ពលរដ្ឋជាង ១០០នាក់ នៅភូមិវាល និងភូមិត្រពាំងសេះ សង្កាត់គោកចក ក្រុងសៀមរាប បានប្រមូលផ្ដុំគ្នាបិទកំណាត់ផ្លូវប៉ែកខាងលិចមិនឱ្យអ្នកដំណើរ និងភ្ញៀវទេសចរណ៍ខ្លះចូលទៅកាន់ប្រាសាទអង្គរវត្ត បានទេ។
ការបិទកំណាត់ផ្លូវនេះ ធ្វើឡើងចំនួន ២លើក គឺចាប់ពីម៉ោងជាង ១២ថ្ងៃត្រង់ ថ្ងៃសុក្រ ទី២៣ ខែមិថុនា បានបិទម្ដង និងចាប់ពីម៉ោង ២រសៀលម្ដងទៀត បន្ទាប់ពីមន្ត្រីអាជ្ញាធរអប្សរា បានសន្យាថា នឹងមកជួបជជែក ព្រមទាំងរកដំណោះស្រាយជុំវិញបញ្ហារុះរើសំណង់ថ្មីនៅក្នុងតំបន់ហាមឃាត់ ប៉ុន្តែមិនឃើញមន្ត្រីអប្សរាបង្ហាញខ្លួនតាមពេលវេលាណាត់ជួបមក។
ស្ត្រីអ្នកភូមិវាល ម្នាក់ ក្នុងចំណោមពលរដ្ឋដែលបិទផ្លូវជាច្រើនទៀត គឺអ្នកស្រី សែម សាវឿន។ អ្នកស្រីបានអះអាងនៅវេលាម៉ោងជិត ៥ល្ងាចនេះថា បញ្ហាដែលអ្នកស្រី និងអ្នកភូមិជាច្រើនទៀតលើកគ្នាមកបិទផ្លូវ គឺបន្ទាប់ពីអាជ្ញាធរអប្សរាបានបញ្ជូនកម្លាំងទៅរុះរើសំណង់ថ្មីរបស់ប្រជាពលរដ្ឋនៅជិតប្រាសាទអង្គរវត្ត អស់ចំនួន ៣ខ្នង៖ «អប្សរាហ្នឹងជាអ្នកបើកឱ្យប្រជាពលរដ្ឋធ្វើសំណង់ថ្មីនៅក្នុងតំបន់អង្គរ ក្នុងរយៈពេល ២០ថ្ងៃនៃការបោះឆ្នោត។ បើសិនជាគាត់មិនឱ្យធ្វើ ពេលដែលដឹកឈើ និងឥដ្ឋមក ហេតុអ្វីក៏មិនហាមឃាត់?»។
ក្រុមអ្នកភូមិទាមទារឱ្យអាជ្ញាធរអប្សរា បញ្ឈប់ការរុះរើសំណង់ថ្មីរបស់ពួកគេនៅក្នុងតំបន់ឧទ្យានអង្គរ បើពុំនោះទេពួកគេនៅតែលើកគ្នាតវ៉ា និងបិទផ្លូវទៀត។
អ្នកស៊ើបអង្កេតអង្គការសិទ្ធិមនុស្សលីកាដូ (LICADHO) ខេត្តសៀមរាប លោក ម៉ែន គឹមសួរ ដែលទៅឃ្លាំមើលសកម្មភាពបិទផ្លូវនោះមានប្រសាសន៍ថា លោកមានការព្រួយបារម្ភចំពោះការប្រឆាំងគ្នារវាងប្រជាពលរដ្ឋនៅក្នុងតំបន់អង្គរ ជាមួយនឹងអាជ្ញាធរអប្សរា ជុំវិញការចុះរុះរើសំណង់ដែលទើបតែសង់ថ្មីៗ នៅក្នុងអំឡុងពេលយុទ្ធនាការឃោសនា និងការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ កាលពីថ្ងៃទី២០ ខែឧសភា រហូតដល់ថ្ងៃទី៤ ខែមិថុនា នោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។