រដ្ឋបាល​ខេត្ត​ព្រះសីហនុ​ឲ្យ​ពលរដ្ឋ​រស់​នៅ​ក្នុង​សង្កាត់​៣​មក​ចុះ​បញ្ជី​ដីធ្លី

ដោយ ដែន អយុធ្យា
2017.06.24
ស៊្រុន ស្រ៊ន់ ៨៥៥ លោក ស៊្រុន ស៊្រន់ អភិបាល​រង​ខេត្ត​ព្រះសីហនុ នៅ​ក្នុង​កិច្ច​ប្រជុំ​ជាមួយ​ប្រជាពលរដ្ឋ​រស់​នៅ​តំបន់​ពយកំពេញ និង​តំបន់​ជុំវិញ​បឹង​ព្រែកទប់ ស្ថិត​ក្នុង​ភូមិ​១ សង្កាត់​លេខ​៣ ក្រុង​ព្រះសីហនុ ចូល​រួម​ប្រជុំ​ផ្សព្វផ្សាយ​នីតិវិធី​ចុះ​បញ្ជី​ដីធ្លី​ជា​លក្ខណៈ​ប្រព័ន្ធ​ជូន​ពលរដ្ឋ​រស់​នៅ​តំបន់​វិនិច្ឆ័យ​ទាំង​ពីរ កាល​ពី​ព្រឹក​ថ្ងៃ​ទី​២៣ ខែ​មិថុនា ឆ្នាំ​២០១៧។ RFA/Den Ayuthea
RFA/Den Ayuthea

ស្ថាប័ន​ពាក់ព័ន្ធ​នៃ​រដ្ឋបាល​ខេត្ត​ព្រះសីហនុ បាន​កំណត់​តំបន់​វិនិច្ឆ័យ​ចំនួន​២ ទីតាំង​ស្ថិត​ក្នុង​ភូមិ​១ សង្កាត់​៣  ប្រកាស​ឲ្យ​ប្រជាពលរដ្ឋ​រស់​នៅ​តំបន់​នេះ ត្រូវ​នាំ​យក​ឯកសារ​ពាក់ព័ន្ធ​មក​ចុះ​បញ្ជី​ដីធ្លី​មាន​លក្ខណៈ​ជា​ប្រព័ន្ធ​ជាមួយ​មន្ត្រី​ជំនាញ​ឲ្យ​បាន​ទាន់​ពេល។

អភិបាលរង​ខេត្ត​ព្រះសីហនុ លោក ស្រ៊ុន ស្រ៊ន់ ប្រកាស​ឲ្យ​ប្រជាពលរដ្ឋ​ដែល​មាន​លំនៅឋាន និង​មាន​ក្បាលដី​នៅ​តំបន់​វិនិច្ឆ័យ​ចុះ​បញ្ជី​ដីធ្លី​មាន​លក្ខណៈ​ជា​ប្រព័ន្ធ នៅ​តំបន់​ពយកំពេញ និង​តំបន់​ជុំវិញ​មាត់​បឹង​ព្រែកទប់ ត្រូវ​នាំ​យក​ឯកសារ​ពាក់ព័ន្ធ​នៃ​ការ​កាន់​កាប់​ដីធ្លី​មក​ចុះ​បញ្ជី​ជាមួយ​មន្ត្រី​ជំនាញ​មន្ត្រី​សុរិយោដី ចាប់​ពី​ពេល​នេះ​ត​ទៅ។

​លោក​ស្នើ​ដល់​អ្នក​ជាប់​ពាក់ព័ន្ធ​ដែល​ត្រូវ​ចុះ​បញ្ជី​ក្បាលដី​នៅ​តំបន់​វិនិច្ឆ័យ​ទាំង​ពីរ ត្រូវ​ចូលរួម​សហការ​ជាមួយ​មន្ត្រី​ជំនាញ រដ្ឋបាល​ខេត្ត​ព្រះសីហនុ ឲ្យ​បាន​ទាំង​អស់​គ្នា​ដើម្បី​ជំរុញ​ឲ្យ​ការងារ​ចុះ​បញ្ជី​ដីធ្លី​នេះ ឈាន​ដល់​ឆាប់​ទទួល​បាន​ប្លង់​កម្មសិទ្ធិ​ស្រប​ច្បាប់​បាន​ឆាប់៖ «កន្លង​មក​នៅ​ខេត្ត​ព្រះសីហនុ មាន​បញ្ហា​ដីធ្លី​កើត​ឡើង​យ៉ាង​ច្រើន​ករណី ដែល​ជា​បន្ទុក​ដល់​អាជ្ញាធរ តុលាការ​រហូត​ដល់​រាជរដ្ឋាភិបាល ដើម្បី​ឲ្យ​ដោះស្រាយ​បន្ត​ចំពោះ​ជម្លោះ​ដីធ្លី​ដែល​កើត​មាន​ឡើង»

