ប្រជាពលរដ្ឋប្រមាណជាង ១០០គ្រួសារនៅស្រុករតនមណ្ឌល ខេត្តបាត់ដំបង ព្រួយបារម្ភខ្លាចបាត់បង់ដីស្រែចម្ការ និងដីលំនៅឋាន ដោយសារគម្រោងសាងសង់រោងចក្រផលិតស៊ីម៉ងត៍របស់ក្រុមហ៊ុន ខេ ស៊ីមិន (K Cement) នៅតំបន់ដីដែលពួកគាត់រស់នៅ ដែលដំណើរការក្នុងពេលឆាប់ៗខាងមុខនេះ។
អ្នកភូមិអះអាងថា អាជ្ញាធរផ្ដល់សំណងដល់ប្រជាពលរដ្ឋដែលមានដីប៉ះពាល់តិចតួច មិនសមស្របទៅតាមតម្លៃដីនៅលើទីផ្សារនោះទេ ប៉ុន្តែមន្ត្រីក្រុមហ៊ុន ខេ ស៊ីមិន អះអាងថា ខាងក្រុមហ៊ុនពុំមានគម្រោងសាងសង់រោងចក្រនៅស្រុករតនមណ្ឌល នោះទេ។
ប្រជាពលរដ្ឋនៅស្រុករតនមណ្ឌល អំពាវនាវឲ្យអភិបាលខេត្តបាត់ដំបង និងមន្ត្រីពាក់ព័ន្ធ បញ្ឈប់គម្រោងសាងសង់រោងចក្រផលិតស៊ីម៉ងត៍នៅតំបន់ដីដែលពួកគាត់រស់នៅ ឬឲ្យផ្ដល់សំណងប៉ះពាល់ទៅតាមតម្លៃដីទីផ្សារបច្ចុប្បន្ន ដើម្បីសម្រួលដល់ការរស់នៅរបស់ប្រជាពលរដ្ឋ។
ប្រជាពលរដ្ឋដែលប៉ះពាល់ដីពីគម្រោងសាងសង់រោងចក្រផលិតស៊ីម៉ងត៍ គឺលោក ចុង យាន រស់នៅភូមិដូនមាយ ឃុំស្ដៅ ស្រុករតនមណ្ឌល ខេត្តបាត់ដំបង ថ្លែងថា ដីស្រែរបស់លោកចំនួនជាង ៣ហិកតារ និងដីចម្ការដែលមានផលដំណាំរួមមាន ដូង និងស្វាយ ជាដើម ចំនួន ៥ហិកតារនៅតំបន់ដែលក្រុមហ៊ុន ខេ ស៊ីមិន បម្រុងសង់រោងចក្រផលិតស៊ីម៉ងត៍នៅភ្នំដូនមាយ ឃុំស្ដៅ។ លោកអះអាងថា កន្លងទៅអាជ្ញាធរស្រុករតនមណ្ឌល និងមន្ត្រីពាក់ព័ន្ធ បានចុះទៅវាស់វែង និងត្រួតពិនិត្យផ្ទៃដីរបស់ប្រជាពលរដ្ឋដែលរងផលប៉ះពាល់ពីគម្រោងនេះ នឹងទទួលបានសំណងប្រមាណ ៥ពាន់ដុល្លារក្នុងមួយហិកតារ។ លោកបញ្ជាក់ថា ប្រាក់ចំនួន ៥ពាន់ដុល្លារនេះ តិចតួចមិនសមស្របទៅនឹងតម្លៃដីទីផ្សារបច្ចុប្បន្ន និងមិនអាចយកប្រាក់នោះទៅទិញដី ដើម្បីដាំដុះដោះស្រាយជីវភាពគ្រួសារបាននោះទេ៖ «ព្រោះបើលក់ដីអស់ទៅខ្ញុំមិនដឹងទៅរំពឹងអី ព្រោះថា លុយដែលទទួលបានវាតិចពេក បើយកទៅទិញដីក៏ទិញមិនបានដែរ។ ប្រជាពលរដ្ឋខ្លះគាត់បានមួយហិកតារ ២ម៉ឺនដុល្លារ»។
