ពលរដ្ឋមួយគ្រួសារនៅស្រុកព្រះស្ដេច ខេត្តព្រៃវែង ចោទប្រកាន់អាជ្ញាធរមូលដ្ឋានថា ជាដើមចមធ្វើឲ្យរាំងស្ទះការធ្វើប័ណ្ណកម្មសិទ្ធិដីធ្លីស្របច្បាប់របស់ពួកគាត់ ដោយមិនព្រមចេញលិខិតស្នាមបញ្ជាក់អោយនោះទេ។
អ្នកភូមិបញ្ជាក់ថា តាមគំនិតរបស់អាជ្ញាធរនេះក្នុងចេតនាដើម្បីរឹបអូសដីយកដីពីប្រជាពលរដ្ឋធ្វើជាសម្បត្តិសាធារណៈ ដោយពុំមានការយល់ព្រមពីម្ចាស់កម្មសិទ្ធិ។ ប៉ុន្តែមេឃុំបញ្ជាក់ថា ហេតុដែលអាជ្ញាធរពុំទាន់ធ្វើប្លង់ឲ្យដោយសារដីនោះមានទំនាស់មិនទាន់ដាច់ស្រេចនៅឡើយ។
អ្នកភូមិដែលអះអាងថាជាម្ចាស់ដីឲ្យដឹងថា ដីស្រែដែលអាជ្ញាធរមិនធ្វើប្លង់ឲ្យនោះប្រមាណ ៣ហិកតារ ស្ថិតនៅភូមិអន្លង់ចារ ឃុំព្រះស្ដេច ស្រុកព្រះស្ដេច ខេត្តព្រៃវែង ហើយបានបង្កបង្កើនផលតាំងពីឆ្នាំ១៩៧៩ រហូតមក។
លោក កៅ ប៊ុនឈាន រស់នៅភូមិអន្លង់ចារ ថ្លែងនៅថ្ងៃទី២៦ កក្កដា ថា ដីដែលលោកកាន់កាប់នោះអ្នកភូមិក្បែរខាងសុទ្ធតែដឹងថា ជាដីរបស់ខ្លួនកាន់កាប់ជាយូរឆ្នាំមកហើយ ប៉ុន្តែពុំទាន់ធ្វើប្លង់ជាកម្មសិទ្ធិស្របច្បាប់នៅឡើយទេ។ លោកបន្តថា កាលពីខែមិថុនា ឆ្នាំ២០១៤ កន្លងទៅ អាជ្ញាធរចុះវាស់វែងធ្វើប្លង់ដីស្របច្បាប់ដល់ប្រជាពលរដ្ឋនៅតំបន់នោះ។ លោកថាគ្រានោះលោកទៅធ្វើលិខិតបញ្ជាក់ពីអាជ្ញាធរភូមិឃុំជាច្រើនលើកមកហើយ ប៉ុន្តែអាជ្ញាធរតែងតែដោះសាថាយ៉ាងនេះយ៉ាងនោះ ធ្វើឲ្យខកខានពុំបានធ្វើប្លង់កម្មសិទ្ធិស្របច្បាប់នោះទេ។
លោកចាត់ទុកទង្វើរបស់អាជ្ញាធរនេះថា ក្នុងគោលបំណងដើម្បីរឹបអូសយកដីពីប្រជាពលរដ្ឋក្នុងរូបភាពដាក់ជាសម្បត្តិរដ្ឋដោយគ្មានការឯកភាពម្ចាស់ដី៖ «កាលធ្វើប្លង់យើងចុះធ្វើ ដល់ពេលអាជ្ញាធរអត់ឲ្យយើងធ្វើ ហើយយើងអត់យល់ថា ហេតុអ្វីគាត់ឃាត់ គាត់ថាចាំដាក់ដីជាសម្បត្តិសាធារណៈ ហើយដីយើងកំពុងធ្វើស្រែអីរាល់ឆ្នាំអីអ៊ីចឹងណាស់! គាត់ធ្វើអ៊ីចឹង ដល់ពេលអ៊ីចឹងមានអារម្មណ៍ថា ធ្វើការអន្តរាគមន៍អីបាន ហើយដីហ្នឹងមិនមានទំនាស់ទេ ចុះបើមិនមានទំនាស់ហេតុអីគាត់មិនគាំទ្រឲ្យយើង។ វាគ្មានហេតុផលអីដាក់ជាសម្បត្តិរដ្ឋទេ ដីយើងអ៊ីចឹង»។
