ពលរដ្ឋ​នៅ​ខេត្ត​ព្រះវិហារ​ដាក់​ញត្តិ​ទៅ​ក្រសួង​ដែនដី​សុំ​អន្តរាគមន៍​រឿង​ដីធ្លី​ជាមួយ​ក្រុមហ៊ុន​រ៉ែ​មាស

ដោយ ហេង សកល
2018-01-12
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ផែនទី​ខេត្ត​ព្រះវិហារ
ផែនទី​ខេត្ត​ព្រះវិហារ
Photo: RFA

ប្រជាពលរដ្ឋ ៧​នាក់​តំណាង​ឱ្យ​ពលរដ្ឋ ៥៦​គ្រួសារ មក​ពី​ស្រុក​រវៀង ខេត្ត​ព្រះវិហារ នៅ​ថ្ងៃ​សុក្រ ទី​១២ ខែ​មករា បាន​ដាក់​ញត្តិ​ទៅ​ក្រសួង​រៀបចំ​ដែនដី នគរូបនីយកម្ម និង​សំណង់ ដើម្បី​ស្នើ​សុំ​ឱ្យ​ជួយ​ដោះស្រាយ​វិវាទ​ដីធ្លី​របស់​ពួកគាត់​ជាមួយ​ក្រុមហ៊ុន​ឯកជន ដែល​មាន​អ្នក​មាន​អំណាច​នៅ​ពី​ក្រោយ​ខ្នង។

ខ្លឹមសារ​នៃ​ញត្តិ​ដែល​ក្រុម​ពលរដ្ឋ​ដាក់​ជូន​ក្រសួង​រៀបចំ​ដែនដី​នោះ គឺ​ស្នើ​សុំ​អន្តរាគមន៍​ពី​ស្ថាប័ន​ជំនាញ​មួយ​នេះ ជុំវិញ​រឿង​វិវាទ​ដីធ្លី​របស់​ពួកគាត់​ជាមួយ​ក្រុមហ៊ុន ឌែលខម (Del com Cambodia) ដែល​ស្ថិត​នៅ​ក្នុង​តំបន់​រំដេង ភ្នំ​លង់ ឃុំ​រម្យទម ស្រុក​រវៀង ខេត្ត​ព្រះវិហារ។

​តំណាង​ពលរដ្ឋ​លោក ទុយ ឆេង បញ្ជាក់​ប្រាប់​អាស៊ីសេរី​ថា ក្រុមហ៊ុន ឌែលខម ដែល​មាន​លោក ហ៊ីង ប៊ុនហៀង មេបញ្ជាការ​រង​នៃ​កង​អង្គរក្ស​លោក ហ៊ុន សែន ជា​ខ្នង​បង្អែក បាន​រំលោភ​យក​ដីធ្លី​របស់​ពួកគាត់​តាំង​ពី​ឆ្នាំ​២០០២ មក។ លោក​បន្ត​ថា ប្រជាពលរដ្ឋ​បាន​ស្នើ​សុំ​អន្តរាគមន៍​ជា​ច្រើន​ដង​ទៅ​អាជ្ញាធរ​មូលដ្ឋាន និង​អាជ្ញាធរ​ខេត្ត តែ​អាជ្ញាធរ​ទាំង​នោះ​មិន​បាន​ជួយ​ដោះស្រាយ​ពួកគាត់​ឡើយ តែ​បែរ​ជា​គាំទ្រ​ក្រុមហ៊ុន​ទៅ​វិញ។ ហេតុ​នេះ​ហើយ​ទើប​ពួកគាត់​សម្រេច​ចិត្ត​ឡើង​មក​ភ្នំពេញ ដើម្បី​ស្នើ​សុំ​ដល់​អាជ្ញាធរ​ជំនាញ​ថ្នាក់​ជាតិ៖ «ប្រជាពលរដ្ឋ​មិន​អស់​ចិត្ត និង​មិន​សុខ​ចិត្ត​ គឺ​ដោយសារ​ប្រជា​ពលរដ្ឋ​រស់​នៅ​លើ​ដីភូមិករ​របស់​ខ្លួន ហើយ​ម្យ៉ាង​ទៀត​ដី​នោះ​ជា​របស់​ជន​ជាតិ​ដើម​ភាគ​តិច​កួយ ដែល​ពួក​គាត់​ធ្លាប់​រស់​នៅ​តាំងពី​ដូន​តា​មក។ តែ​បច្ចុប្បន្ន​ហ្នឹង វា​ទៅ​ជា​ដី​របស់​ក្រុមហ៊ុន​ទៅ​វិញ មិន​មែន​ជា​ដីពលរដ្ឋ»

