អ្នកភូមិជាង ៦០០នាក់ នាំគ្នាតវ៉ានៅមុខសាលាខេត្តកណ្ដាល នៅព្រឹកថ្ងៃទី១៩ កុម្ភៈ ទាមទារដីរបស់ពួកគាត់នៅស្រុកកណ្ដាលស្ទឹង ខេត្តកណ្ដាល ដែលពួកគាត់អះអាងថា ក្រុមហ៊ុន ហេង អភិវឌ្ឍន៍ បានរំលោភយក ហើយប្ដឹងពួកគាត់។
តំណាងអ្នកភូមិតវ៉ាមួយរូប អ្នកស្រី អឿង សារី ថ្លែងប្រាប់អ្នកព័ត៌មាននៅមុខសាលាខេត្តកណ្ដាលថា មូលហេតុពួកអ្នកភូមិនាំគ្នានៅមុខសាលាខេត្តនៅព្រឹកថ្ងៃទី១៩ កុម្ភៈ នេះ គឺដើម្បីរកអន្តរាគមន៍ពីអភិបាលខេត្ត ឲ្យជួយដោះស្រាយបញ្ហាដីធ្លីពួកគាត់៖ «ប្រជាពលរដ្ឋពួកខ្ញុំ គឺចង់រដ្ឋាភិបាល ក៏ដូចជា លោកអភិបាលខេត្ត សម្ដេចនាយកជួយអន្តរាគមន៍ដោះស្រាយឲ្យដីប្រជាពលរដ្ឋខ្ញុំវិញ ហើយក៏ដូចជាអន្តរាគមន៍ដាក់បន្ទុកលើក្រុមហ៊ុន ហេង អភិវឌ្ឍន៍ ក៏ដូចជា អ្នកស្រី សៀង ចាន់ហេង ហ្នឹង ឲ្យដោះស្រាយជូនប្រជាពលរដ្ឋហ្នឹងមក ហើយកុំប្ដឹងប្រជាពលរដ្ឋទៀត ព្រោះខ្លួនឯងយកដីប្រជាពលរដ្ឋហើយ ប្ដឹងប្រជាពលរដ្ឋ។ សូមឲ្យរដ្ឋាភិបាលហ្នឹង ចាត់ការអ្នកស្រី សៀង ចាន់ហេង ក្រុមហ៊ុន ហេង អភិវឌ្ឍន៍ ហ្នឹងផង កុំឲ្យគាត់ចេះតែដើរយកដីប្រជាពលរដ្ឋប៉ាតណាប៉ាតណីទៀត។ ប្រជាពលរដ្ឋពិបាក ដោយសារតែបុគ្គលគាត់ម្នាក់ ប្រជាពលរដ្ឋពិបាករាប់រយពាន់នាក់...»។
អ្នកស្រីមានប្រសាសន៍បន្តថា ការតវ៉ាបញ្ហាដីធ្លីជាមួយក្រុមហ៊ុន ហេង អភិវឌ្ឍន៍ នេះ មានរយៈពេល ១៥ឆ្នាំហើយ ហើយអ្នកស្រី និងអ្នកភូមិមួយចំនួនទៀតត្រូវបានក្រុមហ៊ុន ហេង អភិវឌ្ឍន៍ ប្ដឹងថែមទៀត។ ការតវ៉ានៅសាលាខេត្តកណ្ដាលនេះ គឺនៅពេលដែលអ្នកស្រី និងអ្នកភូមិផ្សេងទៀត បដិសេធមិនទៅមន្ទីរយុត្តិធម៌របស់កងរាជអាវុធហត្ថខេត្តកណ្ដាល ដែលកោះហៅឲ្យក្រុមអ្នកស្រីចូលទៅបំភ្លឺពីបទល្មើសព្រហ្មទណ្ឌ នៅព្រឹកថ្ងៃទី១៩ កុម្ភៈ។ ក្នុងលិខិតរបស់នាយការិយាល័យបទល្មើសព្រហ្មទណ្ឌ កងរាជអាវុធហត្ថខេត្តកណ្ដាល បានកោះហៅអ្នកស្រី អឿង សារី ចូលខ្លួនដើម្បីសាកសួរតាមបណ្ដឹងរបស់ឈ្មោះ សៀង ចាន់ហេង អំពីការចោទប្រកាន់ថា បានបំផុសបំផុល និងដឹកនាំក្រុមប្រជាជនរារាំងគ្រឿងចក្រមិនឲ្យកាយដីកម្មសិទ្ធិស្របច្បាប់។
