បញ្ហាអាជ្ញាធរជាតិព្រះវិហារ រួមនឹងសាលាខេត្ត បណ្ដេញប្រជាពលរដ្ឋនៅតំបន់ស្វាយជ្រុំ ឱ្យរុះរើលំនៅឋាន ហើយយកដីធ្វើជាតំបន់ទ្រនាប់ឧទ្យានជាតិប្រាសាទព្រះវិហារ កាលពីពីរឆ្នាំមុន បានកម្រើកឡើងវិញហើយនៅពេលនេះ។ អតីតក្រុមអ្នកភូមិស្វាយជ្រុំ ជាច្រើន កំពុងលើកគ្នាទៅទីក្រុងភ្នំពេញ ដើម្បីទាមទារឱ្យរដ្ឋាភិបាលប្រគល់ដីធ្លី និងអនុញ្ញាតឱ្យពួកគេបានវិលត្រឡប់ទៅរស់នៅទីនោះវិញ។
ប៉ូលិសក្រុងព្រះវិហារ បានស្ទាក់ឃាត់រថយន្តមួយគ្រឿង ដឹកប្រជាពលរដ្ឋជាច្រើននាក់មកពីភូមិធម្មជាតិសម្ដេចតេជោ នៃឃុំស្រអែម ស្រុកជាំក្សាន្ត ព្រមទាំងប្រគល់ក្រុមអ្នកតវ៉ាដីធ្លីចំនួន ៦នាក់ ដែលគ្រោងធ្វើដំណើរទៅទីក្រុងភ្នំពេញ ប្រគល់ឱ្យអាជ្ញាធរមូលដ្ឋាន នាំវិលត្រឡប់ទៅលំនៅឋានវិញ កាលពីព្រឹកថ្ងៃអង្គារ ទី២ ខែកញ្ញា។
តំណាងប្រជាពលរដ្ឋដែលជាអតីតរស់នៅតំបន់ស្វាយជ្រុំ គឺលោក ផាន់ ធឿន។ លោកអះអាងកាលពីរសៀលថ្ងៃអង្គារ ទី២ ខែកញ្ញា ថា រយៈពេល ២-៣ថ្ងៃជាប់គ្នាមកនេះ អតីតអ្នកភូមិស្វាយជ្រុំ ជាច្រើនគ្រួសារ បាននាំគ្នាឡើងទៅទីក្រុងភ្នំពេញជាបន្តបន្ទាប់ ដើម្បីតវ៉ាសុំឱ្យរដ្ឋាភិបាលប្រគល់ដីដែលពួកគេធ្លាប់រស់នៅមកវិញ។ តំណាងដដែលអះអាងថា កាលពីព្រឹកថ្ងៃអង្គារ ប៉ូលិសសង្កាត់ប៉ាលហាល ក្រុងព្រះវិហារ បានកាក់រថយន្តមួយគ្រឿង ដែលដឹកអតីតអ្នកភូមិស្វាយជ្រុំ ដែលគ្រោងឡើងទៅតវ៉ា នៅទីក្រុងភ្នំពេញ ហើយបានហៅអាជ្ញាធរឃុំស្រអែម ឱ្យនាំអ្នកភូមិចំនួន ៦នាក់វិលត្រឡប់ទៅផ្ទះវិញ៖ «គេមកដល់នេះខ្លះហើយ ប៉ុន្តែមួយចំនួននៅមិនទាន់មកដល់ទេ។ ថ្ងៃនេះ ឡើងមកបន្តបន្ទាប់ទៀត ប៉ុន្តែដោយមានការទប់ស្កាត់ ប្រជាពលរដ្ឋខ្លាច។ ក្នុងមួយឡាន គឺគេចាប់បញ្ជូនទៅវិញអស់ហើយ»។
តំណាងអ្នកភូមិបញ្ជាក់ថា ពួកគេជាច្រើនរយគ្រួសារធ្លាប់រស់នៅតំបន់ស្វាយជ្រុំ ចាប់តាំងពីឆ្នាំ២០០០ មក ដោយមានដីស្រែចម្ការសម្រាប់ធ្វើចិញ្ចឹមជីវិត ក៏ប៉ុន្តែកាលពីឆ្នាំ២០១២ អាជ្ញាធរជាតិព្រះវិហារ និងសាលាខេត្ត បានបណ្ដេញពួកគេ ដោយចែកដីនៅភូមិធម្មជាតិសម្ដេចតេជោ ទំហំ ៣០ម៉ែត្រក្នុង១គ្រួសារ ដោយមិនមានដីធ្វើស្រែចម្ការចិញ្ចឹមជីវិតទេ។
