ពលរដ្ឋ​នៅ​ឃុំ​ទន្លូង​ខេត្ត​ត្បូងឃ្មុំ​ស្នើ​លោក​នាយករដ្ឋមន្ត្រី​អន្តរាគមន៍​បញ្ហា​ដីធ្លី

ដោយ​ សូត សុខប្រាថ្នា
2017.06.24
ជម្លោះ​ដី ទន្លូង ត្បូងឃ្មុំ ៨៥៥ លោកស្រី អ៊ីម សំអាន ឈរ​នៅ​ថ្លែង​ទៅ​កាន់​លោក​នាយករដ្ឋមន្ត្រី ហ៊ុន សែន អំពី​បញ្ហា​ដីធ្លី​ដែល​ក្រុមហ៊ុន​រំលោភ​យក កាល​ពី​លោក​ចូល​រួម​ទិវា​ចងចាំ​ស្ដីពី​ដំណើរ​ឆ្ពោះ​ទៅ​ផ្ដួល​រំលំ​របប​ខ្មែរក្រហម នៅ​ភូមិ​កោះថ្ម ឃុំ​ទន្លូង ស្រុក​មេមត់ ខេត្ត​ត្បូងឃ្មុំ នៅ​ថ្ងៃ​ទី​២១ មិថុនា ឆ្នាំ​២០១៧។ RFA/Saut Sokprathna
RFA/Saut Sokprathna

ប្រជាពលរដ្ឋ​នៅ​ឃុំ​ទន្លូង ស្រុក​មេមត់ ខេត្ត​ត្បូងឃ្មុំ ត្អូញត្អែរ​ពី​ភាព​លំបាក​ដោយសារ​ដី​សហគមន៍​ដែល​អ្នក​ភូមិ ពិសេស​ជនជាតិ​ដើម​ភាគតិច​ស្ទៀង ធ្លាប់​អាស្រ័យ​ផល​កន្លង​មក ត្រូវ​បាន​ធ្លាក់​ទៅ​លើ​ដៃ​ក្រុមហ៊ុន​មួយ​ចំនួន​ទៅ​វិញ។ ពួកគេ​ស្នើ​ឱ្យ​លោក​នាយករដ្ឋមន្ត្រី​ជួយ​អន្តរាគមន៍​ដក​ហូត​ដី​ទាំង​នោះ​ប្រគល់​ជូន​ប្រជា​សហគមន៍​វិញ សម្រាប់​បង្កបង្កើនផល​ចិញ្ចឹម​ជីវិត។

ប្រជាពលរដ្ឋ​រស់​នៅ​តំបន់​ដែល​ជា​​អតីត​ទីតាំង​អនុស្សាវរីយ៍​ដ៏​ជូរចត់​របស់​លោក​នាយករដ្ឋមន្ត្រី ហ៊ុន សែន នៅ​ឃុំ​ទន្លូង លើក​ឡើង​ថា ជីវភាព​របស់​ពួកគាត់​បច្ចុប្បន្ន​កាន់​តែ​ពិបាក​ជាង​ទៀត ដោយសារ​ដីធ្លី​របស់​ពួកគាត់​ធ្លាប់​អាស្រ័យ​ផល​កន្លង​មក​មាន​ក្រុមហ៊ុន​មួយ​ចំនួន​រំលោភ​យក ហើយ​យក​ដី​ទាំង​នោះ​មួយ​ចំណែក​ជួល​ទៅ​ឱ្យ​ជនជាតិ​វៀតណាម ដាំ​ដំណាំ​ទៀត​ផង។

ក្នុង​ឱកាស​លោក​នាយករដ្ឋមន្ត្រី ហ៊ុន សែន អញ្ជើញ​ទៅ​ចូលរួម​ទិវា​រំលឹក​ការ​ចងចាំ​នៃ​ដំណើរ​ឆ្ពោះ​ទៅ​ផ្តួល​រំលំ​របប​ប្រល័យ​ពូជសាសន៍ ប៉ុល ពត កាល​ពី​ថ្ងៃ​ទី​២១ ខែ​មិថុនា នៅ​ភូមិ​កោះថ្ម ឃុំ​ទន្លូង មាន​អ្នក​ភូមិ​ម្នាក់ គឺ​អ្នកស្រី អ៊ីម សំអាន ដែល​ធ្លាប់​ស្គាល់ និង​រាប់​អាន​ជាមួយ​លោក ហ៊ុន សែន បាន​ឡើង​ទៅ​ជួប​ផ្ទាល់​ជាមួយ​លោក​នាយក​រដ្ឋមន្ត្រី។

