ប្រជាពលរដ្ឋនៅស្រុកក្រគរ ខេត្តពោធិ៍សាត់ ចោទមេភូមិនៃឃុំឈើតុំ និងឃុំស្វាយស ថាបានឃុបឃិតគ្នាលក់ដីព្រៃរបស់រដ្ឋជាង ១ពាន់ហិកតារ ទៅឲ្យក្រុមឈ្មួញ។ ប៉ុន្តែមេភូមិឆ្លើយតបវិញថា ការចោទប្រកាន់របស់ក្រុមពលរដ្ឋ គឺជារឿងមិនពិត ដោយពលរដ្ឋមិនដឹងច្បាស់ពីការគ្រប់គ្រងដែនដីរដ្ឋបាលរបស់អាជ្ញាធរភូមិ ដែលមិនទាន់បានបែងចែកច្បាស់លាស់។
តំណាងអ្នកភូមិក្បាលទាហាន នៃឃុំឈើតុំ អះអាងនៅថ្ងៃទី២១ ខែមិថុនា ថា ផ្ទៃដីព្រៃទំហំជាង ៥០០ហិកតារ ឋិតនៅចំណុចភ្នំតាកុច និងច្រាបផ្ចឹក នៃឃុំស្វាយស ត្រូវឈ្មួញដាក់គ្រឿងចក្រឈូសរំលើងព្រៃចាប់តាំងពីថ្ងៃទី១២ ខែមិថុនា ឆ្នាំ២០១៥ គ្មានអាជ្ញាធរចុះទប់ស្កាត់ឡើយ។
បើទោះបីជាដីព្រៃដែលឈ្មួញកំពុងរំលោភយកនោះ ឋិតនៅក្នុងទឹកដីរដ្ឋបាលរបស់ឃុំស្វាយស តែពលរដ្ឋនៅភូមិចំនួន៤ នៃឃុំឈើតុំ និងឃុំស្វាយស ធ្លាប់ចូលទៅរកអនុផលព្រៃឈើ ដូចជា កាប់ឧស បោចវល្លិ ជីកដំឡូង រកទំពាំង និងមើលគោក្របី ជាដើម។
តំណាងពលរដ្ឋ លោក ម៉េង ប៊ុនរឿន ចោទមេភូមិក្បាលទាហាន ឃុំឈើតុំ ឈ្មោះ គុល សុគុណ និងអនុភូមិអន្សាចំបក់ ឃុំស្វាយស ឈ្មោះ វង្ស ថាជាអ្នកលក់ និងបើកដៃឲ្យឈ្មួញមានលុយបីនាក់នៅផ្សារបំណក់ ក្នុងស្រុកក្រគរ ដាក់គ្រឿងចក្រចំនួន ៤គ្រឿងឈូសព្រៃ។ លោករំឭកថា អ្នកភូមិក្បាលទាហាន ចំនួន ១៥គ្រួសារ ធ្លាប់ទៅហាមឃាត់មិនឲ្យឈូសឆាយដែរ ប៉ុន្តែគេមិនស្ដាប់៖ «ចូលដល់ដើមឆ្នាំ២០១៥ គឺមេភូមិយកដីទៅចែកគ្នាគាត់ លក់ទៅឲ្យឈ្មួញ អ្នកខ្លះយកទៅដូរតម្លៃអាត្រាក់ជាថ្នូរជាការឈូសដីរបស់គាត់។ ហើយមួយទៀត គាត់យកទៅលក់ឲ្យឈ្មួញដែលមានលុយទិញបីបួន ទៅ ១០ហិកតារអ៊ីចឹងទៅ។ ឥឡូវឈូសឆាយជិតអស់ហើយ ព្រៃមួយចំនួនដែលសល់គឺមានឈ្មួញគេមកដៅទុកអស់ហើយ»។
ឆ្លើយតបនឹងការចោទប្រកាន់នេះ មេភូមិក្បាលទាហាន លោក គុល សុគុណ បញ្ជាក់ថា ក្រុមពលរដ្ឋរករឿងចោទប្រកាន់អាជ្ញាធរភូមិដោយគ្មានលិខិតស្នាម ឬភស្តុតាងអ្វីទាំងអស់។ លោកថា កន្លងទៅអាជ្ញាធរភូមិអន្សាចំបក់ និងភូមិក្បាលទាហាន ពិតជាបានកំណត់ព្រំប្រទល់ភូមិសាស្ត្រប្រើប្រាស់ដីរវាងភូមិទាំងពីរ ហើយបានរួមគ្នារក្សាទុកដីក្រហមទំហំជាង ៥ហិកតារ សម្រាប់ប្រើប្រាស់ទៀតផង។ ចំណែកការលក់ដូរ ឬចាត់ចែងដីនៅតំបន់ភ្នំតាកុច និងច្រាបផ្ចឹក យ៉ាងណានោះ គឺជារឿងរបស់អាជ្ញាធរភូមិអន្សាចំបក់ ឬអាជ្ញាធរឃុំស្វាយស៖ «ប្រជាពលរដ្ឋខ្លះក្ដាប់អត់បាន ដោយសារអី? ព្រោះមានពីស្ថិតនៅក្នុងហ្នឹង ម្ល៉ោះហើយថាឃុបឃិតទិញដីនៅលើភ្នំ នៅតាមក្បែរហ្នឹងអីមានគេចាប់យកដីមែន ប៉ុន្តែខ្ញុំអត់ដឹងថា គេចាប់ដីនៅពេលណា ព្រោះខ្ញុំទើបធ្វើជាមេភូមិនៅឆ្នាំ២០១៣ នេះ។ អ៊ីចឹងដីដែលគេឈូសឆាយរាល់ថ្ងៃ គេថាជាដីកម្មសិទ្ធិរបស់គេ»។
វិទ្យុអាស៊ីសេរី មិនអាចទាក់ទងអនុប្រធានភូមិអន្សាចំបក់ ឈ្មោះ វង្ស និងអភិបាលស្រុកក្រគរ លោក ប៊ិន វណ្ណា ដែលទើបឡើងកាន់តំណែងថ្មី ដើម្បីសុំការបំភ្លឺបន្ថែមជុំវិញការចោទប្រកាន់នេះបានទេ នៅថ្ងៃទី២១ ខែមិថុនា។
តំណាងពលរដ្ឋអះអាងថា បើទោះបីជាក្រុមពលរដ្ឋមិនចាប់បានឯកសារ ឬភស្តុតាងបង្ហាញពីអំពើពុករលួយនេះក្ដី ប៉ុន្តែអនុប្រធានភូមិអន្សាចំបក់ ឈ្មោះ វង្ស បានចូលរួមសកម្មភាពជាមួយក្រុមឈ្មួញឈូសឆាយដីព្រៃរបស់រដ្ឋ។ ចំណែកមេភូមិក្បាលទាហាន លោក គុល សុគុណ វិញក៏បានទិញម៉ូតូថ្មីមួយគ្រឿងដែរ ដោយអ្នកភូមិសង្ស័យថា លុយដែលទិញម៉ូតូនោះ គឺបានមកពីការលក់ដូរដីព្រៃរបស់រដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។