ប្រធានក្រុមហ៊ុន ផានអ៊ីម៉ិច (PhanImex) លោកស្រី ស៊ុយ សុផាន ចូលបំភ្លឺនៅរដ្ឋសភាតាមការកោះហៅរបស់គណៈកម្មការទី១០នៃរដ្ឋសភា អំពីជម្លោះជាមួយពលរដ្ឋបុរីកីឡា នៅរសៀលថ្ងៃទី១៦ តុលា។
ប្រធានក្រុមហ៊ុន ផានអ៊ីម៉ិច បានទទួលកម្មសិទ្ធិអភិវឌ្ឍតំបន់បុរីកីឡា លើផ្ទៃដី ៤,៦ហិកតារ ក្រោមកិច្ចសន្យាសាងសង់អគារចំនួន១០ ជូនពលរដ្ឋនៅតំបន់នោះរស់នៅនឹងកន្លែងលើទំហំដីប្រមាណ ២ហិកតារ តែក្រុមហ៊ុនបានសាងសង់អគារត្រឹមតែ ៨អគារ ដែលនៅសល់ពលរដ្ឋ ១៥៤គ្រួសារ គ្មានលំនៅឋានស្នាក់នៅ និងរងការបណ្ដេញចេញដោយបង្ខំកាលពីដើមឆ្នាំ២០១២។
ប្រធានគណៈកម្មការទី១០នៃរដ្ឋសភា ទទួលបន្ទុកការងារអង្កេត បោសសម្អាត និងប្រឆាំងអំពើពុករលួយ លោក ហូរ វ៉ាន់ បានឲ្យដឹងថា លោកស្រី ស៊ុយ សុផាន បានលើកហេតុផលថា ក្រុមហ៊ុនលោកស្រីទទួលការខាតបង់ក្នុងការអភិវឌ្ឍតំបន់នោះ ទើបលោកស្រីមិនព្រមធ្វើតាមការសន្យា និងទាមទារដីដែលនៅសល់ពីការសាងសង់អគារនោះទៀត៖ «លោកជំទាវត្រូវដឹងថា ដីរបស់ក្រុមហ៊ុន ៤,៦ហិកតារ ដីដែលត្រូវសាងសង់ឲ្យពលរដ្ឋតែ ២ហិកតារទេ ឯដី ២,៦ហិកតារ ជាសម្បត្តិទ្រព្យរបស់ក្រុមហ៊ុនយកទៅរកទទួលទាន ពេលដែលសំណង់ស៊ីម៉ងត៍ អ្វីៗឡើងថ្លៃ ដីរបស់គាត់ក៏ឡើងថ្លៃដែរ ហើយគាត់បានក៏សង់ផ្ទះល្វែងជាលក់ជាច្រើនដែរ ហើយគាត់ក៏បានលក់ដីជាច្រើនផ្នែកដែរ ដូច្នេះទាំងអស់ហ្នឹង ខ្ញុំគិតថាក្រុមហ៊ុនមិនបានជម្រាបជូនដល់យើងខ្ញុំនូវចំណូលសរុបរបស់ក្រុមហ៊ុន ក្នុងកិច្ចសន្យាបុរីកីឡា ទាំងមូលលើផ្ទៃដីចំនួន ៤,៦ហិកតារទេ»។
ទោះជាយ៉ាងណាក៏ដោយ លោក ហូរ វ៉ាន់ បញ្ជាក់ថា លោក និងក្រុមការងារជំនាញ នឹងបន្តដោះស្រាយគ្រប់វិធី ដើម្បីពន្លឿនឲ្យ លោកស្រី ស៊ុយ សុផាន សង់អគារឲ្យគ្រប់ចំនួន និងឆាប់រហ័សតាមកិច្ចសន្យាចំពោះមុខច្បាប់ ដោយមិនឲ្យ លោកស្រី ស៊ុយ សុផាន យកលេសថាក្រុមហ៊ុនខ្លួនខាតបង់អ្វីនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។