​តំណាង​ពលរដ្ឋ​បញ្ជាក់​ថា ខាង​មន្ត្រី​ក្រសួង​រៀបចំ​ដែនដី បាន​ទទួល​យក​ញត្តិ​របស់​ពលរដ្ឋ និង​បាន​ប្រាប់​ពួគគាត់​ឱ្យ​នាំ​គ្នា​ទៅ​ជួប​តំណាង​ក្រសួង​នៅ​ថ្ងៃ​ទី​២៨ ខែ​មករា ខាង​មុខ​នេះ។ ដូច្នេះ​លោក​សង្ឃឹម​ថា ក្រសួង​រៀបចំ​ដែនដី​នឹង​ជួយ​អន្តរាគមន៍​ដោះស្រាយ​បញ្ហា​នេះ ដើម្បី​ឱ្យ​ពួកគាត់​អាច​មាន​លទ្ធផល​ចូល​ទៅ​ធ្វើស្រែ​ចម្ការ​នៅ​លើ​ដី​នោះ​វិញ៖ «សុំ​ឱ្យ​អាជ្ញាធរ និង​លោក​រដ្ឋមន្ត្រី (ជា សុផារ៉ា) ឱ្យ​គាត់​ចេញ​ជា​ប័ណ្ណ​កម្មសិទ្ធិ​ពេញលេញ តែ​គាត់​មិន​ទាន់​ឆ្លើយ​តប​ទេ។ គាត់​គ្រាន់​តែ​ប្រាប់​ឱ្យ​ថា​ ចាំ​ដល់​ថ្ងៃ​ទី​២៨ (មករា) គាត់​នឹង​ទៅ​ធ្វើ​សន្និបាត​នៅ​មន្ទីរ​សុរិយោដី​ខេត្ត​ព្រះវិហារ គាត់​ឱ្យ​ប្រជាពលរដ្ឋ​ខ្ញុំ​ហ្នឹង​​ទៅ​ជួប»

​តំណាង​ពលរដ្ឋ​អះអាង​ថា ពួកគាត់​ចំនួន ៥៦​គ្រួសារ​បាន​រស់​នៅ​លើ​ទីតាំង​ដី​ទំនាស់​នោះ តាំង​ពី​ឆ្នាំ១៩៩៧ ដោយ​មាន​ការ​ទទួល​ស្គាល់​ពី​អាជ្ញាធរ និង​មាន​ឯកសារ​កាន់​កាប់​ដីធ្លី​ត្រឹមត្រូវ ក៏ប៉ុន្តែ​ចាប់​តាំង​ពី​ឆ្នាំ​២០០២ មក ក្រុមហ៊ុន ឌែលខម បាន​ព័ទ្ធ​របង​ការដ្ឋាន​រំលោភ​យក​ដីចម្ការ​របស់​ពួកគាត់​អស់​ចំនួន ១២៧​ហិកតារ ពោល​គឺ​នៅ​សល់​តែ ២០​ហិកតារ​ទៀត​ប៉ុណ្ណោះ ដែល​ពួកគាត់​អាច​នៅ​បង្កបង្កើនផល​បាន។ បញ្ហា​នេះ​បាន​អូស​បន្លាយ​ជា​ច្រើន​ឆ្នាំ ហើយ​មាន​ការ​ប៉ះទង្គិច​រវាង​ក្រុមហ៊ុន និង​ពលរដ្ឋ​ជា​ច្រើន​ដង​នៅ​ពេល​ដែល​ពលរដ្ឋ​ចូល​ទៅ​ធ្វើ​ចម្ការ។

​អាស៊ីសេរី មិន​អាច​ទាក់ទង​ក្រុមហ៊ុន ឌែលខម និង​លោក ហ៊ីង ប៊ុនហៀង ដើម្បី​សុំ​ការ​បកស្រាយ​អំពី​រឿង​នេះ​បាន​ទេ នៅ​ថ្ងៃ​ទី​១២ ខែ​មករា។

