ប្រជាពលរដ្ឋនៅឃុំក្រយា ស្រុកសន្ទុក ខេត្តកំពង់ធំ បារម្ភថា ក្រុមហ៊ុន អាន ម៉ារ៉ាឌី អាចនឹងចូលឈូសឆាយដំណាំពួកគាត់បន្តទៀត។ ក្តីបារម្ភនេះ ក្រោយពេលខាងក្រុមហ៊ុនបានចូលទៅឈូសឆាយផលដំណាំពលរដ្ឋជាច្រើនសា ប៉ុន្តែអាជ្ញាធរនៅមិនទាន់អាចដោះស្រាយបាននៅឡើយ។
អាជ្ញាធរមូលដ្ឋានបញ្ជាក់ថា វិវាទដីធ្លីរវាងក្រុមហ៊ុន និងពលរដ្ឋ ធ្លាប់មានការដោះស្រាយរួចមកហើយ ប៉ុន្តែមានពលរដ្ឋមួយចំនួនមិនទាន់ទទួលយកការសម្របសម្រួលនោះ។
ប្រជាពលរដ្ឋចំនួន ១១គ្រួសារ ស្នើឲ្យរាជរដ្ឋាភិបាល ឬអាជ្ញាធរខេត្ត ជួយពន្លឿនក្នុងការដោះស្រាយជម្លោះដីធ្លីជាមួយក្រុមហ៊ុន អាន ម៉ារ៉ាឌី ឲ្យបានឆាប់រហ័ស។
ការស្នើនេះ ពីព្រោះពលរដ្ឋត្រូវការដីធ្លីសម្រាប់បង្កបង្កើនផលពិតប្រាកដ និងជៀសវាងក្រុមហ៊ុនចូលមកឈូសឆាយផលដំណាំរបស់ពួកគាត់ជាថ្មីទៀត។
តំណាងពលរដ្ឋនៅភូមិឈើទាលជ្រុំ ឃុំក្រយា មានវ័យជាង ៦០ឆ្នាំ លោក សន សឿន មានប្រសាសន៍ថា ដីរបស់លោកជាង ១០ហិកតារដែលធ្លាប់កាន់កាប់តាំងពីទសវត្សរ៍ទី៩០ មក ប៉ុន្តែត្រូវបានក្រុមហ៊ុន អាន ម៉ារ៉ាឌី ចូលឈូសឆាយយកកាលពីឆ្នាំ២០០៧ ដោយមិនមានសំណង ឬការដោះដូរឡើយ។ លោកបន្តថា ផលដំណាំជាច្រើន រួមទាំងឡដុតឧសរបស់ពួកគាត់ ក៏ត្រូវបានខាងក្រុមហ៊ុនបំផ្លាញចោលដែរ៖ « នែ ! ដីខំកាន់កាប់ជាយូរណាស់មកហើយ ស្រាប់តែក្រុមហ៊ុនយកៗដោយគ្មានសំណងគ្មានអ្វីសោះ »។
ប្រភពដដែលបញ្ជាក់ថា ពលរដ្ឋ ១១គ្រួសារ គឺមានទំហំផ្ទៃដីសរុបប្រមាណ ៥០ហិកតារ។ ក្រោយពេលឈូសឆាយដីរបស់ពួកគាត់អស់ ក្រុមហ៊ុនមិនបានយកទៅដាំដំណាំអ្វីទេ ដោយទុកដីទំនេរចោល ទើបនៅឆ្នាំ២០១៥ ពលរដ្ឋក៏នាំគ្នាចូលទៅកាន់កាប់ និងដាំដំណាំផ្សេងៗនៅលើដីរបស់ខ្លួនឡើងវិញ ប៉ុន្តែនៅដើមខែមីនា ឆ្នាំ២០១៧ ក្រុមហ៊ុនក៏បានយកគ្រឿងចក្រចូលទៅឈូសឆាយជាថ្មីទៀត។
ក្រៅពីពលរដ្ឋ ១១គ្រួសារនេះ ក៏មានអ្នកភូមិនៅឃុំក្រយា ជាច្រើនគ្រួសារទៀត កំពុងមានជម្លោះជាមួយក្រុមហ៊ុន អាន ម៉ារ៉ាឌី ដែរ ប៉ុន្តែពួកគេមិនទាន់បានដាក់ពាក្យបណ្ដឹងទៅអង្គការសង្គមស៊ីវិល។