អាស៊ីសេរី មិនអាចរកការបញ្ជាក់បន្ថែមពីកងរាជអាវុធហត្ថខេត្តកណ្ដាលបានទេ ព្រោះមិនមានអ្នកលើកទូរស័ព្ទ។
អ្នកភូមិអះអាងថា ដីដែលពួកគាត់មានទំនាស់នោះ ជាដីរួម មានទំហំ ៤០០ហិកតារ ស្ថិតនៅក្នុងឃុំអំពៅព្រៃ កណ្ដោក និងឃុំព្រែកស្លែង ស្រុកកណ្ដាលស្ទឹង ខេត្តកណ្ដាល។ ពួកគាត់អះអាងថា បានគ្រប់គ្រងតាំងពីឆ្នាំ១៩៩៣ មក។ ពួកគាត់ថ្លែងថា ថ្វីបើពួកគាត់កាន់កាប់យូរមែន ប៉ុន្តែមិនមានប័ណ្ណកម្មសិទ្ធិទេ ហើយបែរជាក្រុមហ៊ុន ហេង អភិវឌ្ឍន៍ មានប័ណ្ណកម្មសិទ្ធិទៅវិញ។
អ្នកភូមិអាចធ្វើស្រែចម្ការបានទើបនាំគ្នាចាប់ផ្ដើមតវ៉ានៅឆ្នាំ២០០៥។ ក្រោយការតវ៉ា រដ្ឋាភិបាលបានដោះស្រាយជូនពួកអ្នកទាំងនោះបានចំនួន ២០០ហិកតារ។ ឥឡូវនេះពួកអ្នកភូមិបន្តការតវ៉ាទាមទារយកដីចំនួន ២០០ហិកតារទៀត។ ពួកគាត់បដិសេធថា មិនដែលផ្ដិតមេដៃលក់ដីនោះទៅឲ្យក្រុមហ៊ុនទេ៖ «បើគាត់ដោះស្រាយឲ្យពួកខ្ញុំអត់មកទេ។ ដីហ្នឹង ប្រជាជនចង់លក់ អត់មានប័ណ្ណកម្មសិទ្ធិ។ តែដល់ពេលក្រុមហ៊ុនលក់មានប័ណ្ណកម្មសិទ្ធិ។ ខ្ញុំសួរថា ក្រុមហ៊ុនហ្នឹងមានប័ណ្ណកម្មសិទ្ធិចេញណាមក? ព្រោះប្រជាជនអត់មានបានផ្ដិតមេដៃឲ្យគាត់ទេ ហើយគាត់មានប័ណ្ណកម្មសិទ្ធិលក់ទៅឲ្យអ្នកដទៃ។ ចំណែកឯប្រជាជន ដីពិតប្រាកដរបស់ប្រជាជនធ្វើហូបរាល់ថ្ងៃប្រចាំឆ្នាំ ទៅជាអត់មានប័ណ្ណកម្មសិទ្ធិ»។
តំណាងសហគមន៍ដែលត្រូវបានគេប្ដឹង មានឈ្មោះលោកស្រី អឿង សារី ញ៉េប អឿង គួន សំអាត ផាន់ វុទ្ធី ម៉ម ចន និង ជា សុខា។
ការតវ៉ារបស់អ្នកភូមិនៅព្រឹកថ្ងៃទី១៩ កុម្ភៈនេះ មានមន្ត្រីសាលាខេត្តកណ្ដាលម្នាក់ចេញមកជួបអ្នកភូមិ ដោយសុំឲ្យតំណាងអ្នកភូមិចំនួន ១៣នាក់ចូលជួប និងឲ្យអ្នកភូមិផ្សេងទៀតត្រឡប់ទៅផ្ទះវិញ។ ប៉ុន្តែអ្នកភូមិមិនព្រម ព្រោះពួកគាត់ចង់ចូលជួបទាំងអស់គ្នា។
ទោះជាយ៉ាងនេះក្ដី អ្នកភូមិសម្រេចរំសាយគ្នាវិញ នៅព្រឹកថ្ងៃដដែល ដោយមិនបានទទួលលទ្ធផលអ្វីឡើយ ក្រៅពីបានដាក់ពាក្យបណ្ដឹងមួយច្បាប់ទៅអភិបាលខេត្តកណ្ដាល ដើម្បីសុំឲ្យជួយធ្វើអន្តរាគមន៍បន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។