ប្រជាពលរដ្ឋ ២០០នាក់ ជាសមាជិកសហគមន៍ ៩ មានជម្លោះដីធ្លីរ៉ាំរ៉ៃ បានលើកគ្នាទៅតវ៉ាមុខសាលាខេត្តព្រះសីហនុ ដើម្បីស្នើឲ្យថ្នាក់ដឹកនាំខេត្តនេះ ជួយអន្តរាគមន៍ដោះស្រាយទំនាស់ដីធ្លីអូសបន្លាយពេលជិត ១០ឆ្នាំមកហើយ។ ការទាមទារឲ្យដោះស្រាយនេះ ស្របតាមអនុសាសន៍របស់លោកនាយករដ្ឋមន្ត្រី ហ៊ុន សែន ដែលបានលើកឡើងថា អាជ្ញាធរខេត្តត្រូវរួមគ្នាដោះស្រាយបញ្ហាទំនាស់ដីនៅក្នុងតំបន់ខ្លួនគ្រប់គ្រង។
ជំនួបពិភាក្សារវាងតំណាងពលរដ្ឋមកពីសហគមន៍រងគ្រោះដីធ្លីទាំង ៩ ជាមួយថ្នាក់ដឹកនាំខេត្តព្រះសីហនុ នៅព្រឹកថ្ងៃទី២៥ ខែសីហា មិនមានលទ្ធផលទេ ប៉ុន្តែអាជ្ញាធរខេត្តបានសន្យាថានឹងរិះរកវិធីដោះស្រាយទៅតាមដំណាក់កាល ឬទៅតាមបណ្ដឹងរបស់ប្រជាពលរដ្ឋដាក់ជូនអាជ្ញាធរនៅថ្ងៃខាងមុខ។
តំណាងសហគមន៍ម្នាក់ គឺលោក ស៊ុន សុផាត ស្ថិតក្នុងចំណោមតំណាងសហគមន៍ច្រើនទៀត នៅខេត្តព្រះសីហនុ បានឲ្យដឹងថា កិច្ចពិភាក្សាលើទំនាស់ដីធ្លីជាមួយលោក ស៊ុន ស្រន អភិបាលរងខេត្តព្រះសីហនុ និងមន្ត្រីពាក់ព័ន្ធខេត្តនេះបានត្រឹមអាជ្ញាធរសន្យា និងអង្កេតទៅលើទំនាស់ដីធ្លីទៅតាមបណ្ដឹងពលរដ្ឋទៅតាមដំណាក់កាល។
តំណាងរូបនេះអះអាងថា បើគ្មានដំណោះស្រាយលើជម្លោះដីធ្លីដែលកើតមាននៅខេត្តព្រះសីហនុទេ នៅអនាគតពលរដ្ឋរងគ្រោះដីធ្លីទាំង ៩សហគមន៍ នឹងលើកគ្នាឡើងមកតវ៉ាដល់មុខស្ថាប័នកំពូលៗ និងមុខផ្ទះលោកនាយករដ្ឋមន្ត្រី ហ៊ុន សែន នាទីក្រុងភ្នំពេញ បន្តទៀត៖ « គេថាអ្នកអត់ជាប់ពាក់ព័ន្ធប្រព័ន្ធតុលាការ គេថានឹងដោះស្រាយឲ្យ តែដោះស្រាយចំពោះអ្នកដាក់ពាក្យបណ្ដឹងមុន អ្នកដាក់បណ្ដឹងក្រោយដោះក្រោយ។ ប៉ុន្តែមិនមែនដោះស្រាយនៅក្នុងរយៈពេល ២ ទៅ ៣ថ្ងៃហ្នឹងទេ គេនិយាយថាអ៊ីចឹង។ ជជែកគ្នាប៉ុណ្ណឹង ហើយខ្ញុំក៏ស្នើសុំសំណូមពរជួយជំរុញឲ្យមានការវាស់វែងដីដែលតំបន់ខ្ញុំរស់នៅហ្នឹង គឺមានទីតាំងនៅកន្លែងហ្នឹងស្រប គឺដោយសារតែគេបណ្ដេញយើងអត់ចេញ»។
បន្ទាប់ពីតំណាងរបស់ពួកគេជួបពិភាក្សាមិនទទួលបានលទ្ធផលលើជម្លោះដីធ្លីដែលកើតមាននៅខេត្តព្រះសីហនុ ក្រុមប្រជាពលរដ្ឋជាង ២០០នាក់ ក៏បានរំសាយការប្រមូលផ្តុំនៅវេលាថ្ងៃត្រង់ ដោយត្រៀមប្រមូលផ្តុំតវ៉ាទ្រង់ទ្រាយធំនៅថ្ងៃខាងមុខ។
លោក ថេង សាវឿន អ្នកសម្របសម្រួលបណ្ដាញកសិករដែលតាមឃ្លាំមើលសកម្មភាពតវ៉ារបស់ប្រជាសហគមន៍មានទំនាស់ដីធ្លីខេត្តព្រះសីហនុ។ លោកបានទទូចដល់អាជ្ញាធរពាក់ព័ន្ធខេត្តនេះ ត្រូវដោះស្រាយបញ្ចប់ជម្លោះដីធ្លីរ៉ាំរ៉ៃនៅខេត្តព្រះសីហនុ ឲ្យស្របតាមអនុសាសន៍របស់លោកនាយករដ្ឋមន្ត្រី ហ៊ុន សែន កាលពីថ្ងៃទី១៨ ខែសីហា។