អ្នកភូមិមួយរូបទៀតដែលមិនមែនជាពលរដ្ឋស្ថិតនៅក្នុងពលរដ្ឋចំណោម ១១គ្រួសារ លោកស្រី តុត មុំ ឲ្យដឹងថា ពួកគាត់មិនបានធ្វើការងារពេញដៃពេញជើងឡើយ ដោយសារតែជម្លោះដីធ្លីជាមួយក្រុមហ៊ុននៅមិនទាន់ដោះស្រាយ ហើយខាងក្រុមហ៊ុនចេះតែចូលឈូសឆាយដំណាំរបស់ពួកគាត់៖ « ជួយឲ្យសម្ដេចតេជោ ហ៊ុន សែន ជួយឲ្យនិស្សិតវាស់វែងឲ្យដាច់ស្រឡះពីក្រុមហ៊ុនផងទៅលោកគ្រូ »។
អាស៊ីសេរី មិនអាចទាក់ទងតំណាងក្រុមហ៊ុន អាន ម៉ារ៉ាឌី បានទេនៅថ្ងៃទី១៨ មីនា។
យ៉ាងនេះក្តី មេភូមិឈើទាលជ្រុំ លោក អ៊ួច អឿន មានប្រសាសន៍ថា មិនមែនតែពលរដ្ឋនៅភូមិរបស់លោកទេដែលកំពុងមានជម្លោះជាមួយក្រុមហ៊ុន អាន ម៉ារ៉ាឌី ប៉ុន្តែមានពលរដ្ឋជាច្រើនគ្រួសារផ្សេងទៀតក៏កំពុងមានវិវាទជាមួយក្រុមហ៊ុនដូចគ្នាដែរ។ លោកថា ទំនាស់ដីធ្លីនេះកើតឡើងក្រោយពេលក្រុមហ៊ុនទទួលបានសិទ្ធិវិនិយោគពីរដ្ឋកាលពីឆ្នាំ២០០៧ ប៉ុន្តែមានផ្ទៃដីមួយចំនួន ក្រុមហ៊ុនមិនបានអភិវឌ្ឍ ទើបពលរដ្ឋនាំគ្នាចូលទៅកាន់កាប់។ តែយ៉ាងណា លោកបញ្ជាក់ថា មានពលរដ្ឋមួយចំនួន គឺកាន់កាប់មុនពេលក្រុមហ៊ុនចូលមក៖ « តាមកន្លែងហ្នឹងពីដើម ខ្ញុំបានចូលមកកាន់កាប់មុនគេមុនឯង តែក្រោយមកមានក្រុមហ៊ុនគេចូលធ្វើ ក៏ផ្អាកអស់មួយសាទៅ »។
មេភូមិដដែលអះអាងថា អាជ្ញាធរស្រុក និងខេត្ត ក៏បានសម្របសម្រួលជាមួយពលរដ្ឋដែលកំពុងមានជម្លោះជាមួយក្រុមហ៊ុន ប៉ុន្តែមានពលរដ្ឋមួយចំនួននៅមិនទាន់ទទួលយកការដោះស្រាយនៅឡើយ។
មន្ត្រីសម្របសម្រួលអង្គការលីកាដូ (LICADHO) ខេត្តកំពង់ធំ ដែលបានចុះអង្កេតលើករណីនេះ លោក ញូង សាមឿន មានប្រសាសន៍ថា ពិតជាមានការឈូសឆាយដំណាំរបស់ប្រជាពលរដ្ឋមែន ដោយខាងក្រុមហ៊ុនសំអាងថាជាដីរបស់ខ្លួនទទួលបានសិទ្ធិវិនិយោគពីរាជរដ្ឋាភិបាល៖ « យើងយល់ឃើញថាបើទោះបីជាដីរបស់ប្រជាពលរដ្ឋនៅប្លុកដីក្រុមហ៊ុន ដែលទទួលបានសិទ្ធិវិនិយោគក៏ដោយ ក៏ត្រូវមានការដោះស្រាយសំណងសមរម្យណាមួយរវាងក្រុមហ៊ុន និងប្រជាពលរដ្ឋ »។
មន្ត្រីសង្គមស៊ីវិលរូបនេះបន្ថែមទៀតថា ក្រៅពីពលរដ្ឋ ១១គ្រួសារដែលបានដាក់ពាក្យបណ្ដឹងមកអង្គការលីកាដូ គឺមានពលរដ្ឋជាច្រើនរយគ្រួសារទៀតនៅឃុំក្រយា កំពុងប្រឈមជាមួយក្រុមហ៊ុន ទាំងក្រុមហ៊ុនខ្មែរ និងក្រុមហ៊ុនបរទេស។ លោកថា ដើម្បីដោះស្រាយវិវាទទាំងនោះ អាជ្ញាធរពាក់ព័ន្ធត្រូវមានឆន្ទៈពិតប្រាកដ និងមិនត្រូវព្រងើយកន្តើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។