លោក​នាយករដ្ឋមន្ត្រី​បាន​ថ្លែង​ទៅ​កាន់​ស្ត្រី​រូប​នោះ​បែប​លេង​សើច​ថា កាល​ពី​ក្រមុំ គឺ​មាន​សម្រស់​ស្រស់​ស្អាត ប៉ុន្តែ​បច្ចុប្បន្ន គឺ​ខុស​ពី​មុន​ឆ្ងាយ​ណាស់។ ស្ត្រី​រូប​នោះ​បាន​ឆ្លើយ​ទៅ​កាន់​លោក ហ៊ុន សែន វិញ​ថា សម្រស់​ធ្លាក់​ចុះ​ដោយសារ​តែ​ពិបាក​ចិត្ត​ខ្លាំង​ពេក ព្រោះ​កូន​ចៅ​ច្រើន ប៉ុន្តែ​មិន​មាន​ដី​សម្រាប់​បង្កបង្កើនផល​ចិញ្ចឹម​ជីវិត​ទេ ដោយសារ​ក្រុមហ៊ុន​ឈូស​ឆាយ​យក។

​លោក​នាយករដ្ឋមន្ត្រី​បាន​សួរ​នាំ​អំពី​រឿងរ៉ាវ​ដីធ្លី និង​បាន​ស្ដាប់​ការ​ត្អូញត្អែរ​ពី​ភាព​លំបាក​របស់​ស្ត្រី​រូប​នោះ ហើយ​គាត់​ក៏​បាន​ហៅ​រដ្ឋមន្ត្រី​ក្រសួង​រៀបចំ​ដែនដី នគរូបនីយកម្ម និង​សំណង់ លោក ជា សុផារ៉ា មក​ជួប និង​បញ្ជា​ឱ្យ​ដោះស្រាយ​បញ្ហា​នេះ បើ​ទោះ​បី​ជា​ត្រូវ​ទិញ​ដី​ដែល​បាត់បង់​នោះ​មក​ឱ្យ​អ្នកស្រី សំអាន វិញ​ក៏ដោយ៖ «ទៅ​មើល​ដី​នៅ​កន្លែង​ណា? ព្រោះ​ដី​កាល​ហ្នឹង​វា​អត់​មាន​ប្លង់​មានអី​ទេ។ ចំណាំ​យើង​ហ្នឹង ចំណាំ​អី? មាន​បុះ​អី​នៅ​ខាង​ក្នុង? ហើយ​យើង​ហ្នឹង​ធ្វើ​បុះ​ណា? (សំអាន៖ ខ្ញុំ​ធ្វើ​គ្រប់​កន្លែង​កាល​ណោះ ព្រោះ​ដី​វា​វិល​ជុំ)។ អើ​ចុះ​ដើរ​ធ្វើ​គ្រប់​កន្លែង​អីចឹង​ទើប​វា​ពិបាក»

