Opens in new windowអភិបាលរងខណ្ឌដូនពេញ លោក សុខ ពេញវុធ ដឹកនាំសន្តិសុខប្រមាណជាង ៣០នាក់ ចុះរុះរើរោងដែលប្រជាពលរដ្ឋធ្វើសម្រាប់ជ្រកភ្លៀង ដើម្បីតវ៉ានៅទីលានប្រជាធិបតេយ្យនៅថ្ងៃទី១៣ ខែកញ្ញា ដោយហេតុផលថា ជាការតវ៉ាខុសច្បាប់។
តំណាងប្រជាពលរដ្ឋ លោក លី គីមហុង និងពលរដ្ឋប្រមាណជិត ៤០០នាក់ ដែលនាំគ្នាតវ៉ានៅទីលានប្រជាធិបតេយ្យពីបញ្ហាដីធ្លីរ៉ាំរ៉ៃមកពីខេត្តកំពត និយាយថា ពួកគាត់នឹងមិនចាកចេញពីទីលានប្រជាធិបតេយ្យទេ បើមិនមានដំណោះស្រាយ និងមិនដក លោក ហេង វន្ថា ពីតំណែងជាអភិបាលរងខេត្តកំពត ទេនោះ។
តំណាងប្រជាពលរដ្ឋ លោក លី គីមហុង ក្រុមនិស្សិត និងប្រជាពលរដ្ឋប្រមាណជិត ៤០០នាក់ស្រែកទាមទារឲ្យ លោក ហេង វន្ថា ចុះចេញពីតំណែងជាអភិបាលរងខេត្តកំពត ព្រោះថា អភិបាលរងរូបនេះមិនគោរពតាមអនុក្រឹត្យលេខ២៥៩ របស់រដ្ឋាភិបាល ដោយយកដីប្រមាណជាង ១ពាន់ហិកតារ (១.២៨៨ហិកតារ) ទៅចែកឲ្យអតីតកងកម្លាំងប្រដាប់អាវុធ និងក្រុមគ្រួសារប្រមាណជាង ២០០គ្រួសារ (២៤០គ្រួសារ) និងស្នើដល់លោកនាយករដ្ឋមន្ត្រី ហ៊ុន សែន ឲ្យជួយអន្តរាគមន៍ជុំវិញបញ្ហានេះ។
តំណាងប្រជាពលរដ្ឋភូមិតេជោអភិវឌ្ឍន៍ លោក លី គីមហុង អះអាងថា រូបលោកបានទៅតាំងទីលំនៅនៅភូមិតេជោអភិវឌ្ឍន៍ តាំងពីឆ្នាំ២០០០ ហើយបច្ចុប្បន្នក្នុងភូមិតេជោអភិវឌ្ឍន៍ មានប្រជាពលរដ្ឋប្រមាណជាង ៨០០គ្រួសារ (៨៥០គ្រួសារ) ដោយមានលិខិតកាន់កាប់ដីធ្លីដែលចេញដោយមេឃុំ និងលោកអភិបាលស្រុកឈូក ខេត្តកំពត ត្រឹមត្រូវ ហើយប្រជាពលរដ្ឋទាំងអស់ក៏ទាមទារដែរឲ្យអាជ្ញាធរខេត្តកំពត ដោះលែងតំណាងប្រជាពលរដ្ឋពីររូប គឺលោក លី គីមហ៊ុយ និង លី គីមហ៊ា៖ «គាត់ហ្នឹងមនុស្សបំពានអនុក្រឹត្យ មនុស្សមិនស្មោះនឹងប្រមុខរាជរដ្ឋាភិបាល មនុស្សក្បត់រាជរដ្ឋាភិបាល ធ្វើបាបប្រជាពលរដ្ឋ បំពេញចិត្តឈ្មួញ»។
ឆ្លើយតបនឹងការចោទប្រកាន់នេះ អភិបាលរងខេត្តកំពត លោក ហេង វន្ថា បដិសេធថា លោកមិនបានរំលោភយកដីរបស់ប្រជាពលរដ្ឋនៅភូមិតេជោអភិវឌ្ឍន៍ ទៅចែកអតីតកងកម្លាំងប្រដាប់អាវុធ និងក្រុមគ្រួសារនោះទេ។ លោកបញ្ជាក់ថា លោកអនុវត្តតាមអនុក្រឹត្យកាលពីឆ្នាំ២០១១ របស់រាជរដ្ឋាភិបាលស្ដីពីការធ្វើអនុប្រយោគជាដីឯកជនរបស់រដ្ឋ ទំហំជាង ១ពាន់ហិកតារ (១.