពាក់ព័ន្ធ រាជរដ្ឋាភិបាល ធ្វើការដោះស្រាយការទាមទារជាមួយពលរដ្ឋដោយប្រសិទ្ធភាព និងដោយតម្លាភាព៖ «កន្លងមក គឺគាត់បង្កឡើងជាច្រើនដងមកហើយ ហេតុនេះបានជាប្រជាពលរដ្ឋគាត់តវ៉ា។ អ្វីដែលខេត្តគាត់ដោះស្រាយហ្នឹង គឺអត់សមស្របទៅនឹងគាត់ទាមទារទេ»។
តាមការគ្រោងទុក សហគមន៍ប៊ូស្រាទាំង ៧ភូមិ នឹងបន្តធ្វើបាតុកម្មបិទផ្លូវទេសចរណ៍ទឹកជ្រោះប៊ូស្រា នៅក្រោយពិធីបុណ្យភ្ជុំ ដើម្បីដាក់សម្ពាធឲ្យអាជ្ញាធរដោះស្រាយបញ្ហាជូនអ្នកភូមិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។