ប្រជាពលរដ្ឋប្រមាណ ១០នាក់រស់នៅអមផ្លូវរថភ្លើងនៅក្រុងប៉ោយប៉ែត ខេត្តបន្ទាយមានជ័យ នៅព្រឹកថ្ងៃទី២៨ ឧសភា បន្តការតវ៉ាសាជាថ្មីនៅមុខសាលាក្រុង ដើម្បីដាក់សម្ពាធឲ្យអាជ្ញាធរពាក់ព័ន្ធ ដោះស្រាយសំណងប៉ះពាល់ពីគម្រោងអភិវឌ្ឍន៍ផ្លូវរថភ្លើងជូនពួកគាត់ឲ្យបានឆាប់។
នេះជាលើកទី៧៧ ហើយដែលពលរដ្ឋរស់នៅក្រុងប៉ោយប៉ែត ទទូចឲ្យអាជ្ញាធរក្រុងដោះស្រាយសំណងប៉ះពាល់ពីគម្រោងអភិវឌ្ឍន៍ផ្លូវរថភ្លើងជូនពួកគាត់។
តំណាងអ្នកតវ៉ា លោក វន វ័ន្ត រស់នៅភូមិផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត ឲ្យដឹងនៅថ្ងៃទី២៨ ឧសភា ថា មូលហេតុដែលពួកគាត់តវ៉ាជាថ្មី ដោយសារអាជ្ញាធរក្រុង និងមន្ត្រីពាក់ព័ន្ធ មិនទាន់ផ្ដល់សំណងប៉ះពាល់ពីគម្រោងអភិវឌ្ឍន៍ជូនពួកគាត់នៅឡើយ៖ « ហើយគាត់ចេះតែមកលាបពណ៌ប្រជាពលរដ្ឋថាបម្រើបក្សនេះបក្សនោះ ទន្ទ្រានដីរដ្ឋនៅ។ ពួកខ្ញុំមានប័ណ្ណកាន់កាប់ដីធ្លីត្រឹមត្រូវផង ចុះបើពួកខ្ញុំគ្មានឯកសារក្នុងដៃវិញ មិនដឹងជាអាជ្ញាធរក្រុងធ្វើបាបយ៉ាងណា។ ខ្ញុំជាប្រជាពលរដ្ឋ ខ្ញុំឈឺចាប់ណាស់ មិនចង់ឲ្យអាជ្ញាធរធ្វើបែបនេះដាក់ពលរដ្ឋទេ » ។
លោកអះអាងថា ក្រុមអ្នកតវ៉ាប្រមាណ ១០នាក់តំណាងពលរដ្ឋជាង ៣០គ្រួសារជាប្រជាពលរដ្ឋក្រីក្រ គ្មានប្រាក់សម្រាប់ទិញដីសង់ទីលំនៅឋានថ្មីនោះទេ។
អាស៊ីសេរី ពុំអាចទាក់ទងអភិបាលរងក្រុងប៉ោយប៉ែត លោក ម៉ែន សុភ័ណ ដើម្បីសុំអត្ថាធិប្បាយជុំវិញបញ្ហានេះបានទេនៅថ្ងៃទី២៨ ឧសភា។ ប៉ុន្តែកន្លងទៅ លោក ម៉ែន សុភ័ណ មានប្រសាសន៍ថា អាជ្ញាធរក្រុងពុំមានសិទ្ធិអំណាចដោះស្រាយបញ្ហានេះជូនពលរដ្ឋទេ ព្រោះអាជ្ញាធរបានបញ្ជូនបណ្ដឹងរបស់ពលរដ្ឋដាក់ទៅអន្តរក្រសួង ដើម្បីដោះស្រាយរួចមកហើយ ប៉ុន្តែខាងអន្តរក្រសួងមិនទាន់ឆ្លើយតបថានឹងដោះស្រាយយ៉ាងណានៅឡើយ។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា បើទោះជាអាជ្ញាធរក្រុងបញ្ជូនបណ្ដឹងរបស់ពលរដ្ឋដាក់ទៅអន្តរក្រសួងយ៉ាងនេះក្ដី ក៏ករណីនេះក៏នៅតែជាតួនាទីរបស់អាជ្ញាធរក្រុងប៉ោយប៉ែត ត្រូវដោះស្រាយជូនពលរដ្ឋដដែល ព្រោះក្រុមអ្នកតវ៉ាស្ថិតនៅក្រោមការគ្រប់គ្រងរបស់អាជ្ញាធរក្រុងមួយនេះ៖ « អាជ្ញាធរអាចដោះស្រាយបាន ព្រោះថាអ្នកដែលអង្គុយកៅអីរដ្ឋមិនដែលបោះបង់ប្រជាពលរដ្ឋទេ ព្រោះពលរដ្ឋជាមនុស្សក្នុងសង្គម។ ដូច្នោះ អាជ្ញាធរត្រូវរៀបចំខ្លួនឲ្យបានល្អ មុននឹងចូលកាន់តំណែង ធ្វើយ៉ាងណាឲ្យប្រជាពលរដ្ឋមានសេចក្ដីសុខ មិនមែនអង្គុយកៅអីរដ្ឋប្រព្រឹត្តតែអំពើពុករលួយនោះទេ » ។
កន្លងទៅ ប៉ូលិសនៃអធិការនគរបាលក្រុងប៉ោយប៉ែត បានបង្ខំក្រុមអ្នកតវ៉ាឲ្យផ្ដិតស្នាមមេដៃធ្វើកិច្ចសន្យាចំនួន ៣លើកមកហើយ ដើម្បីឲ្យឈប់តវ៉ានៅមុខសាលាក្រុងបន្តទៀត។ ក្រុមអ្នកតវ៉ាទាមទារឲ្យអាជ្ញាធរដោះស្រាយសំណងប៉ះពាល់ពីគម្រោងសាងសង់ផ្លូវរថភ្លើងតាមផ្លូវច្បាប់។ ក្រុមអ្នកតវ៉ាបានវិលត្រឡប់ទៅផ្ទះវិញនៅព្រឹកថ្ងៃទី២៨ ដដែល បន្ទាប់ពីពួកគាត់តវ៉ាអស់ជាង ១ម៉ោង ដោយពុំមានដំណោះស្រាយ។ពលរដ្ឋអះអាងថា ប្រសិនបើអាជ្ញាធរមិនដោះស្រាយសំណងជូនពួកគាត់សមរម្យទេ ពួកគាត់នឹងតវ៉ាសាជាថ្មីទៀតក្នុងពេលឆាប់ៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។