លោក ស្រ៊ុន ស្រ៊ន់ លើក​ឡើង​ដូច​នេះ​នៅ​ឱកាស​ចូលរួម​បើក​កិច្ចប្រជុំ​ផ្សព្វផ្សាយ​សេចក្ដី​ប្រកាស​កំណត់​តំបន់​វិនិច្ឆ័យ​ចុះ​បញ្ជី​ក្បាលដី​ជា​លក្ខណៈ​ប្រព័ន្ធ​នៅ​តំបន់​ពយកំពេញ និង​តំបន់​ជុំវិញ​បឹង​ព្រែកទប់ ស្ថិត​ក្នុង​ភូមិ​១ សង្កាត់​៣ ក្រុង​ព្រះសីហនុ កាល​ពី​ព្រឹក​ថ្ងៃ​សុក្រ ទី​២៣ ខែ​មិថុនា។

ប្រជាពលរដ្ឋ​រស់​នៅ​តំបន់​ពយកំពេញ និង​តំបន់​ជុំវិញ​មាត់​បឹង​ព្រែកទប់ រាប់​រយ​នាក់​ដែល​បាន​ចូលរួម​ក្នុង​ពិធី​ផ្សព្វផ្សាយ​នេះ គាំទ្រ​សកម្មភាព​ការងារ​របស់​រដ្ឋបាល​ខេត្ត​ព្រះសីហនុ ពិសេស​លោក​នាយករដ្ឋមន្ត្រី ហ៊ុន សែន ដែល​បាន​ជួយ​អន្តរាគមន៍​អាច​ឲ្យ​ពួកគេ​បាន​ចុះ​បញ្ជី​ដីធ្លី​ស្របច្បាប់​ពេល​នេះ។

ប្រធាន​មន្ទីរ​រៀបចំ​ដែនដី នគរូបនីយកម្ម សំណង់ និង​សុរិយោដី ខេត្ត​ព្រះសីហនុ លោក នួន ប៉ុក បាន​ឲ្យ​ដឹង​ថា នីតិវិធី​សម្រាប់​អនុវត្ត​ទៅ​លើ​ការ​ចុះ​បញ្ជី​ដីធ្លី​មាន​លក្ខណៈ​ជា​ប្រព័ន្ធ​នៅ​តំបន់​វិនិច្ឆ័យ​តំបន់​ពយកំពេញ និង​តំបន់​ជុំវិញ​បឹង​ព្រែកទប់ ចែក​ជា ៥ ដំណាក់កាល​រួម​មាន ដំណាក់​កាល​រៀបចំ​កំណត់​តំបន់​វិនិច្ឆ័យ។ ការ​បង្កើត​គណៈកម្មការ​រដ្ឋបាល​សម្រាប់​ផ្ដល់​ព័ត៌មាន​ជូន​ពលរដ្ឋ​នីតិវិធី​នៃ​ដំណើរ​ការ​ចុះ​បញ្ជី​ដីធ្លី​ជា​លក្ខណៈ​ប្រព័ន្ធ។ ដំណាក់កាល​ប្រតិបត្តិការ​បច្ចេកទេស​គឺ​ការ​ចុះ​ស្រង់​ទិន្នន័យ​នៃ​ការ​កសាង​ប្លង់​សុរិយោដី និង​បញ្ជី​ឈ្មោះ​ម្ចាស់​ដី។

ដំណាក់កាល​បិទ​ផ្សាយ​ជា​សាធារណៈ​នូវ​ឯកសារ​នៃ​ការវិនិច្ឆ័យ​ដើម្បី​បង្ហាញ​ជូន​ប្រជាពលរដ្ឋ​ពី​លទ្ធផល​នៃ​ការ​កសាង​ប្លង់​សុរិយោដី និង​បញ្ជី​ឈ្មោះ​ម្ចាស់​ដី​ដើម្បី​ផ្ទៀងផ្ទាត់​ឈ្មោះ​ស្ថានភាព​គ្រួសារ និង​ក្បាលដី​របស់​ប្រជាពលរដ្ឋ​នៅ​តាម​ទីតាំង​នីមួយៗ ព្រមទាំង​ធ្វើការ​តវ៉ា​ក្នុង​ករណី​មាន​កំហុស​ឆ្គង។ បន្ថែម​លើ​នេះ នឹង​ធ្វើ​របាយការណ៍​ស្ដីពី​លទ្ធផល​នៃ​ការ​បិទ​ផ្សាយ​ជា​សាធារណៈ​នូវ​ឯកសារ​នៃ​ការ​វិនិច្ឆ័យ​របស់​គណៈកម្មការ​រដ្ឋបាល​ជូន​ក្រសួង​ដែនដី ដើម្បី​ពិនិត្យ​សម្រេច និង​ចុង​ក្រោយ គឺ​ការ​ចេញ​វិញ្ញាបនបត្រ​សម្គាល់​ម្ចាស់​អចលនវត្ថុ​ជូន​ប្រជាពលរដ្ឋ។

