អតីតប្រជាពលរដ្ឋជាភូមិបឹងកក់ ដែលកន្លងមកបានចាកចេញពីតំបន់បឹងកក់ ប្រមាណ ៥០នាក់ ស្ថិតក្នុងចំណោមពលរដ្ឋរាប់ពាន់គ្រួសារ បានលើកគ្នាមកតវ៉ាលើកបដា និងដាក់ញត្តិជូនមន្ត្រីស្ថានទូតប្រទេសសិង្ហបុរី ឬសាំងហ្គាពួរ ប្រចាំកម្ពុជា ដើម្បីស្នើឲ្យក្រុមហ៊ុនឈ្មោះមួយដែលបានចុះបញ្ជីក្នុងផ្សារហ៊ុនសិង្ហបុរី ផ្អាកទិញដីដើម្បីអភិវឌ្ឍន៍នៅតំបន់បឹងកក់ ដែលកំពុងមានទំនាស់ដីធ្លីជាមួយពលរដ្ឋ។
តំណាងអតីតអ្នកភូមិបឹងកក់ម្នាក់ គឺអ្នកស្រី សាត ផា បានបញ្ជាក់នៅព្រឹកថ្ងៃចន្ទ ទី៤ ខែសីហា នេះ ថា កន្លងមកនេះ ពលរដ្ឋពួកគាត់រាប់ពាន់គ្រួសារ ត្រូវអាជ្ញាធរបង្ខំឲ្យរុះរើលំនៅឋានចាក់ចេញពីទីតាំងធ្លាប់រស់នៅជាថ្នូរផ្ដល់សំណងចំនួន ៨ពាន់ដុល្លារសហរដ្ឋអាមេរិក និងប្រាក់ ២លានរៀល។
អ្នកស្រីបន្តថា ពលរដ្ឋអតីតអ្នកភូមិបឹងកក់ បានយល់ព្រមទទួលយកសំណងនេះដោយបង្ខំ និងមានការគំរាមកំហែងនៅពេលកន្លងមក។
តំណាងអតីតអ្នកភូមិបឹងកក់ បញ្ជាក់ថា ពួកគាត់បានទាមទារសំណងពីរដ្ឋាភិបាល ឬសាលារាជធានីភ្នំពេញ ក្នុងមួយគ្រួសារៗ ចំនួនចន្លោះពី ២ម៉ឺន ទៅ ៣ម៉ឺនដុល្លារបន្ថែមទៀត ទើបបញ្ឈប់សកម្មភាពតវ៉ា៖ «ពួកខ្ញុំអតីតអ្នកភូមិបឹងកក់ ចាកចេញគឺគេបានបង្ខំ គឺគេបានបង្ខំឲ្យចេញដោយឲ្យលុយ ៨ពាន់ដុល្លារ និងប្រាក់ ២លានរៀល ហើយបើយើងមិនយក ក៏គេដេញយើងដែរ។ យើងទាមទារដំណោះស្រាយបន្តទៀត វាអត់សមស្រប អ្នកនៅក្រោយគេបានសំណងច្រើនជាង។ ពួកខ្ញុំចាកចេញគឺខ្ញុំបានជួលផ្ទះគេស្នាក់នៅ វេទនាខ្លាំងណាស់ វេទនាមែនទែន! ពួកខ្ញុំទាមទារសំណងបន្ថែមហ្នឹងមិនច្រើនប៉ុន្មានទេ គឺពី ២ ទៅ ៣ម៉ឺនដុល្លារទេក្នុងម្នាក់ ឬមួយគ្រួសារ»។
មន្ត្រីស្ថានទូតប្រទេសសិង្ហបុរី ឬសាំងហ្គាពួរ បានចេញមកទទួលយកញត្តិរបស់អតីតអ្នកភូមិបឹងកក់ នៅព្រឹកថ្ងៃចន្ទនេះ ដោយសន្យាថា នឹងពិនិត្យទៅលើសំណើទាំងនោះ និងឆ្លើយតបទៅអ្នកភូមិបឹងកក់ នៅពេលក្រោយ។
កាលពីឆ្នាំ២០០៧ រដ្ឋាភិបាលកម្ពុជា បានជួលដីនៅក្នុងបរិវេណ តំបន់បឹងកក់ រយៈពេល ៩៩ឆ្នាំ ទៅឲ្យលោក ឡៅ ម៉េងឃីន សមាជិកព្រឹទ្ធសភាគណបក្សប្រជាជនកម្ពុជា និងជាម្ចាស់ក្រុមហ៊ុនស៊ូកាគូ ដើម្បីធ្វើការអភិវឌ្ឍន៍ផ្ទៃដី នៅតំបន់បឹងកក់ចំនួន ១៣៣ហិកតារ ក្នុងតម្លៃ ៧៩លានដុល្លារសហរដ្ឋអាមេរិក។
មន្ត្រីអង្គការការពារសិទ្ធិមនុស្សចាត់ទុកការអភិវឌ្ឍនេះ ថានាំឲ្យប៉ះពាល់ដល់ការរស់នៅរបស់ប្រជាពលរដ្ឋក្នុងតំបន់បឹងកក់ ជាង ៤ពាន់គ្រួសារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។