អង្គការពន្លកខ្មែរ ឱ្យដឹងថា បច្ចុប្បន្នមានប្រជាពលរដ្ឋចំនួនជាង ៨០០គ្រួសារ ដែលរស់នៅស្រុកត្បែងមានជ័យ ស្រុកជ័យសែន និងស្រុកឆែប របស់ខេត្តព្រះវិហារ កំពុងទទួលរងការប៉ះពាល់ដោយសារតែក្រុមហ៊ុនដីសម្បទានសេដ្ឋកិច្ចឈូសរំលោភយកដីស្រែចម្ការរបស់ពួកគេ។
ក្រុមប្រជាពលរដ្ឋទាំងនោះ បានប្រឹងប្រែងតាមមធ្យោបាយជាច្រើនរយៈពេល ៤ឆ្នាំមកហើយដើម្បីឱ្យអាជ្ញាធររដ្ឋាភិបាលជួយដោះស្រាយទៅលើការប៉ះពាល់ និងបាត់បង់ដីធ្លីរបស់ពួកគេ ប៉ុន្តែមិនមានលទ្ធផលអ្វីប្រសើរនៅឡើយទេ។
ប្រជាពលរដ្ឋដែលជាសហគមន៍ទំនាស់ដីធ្លី នៅក្នុងស្រុកចំនួន៣ របស់ខេត្តព្រះវិហារ មានគម្រោងនឹងធ្វើពិធីបន់ស្រន់អ្នកតា បំណងសូមឱ្យជួយថែរក្សាពួកគេឱ្យមានសេចក្ដីសុខចំរើន ព្រមទាំងដាក់បណ្ដាសាដល់ក្រុមហ៊ុនដែលកំពុងតែរំលោភយកដីធ្លីរបស់ពួកគេផង នៅថ្ងៃទី២៣ ខែកុម្ភៈ ខាងមុខ។
ក្រុមអ្នកភូមិដែលរស់នៅស្រុកឆែប ស្រុកត្បែងមានជ័យ និងស្រុកជ័យសែន គ្រោងនឹងរៀបចំពិធីសែនអ្នកតានេះនៅក្នុងថ្ងៃ និងម៉ោងដំណាលគ្នា ប៉ុន្តែទីកន្លែងប្រារព្ធផ្សេងៗពីគ្នា។
តំណាងសហគមន៍ទំនាស់ដីធ្លីជនជាតិដើមភាគតិចកួយ នៅឃុំប្រមេរ ស្រុកត្បែងមានជ័យ គឺអ្នកស្រី នួន ម៉ុន។ អ្នកស្រីមានប្រសាសន៍នៅរសៀលថ្ងៃអង្គារ ទី២១ ខែកុម្ភៈ ថា ក្រុមរបស់អ្នកស្រីនឹងរៀបចំពិធីឡើងអ្នកតាដែលថែរក្សាព្រៃ រក្សាប្រាសាទបុរាណ ព្រមទាំងបញ្ចូលរូបផង ឱ្យលោកមកជួបប្រជាពលរដ្ឋដែលកំពុងតែរងទុក្ខ ដោយការបាត់បង់ដីធ្លីដើម្បីឱ្យជួយថែរក្សាឱ្យបានសុខសាន្តទាំងអស់គ្នានៅថ្ងៃទី២៣ ខែកុម្ភៈ ខាងមុខ៖ «អ្នកតារក្សាព្រៃ រក្សាភ្នំ រក្សាប្រាសាទបុរាណនៅកន្លែងក្រុមហ៊ុនដីសម្បទានឱ្យលោកអញ្ជើញចូលមកដើម្បីបានជួបបងប្អូនដែលមានទុក្ខលំបាក»។
តំណាងសហគមន៍ជនជាតិដើមភាគតិច នៅឃុំប្រមេរ ម្នាក់ទៀតដែលគ្រោងនឹងដឹកនាំធ្វើពិធីសែនអ្នកតានៅឯទីវាល អ្នកស្រី ស៊ិន សាំ មានប្រសាសន៍ថា ក្រុមរបស់អ្នកស្រីនឹងធ្វើពិធីនេះនៅជិតកន្លែងដែលក្រុមហ៊ុនដាំអំពៅរបស់ចិន កំពុងតែឈូសឆាយរំលោភយកដីស្រែចម្ការ។ ពិធីនោះនឹងមានមាន់ ជ្រូក ដើម្បីសែនថ្វាយអ្នកតា ម្ចាស់ទឹកម្ចាស់ដីឱ្យសេពសោយទៅតាមប្រពៃណី ព្រមទាំងដាក់បណ្ដាសាដល់អ្នករំលោភយកដីធ្លីផង៖ «អ្នកណាធ្វើអាក្រក់ រំលោភយកទឹកដីយើង ក៏ឱ្យអ្នកតាកាច់ទៅ។ ដោយសារថា ផ្លូវច្បាប់ដោះស្រាយមិនបាន ទើបក្រុមរបស់ខ្ញុំធ្វើពិធីតាមជំនឿដូច្នេះ»។
ទោះជាយ៉ាងណា អាស៊ីសេរីមិនអាចសុំការអធិប្បាយពីអភិបាលខេត្តព្រះវិហារ លោក អ៊ុន ចាន់ដា ជុំវិញរឿងដែលអ្នកភូមិនាំគ្នាធ្វើពិធីសែនអ្នកតា ព្រមទាំងដាក់បណ្ដាសាទៅលើអ្នករំលោភដីធ្លីនោះបានថាយ៉ាងណានៅឡើយ នៅរសៀលថ្ងៃទី២១ ខែកុម្ភៈ ដោយសារតែលោកមិនលើកទូរស័ព្ទ។
អង្គការពន្លកខ្មែរ បានឱ្យដឹងថា ក្នុងរយៈពេល ៤ឆ្នាំមកនេះ គេបានស្រាវជ្រាវរកឃើញប្រជាពលរដ្ឋនៅស្រុកត្បែងមានជ័យ ស្រុកឆែប និងស្រុកជ័យសែន ជាង ៨០០គ្រួសារ បានរងការប៉ះពាល់ និងបាត់បង់ដីស្រែចម្ការប្រមាណជាង ៦.០០០ហិកតារ ដោយសារតែក្រុមហ៊ុនដីសម្បទានសេដ្ឋកិច្ចរបស់ចិន ឈូសឆាយយកទៅដាំអំពៅ។
មន្ត្រីតស៊ូមតិរបស់អង្គការពន្លកខ្មែរ លោក ប៉ិក សោភ័ណ យល់ថា ប្រហែលជាពលរដ្ឋមានទំនាស់ដីធ្លីទាំងនោះគ្មានភាពកក់ក្ដៅក្នុងការដោះស្រាយតាមផ្លូវអាជ្ញាធរ និងប្រព័ន្ធច្បាប់តទៅទៀត ទើបពួកគេបង្ខំចិត្តយកពិធីជំនឿអរូបិយមកបែរបន់ដូច្នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។