២៨៨ហិកតារ) ស្ថិតនៅឃុំតេជោអភិវឌ្ឍន៍ ស្រុកឈូក ខេត្តកំពត។ អភិបាលរងខេត្តកំពត រូបនេះអះអាងថា ការតវ៉ារបស់ប្រជាពលរដ្ឋទាំងនោះ គឺកើតចេញពីការញុះញង់របស់ប្រធានគណបក្សសម្ព័ន្ធដើម្បីប្រជាធិបតេយ្យ លោក ខឹម វាសនា៖ «ខ្ញុំស៊ើបទៅ គឺ ខឹម វាសនា ហ្មងជាអ្នកទិញដីហ្នឹង ទិញរាប់រយហិកតារហ្មងដីហ្នឹង។ ចឹងគាត់ខ្លាចបាត់បង់ដីហ្នឹង គាត់យកកម្លាំងមកទាមទារទម្លាក់ខ្ញុំអី។ ខ្ញុំអនុវត្តតាមគោលនយោបាយរបស់រាជរដ្ឋាភិបាល។ ប្រជាពលរដ្ឋនៅភូមិក្រៅទេ គាត់ដើរប្រមែប្រមូលមកធ្វើការតវ៉ា។ ការញុះញង់របស់គណបក្សហ្នឹង ញុះញង់ប្រជាពលរដ្ឋឲ្យមានបញ្ហា ព្រោះខ្លាចបាត់បង់ផលប្រយោជន៍វាហ្នឹង»។
ជុំវិញបញ្ហានេះ ប្រធានគណបក្សសម្ព័ន្ធដើម្បីប្រជាធិបតេយ្យ លោក ខឹម វាសនា និយាយថា លោកមិនមានដីសូម្បីមួយដុំប៉ិនកងដៃនៅភូមិតេជោអភិវឌ្ឍន៍ ឃុំតេជោអភិវឌ្ឍន៍ ស្រុកឈូក ខេត្តកំពត នោះឡើយ។ លោកបន្ថែមថា ការធ្វើការតវ៉ា គឺជាសិទ្ធិសេរីភាពរបស់ពលរដ្ឋកម្ពុជា៖ «អត់មានដីយើងអីនៅហ្នឹងផង មានតែដីរបស់ប្រជាពលរដ្ឋរាប់ពាន់គ្រួសារ ម៉េចក៏ថាដីរបស់សម្ព័ន្ធទៅវិញ»។
អ្នកនាំពាក្យសាលាក្រុងភ្នំពេញ លោក ឡុង ឌីម៉ង់ និយាយថា ការតវ៉ារបស់ប្រជាពលរដ្ឋទាំងនោះ គឺខុសច្បាប់ ព្រោះពលរដ្ឋទាំងនោះមិនបានដាក់ពាក្យសុំច្បាប់ពីសាលាក្រុងភ្នំពេញ ដើម្បីតវ៉ាជាមុន ម្ល៉ោះហើយអាជ្ញាធរមិនអនុញ្ញាតឲ្យពលរដ្ឋបន្តធ្វើការតវ៉ានោះទេ ហើយអាជ្ញាធរនឹងចាត់វិធានការតាមផ្លូវច្បាប់។
ទោះបីជាមានការបញ្ជាក់យ៉ាងនេះក្តី តំណាងប្រជាពលរដ្ឋ និងប្រជាជនទាំងនោះ អះអាងថា អាជ្ញាធរខេត្តកំពត ត្រូវតែដោះលែងតំណាងពលរដ្ឋពីររូបវិញ និងប្រគល់ដីនោះឲ្យពួកគាត់ជាកំហិត បើពុំនោះទេ ពួកគាត់នឹងមិនចាកចេញពីទីលានប្រជាធិបតេយ្យឡើយ។
លោក លី គីមហុង៖ «ទេអាការបំបែកហ្នឹង លោកត្រូវមើលពីហេតុផល បើចេះតែបំបែក បំបែកឲ្យងាប់ទាំងអស់គ្នាតាហ្មងទៅ»។
តំណាងប្រជាពលរដ្ឋ និងពលរដ្ឋប្រមាណជិត ៤០០នាក់ដែលមកតវ៉ានោះ បានចាកចេញពីទីលានប្រជាធិបតេយ្យហើយនៅម៉ោងប្រហែលជិត ៦ល្ងាចថ្ងៃទី១៣ ខែកញ្ញា នេះ។ ទោះបីជាយ៉ាងនេះក្តី តំណាងប្រជាពលរដ្ឋ លោក លី គីមហុង បញ្ជាក់ថា ពលរដ្ឋនៅតែបន្តធ្វើការតវ៉ារហូត លុះត្រាណាដោះលែងតំណាងរបស់ខ្លួន គឺលោក លី គីមហ៊ុយ និង លី គីមហ៊ា ហើយអាជ្ញាធរខេត្តកំពត ត្រូវប្រគល់ដីជូនពលរដ្ឋវិញ ទើបពួកគាត់ឈប់តវ៉ា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។