ពលរដ្ឋមានជម្លោះដីធ្លីជិត ៥០នាក់ មានក្មេង ចាស់ ជនពិការ និងស្រ្តីបីកូននឹងថ្នក់ក្រមាផងនោះ ដែលមកពីខេត្តខេត្តបាត់ដំបង ខេត្តប៉ៃលិន និងខេត្តបន្ទាយមានជ័យ សម្រេចលើកគ្នាដើរមកដាក់ញត្តិតាមស្ថាប័នសំខាន់ៗ ក្នុងរាជធានីភ្នំពេញ នៅព្រឹកថ្ងៃទី១ កញ្ញា ដោយពួកគេរំពឹងថា ស្ថាប័នទាំងនោះអាចជួយធ្វើអន្តរាគមន៍ និងអាចផ្តល់ដំណោះស្រាយបញ្ហាដីធ្លីដ៏រ៉ាំរ៉ៃជូនពួកគាត់ដែលអ្នកមានអំណាចរំលោភយកអស់ជាច្រើនឆ្នាំមកហើយ។
ស្ថាប័នដែលពួកគាត់ដើរសំដៅទៅដាក់ញត្តិដើម្បីស្វែងរកដំណោះស្រាយដីធ្លី មានខុទ្ទកាល័យលោកនាយករដ្ឋមន្ត្រី ហ៊ុន សែន និងរដ្ឋសភា។
ប៉ុន្តែបំណងរបស់ពលរដ្ឋដែលចង់ដាក់ញត្តិជូនលោក ហ៊ុន សែន គឺមិនបានសម្រេចឡើយ ដោយក្រុមសន្តិសុខខណ្ឌដូនពេញ អមដោយកម្លាំងកងរាជអវុធហត្ថប្រដាប់ដោយខែលនិងដំបងរាប់សិបនាក់នៅពីក្រោយផងនោះ បានរាំងខ្ទប់ពលរដ្ឋមិនអោយដើរទៅដាក់ញត្តិដល់ខុទ្ទកាល័យលោក ហ៊ុន សែន បានឡើយ។
បង់អង្គុយចាក់បេតុងរាងជារង្វង់មូល ព័ទ្ធជុំវិញដើមពោធិ៍ក្បែរវត្តបទុមវតី ដែលពលរដ្ឋរងគ្រោះដីធ្លីស្គាល់ថា ជាកន្លែងទទួលញត្តិទាក់ទងនឹងជម្លោះដីធ្លីគ្រប់ទិសទីនោះ ត្រូវពលរដ្ឋមកពីខេត្តទាំងបីនេះ លែងមានជំនឿតទៅទៀតហើយ។
ពួកគាត់ថ្លែងថា ញត្តិដែលពួកគាត់ដាក់ជូនលោក ហ៊ុន សែន នៅក្រោមដើមពោធិ៍នេះពីមុនៗមក មិនដឹងជាបាត់ទៅណា ចំណែកឯវិធានការថានឹងដោះស្រាយរឿងដីធ្លីជូនពួកគាត់វិញ ក៏មិនទាន់លេចចេញជាផ្លែផ្កាណាមួយនៅឡើយ។ ពួកគាត់ថ្លែងថា ពួកគាត់បានត្រឹមតែលឺពាក្យមួយឃ្លាចេញពីមាត់មន្រ្តីតំណាងខុទ្ទកាល័យថា នឹងផ្ញើញត្តិដាក់ជូនសម្ដេចតែប៉ុណ្ណោះ នៅពេលដែលមានវត្តមានមន្រ្តីតំណាងខុទ្ទកាល័យចេញមកទទួលញតិ្តម្តងៗ។
ដោយអស់សង្ឃឹមនឹងខុទ្ទកាល័យលោកនាយករដ្ឋមន្ត្រី ហ៊ុន សែន ពលរដ្ឋតវ៉ារឿងដីធ្លីទាំងនេះ ក៏បន្តដើរតវ៉ាឆ្ពោះទៅមន្ទីររដ្ឋសភាដែលស្ថិតនៅទិសខាងកើតផ្ទះលោកនាយករដ្ឋមន្រ្តី ហ៊ុន សែន។
