ប្រជាពលរដ្ឋប្រមាណ ១០០នាក់ បានលើកគ្នាទៅកាន់សាលាខេត្តសៀមរាប តាំងព្រឹកព្រលឹមថ្ងៃពុធ ទី២៥ ខែកុម្ភៈ ដើម្បីឱ្យជួយដោះស្រាយជុំវិញរឿងដែលអាជ្ញាធរអប្សរារុះរើផ្ទះសម្បែង និងបណ្ដេញអ្នកភូមិឱ្យចេញពីដីដែលធ្លាប់រស់នៅ។
ការលើកគ្នាទៅស្វែងរកជួបអភិបាលខេត្តនេះ ធ្វើឡើងបន្ទាប់ពីអាជ្ញាធរអប្សរាបានបញ្ជូនកម្លាំងចម្រុះ និងគ្រឿងចក្រទៅរុះរើផ្ទះប្រជាពលរដ្ឋចំនួន ២៤ខ្នង នៅភូមិព្រៃគុយ សង្កាត់អំពិល ក្រុងសៀមរាប កាលពីថ្ងៃទី២៤ ខែកុម្ភៈ កន្លងទៅ។
ក្រុមអ្នកភូមិព្រៃគុយ សង្កាត់អំពិល ក្រុងសៀមរាប បានលើកគ្នាបិទកំណាត់ផ្លូវរបស់អាជ្ញាធរអប្សរាដែលកែងនឹងផ្លូវចូលទៅភូមិត្រាំនាគ មិនឱ្យរថយន្តគ្រប់ប្រភេទចេញចូលបានទេកាលពីថ្ងៃត្រង់ ថ្ងៃពុធ ទី២៥ ខែកុម្ភៈ។
ការលើកគ្នាបិទកំណាត់ផ្លូវនេះ ធ្វើឡើងបន្ទាប់ពីក្រុមអ្នកភូមិលើកគ្នាទៅតវ៉ានៅមុខសាលាខេត្តសៀមរាប ព្រមទាំងបញ្ជូនតំណាងចំនួន ៧នាក់ ឱ្យចូលជួបពិភាក្សាជាមួយអាជ្ញាធរផង ក៏ប៉ុន្តែមិនបានលទ្ធផលអ្វីទេ ដោយសារមិនបានជួបអភិបាលខេត្តសោះ។
ក្រុមអ្នកភូមិសំដែងការមិនសុខចិត្តចំពោះអាជ្ញាធរអប្សរា ដែលបានបញ្ជូនកម្លាំង និងគ្រឿងចក្រចុះទៅរុះរើលំនៅឋានរបស់ពួកគេចំនួន ២៤ខ្នង កាលពីថ្ងៃទី២៤ ខែកុម្ភៈ កន្លងទៅទេ៖ «អត់សុខចិត្តពីរឿងអប្សរាមកឈូសមករើផ្ទះ ធ្វើឱ្យប្រជាពលរដ្ឋស្រែកយំ ធ្វើឱ្យប្រជាពលរដ្ឋភ័យ»។
សាក្សីដែលតាមមើលការរុះរើលំនៅឋានប្រជាពលរដ្ឋនោះ បានរិះគន់ថា កម្លាំងរបស់អាជ្ញាធរអប្សរាខ្លះហាក់ដូចជាគ្មានសីលធម៌ទេ ដោយការរុះរើលំនៅឋានកាលពីថ្ងៃទី២៤ ខែកុម្ភៈ គេឃើញមានការប្រើរថយន្តថយបុកកម្ទេចផ្ទះជាដើម។
ក្រុមអង្គការសិទ្ធិមនុស្សក្រៅរដ្ឋាភិបាល បានរិះគន់សកម្មភាពរបស់អាជ្ញាធរអប្សរាដែលប្រើកម្លាំងចុះរុះរើលំនៅឋានប្រជាពលរដ្ឋនោះ ថាគឺជាការអនុវត្តច្បាប់មិនស្មើភាពគ្នាទេ។
