ពលរដ្ឋរស់នៅតាមបណ្តោយផ្លូវរថភ្លើងពីចំណុចស្ថានីយរថភ្លើង ទៅដល់ចំណុចគីឡូម៉ែត្រលេខ៦ ទាមទារឲ្យសាលារាជធានីភ្នំពេញ ផ្តល់ព័ត៌មានអំពីការធ្វើផ្លូវថ្នល់នៅពីលើផ្លូវរថភ្លើងមួយខ្សែនេះ។ សង្គមស៊ីវិលយល់ថា ការព្រួយបារម្ភរបស់ពលរដ្ឋជារឿងត្រឹមត្រូវ ព្រោះពលរដ្ឋមានសិទ្ធិទទួលព័ត៌មានពីគម្រោងអភិវឌ្ឍន៍អ្វីមួយរបស់រដ្ឋាភិបាល។
បើទោះជាលោកនាយករដ្ឋមន្ត្រី ហ៊ុន សែន ប្រកាសពីគម្រោងធ្វើផ្លូវថ្នល់នៅលើផ្លូវរថភ្លើងនេះជាងបីខែមកហើយក្តី ប៉ុន្តែពលរដ្ឋប្រឈមការប៉ះពាល់នៃការធ្វើផ្លូវនេះ មិនទាន់បានទទួលព័ត៌មានណាមួយនៃការអភិវឌ្ឍនេះនៅឡើយទេ។ ពួកគេចង់ដឹងថា តើរដ្ឋាភិបាលនឹងផ្តល់សំណង ឬគោលការណ៍យ៉ាងណាចំពោះដីផ្ទះរបស់ពួកគេដែលប៉ះពាល់នោះ។
នៅព្រឹកថ្ងៃទី២៣ ខែមិថុនា ពលរដ្ឋប្រមាណ ៣០នាក់ តំណាងសហគមន៍ដែលប្រឈមការប៉ះពាល់ នាំគ្នាទៅឈរតវ៉ាមុខសាលាក្រុងភ្នំពេញ។ ជាលទ្ធផល សាលាក្រុងអនុញ្ញាតឲ្យតំណាងក្រុមពលរដ្ឋ ៥រូប ស្តាប់ការពន្យល់របស់មន្ត្រីសាលាក្រុង។
លោកស្រី មាស មុំ ពលរដ្ឋរស់នៅភូមិ២៣ សង្កាត់បឹងកក់៣ ខណ្ឌទួលគោក ដែលបានចូលស្តាប់ការពន្យល់របស់សាលាក្រុងភ្នំពេញ ប្រាប់ថា ពលរដ្ឋមិនទទួលព័ត៌មានអ្វីពីសាលាក្រុងនៅឡើយទេ។ ពលរដ្ឋរូបនេះ ស្នើទៅសាលាក្រុង ឬក្រសួងសាធារណការ បើកវេទិកាសាធារណៈពន្យល់ប្រាប់ពីការធ្វើផ្លូវនេះ៖ «ចំឡើយដដែលអត់មានវិជ្ជមានអីជូនពួកយើងទេ ពួកគាត់ថា ពេលណាដែលពួកគាត់ត្រូវការ ពួកគាត់នឹងចុះសិក្សា ថាត្រូវយកប៉ុន្មានម៉ែត្រ មកប៉ុន្មានពីអ័ក្សផ្លូវទើបគេបើកវេទិកា»។
អ្នកនាំពាក្យក្រសួងសាធារណការ និងដឹកជញ្ជូន លោក នូ វឌ្ឍនៈ ឲ្យដឹងថា ការធ្វើផ្លូវជាគម្រោងរបស់សាលារាជធានីភ្នំពេញ ព័ត៌មានផ្សេងទៀតលោកបដិសេធបំភ្លឺ។
វិទ្យុអាស៊ីសេរី មិនអាចសុំការបំភ្លឺពីអ្នកនាំពាក្យសាលាក្រុងភ្នំពេញ លោក ជិន ប៊ុនធឿន បានទេនៅថ្ងៃទី២៣ ខែមិថុនា។