លោក នួន ប៉ុក ស្នើ​ឲ្យ​អ្នក​មាន​ចំណែក​ក្បាលដី ពិសេស​ប្រជាពលរដ្ឋ​រស់​នៅ​តំបន់​វិនិច្ឆ័យ​ចុះបញ្ជី​ដីធ្លី​ជា​លក្ខណៈ​ប្រព័ន្ធ​ទាំង​ពីរ​ទីតាំង ត្រូវ​នាំ​យក​ឯកសារ​ទាក់ទង​ការ​ចុះ​បញ្ជី​ក្បាល​ដី​នេះ​មក​ជួប​មន្ត្រី​ជំនាញ​ចុះ​បញ្ជី​ដីធ្លី​ចាប់​ពី​ពេល​នេះ​តទៅ៖ «ដើម្បី​សម្រេច​បាន​នូវ​ដំណាក់កាល​ទាំង ៥ ខាង​លើ​នេះ ការ​ចូលរួម​របស់​ម្ចាស់​ដី និង​អ្នក​ពាក់ព័ន្ធ​ជា​កត្តា​ចាំបាច់​ដោយ​ខាង​ពុំ​បាន។ ដំណាក់កាល​ទី​១ ត្រូវ​បាន​សម្រេច​នូវ​ការ​កំណត់​ប្រកាស​តំបន់​ពយកំពេញ និង​តំបន់​ជុំវិញ​បឹង​ព្រែកទប់ ជា​តំបន់​បង្កើត​គណៈកម្មការ​រដ្ឋបាល ហើយ​ពេល​នេះ​ប្រជុំ​ប្រកាស​ដល់​ម្ចាស់​ដី និង​អ្នក​ពាក់ព័ន្ធ​នូវ​ទីតាំង​ដី​ដែល​បាន​កំណត់​ជា​តំបន់​វិនិច្ឆ័យ​នេះ»

មន្ត្រី​ឃ្លាំមើល​ការ​អភិវឌ្ឍ​សង្គម បាន​ស្វាគមន៍​នីតិវិធី​នៃ​ការ​ចុះ​បញ្ជី​ដីធ្លី​ជា​លក្ខណៈ​ប្រព័ន្ធ ជូន​ប្រជាពលរដ្ឋ​នៅ​តំបន់​ពយកំពេញ និង​ជុំវិញ​មាត់​បឹង​ព្រែកទប់ របស់​រដ្ឋបាល​ខេត្ត​ព្រះសីហនុ នៅ​ពេល​នេះ។ ពួកគេ​រំពឹង​ថា តាម​រយៈ​ការ​ចុះ​បញ្ជី​ដីធ្លី​ឈាន​ដល់​ផ្ដល់​ប្លង់​កម្មសិទ្ធិ​ជូន​ពលរដ្ឋ​នេះ នឹង​អាច​ជួយ​កាត់​បន្ថយ​ទំនាស់​ដីធ្លី​នា​មូលដ្ឋាន​នេះ​នៅ​ថ្ងៃ​ខាង​មុខ។

​ប៉ុន្តែ​ទន្ទឹម​គ្នា​នេះ មន្ត្រី​សង្គម​ស៊ីវិល​មួយ​ចំនួន​បង្ហាញ​ការ​សោកស្ដាយ​ចំពោះ​ការ​បាត់បង់​បរិវេណ​ដី​ផ្ទៃ​រង​ទឹក​ភ្លៀង ឬ​ដី​ចំណី​មាត់​បឹង​ព្រែកទប់ ដែល​ពី​មុន​មាន​ផ្ទៃ​ធំ​ទូលាយ​តែ​បច្ចុប្បន្ន​ត្រូវ​បុគ្គល​មាន​អំណាច និង​ឈ្មួញ​លោភលន់​ខ្លះ បាន​ចាក់​ដី​រំលោភ​ធ្វើ​កម្មសិទ្ធិ​ឯកជន​កន្លង​មក​នាំ​ឲ្យ​ផ្ទៃ​បឹង​ព្រែកទប់ រួម​តូច៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។