ប្រជាពលរដ្ឋប្រមាណជាង ១០នាក់ តំណាងឲ្យពលរដ្ឋជាង ៥០គ្រួសារ ដែលរស់នៅអមផ្លូវរថភ្លើងនៅក្រុងប៉ោយប៉ែត ខេត្តបន្ទាយមានជ័យ នៅព្រឹកថ្ងៃទី៦ កុម្ភៈ បន្តការតវ៉ាជាថ្មីទៀតនៅមុខសាលាក្រុង ដើម្បីទាមទារឲ្យអាជ្ញាធរពាក់ព័ន្ធ ដោះស្រាយសំណងប៉ះពាល់ពីគម្រោងសាងសង់ផ្លូវរថភ្លើងជូនពួកគាត់។
នេះជាលើកទី៤៤ ហើយដែលពលរដ្ឋនៅក្រុងប៉ោយប៉ែត តវ៉ាទទូចឲ្យអាជ្ញាធរដោះស្រាយសំណងប៉ះពាល់ពីគម្រោងអភិវឌ្ឍន៍ផ្លូវរថភ្លើងជូនពួកគាត់។
តំណាងអ្នកតវ៉ារស់នៅសង្កាត់ផ្សារកណ្ដាល ក្រុងប៉ោយប៉ែត លោក វន វ័ន ឲ្យដឹងនៅថ្ងៃទី៦ កុម្ភៈ ថា ការតវ៉ាលើកទី៤៤ នេះ ក៏មិនខុសពីលើកមុនៗដែរ គឺអាជ្ញាធរពុំបានចេញទៅជួបដោះស្រាយជាមួយពួកគាត់នោះឡើយ។ លោកបន្ថែមថា អាជ្ញាធរគេចយករួចខ្លួន ដោយមិនគិតពីទុក្ខលំបាករបស់ពួកគាត់ដែលជាប្រជាពលរដ្ឋក្រីក្រ រកព្រឹកខ្វះល្ងាចនោះទេ។
លោកអះអាងថា មូលហេតុដែលពួកគាត់តវ៉ា ដោយសារព្រួយបារម្ភជាខ្លាំងនៅពេលដែលអាជ្ញាធរសង់ផ្លូវរថភ្លើងឆ្លងកាត់មុខផ្ទះ ធ្វើឲ្យពួកគាត់គ្មានផ្លូវធ្វើដំណើរចេញចូលក្នុងផ្ទះ ដែលមិនអាចរស់នៅទីនោះបន្តទៀតបាន៖ « អាជ្ញាធរមិនគោរព គោលនយោបាយ របស់ធនាគារ អភិវឌ្ឍន៍អាស៊ី អេ . ឌី . ប៊ី (ADB) ទេ។ អ៊ីចឹងបានជាពួកខ្ញុំមិនសុខចិត្ត ដោយសារតែ អត់មានសុវត្ថិភាព នៅពេលដែល រទេះភ្លើង សង់ហើយ ព្រោះអាជ្ញាធរសង់ផ្លូវរថភ្លើង កាន់តែ ខិតកៀក មកដល់ មែនទែនហើយ »។
ក្រុមអ្នកតវ៉ា ទាមទារឲ្យអាជ្ញាធរដោះស្រាយសំណងជូនពួកគាត់ទៅតាមតម្លៃដីនៅលើទីផ្សារ និងឲ្យបានឆាប់រហ័ស ដើម្បីយកប្រាក់ទៅទិញដីសង់ទីលំនៅថ្មីបានទាន់ពេលវេលា។
អាស៊ីសេរី មិនអាចទាក់ទងអភិបាលរងក្រុងប៉ោយប៉ែត ទទួលបន្ទុកដោះស្រាយវិវាទ លោក ម៉ែន សុភ័ណ ដើម្បីសុំអត្ថាធិប្បាយជុំវិញបញ្ហានេះបានទេ នៅថ្ងៃទី៦ កុម្ភៈ ដោយទូរស័ព្ទរបស់លោកនៅពេលព្រឹក មានអ្នកទទួលជំនួសប្រាប់ថា លោកជាប់រវល់ប្រជុំ ចំណែកនៅពេលរសៀល ពុំមានអ្នកទទួល។ ប៉ុន្តែកន្លងទៅ លោក ម៉ែន សុភ័ណ ធ្លាប់អះអាងថា អាជ្ញាធរក្រុងមិនអាចដោះស្រាយសំណងជូនក្រុមអ្នកតវ៉ាបានទេ ដោយសារពួកគាត់រស់នៅមិនស្ថិតក្នុងគម្រោងដែលត្រូវដោះស្រាយ។
មន្ត្រីសម្របសម្រួលអង្គការលីកាដូ (LICADHO) ប្រចាំខេត្តបន្ទាយមានជ័យ លោក ភុន ឈិន មានប្រសាសន៍ថា ក្រុមអ្នកតវ៉ាទាំងអស់នោះរងផលប៉ះពាល់ពីគម្រោងអភិវឌ្ឍន៍ផ្លូវរថភ្លើង ដែលអាជ្ញាធរត្រូវដោះស្រាយសំណងជូនពួកគាត់។ លោកសង្កត់ធ្ងន់ថា បញ្ហានេះប្រសិនបើអាជ្ញាធរក្រុងមិនដោះស្រាយទេ ពលរដ្ឋត្រូវដាក់ពាក្យប្ដឹងទៅស្ថាប័នផ្សេងទៀត ដូចជាធនាគារអភិវឌ្ឍន៍អាស៊ី អេ.ឌី.ប៊ី (ADB) និងគណៈកម្មការអន្តរក្រសួង ដើម្បីស្នើសុំឲ្យដោះស្រាយបន្ត៖ « យើងគិតថាអ្វីដែលអាជ្ញាធរធ្វើជាមិនដឹងមិនឮកន្លងមកនេះ ដោយសារប្រហែលមកពីអាជ្ញាធរគិតថាការតវ៉ារបស់ពួកគាត់ដដែលៗ។ ពេលអ៊ីចឹងបានជាគេមិនចាប់អារម្មណ៍ ហើយ កន្លងមក គេចេះតែព្យាយាមលើកហេតុផលថា គេបានដោះស្រាយរួចរាល់ហើយ ចំពោះអ្នកដែល នៅសល់ បន្តទាមទារ គឺពួកគាត់មិនព្រមទទួលយកសំណង និងអ្នកដែលមករស់នៅថ្មី »។
ប្រជាពលរដ្ឋបានវិលត្រឡប់ទៅផ្ទះវិញ បន្ទាប់ពីតវ៉ានៅមុខសាលាក្រុងប្រមាណ ១ម៉ោងកន្លះ ពុំមានដំណោះស្រាយ។ ក្រុមអ្នកតវ៉ាអះអាងថា ប្រសិនបើអាជ្ញាធរមិនដោះស្រាយសំណងជូនពួកគាត់ដែលអាចទទួលយកបានទេ ពួកគាត់នឹងតវ៉ាសាជាថ្មីទៀតក្នុងពេលឆាប់ៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។