លោកបន្តថា ពលរដ្ឋមានទំនាស់ដីធ្លីទាំង ៩សហគមន៍ មានគម្រោងប្រមូលផ្តុំគ្នាតវ៉ាដល់ទីក្រុងភ្នំពេញជាថ្មី ក្នុងពេលដ៏ឆាប់ បើអាជ្ញាធរខេត្តព្រះសីហនុ មិនមានវិធានការដោះស្រាយជម្លោះដីធ្លី ឬវាស់ដីផ្ដល់ប្លង់កម្មសិទ្ធិជូនពលរដ្ឋឲ្យបានជាស្ថាពរទេ៖ « ក្នុងការដោះស្រាយបញ្ហាហ្នឹងដែរ ក៏សុំឲ្យក្រសួង ឬមន្ទីរឈរលើភាពឯករាជ្យ និងគិតផលប្រយោជន៍ជាចម្បង ហើយសុំកុំគិតក្រុមហ៊ុន អ្នកមានអំណាច ឬក៏ឈ្មួញដែលធ្វើការរំលោភយកដីពីប្រជាពលរដ្ឋហ្នឹងជាកត្តាសំខាន់»។
លោក ថេង សាវឿន បន្តថា ទំនាស់ដីធ្លីរបស់ប្រជាពលរដ្ឋទាំង ៩សហគមន៍ នៅខេត្តព្រះសីហនុនេះ គឺទំនាស់ខ្លះបានកើតមានតាំងពីឆ្នាំ២០០៧ មកម្ល៉េះ ហើយបានប៉ះពាល់ប្រជាពលរដ្ឋជាង ៤ពាន់គ្រួសារ។
នៅក្នុងជំនួបពិភាក្សាជាមួយតំណាងសហគមន៍ទាំង ៩សហគមន៍ លោក ស៊ុន ស្រ៊ន អភិបាលរងខេត្តព្រះសីហនុ បានលើកឡើងថា ករណីទំនាស់ដីធ្លីខ្លះ គឺកំពុងស្ថិតក្នុងដៃរបស់តុលាការ គឺមិនអាចលូកដៃចូលបានទេ គឺត្រូវទុកឲ្យតុលាការអនុវត្តទៅតាមនីតិវិធីតុលាការ។ ប៉ុន្តែបើទំនាស់ផ្សេងទីនេះ អាជ្ញាធរពាក់ព័ន្ធខេត្តនឹងរកវិធីដោះស្រាយជូនពលរដ្ឋទៅតាមដំណាក់កាលៗ នៅពេលអាជ្ញាធរបានទទួលពាក្យបណ្ដឹងរបស់ពលរដ្ឋរងគ្រោះ។
ទាក់ទិនទំនាស់ដីធ្លីនេះ កាលពីថ្ងៃទី១៨ ខែសីហា លោកនាយករដ្ឋមន្ត្រី ហ៊ុន សែន បានប្រកាសដកតំណែង ឬតួនាទីពីរដ្ឋមន្ត្រី ឬអភិបាលរាជធានីខេត្តទាំងឡាយណាដែលព្រងើយក្នុងការដោះស្រាយកង្វល់ ឬបញ្ហាជូនពលរដ្ឋ ពិសេសទំនាស់ដីធ្លី៖ « នយោបាយដីធ្លីយើងផ្តល់ឱកាសធ្វើដូច្នេះ។ ប៉ុន្តែមន្ត្រីរបស់យើងហាក់ដូចជាស្តាប់មិនបាន យល់គ្នាមិនបាន។ ខ្ញុំសូមដាស់តឿនសាជាថ្មីម្តងទៀត។ ទំនាស់ដីធ្លីចេញពីខេត្តណា ខេត្តហ្នឹងត្រូវទទួលខុសត្រូវ»។
ប្រកាសនេះទទួលបានការសាទរពីប្រជាពលរដ្ឋមានទំនាស់ដីធ្លី និងមន្ត្រីអង្គការមិនមែនរដ្ឋាភិបាលមួយចំនួននៅកម្ពុជា។
បញ្ហានេះ មន្ត្រីសង្គមស៊ីវិលខ្លះកំពុងរង់ចាំមើលវិធានការក្តៅរបស់ប្រមុខដឹកនាំរដ្ឋាភិបាល ដោះស្រាយបញ្ចប់ជម្លោះដីធ្លីជូនប្រជាពលរដ្ឋនៅតាមខេត្តនានា ដោយយកចិត្តទុកដាក់។
យ៉ាងណាក្តី មន្ត្រីសិទ្ធិមនុស្សអះអាងថា ពលរដ្ឋរងគ្រោះដីធ្លីមកពីតាមខេត្តមួយចំនួនដែលលើកគ្នាមកតវ៉ាដល់រាជធានីភ្នំពេញ នៅមិនទាន់ឃើញរដ្ឋាភិបាល ឬផ្នែកពាក់ព័ន្ធណាមួយជួយដោះស្រាយបញ្ចប់ជម្លោះនេះនៅឡើយទេរហូតមកដល់ពេលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។