ប្រជាពលរដ្ឋមានទំនាស់ដីធ្លីនៅសង្កាត់ព្រែកព្រះស្ដេច ក្រុងបាត់ដំបង ប្រមាណ ៣០នាក់ តំណាងឲ្យពលរដ្ឋជាង ៣០០គ្រួសារ នៅព្រឹកថ្ងៃទី២២ មិថុនា តវ៉ាប្រឆាំងនឹងអាជ្ញាធរក្រុងដែលបានចុះវាស់វែងបោះបង្គោលព្រំលើដីរបស់ពួកគាត់ ដើម្បីយកទៅបែងចែកឲ្យពលរដ្ឋមកពីតំបន់ផ្សេង។
អ្នកភូមិព្រួយបារម្ភខ្លាចអាជ្ញាធរមិនបានបែងចែកដីទំនាស់នោះជូនពួកគាត់។ ប៉ុន្តែអភិបាលរងក្រុងបាត់ដំបង បញ្ជាក់ថា អាជ្ញាធរចុះវាស់វែងបោះបង្គោលព្រំដី ដើម្បីងាយស្រួលដល់ការបែងចែកដីជូនប្រជាពលរដ្ឋឲ្យបានឆាប់រហ័ស។
ក្រុមអ្នកតវ៉ាលើកឡើងថា មូលហេតុដែលពួកគាត់ប្រតិកម្មនឹងអាជ្ញាធរចុះវាស់វែងបោះបង្គោលព្រំដី ដោយសារអាជ្ញាធរពុំមានឯកសារបង្ហាញឈ្មោះរបស់ពួកគាត់ ដែលបានទទួលដីទំនាស់នោះទេ។
តំណាងអ្នកតវ៉ាម្នាក់រស់នៅភូមិអូរខ្ជាយ សង្កាត់ព្រែកព្រះស្ដេច លោកស្រី គីវ បុប្ផា ប្រាប់វិទ្យុអាស៊ីសេរី នៅលើដីទំនាស់ភូមិអូរខ្ជាយ ថា អាជ្ញាធរវាស់វែងបោះបង្គោលព្រំដីទំហំទទឹង ៤ម៉ែត្រកន្លះ និងបណ្ដោយ ១៦ម៉ែត្រក្នុងមួយឡូត៍ ហើយចំលើដីរបស់លោកស្រីចំនួន ១៥ឡូត៍ ដែលបានកាន់កាប់តាំងពីឆ្នាំ១៩៩២។ លោកស្រីបញ្ជាក់ថា អាជ្ញាធរវាស់ដីនេះ ទំនងគម្រោងបែងចែកទៅឲ្យគ្រួសារយោធាដែលមានទ្រព្យសម្បត្តិមកពីតំបន់ផ្សេង ហើយធ្វើឲ្យពួកគាត់មិនបានទទួលដីនោះ៖ « ខ្ញុំចង់បាន ១០ឡូត៍ដូចដែលបានដាក់សំណើសុំទៅអាជ្ញាធរសង្កាត់ ប៉ុន្តែអត់ឃើញឈ្មោះខ្ញុំទេ។ ចំណែកឯអ្នកអត់ដី បែរជាមានឈ្មោះទទួលដីទៅវិញ។ តើមូលហេតុអ្វីបានជាអាជ្ញាធរធ្វើអ៊ីចឹង ?» ។
ស្រដៀងគ្នានេះដែរ ពលរដ្ឋនៅភូមិអូរខ្ជាយ ម្នាក់ទៀត លោកស្រី ជ័យ ភាព ថ្លែងថា អាជ្ញាធរចុះវាស់វែងបោះបង្គោលព្រំដីតាមអំពើចិត្ត ដោយពុំបានបង្ហាញឈ្មោះគ្រួសាររបស់លោកស្រី ថានឹងទទួលបានដីប៉ុន្មានឡូត៍នោះទេ។ លោកស្រីអះអាងថា អាជ្ញាធរមិនបង្ហាញឯកសារឈ្មោះឲ្យប្រជាពលរដ្ឋដឹង គឺមានចេតនាអាក្រក់លើពួកគាត់៖ « ខ្ញុំមិនសុខចិត្តទេ។ ខ្ញុំមិនឲ្យដីរបស់ខ្ញុំទេ។ សូមឲ្យសម្ដេច ហ៊ុន សែន ជួយដោះស្រាយឲ្យផង ព្រោះអីអាជ្ញាធរចេះតែមកវាស់ដីយកទៅឲ្យអ្នកផ្សេងតែរហូត » ។
