សហគមន៍ជនជាតិព្នង មកពីភូមិពូគង់ ឃុំស្រែព្រះ ស្រុកកែវសីមា ខេត្តមណ្ឌលគិរី បង្ហាញពីវិនាសកម្មព្រៃឈើរបស់សហគមន៍។ ប្រជាសហគមន៍បានចាត់ទុកករណីនេះជាការបំផ្លាញដោយក្រុមហ៊ុនវៀតណាម ឈ្មោះ ប៊ិញ ហ្វឿក ក្រចេះ រ៉ាប់ប៊ឺ១ (Benh Hoeurk Kratie Rubber 1) ជនចំណូលថ្មីមួយចំនួន មន្ត្រីរាជការ និងអ្នកមានលុយមានអំណាច។
ប្រជាសហគមន៍ភូមិពូគង់ ឃុំព្រះស្រែ ឲ្យដឹងថា គិតមកត្រឹមដើមឆ្នាំ២០១៥ នេះ ព្រៃឈើដែលស្ថិតក្នុងដែនសហគមន៍គ្រប់គ្រងប្រមាណជា ៨០% នៃផ្ទៃដីសរុបជាង ៩.០០០ហិកតារ ត្រូវរលាយបាត់បង់ដោយសារការអភិវឌ្ឍចំការកៅស៊ូតាមរយៈគម្រោងផ្តល់ដីសម្បទានសេដ្ឋកិច្ចរបស់រដ្ឋាភិបាល។
ប្រធានសហគមន៍ភូមិពូគង់ លោក ទ្រីប ធើម ថ្លែងនៅក្នុងសន្និសីទសារព័ត៌មាននាព្រឹកថ្ងៃ១៨ ខែមីនា ថា ក្រុមហ៊ុន ប៊ិញ ហ្វឿក ក្រចេះ រ៉ាប់ប៊ឺ១ ជនចំណូលថ្មី និងមន្ត្រីរាជការ អ្នកមានអំណាចបានរួមគ្នាកាប់ព្រៃសហគមន៍នេះ នៅក្នុងភូមិចំនួន៣ គឺភូមិពូគង់ ភូមិអូរច្រា និងភូមិពូចារ។ លោកថា គ្រាន់តែភូមិពូគង់មួយ ព្រៃឈើវិនាសអស់ជាង ៣ពាន់ហិកតារ។ ការបំផ្លាញបែបនេះ អាចនាំឲ្យព្រៃឈើសហគមន៍បាត់បង់ក្នុងរយៈពេលដ៏ខ្លី ហើយប៉ះពាល់ដល់វប្បធម៌ ប្រពៃណី និងជីវភាពរបស់ជនជាតិដើមភាគតិចព្នងទៀតផង៖ «ព្រោះចាប់ម្តងៗ ប៉ះវៀតណាមផង ខ្មែរយើងផង ចាមផង ចិនផង កាប់ព្រៃតែម្ដង។ ឥឡូវកាប់ទន្ទ្រាន ព្រៃដែលសំខាន់អស់ប៉ុន្មានពាន់ហិកតារហើយ»។
បន្ថែមលើនោះលោក វណ្ណា ខ្វើក សមាជិកគណៈកម្មការសហគមន៍ពូគង់ អះអាងថា ក្រុមហ៊ុនវៀតណាម ប៊ិញ ហ្វឿក ក្រចេះ រ៉ាប់ប៊ឺ១ ទទួលបានដីសម្បទានជាង ៨ពាន់ហិកតារទេ ប៉ុន្តែក្រុមហ៊ុននេះបានទន្ទ្រានចូលដល់ព្រៃសហគមន៍ភូមិពូគង់ ហើយកាប់ឈើលក់ទៅឲ្យឧកញ៉ា ស៊ិន សំអុល ដែលទទួលទិញឈើនោះទុកនៅក្នុងក្រុមហ៊ុន ប៊ិញ ហ្វឿក ក្រចេះ រ៉ាប់ប៊ឺ១៖ «ចូលក្រុមហ៊ុនហើយ មកកាប់ឈើប្រណិត។ បើគិតទៅវាបំផ្លាញដង្ហើមរបស់ប្រជាពលរដ្ឋជាច្រើន»។