​តំណាង​ប្រជា​សហគមន៍​ជនជាតិ​ដើម​ភាគតិច​ស្ទៀង នៅ​ភូមិ​ចង្គុំទី១ ជាប់​គ្នា​នឹង​ភូមិ​កោះថ្ម លោក សៃ តាយ មាន​ប្រសាសន៍​ថា វិបត្តិ​ដី​សហគមន៍​របស់​ពួកគាត់ គឺ​មិន​មែន​កើត​ឡើង​តែមួយ​គ្រួសារ​ឡើយ ពោល​គឺ​កើត​ឡើង​ចំពោះ​ពលរដ្ឋ​ទាំង​ពីរ​ភូមិ ដែល​មាន​ចំនួន​ជាង ៣០០​គ្រួសារ។ លោក​បញ្ជាក់​ថា ដី​សហគមន៍​នៅ​ចំណុច​ត្បុល ដែល​ជា​តំបន់​អនុស្សាវរីយ៍​ដ៏​ជូរចត់​របស់​លោក​នាយករដ្ឋមន្ត្រី​ធ្លាប់​ធ្វើ​ដំណើរ​ឆ្លង​កាត់​ទៅ​ប្រទេស​វៀតណាម គឺ​មាន​ទំហំ​ជាង ៤​ពាន់​ហិកតារ​(៤.២៧១) ហើយ​អ្នក​ភូមិ ពិសេស​ជនជាតិ​ដើម​ភាគតិច​ស្ទៀង បាន​អាស្រ័យ​ជា​លក្ខណៈ​ចម្ការ​វិល​ជុំ​តាំង​ពី​ដើម​មក៖ «ពួក​ខ្ញុំ​ហ្នឹង គឺ​ពេញ​ចិត្ត​ណាស់​ដែល​អ្នក​មីង​បាន​ស្នើ​សុំ​ផ្ទាល់ ដែល​គាត់​បាន​ជួប​ជាមួយ​សម្ដេច​លោក​នាយករដ្ឋមន្ត្រី។ រូប​ខ្ញុំ​បន្ថែម​ដើម្បី​ឱ្យ​សម្ដេច​ហ្នឹង​ឱ្យ​ក្រុម​ការងារ​នាយករដ្ឋមន្ត្រី​មើល​ឱ្យ​ពិតប្រាកដ ដី​ហ្នឹង​ដើម្បី​ប្រគល់​ឱ្យ​ជន​ជាតិ​ដើម​ភាគ​តិច​ពួក​ខ្ញុំ»

​ប្រភព​ដដែល​អះអាង​ថា ចាប់​តាំង​ពី​ឆ្នាំ​២០១៤ ដី​តំបន់​នោះ ត្រូវ​បាន​ក្រុមហ៊ុន​មួយ​ចំនួន ដូចជា​ក្រុមហ៊ុន កុយ សុខងួន ក្រុមហ៊ុន ឆន ថារី ក្រុមហ៊ុន ស្រ៊ុន ហាំងឡេង និង​ក្រុមហ៊ុន​ផ្សេង​ទៀត​ឈូស​ឆាយ​យក ក្រោម​ហេតុផល​ថា​បាន​ទទួល​សិទ្ធិ​វិនិយោគ​ពី​រាជរដ្ឋាភិបាល។ ពលរដ្ឋ​រូប​នេះ​មិន​ឃើញ​ក្រុមហ៊ុន​ទាំង​នោះ​ដាំ​ដំណាំ​អ្វី​ទេ គឺ​ទុក​ដី​ទំនេរ​ចោល ហើយ​យក​ចំណែក​ដី​មួយ​ចំនួន​ទៅ​ជួល​ឱ្យ​ជនជាតិ​វៀតណាម ដាំ​អំពៅ​ថែម​ទៀត។

លោក​បញ្ជាក់​ថា ចាប់​តាំង​ពី​ដី​របស់​ពួកគាត់​ត្រូវ​បាន​ក្រុមហ៊ុន​រំលោភ​យក អ្នក​ភូមិ​កាន់តែ​ជួប​បញ្ហា​ប្រឈម​ក្នុង​ជីវភាព​រស់​នៅ ដូចជា​ជំពាក់​បំណុល​គ្រឹះស្ថាន​ហិរញ្ញវត្ថុ ហើយ​ខ្លះ​នាំ​គ្នា​ស៊ី​ឈ្នួល​ធ្វើ​ការ​ឱ្យ​ក្រុមហ៊ុន ឬ​ជនជាតិ​វៀតណាម ជាដើម៖ «បាទ! ពួក​ខ្ញុំ​ជីវភាព​រាល់​ថ្ងៃ​ហ្នឹង កំពុង​ក្រលំបាក​វេទនា​យ៉ាង​ខ្លាំង ព្រោះ​អី​ពួក​ខ្ញុំ​ទម្លាប់​គឺ​មាន​ដី​ចម្ការ​វិល​ជុំ»