លោក អេង ឆៃអ៊ាង តំណាងរាស្រ្តបក្សសង្រ្គោះជាតិ ដែលទើបនឹងជាប់ឆ្នោតជាប្រធានគណៈកម្មការសិទ្ធិមនុស្សទទួលពាក្យបណ្តឹង អង្កេតនិងទំនាក់ទំនងរដ្ឋសភា ព្រឹទ្ធសភា ចេញមកជួបពលរដ្ឋ និងនាំតំណាងពលរដ្ឋ ៩រូប ដោយ ៣រូបតំណាងអោយខេត្តមួយ អាចដាក់ញត្តិជូនដល់ដៃតំណាងរាស្ត្របក្សទាំងពីរដោយជោគជ័យ។ ចំណែកតំណាងរាស្ត្របក្សប្រជាជនកម្ពុជា ដែលទទួលញត្តិពលរដ្ឋក្នុងមន្ទីររដ្ឋសភា គឺអ្នកស្រី ឡោ ខេង។
លោក អេង ឆៃអ៊ាង ថ្លែងថា លោកនឹងរៀបចំក្រុមការងារដើម្បីសង្កេតបញ្ហាដីធ្លីទាំងបីខេត្តនេះ ហើយលោកស្នើអោយពលរដ្ឋវិលត្រឡប់ទៅខេត្តវិញ៖ «ក្នុងបន្តិចទៀតខ្ញុំនឹងជួបតំណាងពួកគាត់ដើម្បីពនិត្យបណ្តឹងរបស់គាត់ ហើយការសម្រេចយ៉ាងណានោះ យើងមិនទាន់សម្រេចយ៉ាងណា គឺយើងមិនទាន់សន្និដ្ឋានយ៉ាងណានោះ យើងពិនិត្យសិន ពិនិត្យរួចហើយបានយើងអាចធ្វើការអង្កេតទៀត ហើយបើសិនជាស្ថានភាពហ្នឹងវានៅមានភាពស្រពេចស្រពិល យើងនឹងអង្កេតឲ្យបានច្បាស់លាស់មុនយើងបញ្ចូលទៅឲ្យអាជ្ញាធរមានសមត្ថកិច្ចធ្វើការដោះស្រាយ»។
តំណាងអ្នកតវ៉ាដីធ្លីមកពីខេត្តបាត់ដំបង អ្នកស្រី ចាន់ ហឿ ថ្លែងថា អ្នកស្រីនិងពលរដ្ឋតវ៉ាដីធ្លីឯទៀតនឹងរង់ចាំមើលចំណាត់ការរបស់ក្រុមអ្នកតំណាងរាស្ត្រទាំងពីរគណបក្ស នឹងអាចដោះស្រាយរឿងដីធ្លីជូនពួកគាត់ប្រកបដោយប្រសិទ្ធភាពបានកម្រិតណា៖ «នាងខ្ញុំទុកចិត្តហើយ រដ្ឋសភាទាំងពីរគណបក្សហ្នឹងខ្ញុំទុកចិត្ត តែបើសិនជានាងខ្ញុំទៅ សំខាន់អត់មានសម្ភារៈកសិកម្ម អត់កន្លែងជ្រកនៅ ហើយឲ្យនាងខ្ញុំទៅយ៉ាងម៉េច? ទៅនៅហាលភ្លៀងហាលខ្យល់ដូចមុនដដែល ដល់ពេលទៅត្រូវបាន ជនខិលខូចមកដើម្បីថាឆ្លៀតឱកាសធ្វើទារុណកម្មយប់ព្រលប់ មួយលើកពីរលើក យកទៅដាក់ពេទ្យទៅអត់មានអ្នកណាទទួលខុសត្រូវសោះ»។
លោក គង់ សភា តំណាងរាស្រ្តបក្សសង្រ្គោះជាតិ ថ្លែងថា លោកនឹងសិក្សាពីជម្លោះដីធ្លីទាំងនេះ ហើយនឹងចាត់វិធានដោះស្រាយដីធ្លីជូនពលរដ្ឋឲ្យហើយ ក្នុងរយៈពេល ១ខែក្រោយការដាក់ញត្តិនេះ។
បើទោះបីជាមានការសន្យាពីអ្នកតំណាងរាស្ត្រយ៉ាងណាក្តី ពលរដ្ឋតវ៉ារឿងដីធ្លីនៅតែអះអាងថា ពួកគាត់នឹងបន្តការស្នាក់នៅក្នុងវត្តពោធិយារាម ក្រុងភ្នំពេញ តទៅទៀត បើសិនជាពួកគាត់នៅតែមិនទទួលបានដំណោះស្រាយជាក់លាក់ណាមួយដែលអាចទុកចិត្តបានពីតំណាងរាស្ត្រទាំងពីរបក្ស និងអាជ្ញាធរថ្នាក់ខេត្តនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។