លោក ហ៊ុន សែន ឲ្យដឹងក្នុងពិធីសម្ពោធអគាររដ្ឋបាលថ្មីរបស់សាលារាជធានីភ្នំពេញ កាលពីថ្ងៃទី៥ ខែមេសា ថា រដ្ឋាភិបាលនឹងសាងសង់ផ្លូវក្រាលកៅស៊ូមួយខ្សែដែលលុបលើផ្លូវរថភ្លើងចេញពីចំណុចស្ថានីយរថភ្លើងនៅភ្នំពេញ ទៅដល់គីឡូម៉ែត្រលេខ៦ ដើម្បីរំដោះការកកស្ទះចរាចរណ៍។
ប្រធានគណៈកម្មាធិការប្រព្រឹត្តិកម្មនៃក្រុមសម្ព័ន្ធអង្គការសង្គមស៊ីវិល លោក សួន ប៊ុនស័ក្តិ គាំទ្រការព្រួយបារម្ភរបស់ពលរដ្ឋនៅពេលនេះ។ លោកថា ប្រសិនបើអាជ្ញាធរនៅតែមិនផ្តល់ព័ត៌មានពីការអភិវឌ្ឍនេះឲ្យពលរដ្ឋបានដឹង គឺជាការរំលោភសិទ្ធិទទួលបានព័ត៌មាន៖ «ខ្ញុំព្រួយបារម្ភ ហើយយល់ថា នេះជាចំណាត់ការយឺតយ៉ាវឬក៏មិនត្រឹមត្រូវឬការអាចឈាន ដល់ការរំលោភបំពានសិទ្ធិទទួលបានព័ត៌មានរបស់ពលរដ្ឋ »។
តំណាងពលរដ្ឋ លោកស្រី មាស មុំ ឲ្យដឹងថា ពលរដ្ឋប្រឈមការប៉ះពាល់មានចំនួន ៩សហគមន៍។ លិខិតស្នើសុំរបស់ក្រុមពលរដ្ឋ បានដកស្រង់កិច្ចប្រជុំរបស់សាលាក្រុងភ្នំពេញ កាលពីថ្ងៃទី៤ ខែឧសភា ថា ការស្ថាបនាផ្លូវអមសងខាងផ្លូវដែកពីផ្លូវជាតិលេខ៥ រហូតដល់ផ្លូវ R6 (បឹងកក់) មានប្រវែង ៥៦២គីឡូម៉ែត្រ ដែលត្រូវស្ថាបនា ៧ម៉ែត្រសងខាងផ្លូវរថភ្លើង។
លោក ហ៊ុន សែន ធ្លាប់ប្រកាសលុបចោលគម្រោងសង់ផ្លូវល្បឿនលឿននៅលើបណ្តោយផ្លូវរថភ្លើងចោលម្តងហើយ ព្រោះកាលនោះ ពលរដ្ឋរងផលប៉ះពាល់ធ្វើបាតុកម្មទាមទារឲ្យមានការផ្តល់សំណងសមរម្យ។ ដោយឡែកក្រុមពលរដ្ឋដែលប្រឈមការប៉ះពាល់លើផ្លូវរថភ្លើងនៅពេលនេះ ថាពួកគេនៅតែស្វែងរកអន្តរាគមន៍ពីស្ថាប័ននានា ប្រសិនបើមានការបណ្ដេញចេញដូចពលរដ្ឋតំបន់បឹងកក់ បុរីកីឡា ឬថ្មគោលនោះ៕
វីដេអូ៖ ពលរដ្ឋរស់នៅតាមបណ្តោយផ្លូវរថភ្លើងទាមទារព័ត៌មានពីការធ្វើផ្លូវ
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។