សមត្ថកិច្ចក្រុងព្រះវិហារ បដិសេធថា គេមិនបានឃាត់ ឬក៏ចាប់ខ្លួនក្រុមអ្នកតវ៉ាដីធ្លីណាម្នាក់ ដែលគ្រោងឡើងទៅតវ៉ានៅទីក្រុងភ្នំពេញ បញ្ជូនត្រឡប់ទៅលំនៅឋានវិញ ដូចការចោទប្រកាន់នោះទេ។
អធិការស្ដីទីប៉ូលិសក្រុងព្រះវិហារ លោក គង់ គា មានប្រសាសន៍ថា កាលពីព្រឹកថ្ងៃអង្គារ ប៉ូលិសសង្កាត់ប៉ាលហាល បានឃាត់រថយន្តដើម្បីត្រួតពិនិត្យបច្ចេកទេស ក៏ប៉ុន្តែមិនមានឃាត់អ្នកដំណើរណាម្នាក់ទេ។ លោកអធិការស្ដីទី បញ្ជាក់ថា ក្នុងចំណោមរថយន្តដែលប៉ូលិសឃាត់ត្រួតពិនិត្យបច្ចេកទេស កាលពីព្រឹកថ្ងៃអង្គារ នោះ គឺមានរថយន្ត១គ្រឿងដឹកអ្នកដំណើរប្រមាណ ១០នាក់ពីឃុំស្រអែម ស្រុកជាំក្សាន្ត ហើយនៅពេលប៉ូលិសឃាត់រថយន្តនោះ គឺអ្នកភូមិបានហៅមេភូមិរបស់គេ ឱ្យទៅទទួលត្រឡប់ទៅផ្ទះវិញប៉ុណ្ណោះ មិនមែនប៉ូលិសបញ្ជូនដោយបង្ខំឡើយ៖ «មានការឃាត់មនុស្សឯណា មនុស្សគាត់ទៅធម្មតា គាត់ដើរទៅណា គាត់ធ្វើអ្វីស្រេចតែគាត់ទេតើ។ ជិះឡានហ្នឹងក្នុងនោះមាន ៩នាក់ ហើយមានក្មេងអាយុប្រហែល ៦ឆ្នាំហ្នឹងម្នាក់ ៥ឆ្នាំហ្នឹងម្នាក់ មកជាមួយហ្នឹង ហើយមិនទៅឃាត់មនុស្សឯណា!»។
ទោះយ៉ាងណា អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តព្រះវិហារ លោក ឡោ ចាន់ អះអាងថា ប៉ូលិសក្រុងព្រះវិហារ ពិតជាបានស្ទាក់ឃាត់រថយន្ត ព្រមទាំងប្រគល់ក្រុមអ្នកតវ៉ាដីធ្លី ឱ្យទៅអាជ្ញាធរឃុំស្រអែម យកត្រឡប់ទៅលំនៅឋានវិញមែន៖ «ខ្ញុំបានតាមទៅសង្កាត់ផ្ទាល់ គឺមិនឱ្យ ១០នាក់ហ្នឹង ចេញទៅណាមកណាទេ គឺឱ្យនៅនឹងប៉ុស្តិ៍រហូត សូម្បីតែក្មេងអាយុប្រហែល ៦-៧ឆ្នាំដែលគ្នាហេវចង់ងាប់ ក៏មិនឱ្យចេញទៅណាដែរ»។
លោក ឡោ ចាន់ បានហៅសកម្មភាពរបស់ប៉ូលិសក្រុងព្រះ វិហារ ដែលឃាត់រថយន្ត ហើយបញ្ជូនប្រជាពលរដ្ឋអ្នកតវ៉ាដីធ្លី ឱ្យអាជ្ញាធរនាំត្រឡប់ទៅផ្ទះវិញដោយបង្ខំនោះ ថាគឺជាការរំលោភសិទ្ធិកុមារ និងរំលោភសិទ្ធិមនុស្សយ៉ាងធ្ងន់ធ្ងរ ព្រមទាំងជាការគំរាមកំហែងផ្នែកស្មារតីទៅលើប្រជាពលរដ្ឋផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។