ចំណែកឯប្រជាពលរដ្ឋម្នាក់ទៀត គឺលោក ហ៊ីង សាយ ថ្លែងថា នៅពេលដែលក្រុមហ៊ុនដំណើរការសាងសង់រោងចក្រផលិតស៊ីម៉ងត៍ នឹងប៉ះពាល់ដីស្រែ និងដីចម្ការប្រមាណជាង ២០០ហិកតាររបស់ប្រជាពលរដ្ឋចំនួនជាង ១០០គ្រួសារ ក្នុងនោះដីស្រែ និងដីចម្ការរបស់លោកចំនួន ២ហិកតារកន្លះ នឹងប៉ះពាល់ពីគម្រោងនេះដែរ។ លោកអះអាងថា ផ្ទៃដីចំនួន ២ហិកតារកន្លះនេះ ជាឆ្នាំងបាយសំខាន់របស់ក្រុមគ្រួសារលោក ហើយអាជ្ញាធរស្រុករតនមណ្ឌល បានបង្ខំឲ្យរូបលោក និងប្រជាពលរដ្ឋដែលរងផលប៉ះពាល់ដទៃទៀត ទទួលយកសំណងចំនួន ៥ពាន់ដុល្លារក្នុងមួយហិកតារ ហើយឲ្យចាកចេញទៅតាំងលំនៅកន្លែងផ្សេងវិញ តែពួកគាត់មិនព្រមទទួលយកតាមសំណើរបស់លោកអភិបាលរងស្រុកនោះទេ៖ «គេថាបើទោះបីប្រជាពលរដ្ឋមិនព្រមសំណងដែលអាជ្ញាធរផ្ដល់ឲ្យនោះ ក៏គេយកទទេដែរ ធ្វើឲ្យប្រជាពលរដ្ឋមានការភ្ញាក់ផ្អើល។ ប្រជាពលរដ្ឋម្នាក់មិនចង់ចេញពីទឹកដីដែលខ្លួនធ្លាប់រស់នៅទេ»។
ឆ្លើយតបនឹងបញ្ហានេះ អភិបាលរងស្រុករតនមណ្ឌល គឺលោក សៀវ ប៊ុនសៀន មានប្រសាសន៍យ៉ាងខ្លីថា អាជ្ញាធរស្រុកពុំបានបង្ខំឲ្យប្រជាពលរដ្ឋត្រូវតែទទួលយកប្រាក់សំណង ៥ពាន់ដុល្លារ ហើយចាកចេញពីដីរបស់ខ្លួនដូចការចោទប្រកាន់នោះឡើយ៖ «បើគាត់មិនព្រមចេញ គាត់នៅបន្ត ក៏គ្មាននរណាគេទៅបង្ខំគាត់ដែរ»។
ទោះយ៉ាងនេះក្ដី មន្ត្រីក្រុមប្រឹក្សាស្រុករតនមណ្ឌល មកពីគណបក្សសង្គ្រោះជាតិ លោក ប៊ុត ផាន្នី អះអាងថា អាជ្ញាធរស្រុកកន្លងទៅពិតជាបានចុះទៅដោះស្រាយ និងបង្ខំឲ្យប្រជាពលរដ្ឋដែលរងផលប៉ះពាល់ពីគម្រោងសាងសង់រោងចក្រផលិតស៊ីម៉ងត៍នោះប្រាកដមែន។ លោកបញ្ជាក់ថា ក្រុមប្រឹក្សាស្រុក ចង់ដោះស្រាយបញ្ហានេះជូនប្រជាពលរដ្ឋដែរ ប៉ុន្តែគ្មានលទ្ធភាព ដោយសារការដោះស្រាយកន្លងទៅ អភិបាលស្រុកព្យាយាមបិទបាំងមិនឲ្យក្រុមប្រឹក្សាស្រុកបានដឹងពីគម្រោងសាងសង់រោងចក្រផលិតស៊ីម៉ងត៍នោះទេ៖ «ប្រជាពលរដ្ឋមួយចំនួនក៏គាត់ត្អូញត្អែរប្រាប់ខ្ញុំដែរ គឺបើសិនគេយកភ្នំនោះធ្វើទីកន្លែងផលិតរោងចក្រមែន នោះសាលារៀននឹងបាត់បង់។ គាត់បានដាក់ពាក្យប្ដឹងទៅអភិបាលខេត្តអីហើយ ប៉ុន្តែរហូតមកដល់ពេលនេះអត់ឃើញមានដំណោះស្រាយនៅឡើយទេ»។
មន្ត្រីក្រុមហ៊ុនរោងចក្រផលិតស៊ីម៉ងត៍ ខេ ស៊ីមិន (K Cement) លោក គង់ កុសល មានប្រសាសន៍ថា ក្រុមហ៊ុន ខេ ស៊ីមិន ពុំមានគម្រោងសាងសង់រោងចក្រផលិតស៊ីម៉ងត៍នៅស្រុករតនមណ្ឌល ខេត្តបាត់ដំបង នោះទេ៖ «បាទ! អត់មានទេបង ខាងក្រុមហ៊ុនអត់មានគម្រោងចុះទៅសង់រោងចក្រទេ ប្រហែលជាគេយកឈ្មោះក្រុមហ៊ុនខ្ញុំទៅប្រើអីខ្ញុំមិនដឹងទេ»។
ចំណែកឯប្រធានមន្ទីរឧស្សាហកម្ម និងសិប្បកម្ម លោក សំបូរ ផូ មានប្រសាសន៍ថា ក្រុមហ៊ុនដែលសិក្សាស្រាវជ្រាវធនធានរ៉ែ ដើម្បីសាងសង់រោងចក្រផលិតស៊ីម៉ងត៍នៅស្រុករតនមណ្ឌល នោះ ជាគម្រោងរបស់ក្រុមហ៊ុនក្នុងស្រុកឈ្មោះ វិញ ហួរ ទទួលអាជ្ញាប័ណ្ណពីក្រសួងរ៉ែ និងថាមពល ត្រឹមត្រូវ ប៉ុន្តែក្រុមហ៊ុននេះពុំមានអាជ្ញាប័ណ្ណសាងសង់រោងចក្រនៅឡើយទេ៖ «បាទ! មានក្រុមហ៊ុនសិក្សាធ្វើរោងចក្រផលិតស៊ីម៉ងត៍មែន ប៉ុន្តែមានអាជ្ញាប័ណ្ណសិក្សាត្រឹមត្រូវទេ»។
ប្រជាពលរដ្ឋអះអាងថា គម្រោងនេះនឹងដំណើរការក្នុងពេលឆាប់ៗខាងមុខ ហើយរហូតមកទល់ពេលនេះ ប្រជាពលរដ្ឋចំនួន ១១គ្រួសារក្នុងចំណោមជាង ១០០គ្រួសារ ព្រមទទួលយកសំណងប៉ះពាល់ចំនួន ៥ពាន់ដុល្លារក្នុងមួយហិកតារ។ កន្លងទៅ ប្រជាពលរដ្ឋបានដាក់ពាក្យបណ្ដឹងទៅប្រធានគណៈកម្មការទី១ នៃព្រឹទ្ធសភា នៅស្នាក់ការអង្គការលីកាដូ (Licadho) ខេត្តបាត់ដំបង ឲ្យជួយដោះស្រាយផ្ដល់សំណងដល់ពួកគាត់ឲ្យបានសមរម្យ ទៅតាមតម្លៃដីទីផ្សារបច្ចុប្បន្ន។ រហូតមកទល់ពេលនេះ ពុំទាន់ទទួលបានលទ្ធផលនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។