អ្នកស៊ើបអង្កេតរបស់សមាគមការពារសិទ្ធិមនុស្សអាដហុក (Adhoc) ខេត្តសៀមរាប លោក សួស ណារិន មានប្រសាសន៍ថា នៅតំបន់ដែលអាជ្ញាធរអប្សរាគ្រប់គ្រង គឺច្រើនកន្លែងណាស់ដែលហាមឃាត់មិនឱ្យសាងសង់ ហើយនៅតំបន់បូរីសណ្ឋាគារវប្បធម៌ទេសចរណ៍ គឺមានផ្ទៃដីទំហំ ១.០០០ហិកតារ គឺមានការសាងសង់សំណង់ធំៗជាច្រើន ហេតុអ្វីបានជាមិនដេញបែរជាមកដេញតែប្រជាពលរដ្ឋក្រីក្រដូច្នេះ៖ «រដ្ឋត្រូវតែផ្ដល់សំណងជាមុន និងយុត្តិធម៌ តាមច្បាប់ភូមិបាល ប៉ុន្តែអាជ្ញាធរយកលេសថា បានដោះស្រាយសំណងហ្នឹងឱ្យទៅភាគីអ្នកម្ចាស់ដីមុនរួចហើយ តែមានអ្នកមកចាប់ដីហ្នឹងនៅក្រោយ»។
អង្គការសិទ្ធិមនុស្សរិះគន់ថា ចំពោះការបង្ខំឱ្យរុះរើ និងបណ្ដេញចេញទៀតសោត ក៏មិនមានធ្វើសេចក្ដីជូនដំណឹងជាលាយលក្ខណ៍អក្សរ អ្វីឱ្យបានត្រឹមត្រូវដែរ។ ក៏ប៉ុន្តែអនុប្រធាននាយកដ្ឋានផ្សព្វផ្សាយរបស់អាជ្ញាធរអប្សរា លោក ឡុង កុសល បានច្រានចោលការរិះគន់ទាំងនោះដោយថា អ្វីដែលអាជ្ញាធរអប្សរាធ្វើគឺសុទ្ធតែផ្អែកទៅលើគោលការណ៍ច្បាប់ ដោយអនុវត្តទៅតាមអនុក្រឹត្យលេខ៧៩ ចុះថ្ងៃទី១៣ ខែតុលា ឆ្នាំ១៩៩៤ ដើម្បីការពារដីបូរីសណ្ឋាគារនិងវប្បធម៌ទេសចរណ៍។
លោក ឡុង កុសល បញ្ជាក់ថា នៅក្នុងអនុក្រឹត្យនោះ មានចែងថា រាល់ការប្រើប្រាស់ដើម្បីប្រកាន់យកដីកម្មសិទ្ធិ ព្រមទាំងការផ្ទេរសិទ្ធិដីធ្លីទាំងអស់នៅក្នុងតំបន់នេះ ក្រោយពីអនុក្រឹត្យចូលជាធរមាន គឺមិនអាចទទួលស្គាល់ថា ត្រឹមត្រូវតាមច្បាប់ទេ៖ «ម្ចាស់ខ្នងផ្ទះមួយចំនួនដែលរស់នៅទីនោះ បានទទួលស្គាល់ខ្លួនឯងថា គ្រាន់តែជាអ្នកមកចាំដីឱ្យគេទេ ទី២ គាត់ក៏បានទទួលស្គាល់ខ្លួនឯងថា មកចាប់ដីហ្នឹងគឺខុសច្បាប់»។
អាជ្ញាធរអប្សរាបញ្ជាក់ថា ការដែលចុះអនុវត្តវិធានការរដ្ឋបាលដោយរុះរើផ្ទះរបស់ប្រជាពលរដ្ឋចំនួន ២៤ខ្នង នៅភូមិព្រៃគុយ សង្កាត់អំពិល កាលពីថ្ងៃទី២៤ ខែកុម្ភៈ គឺស្ថិតនៅក្នុងចន្លោះរយៈពេល១ខែ ដែលអាជ្ញាធរបានទុកឱកាសឱ្យប្រជាពលរដ្ឋទាំងអស់ទៅជួបពិភាក្សាគ្នានៅឯសាលាក្រុងសៀមរាប ក៏ប៉ុន្តែអ្នកភូមិទាំងនោះមិនបានទៅជួបប្រជុំជាមួយសាលាក្រុងទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ ៕