ឆ្លើយតបនឹងបញ្ហានេះ អភិបាលរងក្រុងបាត់ដំបង លោក ឌី ពៅ មានប្រសាសន៍ថា អាជ្ញាធរវាស់ដីធ្វើឡើងទៅតាមគម្រោងអភិវឌ្ឍន៍របស់ខេត្ត ដែលមានបញ្ជីឈ្មោះរបស់ពលរដ្ឋសរុបចំនួន ៣៣៤គ្រួសារ នៅក្នុងភូមិចំនួន៣ គឺភូមិអូរខ្ជាយ ភូមិ១៣មករា និងភូមិចម្ការឫស្សី សង្កាត់ព្រែកព្រះស្ដេច ក្រុងបាត់ដំបង។ លោកអះអាងថា បន្ទាប់ពីបោះបង្គោលព្រំដីហើយ អាជ្ញាធរនឹងបែងចែកដីជូនប្រជាពលរដ្ឋដែលមានក្នុងបញ្ជីឈ្មោះទាំងអស់៖ « អ៊ីចឹងបន្ទាប់ពីខ្ញុំធ្វើប្លុក៥ ខ្ញុំធ្វើប្លុកមួយរាងទៅ ដើម្បីចង់ដឹងអ្នកដែលមានដីក្នុងសហគមន៍ អ្នកដែលមានដីឡូត៍ខាងក្រៅ មានប្រវត្តិដាំដុះនោះ ខ្ញុំស្រង់ព័ត៌មានឲ្យច្បាស់ ដើម្បីដោះស្រាយបញ្ហានេះ។ ហើយបើបងប្អូនចេះតែមករារាំងអ៊ីចឹង វាដោះអត់ចេញទេ។ ហើយផលលំបាក គឺពួកគាត់អត់មានសុវត្ថិភាពដីធ្លីទេ » ។
មន្ត្រីស៊ើបអង្កេតអង្គការលីកាដូ (LICADHO) ខេត្តបាត់ដំបង លោក ហេង សាយហុង បញ្ជាក់ថា អាជ្ញាធរក្រុងបាត់ដំបង គួរតែពិគ្រោះយោបល់ជាមួយប្រជាពលរដ្ឋដែលធ្លាប់កាន់កាប់ដីធ្លីនោះឲ្យបានច្បាស់លាស់ ដើម្បីឲ្យពួកគាត់អស់មន្ទិលសង្ស័យលើការងារនេះ៖ « ហើយប្រាប់អ្វីដែលយើងធ្វើកុំលាក់បាំង ថាឥឡូវបងប្អូនត្រូវបានចំណែកប៉ុន្មាន ? កុំឲ្យចេះតែដើរធ្វើមុនទៅ ហើយគាត់អត់បានទទួលបានព័ត៌មាននោះ ប្រជាពលរដ្ឋព្រួយបារម្ភជារឿងត្រឹមត្រូវហើយ » ។
កាលពីដើមឡើយ ដីទំនាស់នោះជាដីគម្រោងសួនសាធារណៈរបស់រដ្ឋ។ ក្រោយមក ប្រជាពលរដ្ឋជាង ៣០០គ្រួសារ បានទៅរស់នៅកាន់កាប់ និងដាំដុះផលដំណាំនៅលើដីនោះ។ នៅឆ្នាំ២០១៣ អាជ្ញាធរខេត្តបាត់ដំបង បានរៀបចំគម្រោងអភិវឌ្ឍន៍នៅតំបន់នោះ ហើយបានវាស់ធ្វើជាដីឡូត៍ដែលក្នុងមួយឡូត៍ទទឹង ៤ម៉ែត្រកន្លះ និងបណ្ដោយ ១៦ម៉ែត្រលើផ្ទៃដីសរុបជាង ៦៤០ឡូត៍ សម្រាប់បែងចែកឲ្យពលរដ្ឋក្រីក្រ និងអ្នកដែលបានកាន់កាប់នៅលើដីនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។