ទំនាស់ដីធ្លីរវាងក្រុមហ៊ុនដីសម្បទានសេដ្ឋកិច្ច ជាមួយនឹងប្រជាពលរដ្ឋនៅខេត្តព្រះវិហារ បានចាប់ផ្ដើមកក្រើកឡើងវិញហើយ បន្ទាប់ពីការតវ៉ារឿងទំនាស់ដីធ្លីបានស្ងប់ស្ងាត់មួយរយៈពេលខ្លីមក។ កាលពីព្រឹកថ្ងៃពុធ ទី២៨ ខែធ្នូ អ្នកភូមិបង្កន នៅស្រុករវៀង បានចោទប្រកាន់ក្រុមហ៊ុនដីសម្បទានសេដ្ឋកិច្ចឈ្មោះ ភី.អិន.ធី (PNT) ថា បានប្រើគ្រឿងចក្រទៅឈូសរំលោភយកដីស្រែចម្ការរបស់ពួកគេ ព្រមទាំងបង្ខំឱ្យពលរដ្ឋជាម្ចាស់ដីផ្ដិតមេដៃប្រគល់ដីទៅឱ្យក្រុមហ៊ុនផង។
សហគមន៍ភូមិបង្កន ឃុំរៀបរយ បានរិះគន់អាជ្ញាធរឃុំ អាជ្ញាធរស្រុករវៀង និងខេត្តព្រះវិហារថា កំពុងព្រងើយកន្តើយធ្វើមិនដឹងមិនឮចំពោះបញ្ហាដែលក្រុមហ៊ុនដីសម្បទានសេដ្ឋកិច្ច ឈូសរំលោភយកដីស្រែចម្ការរបស់ប្រជាពលរដ្ឋ។
ប្រតិកម្មរបស់អ្នកភូមិនេះ បានកើតមានឡើងនៅពេលដែលគេអះអាងថា ក្រុមហ៊ុនដីសម្បទានសេដ្ឋកិច្ចឈ្មោះ ភី.អិន.ធី កំពុងប្រើគ្រឿងចក្រឈូសរំលោភយកដីស្រែ និងចម្ការជាបន្តបន្ទាប់។
តំណាងសហគមន៍ភូមិបង្កន គឺលោក ស៊ូ ថាល់។ លោកអះអាងនៅព្រឹកថ្ងៃពុធ ទី២៨ ខែធ្នូ ថា ចាប់តាំងពីល្ងាចថ្ងៃទី២៧ ខែធ្នូ មក ក្រុមហ៊ុន ភី.អិន.ធី បានយកគ្រឿងចក្រទៅឈូសរំលោភយកដីស្រែ និងចម្ការរបស់ប្រជាពលរដ្ឋជាបន្តបន្ទាប់។
តំណាងសហគមន៍ដដែលបញ្ជាក់ថា រូបលោក និងអ្នកភូមិទាំងអស់ព្រួយបារម្ភចំពោះការបាត់បង់ដីធ្លី ប្រសិនបើអាជ្ញាធរមិនធ្វើការទប់ស្កាត់ឱ្យទាន់ពេលទេ៖ «នេះកំពុងតែឈូសរំលំឈើដល់កហើយ។ ក្រុមហ៊ុន ភី.អ៊ិន.ធី នេះ កំពុងហៅប្រជាពលរដ្ឋទៅផ្ដិតមេដៃឱ្យក្រុមហ៊ុនដកយកដីធ្លី»។
អ្នកភូមិបង្កន បញ្ជាក់ថា ពួកគេព្យាយាមទប់ស្កាត់ក្រុមហ៊ុនមិនឱ្យឈូសឆាយរំលោភយកដីរបស់ពួកគេជាច្រើនលើកមកហើយ រហូតដល់ក្រុមហ៊ុនប្ដឹងឡើងតុលាការជាច្រើនដងដែរ។ អ្នកភូមិ ១៦០គ្រួសារបង្ហាញក្ដីអស់សង្ឃឹម ប្រសិនបើអាជ្ញាធរឃុំរៀបរយ អាជ្ញាធរស្រុករវៀង និងអាជ្ញាធរខេត្តព្រះវិហារ នៅតែព្រងើយកន្តើយមិនព្រមចេញមុខដោះស្រាយ។
ទោះជាយ៉ាងណា អាស៊ីសេរី មិនអាចស្វែងរកការទាក់ទងមេឃុំរៀបរយ ដើម្បីសុំការបំភ្លឺជុំវិញរឿងនេះបានថាយ៉ាងណានៅឡើយ នៅថ្ងៃទី២៨ ខែធ្នូ។ ចំណែកអភិបាលស្រុករវៀង លោក ឯ សារ៉ូ វិញ ទូរស័ព្ទចូលតែមិនលើក។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តព្រះវិហារ លោក ឡោ ចាន់ មានប្រសាសន៍ថា លោកទើបតែទទួលដំណឹងពីប្រជាពលរដ្ឋថា ក្រុមហ៊ុន ភី.អិន.ធី ទៅឈូសឆាយរំលោភយកដីនៅភូមិបង្កន នោះ ក៏ប៉ុន្តែលោកមិនទាន់បានឃើញស្ថានភាពជាក់ស្ដែងយ៉ាងណានៅឡើយទេ៖ «បើសិនជាមានករណីដូចប្រជាសហគមន៍អះអាងមែន គឺមានន័យថា ក្រុមហ៊ុនបានរំលោភទៅលើកិច្ចព្រមព្រៀង ដែលខ្លួនយល់ព្រមផ្អាកដើម្បីរង់ចាំការដោះស្រាយនោះហើយ»។
សមាគមការពារសិទ្ធិមនុស្សអាដហុក ឱ្យដឹងថា កាលពីឆ្នាំ២០១៥ ក្រុមហ៊ុនដីសម្បទានសេដ្ឋកិច្ចធ្លាប់យកគ្រឿងចក្រទៅឈូសឆាយបណ្ដាលឱ្យប៉ះពាល់ដីស្រែចម្ការរបស់ប្រជាពលរដ្ឋនៅភូមិបង្កន ម្ដងមកហើយ ក៏ប៉ុន្តែនៅពេលដែលអាជ្ញាធរខេត្តព្រះវិហារ ចុះទៅដោះស្រាយគឺក្រុមហ៊ុនក៏ធ្លាប់ធ្វើកិច្ចសន្យាបញ្ឈប់ការឈូសឆាយដើម្បីរង់ចាំការដោះស្រាយដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។