លោក ឯម សុភ័ក្រ មន្ត្រីនៃមជ្ឈមណ្ឌលអប់រំច្បាប់សម្រាប់សហគមន៍ (CLEC) ថ្លែងថា ក្រុមហ៊ុន ប៊ិញ ហ្វឿក ក្រចេះ រ៉ាប់ប៊ឺ១ ទទួលវិនិយោគដាំកៅស៊ូរយៈពេល ៧០ឆ្នាំ។ លោកថា ក្នុងលិខិតកិច្ចសន្យាវិនិយោគដីមានជាង ៨ពាន់ហិកតារទេ ប៉ុន្តែផ្ទៃដីឈូសវាតបច្ចុប្បន្នដល់ទៅ ១ម៉ឺនហិកតារ។ មូលហេតុនេះ ទើបព្រៃនៅភូមិពូគង់ ហ៊ុមព័ទ្ធដោយព្រៃស្រោងក្នុងតំបន់ការពារសីមា (Seima Protected Forest) ដែលមានផ្ទៃដីជាង ២៩ម៉ឺនហិកតារ កំពុងហិនហោចនូវឈើប្រភេទលេខ១ ដូចជាដើមឈើទាល ផ្ចឹក សុក្រំ បេង នាងនួន ជាដើម។ ព្រៃឈើទាំងនេះកាលពីមុនបានជួយផ្ដល់ប្រាក់ចំណូលទៅឲ្យជនជាតិភាគតិចពីការលក់ជ័រ តែឥឡូវពួកគាត់បានបាត់បង់មុខរបរនេះអស់ហើយ។
ឡើងបង្ហាញនៅក្នុងសន្និសីទសារព័ត៌មាននោះដែរ នាយកប្រតិបត្តិវេទិកានៃអង្គការមិនមែនរដ្ឋាភិបាលស្តីពីកម្ពុជា លោក តឹក វណ្ណារ៉ា ថ្លែងថា ដោយសារតែវិនាសកម្មព្រៃឈើនៅភូមិពូគង់ ឃុំស្រែព្រះ ទើបអាក់ខាន ដល់ការលក់កាបោន ជួយទ្រទ្រង់ការប្រែប្រួលអាកាសធាតុនៅតំបន់ខេត្តមណ្ឌលគិរី។ លោកថា សង្គមស៊ីវិល និងជនជាតិដើមភាគតិចទាមទារឲ្យរដ្ឋាភិបាល ពន្លឿនការចុះបញ្ជីដីធ្លីរបស់សហគមន៍ជនជាតិដើមភាគតិច សុំឲ្យអាជ្ញាធរពាក់ព័ន្ធពិនិត្យក្រុមហ៊ុនទទួលបានដីសម្បទានសេដ្ឋកិច្ច និងអនុវត្តច្បាប់ឡើងវិញ ព្រោះក្រុមហ៊ុនរំលោភលើប្រកាសអន្តរក្រសួង។ បើសិនរកឃើញថា ក្រុមហ៊ុនពិតជារំលោភហួសដីដែលអនុញ្ញាត សុំឲ្យលុបចោលដីសម្បទានសេដ្ឋកិច្ចនោះ។
បំភ្លឺចំពោះការលើកឡើងរបស់សង្គមស៊ីវិល និងសហគមន៍ភូមិពូគង់ លោក មាឃ វិទ្ធី មន្ត្រីរដ្ឋបាលព្រៃឈើកែវសីមា ថ្លែងថា មន្ត្រីរបស់លោកកំពុងចុះពិនិត្យរឿងកាប់ឈើខុសច្បាប់នៅភូមិពូគង់។
វិទ្យុអាស៊ីសេរី មិនអាចទាក់ទងលោកឧកញ៉ា ស៊ិន សំអុល ដើម្បីប្រតិកម្មតបនឹងការបង្ហាញរបស់សង្គមស៊ីវិល និងជនជាតិដើមភាគតិចខេត្តមណ្ឌលគិរី បានទេ នៅថ្ងៃ១ ខែមីនា។
តាមរយៈលិខិតលេខ ២៧៣ កសម ចុះថ្ងៃ២៧ ខែមិថុនា ឆ្នាំ២០១៣ របស់សាលាស្រុកកែវសីមា និងប្រកាសអន្តរក្រសួងលេខ១៧៧ ក្រសួងកសិកម្ម និងលេខ ២០៦ ក្រសួងបរិស្ថាន ចុះថ្ងៃ៩ ខែឧសភា ឆ្នាំ២០១៤ ឲ្យពង្រឹងការគ្រប់គ្រងដីសម្បទានសេដ្ឋកិច្ច បញ្ឈប់កាប់ឈើក្នុងតំបន់ការពារ និងតំបន់ខាងក្រៅដីសម្បទានសេដ្ឋកិច្ច។
របាយការណ៍របស់សហគមន៍ភូមិពូគង់ មាន ៦៧គ្រួសារ។ ក្នុង១គ្រួសារមានដើមឈើត្រងជ័រទឹក (ដើមច្បោះ) ចាប់ពី ២៥ដើម ទៅ ៣០០ដើម។ ពួកគាត់ធ្លាប់ទទួលប្រាក់ចំណូលពីការលក់ជ័រទឹកនេះចាប់ពី ៧៥០ដុល្លារ ទៅ ៩ពាន់ដុល្លារក្នុង១ឆ្នាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។