អ្នកភូមិបង្កន នៃខេត្តព្រះវិហារ ជាង ១០០គ្រួសារ កំពុងនាំគ្នាជ្រួលច្របល់ខ្លាចបាត់បង់ដីស្រែចម្ការរបស់ពួកគេ និងគ្មានអ្វីធ្វើកសិកម្មចិញ្ចឹមជីវិតតទៅទៀត។ ការជ្រួលច្របល់នេះ កើតមានរយៈពេលជិត ២សប្ដាហ៍មកហើយ នៅពេលដែលគេឃើញក្រុមហ៊ុនដីសម្បទានសេដ្ឋកិច្ច ភី.អិន.ធី (PNT) យកគ្រឿងចក្រជាច្រើនទៅឈូសរំលំព្រៃឈើ ដើម្បីពង្រីកយកផ្ទៃដីសម្បទាន ប៉ុន្តែអាជ្ញាធរហាក់មិនអើពើទៅលើការប៉ះពាល់ដីកម្មសិទ្ធិរបស់ប្រជាពលរដ្ឋមួយចំនួនកន្លងមក។
ប្រជាពលរដ្ឋនៅភូមិបង្កន អំពាវនាវជាថ្មីម្ដងទៀតឲ្យអាជ្ញាធរឃុំរៀបរយ និងស្រុករវៀង មានវិធានការទប់ស្កាត់ក្រុមហ៊ុនដីសម្បទានសេដ្ឋកិច្ច ភី.អិន.ធី កុំឲ្យធ្វើសកម្មភាពឈូសឆាយដីព្រៃ ហើយរំលោភចូលដីស្រែ និងចម្ការរបស់ពួកគេ។
តំណាងសហគមន៍ភូមិបង្កន គឺលោក ស៊ូ ថាល់។ លោកមានប្រសាសន៍នៅរសៀលថ្ងៃច័ន្ទ ទី៩ ខែមករា ថា រយៈពេលជិតកន្លះខែហើយដែលក្រុមហ៊ុន ភី.អិន.ធី បានយកគ្រឿងចក្រមកឈូសរំលំព្រៃឈើជិតភូមិរបស់គាត់ ថែមទាំងរំលោភចូលដីស្រែចម្ការរបស់ប្រជាពលរដ្ឋមួយចំនួន។ បុរសដដែលបញ្ជាក់ថា រូបលោក និងអ្នកភូមិចំនួន ១០៦គ្រួសារ កំពុងរងការប៉ះពាល់ ដោយសារការឈូសឆាយរបស់ក្រុមហ៊ុននេះ ក៏ប៉ុន្តែអាជ្ញាធរតាំងពីថ្នាក់ភូមិ ឃុំ រហូតដល់ស្រុករវៀង ហាក់មិនបានយកចិត្តទុកដាក់ជួយការពារផលប្រយោជន៍របស់ប្រជាពលរដ្ឋទេ៖ « ខាងជើង ភូមិនេះ ក្រុមហ៊ុនឈូសប៉ះពាល់លើដីរបស់ប្រជាពលរដ្ឋច្រើនហិកតារហើយ ប៉ុន្តែ មិនដឹង ជាទប់ស្កាត់ យ៉ាងណាទេ ពីព្រោះខ្ញុំឃាត់គេអត់ឈ្នះដែរ »។
កាលពីថ្ងៃទី២៨ ខែធ្នូ ឆ្នាំ២០១៦ អ្នកភូមិបង្កន នៃឃុំរៀបរយ ធ្លាប់បានទប់ស្កាត់សកម្មភាពឈូសឆាយដីរបស់ក្រុមហ៊ុនម្ដងមកហើយ ព្រមទាំងអំពាវនាវឲ្យអាជ្ញាធរឃុំរៀបរយ និងស្រុករវៀង មានវិធានការដោះស្រាយការប៉ះពាល់មកលើពួកគេ ក៏ប៉ុន្តែអាជ្ញាធរមិនទាន់បានឆ្លើយតបអ្វីនៅឡើយទេ។
អាស៊ីសេរី មិនអាចសុំការបំភ្លឺជុំវិញរឿងនេះពីអភិបាលស្រុករវៀង លោក ឯ សារ៉ូ បានថាយ៉ាងណានៅឡើយ នៅថ្ងៃទី៩ ខែមករា ដោយសារតែលោកមិនទទួលទូរស័ព្ទដើម្បីសន្ទនា។
ចំណែកមេឃុំរៀបរយ លោក ឈុន មាស បានបដិសេធថា ក្រុមហ៊ុន ភី.អិន.ធី មិនបានឈូសរំលោភយកដីស្រែចម្ការដូចប្រជាពលរដ្ឋចោទប្រកាន់នោះទេ។ លោកមេឃុំរៀបរយ បញ្ជាក់ថា តាំងតែពីក្រុមហ៊ុនមានវត្តមាននៅទឹកដីឃុំរៀបរយ ក្នុងឆ្នាំ២០១៤ មក គឺអាជ្ញាធរខេត្តព្រះវិហារ អាជ្ញាធរស្រុករវៀង និងមន្ត្រីសុរិយោដី បានចុះទៅពិនិត្យ ព្រមទាំងឲ្យប្រជាពលរដ្ឋទាំងអស់សហការចុះទៅចង្អុលក្បាលដីរបស់ខ្លួន បើមានការប៉ះពាល់ដីកម្មសិទ្ធិ សូមឲ្យប្រាប់ទៅអាជ្ញាធរ ក៏ប៉ុន្តែមិនមានប្រជាពលរដ្ឋណាទៅចង្អុលបង្ហាញទេ។ លោកមេឃុំរៀបរយ អំពាវនាវម្ដងទៀត ប្រសិនបើប្រជាពលរដ្ឋណាមានដីធ្លីប៉ះពាល់ដោយសារការឈូសឆាយនោះ គឺសូមប្រាប់ទៅមេភូមិ និងអាជ្ញាធរឃុំ៖ « បើសិនជា ក្រុមហ៊ុន មានការ ប៉ះពាល់ ដីធ្លីរបស់ ប្រជាពលរដ្ឋ ណាមួយ សូមឲ្យមកទំនាក់ទំនងជាមួយមេភូមិ មន្ត្រីឃុំ ដើម្បី ចុះទៅ ពិនិត្យមើល និងដោះស្រាយជូន »។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តព្រះវិហារ លោក ឡោ ចាន់ យល់ថា បញ្ហាទំនាស់ដីធ្លីរវាងប្រជាពលរដ្ឋ និងក្រុមហ៊ុនដីសម្បទានសេដ្ឋកិច្ចនៅស្រុករវៀង ជាច្រើនកន្លែង ចាប់ផ្ដើមកម្រើកឡើងវិញហើយបន្ទាប់ពីស្ងប់ស្ងាត់តែមួយរយៈពេលខ្លី។
លោក ឡោ ចាន់ ឲ្យដឹងថា រយៈពេលជាង ២សប្ដាហ៍កន្លងមក គឺលោកបានទទួលព័ត៌មានស្ដីពីបញ្ហាទំនាស់ដីធ្លីកើតមានជាបន្តបន្ទាប់នៅក្នុងស្រុករៀង ដូចជានៅភូមិបង្កើនផល នៅភូមិបង្កន ឃុំរៀបរយ និងនៅតំបន់អូរតាលោក នៃឃុំរមទម ស្រុករវៀង ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។