​អ្នក​សម្របសម្រួល​កម្មវិធី​កសាង​សមត្ថភាព​សហគមន៍ និង​តស៊ូ​មតិ​នៃ​អង្គការ​ពន្លក​ខ្មែរ លោក ប៉ិក សោភ័ណ ដែល​ធ្លាប់​បាន​ចុះ​ទៅ​អង្កេត​រឿង​នេះ​ដោយ​ផ្ទាល់​ថ្លែង​ថា ទំនាស់​ដីធ្លី​នេះ​គឺ​ជា​រឿង​ពិបាក​ដោះស្រាយ ព្រោះ​ដី​ទំនាស់​ជា​ដី​រ៉ែ​មាស។ ម្យ៉ាង​វិញ​ទៀត ក្រុមហ៊ុន​ដែល​បង្ក​ទំនាស់​ជាមួយ​ពលរដ្ឋ​មាន​មន្ត្រី​មាន​អំណាច​ក្នុង​ជួរ​រដ្ឋាភិបាល​ធ្វើ​ជា​ខ្នង​បង្អែក ហើយ​ផល​ដែល​បាន​ពី​ការ​ធ្វើ​អាជីវកម្ម​រ៉ែ​មាស​នោះ ក៏​មាន​ចំណែក​របស់​មន្ត្រី​ទាំង​នោះ​ដែរ។ លោក​បន្ត​ថា តំបន់​ដែល​ក្រុមហ៊ុន ឌែលខម កំពុង​ធ្វើ​អាជីវកម្ម​នោះ មាន​ការ​យាមកាម​តឹងរ៉ឹង​ជា​ខ្លាំង​មិន​ឱ្យ​ប្រជាពលរដ្ឋ និង​អង្គការ​សង្គម​ស៊ីវិល​ចេញ​ចូល ឬ​ទៅ​ក្បែរៗ​តំបន់​នោះ​បាន​ឡើយ៖ «កុំ​ថា​ឡើយ​ដល់​ចូល​ក្នុង​ទីតាំង​ក្រុមហ៊ុន គ្រាន់​តែ​នៅ​ខាង​ក្រោ​បរិវេណ​ដែល​គេ​កំពុង​តែ​រកមាស​ហ្នឹង​ ក៏​មិន​អាច​ចូល​ទៅ​បាន​ដែរ គេ​មាន​ទាហាន​ មាន​ប៉ូលីស​យាម​តឹងតែង​ណាស់​ អ៊ីចឹង​ការ​ស្នើ​សុំ​របស់​ប្រជាពលរដ្ឋ​ជាង ៥០​គ្រួសារ​នោះ ជា​រឿង​មួយ​ដែល​រដ្ឋាភិបាល​គួរ​តែ​ពិនិត្យ​មើល​ការ​អនុវត្ត​របស់​អាជ្ញាធរ​ថ្នាក់​ក្រោម​ហ្នឹង មិន​អាច​ឱ្យ​ពួក​គេ​ធ្វើ​អ្វី​តាម​តែ​ចិត្ត​បាន​ទេ។ អ៊ីចឹង​ត្រូវ​មើល​អំពី​ការ​អនុវត្ត​ច្បាប់ និង​គោលការណ៍​អភិបាលកិច្ច​នៅ​ថ្នាក់​ខាង​ក្រោម​ផង បើ​មិន​ដូច្នេះ​ទេ ប្រជាពលរដ្ឋ​នឹង​មិន​ស្ងប់​ទេ គាត់​នឹង​មាន​ការ​ទាម​ទារ​បន្ត​ទៅ​ទៀត»

​តំណាង​ប្រជាពលរដ្ឋ​អះអាង​ថា ពួកគាត់​នឹង​មិន​បញ្ឈប់​សកម្មភាព​ស្វែង​រក​ដំណោះស្រាយ​រឿង​ដីធ្លី​នេះ​ទេ។ ប្រសិនបើ​មិន​មាន​ដំណោះស្រាយ​ត្រឹមត្រូវ និង​សមរម្យ​ទេ​នោះ ពួកគាត់​នឹង​បន្ត​ដាក់​ញត្តិ និង​ពាក្យ​បណ្ដឹង​ទៅ​ស្ថាប័ន​ពាក់ព័ន្ធ​ផ្សេង​ទៀត​រហូត​ទាល់​តែ​មាន​ដំណោះស្រាយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
  • បោះពុម្ព
  • ចែករំលែក
  • អ៊ីម៉ែល
គេហទំព័រ​ទាំងមូល