ទាក់ទង​បញ្ហា​នេះ អភិបាល​រង​ខេត្ត​ត្បូងឃ្មុំ ទទួល​បន្ទុក​ដីធ្លី លោក ហាក់ សុខមករា មាន​ប្រសាសន៍​នៅ​ថ្ងៃ​ទី​២៣ មិថុនា ថា អាជ្ញាធរ​មិន​បាន​ព្រងើយកន្តើយ​បញ្ហា​ប្រឈម​របស់​ពលរដ្ឋ​ទេ ហើយ​កំពុង​ពិនិត្យ​លទ្ធភាព​ដោះស្រាយ​បញ្ហា​ដីធ្លី​ជូន​ពលរដ្ឋ។ ការ​លើក​ឡើង​នេះ ក្រោយ​ពេល​អាជ្ញាធរ​ខេត្ត​ទទួល​បាន​លិខិត​ស្នើ​សុំ​កាន់កាប់​ដីធ្លី​របស់​ពលរដ្ឋ​ជិត ២០០​គ្រួសារ​នៅ​ភូមិ​កោះថ្ម។ លោក​ថា កាល​ពី​ពេល​ថ្មីៗ​នេះ រាជរដ្ឋាភិបាល​សម្រេច​ដក​ហូត​ដី​សម្បទាន​សេដ្ឋកិច្ច​ពី​ក្រុមហ៊ុន​ចំនួន ២ រួម​មាន​ក្រុមហ៊ុន ស្រ៊ុន ហាំងឡេង និង​ក្រុមហ៊ុន ឆាយ លីហៀង ដែល​មាន​ទំហំ​ដី​ជាង ១​ពាន់​ហិកតារ។

លោក​បញ្ជាក់​ថា ការ​ដក​ហូត​នេះ ដោយ​មើល​ឃើញ​ពី​តម្រូវ​ការ​ចាំបាច់​របស់​ពលរដ្ឋ​ភូមិ​កោះថ្ម និង​ភូមិ​ផ្សេង​ទៀត ម្យ៉ាង​ក្រុមហ៊ុន​ទាំង​នោះ​បាន​ធ្វើ​ខុស​ទៅ​នឹង​កិច្ច​សន្យា​វិនិយោគ​ផង។ អភិបាល​រង​ខេត្ត​រូប​នេះ​អះអាង​ថា ដី​ដែល​បាន​ដក​ហូត នឹង​ពិនិត្យ​លទ្ធភាព​ប្រគល់​ជូន​ពលរដ្ឋ​ក្រោម​ទម្រង់​ដី​សម្បទាន​សង្គម​កិច្ច៖ «ខាង​មុខ​នេះ​យើង​ខ្ញុំ នឹង​ចុះ​ពិនិត្យ​លើ​ដី​ដែល​ដក​ហូត​ពី​ក្រុមហ៊ុន​ទាំង​ពីរ​នេះ​លើ​ទំហំ​ជាង ១​ពាន់​ហិកតារ​នេះ ដើម្បី​រៀបចំ​ធ្វើ​អត្តសញ្ញាណ​កម្ម និង​វាស់វែង​ដើម្បី​ចាត់ចែង​ជូន​ប្រជាពលរដ្ឋ​ស្នើ​សុំ​ដែល​ខ្វះខាត​ដី​ពិត​ប្រាកដ ជា​ទម្រង់​ដី​សម្បទាន​សង្គម​កិច្ច»

លោក​បន្ថែម​ថា ចំពោះ​ក្រុមហ៊ុន​មួយ​ចំនួន​ទៀត​ដែល​បាន​អនុវត្ត​ត្រឹមត្រូវ​តាម​កិច្ចសន្យា​វិនិយោគ គឺ​គ្មាន​បញ្ហា​ចោទ​ឡើង​ទេ។