ឆ្លើយតបនឹងការចោទប្រកាន់នេះ មេឃុំព្រះស្ដេច លោក សេក ហួន មានប្រសាសន៍ថា អាជ្ញាធរពុំមានចេតនារឹបអូសយកដីពីប្រជាពលរដ្ឋ ដូចការលើកឡើងនោះទេ។ លោកបញ្ជាក់ថា ហេតុដែលអាជ្ញាធរពុំអាចធ្វើប្លង់ដីដោយសារដីនោះមានទំនាស់ពុំទាន់ដាច់ស្រេចនៅឡើយ ហើយម្ចាស់នោះចង់ធ្វើប្លង់កាន់កាប់ម្នាក់ឯង ទើបយឺតយ៉ាវពុំបានធ្វើប្លង់ដូចពលរដ្ឋដទៃ។
លោក សេក ហួន៖ «ទេ! ធ្វើលិខិតជូនទៅសុរិយោដីអស់ហើយតើ! ចាំតែសុរិយោដីគេមកឲ្យឃុំចូលរួមដោះថ្ងៃណាអាហ្នឹងគេចូលហើយ។ វាមានរឿងអីគេនៅតែរង់ចាំតើ បើកាលគេបិទប្រកាសហើយគាត់ចូលតវ៉ាអាហ្នឹងគេដោះស្រាយភ្លាមៗណាស់ ឥឡូវក៏នៅតែដោះស្រាយដែរ ប៉ុន្តែដល់ពេលដំណាក់កាលយើងនេះទាល់តែសុរិយោដី»។
អ្នកភូមិក្បែរខាងម្នាក់ គឺអ្នកស្រី យឹម សៀម មានប្រសាសន៍ថា ដីនោះពុំមានទំនាស់អ្វីនោះទេ ហើយជាកម្មសិទ្ធិរបស់លោក កៅ ប៊ុនឈាន តាំងពីតូចក្រូចឆ្មារមកម្ល៉េះ។ អ្នកស្រីបន្តថា អាជ្ញាធរគួរចេញលិខិតស្នាមឲ្យម្ចាស់ដី មិនត្រូវរក្សាដីនោះទុកជាសម្បត្តិសាធារណៈដែលអាចជាលេសមួយប្រើក្នុងរូបភាពផ្សេងនោះទេ៖ «វានៅកាន់កាប់យូរហើយលោកពូ ដែលតាំងពីខ្ញុំនៅក្មេងៗម្ល៉េះ ឥឡូវខ្ញុំអាយុ ៦៥ ហើយហ្នឹង។ បើនៅវាលនៅកាលអីទៅកាត់យក ចុះអានេះវានៅហ្នឹង។ ខ្ញុំថាមិនត្រូវទេ គ្នាខំនៅតាំងពីតូចក្រូចឆ្មារមកទាល់ហ្នឹងកូនក្រមុំកំលោះមានចៅអស់ហើយ»។
មន្ត្រីសម្របសម្រួលអង្គការសិទ្ធិមនុស្សអាដហុក (Adhoc) ប្រចាំខេត្តព្រៃវែង អ្នកស្រី អៀង គិមលី មានប្រសាសន៍ថា ក្នុងករណីនេះអាជ្ញាធរមិនគួរគេចវេះមិនចេញលិខិតស្នាមឲ្យប្រជាពលរដ្ឋធ្វើប្លង់ដីនោះទេ ពីព្រោះថា អ្នកភូមិកាន់កាប់ដីនោះដោយស្របច្បាប់តាមលក្ខណៈនៃច្បាប់ភូមិបាល៖ «និយាយទៅការគ្រប់គ្រងរបស់គាត់ហ្នឹង វាលក្ខណៈ ៥យ៉ាងនៅតាមច្បាប់ភូមិបាល។ អ៊ីចឹងដីហ្នឹងជាកម្មសិទ្ធិពេញលេញរបស់អ្នកដែលបានកាន់កាប់ហ្នឹង អាជ្ញាធរគ្មានសិទ្ធិដកដីហ្នឹងធ្វើជាសម្បត្តិសាធារណៈទេ ហើយបើសិនយកដីហ្នឹងដកធ្វើជាសម្បត្តិសាធារណៈក៏ត្រូវមានសំណងសមរម្យ ដល់គាត់តាមតម្លៃទីផ្សារតាមការវាយតម្លៃគណៈកម្មការសុរិយោដីដែរ»។
អ្នកស្រី អៀង គិមលី ឲ្យដឹងថា អ្នកភូមិផងរបងជាមួយផ្ទះម្ចាស់ដីដែលពុំបានធ្វើប្លង់នោះ ជាច្រើនគ្រួសារ ព្រមធ្វើជាសាក្សីក្នុងរឿងទំនាស់នេះដោយអះអាងថា ជាកម្មសិទ្ធិរបស់ម្ចាស់ដីកាន់កាប់យូរឆ្នាំប្រាកដមែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។