ប្រជាពលរដ្ឋប្រមាណ ៥០នាក់នៅក្រុងបាត់ដំបង ខេត្តបាត់ដំបង នាំគ្នាតវ៉ានៅមុខសាលាសង្កាត់អូរចារ ដើម្បីជំទាស់នឹងមន្ត្រីតុលាការចុះអនុវត្តសាលក្រមរបស់សាលាដំបូងខេត្ត នៅព្រឹកថ្ងៃទី១៦ មករា។ តុលាការកាត់ក្ដីឲ្យមន្ត្រីប៉ូលិសនៃស្នងការដ្ឋាននគរបាលខេត្តបាត់ដំបង ម្នាក់ឈ្នះក្ដីក្នុងសំណុំរឿងទំនាស់ដីសាលាមត្តេយ្យនៅក្នុងសង្កាត់នេះ កាលពីខែវិច្ឆិកា ឆ្នាំ២០១៦។
ក្រុមអ្នកតវ៉ានៅសង្កាត់អូរចារ លើកឡើងថា ដីទំនាស់ទំហំប្រមាណទទឹង ៤០ម៉ែត្រ និងបណ្ដោយ ៤០ម៉ែត្រ ដែលជាដីទីធ្លាសាលាមត្តេយ្យសិក្សាភូមិអូរចារ ដែលជាទ្រព្យសម្បត្តិរួមមិនអាចបុគ្គលណាម្នាក់យកធ្វើជាកម្មសិទ្ធិបានឡើយ។
តំណាងអ្នកតវ៉ាម្នាក់ លោក គឹម ភិន រស់នៅភូមិអូរចារ សង្កាត់អូរចារ ក្រុងបាត់ដំបង ផ្ដល់សម្ភាសឲ្យអាស៊ីសេរីនៅលើដីទំនាស់ នៅព្រឹកថ្ងៃទី១៦ មករា ថា ពួកគាត់ពុំបានដឹងថា ដើមបណ្ដឹងជាមន្ត្រីប៉ូលិសនៃស្នងការដ្ឋាននគរបាលខេត្តបាត់ដំបង ប្ដឹងទៅតុលាការយកដីសាលាធ្វើជាកម្មសិទ្ធិរបស់ខ្លួននៅពេលណានោះទេ។ លោកបន្ថែមថា ពួកគាត់ទើបតែដឹងនៅពេលដែលភាគីទំនាស់ ចាក់ដីបម្រុងធ្វើរបងព័ទ្ធយកដីសាលាកាលពីដើមខែមករា ឆ្នាំ២០១៧ ហើយក៏ផ្អើលឆោឡោតែម្ដង៖ « បាទ ! តវ៉ាប្រឆាំងដាច់ខា ត ព្រោះវាអយុត្តិធម៌សម្រាប់ប្រជាពលរដ្ឋជុំវិញសាលានេះរស់នៅតាំងពី១៩៧៩ មក។ ហេតុអីបាន ជាមាន ឯកសារខ្ចី និងលក់ដី ដែលមានមេឃុំចុះហត្ថលេខានោះ ? ហេតុអី បានជា មិនមកសួរប្រជាពលរដ្ឋម្ចាស់ដី ពិតប្រាកដ ? »។
ឆ្លើយតបនឹងបញ្ហានេះ ដើមបណ្ដឹងជាមន្ត្រីប៉ូលិសបង្ក្រាបគ្រឿងញៀននៃស្នងការដ្ឋាននគរបាលខេត្តបាត់ដំបង លោក សៅ ប៊ុនទិត្យ ដែលបានទៅដល់សាលាសង្កាត់អូរចារ ដែរអះអាងថា ដីនេះលោកដាក់ពាក្យប្ដឹងទៅសាលាដំបូងខេត្តកាលពីខែមករា ឆ្នាំ២០១៥ ដើម្បីទទួលមរកតពីយាយជីដូនមួយ ដែលបានសរសេរបណ្ដាំមុនពេលស្លាប់ប្រគល់ឲ្យលោកធ្វើជាកម្មសិទ្ធិ បន្ទាប់ពីសាលាខ្ចីយកទៅប្រើរយៈពេល ១៥ឆ្នាំរួចមក៖ « ខ្ញុំ មិនមែន រំលោភយកដីប្រជាពលរដ្ឋទេ ។ ខ្ញុំប្ដឹងយកដី កេរមរតក មកវិញ ក្រោយពី តុលាការ បានសម្រេច ប្រគល់ដីមកឲ្យខ្ញុំហើយ។ ម្យ៉ាងទៀត ដីនេះមានប្លង់ហើយស្រេច អ៊ីចឹងទេខ្ញុំអត់មានបំពានអ្នកណាទេ។ ខ្ញុំគ្រាន់អនុវត្តដើម្បីធ្វើរបងព័ទ្ធជុំវិញដីរបស់ខ្ញុំប៉ុណ្ណោះ »។
ប៉ុន្តែប្រជាពលរដ្ឋអះអាងថា បុគ្គលដែលស្លាប់នោះពុំមែនជាម្ចាស់ដីទេ គឺជារបស់ពលរដ្ឋនៅក្នុងភូមិ ប្រគល់ទៅឲ្យសាលាប្រើប្រាស់ជារបស់រួមកាលពីសម័យមុន ព្រមទាំងមានសាក្សីរស់ធ្វើជាសាក្សីបញ្ជាក់អំពីរឿងនេះទៀតផង។
ព្រះរាជអាជ្ញារងអមសាលាដំបូងខេត្តបាត់ដំបង លោក ប៉ង់ ចាន់សុយុទ្ធារា ដែលបានចុះអនុវត្តសាលក្រម មានប្រសាសន៍ថា លោកអនុវត្តទៅតាមសាលក្រមស្ថាពររបស់តុលាការ ប្រសិនបើពលរដ្ឋមិនសុខចិត្ត អាចដាក់ពាក្យប្ដឹងឧទ្ធរណ៍បន្តទៀតបាន។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបាត់ដំបង លោក យិន ម៉េងលី លើកឡើងថា បញ្ហានេះជាកំហុលឆ្គងរបស់តុលាការ ដែលពុំបានស្រាវជ្រាវឲ្យបានច្បាស់លាស់ មុននឹងសម្រេចឲ្យដើមបណ្ដឹងឈ្នះក្ដី៖ « ឥឡូវនេះ វាមានលក្ខណៈស្មុគស្មាញណាស់ ហើយ បើ មាន យើង ធ្វើការ សម្រួលក្រៅ ប្រព័ន្ធតុលាការ ទាល់តែ ភាគីទាំងអស់មានឆន្ទៈលះបង់ ឬក៏ អាជ្ញាធរដោះដូរធ្វើយ៉ាង ម៉េច ដើម្បីបញ្ចប់បញ្ហានេះ។ អ៊ីចឹងបានថាបើយើងនិយាយពីផ្លូវច្បាប់ស្មុគស្មាញកាន់តែខ្លាំងឡើង »។
តំណាងក្រុមអ្នកតវ៉ាប្រមាណ ៥នាក់ បានជជែកតឹងសរសៃកជាមួយមន្ត្រីតុលាការនៅមុខសាលាសង្កាត់អូរចារ កាលពីព្រឹកថ្ងៃទី១៦ មករា នៅពេលចុះទៅអនុវត្តសាលក្រមនោះ។ ប៉ុន្តែនៅម៉ោងប្រមាណ ១២ថ្ងៃត្រង់ មន្ត្រីតុលាការបាននាំកម្លាំងសមត្ថកិច្ចចុះទៅដល់ទីតាំងដីទំនាស់ ដើម្បីឲ្យដើមបណ្ដឹងធ្វើរបងព័ទ្ធជុំវិញដី តែត្រូវបានពលរដ្ឋរារាំងជាប់ ហើយក៏ដកថយត្រឡប់ទៅវិញនៅរសៀលថ្ងៃទី១៦ មករា ដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។