ក្រុមហ៊ុន​ដែល​ទទួល​បាន​ដី​សម្បទាន​សេដ្ឋកិច្ច​នៅ​ឃុំ​ទន្លូង និង​ឃុំ​ជាំក្រវៀន លើ​ទំហំ​ផ្ទៃដី​រាប់​ពាន់​ហិកតារ គឺ​មាន​ក្រុមហ៊ុន​មួយ​ចំនួន ដូចជា​ក្រុមហ៊ុន ម៉ែន សារុន ក្រុមហ៊ុន កុយ សុខងួន ជាដើម ត្រូវ​បាន​ប្រជា​សហគមន៍ និង​សង្គម​ស៊ីវិល​មើល​ឃើញ​ថា មិន​បាន​គោរព​តាម​កិច្ចសន្យា​វិនិយោគ​របស់​រដ្ឋាភិបាល​ទេ ដូចជា​ទុក​ដី​ទំនេរ​ចោល​រាប់​ឆ្នាំ ព្រមទាំង​យក​ដី​របស់​ខ្លួន​ទៅ​ជួល​ឱ្យ​ប្រជាពលរដ្ឋ ពិសេស​ជនជាតិ​វៀតណាម តែម្ដង ប៉ុន្តែ​កន្លង​មក​តំណាង​ក្រុមហ៊ុន ម៉ែន សារុន ធ្លាប់​បដិសេធ​ការ​ចោទ​ប្រកាន់​នេះ។

​មន្ត្រី​សម្របសម្រួល​សមាគម​អាដហុក (ADHOC) ខេត្ត​ត្បូងឃ្មុំ លោក នាង សុវ៉ាត មើល​ឃើញ​ថា ក្រៅ​ពី​ក្រុមហ៊ុន​វិនិយោគ​ក៏​មាន​ដែរ ក្រុម​យោធា និង​អ្នក​មាន​អំណាច​បាន​កាន់​កាប់​ដី​តំបន់​នោះ ដែល​បណ្ដាល​ឱ្យ​ពលរដ្ឋ​ម្ចាស់​ស្រុក​រង​ទឹក​ភ្នែក។ លោក​យល់​ថា រាល់​តំបន់​អនុស្សាវរីយ៍​ដ៏​ជូរចត់​របស់​លោក​នាយករដ្ឋមន្ត្រី ដែល​ធ្លាប់​ស្រក់​ទឹក​ភ្នែក​រួច​ទៅ​ហើយ​ក្នុង​សម័យ​ការ​តស៊ូ​រំដោះ​ជាតិ មិន​គួរ​បណ្ដោយ​ឱ្យ​តំបន់​ទាំង​នោះ​មាន​ទឹក​ភ្នែក​ប្រជាពលរដ្ឋ​បន្ត​ស្រក់​ទឹក​ភ្នែក​ទៀត​ទេ៖ «អ៊ីចឹង​ហើយ​ប្រសិនបើ​ឯកឧត្ដម ជា សុផារ៉ា ចង់​ឱ្យ​ស្អាត គណៈកម្មការ​គឺ​ថ្មី កុំ​ឱ្យ​មាន​អ្នក​ចាស់​នៅ​ហ្នឹង។ អា​ហ្នឹង​បាន​អាច​ដោះស្រាយ​បាន។ ប្រសិនបើ​ដាក់​អ្នក​ចាស់​ទៅ គឺ​ស្តោះ​ទឹក​មាត់​លើ​ទ្រូង​ឯង គាត់​មិន​ដោះ​ទេ»

​លោក នាង សុវ៉ាត បន្ថែម​ថា រដ្ឋមន្ត្រី​ក្រសួង​ដែនដី នគរូបនីយកម្ម និង​សំណង់ លោក ជា សុផារ៉ា គប្បី​ពិនិត្យ​ទៅ​លើ​កិច្ច​សន្យា​វិនិយោគ​របស់​ក្រុមហ៊ុន​ទាំង​ឡាយ​ដែល​មាន​វត្តមាន​នៅ​ស្រុក​មេមត់ ពិសេស​ក្រុមហ៊ុន ម៉ែន សារុន តែម្ដង ពីព្រោះ​លោក​កត់សម្គាល់​ថា ក្រុមហ៊ុន​នេះ​បាន​អនុវត្ត​ផ្ទុយ​ទៅ​នឹង​កិច្ចសន្យា​វិនិយោគ​របស់​រាជរដ្ឋាភិបាល៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។