សាលាដំបូងខេត្តកំពត កោះហៅប្រជាពលរដ្ឋ ២គ្រួសារក្នុងចំណោម ១៨គ្រួសារ ទៅបំភ្លឺជុំវិញបណ្ដឹងដែលចោទថា ពលរដ្ឋទាំងនោះកំពុងរស់នៅលើដីកម្មសិទ្ធិឯកជនរបស់អ្នកដទៃ។ ក្រុមពលរដ្ឋបញ្ជាក់ថា ពួកគាត់បានមករស់នៅលើដីនេះជាង ១០ឆ្នាំមកហើយ ដោយគ្មានការតវ៉ាពីបុគ្គលណាម្នាក់ឡើយ ប៉ុន្តែទើបតែពេលនេះមានម្ចាស់ផ្ទះសំណាក់មួយនៅក្រុងកែប ចេញមុខអះអាងថា ជាដីកម្មសិទ្ធិរបស់ខ្លួន និងប្ដឹងប្រជាពលរដ្ឋទាំង ១៨គ្រួសារទៅវិញ។
តំណាងប្រជាពលរដ្ឋ លោកស្រី ចេវ គន្ធឿន ថ្លែងប្រាប់វិទ្យុអាស៊ីសេរី នៅថ្ងៃទី២០ ខែមករា ថា ការកោះហៅទៅបំភ្លឺរបស់សាលាដំបូងខេត្តកំពត ពេលនេះ ធ្វើឡើងតាមពាក្យបណ្ដឹងរបស់ស្ត្រីម្នាក់ឈ្មោះ អែម វណ្ណា ដែលអះអាងថា ខ្លួនជាម្ចាស់កម្មសិទ្ធិដីដែលពលរដ្ឋទាំង ១៨គ្រួសារកំពុងរស់នៅ។
លោកស្រី ចេវ គន្ធឿន បញ្ជាក់ទៀតថា ក្រុមពលរដ្ឋបានមករស់នៅលើដីនេះតាំងពីឆ្នាំ២០០០ និងចាប់ផ្ដើមសាងសង់ផ្ទះនៅលើដីនោះនៅឆ្នាំ២០០៦ ដោយមិនមាននរណាម្នាក់មកអះអាងថា ជាម្ចាស់នោះទេ ទើបតែពេលនេះបែរជាមានពាក្យបណ្ដឹងពីស្ត្រីម្នាក់ឈ្មោះ អែម វណ្ណា ដែលជាម្ចាស់ផ្ទះសំណាក់មួយកន្លែងនៅក្រុងកែប ចោទក្រុមពលរដ្ឋថា កំពុងរស់នៅលើដីគាត់៖ «ពេលដែលពួកខ្ញុំទៅនៅ ខាងបរិស្ថានធ្លាប់ហៅទៅ ប៉ុន្តែឥឡូវគេវាស់ជៀសអស់ហើយ។ គេទៅបោះព្រំនៅខាងក្រោយផ្ទះពួកខ្ញុំ។ នេះគេទុកលទ្ធភាពឱ្យប្រជាជននៅដែរ»។
ដីដែលកំពុងមានទំនាស់នេះ មានទំហំ ៤,០៥០ម៉ែត្រការ៉េ ស្ថិតនៅជើងភ្នំគរ ជាប់ព្រះរាជដំណាក់ ក្នុងភូមិថ្មី សង្កាត់ព្រៃធំ ក្រុងកែប។
ពលរដ្ឋម្នាក់ក្នុងចំណោមពីរនាក់ ដែលចូលបំភ្លឺនៅតុលាការ លោក ណាំ ឡូញ ឱ្យដឹងថា លោក និងពលរដ្ឋដទៃទៀតបានទៅរស់នៅលើដីនោះដោយមិនមានភាពចម្រូងចម្រាសជាមួយពលរដ្ឋណាមួយឡើយ គឺមានតែជាមួយអាជ្ញាធរក្រុងកែប តែប៉ុណ្ណោះ។ កាលនោះ អាជ្ញាធរក្រុងកែប បញ្ជាក់ថា ពលរដ្ឋរស់នៅប៉ះពាល់ទៅលើដីបរិស្ថាន និងឧទ្យានជាតិកែប។ ប៉ុន្តែក្រោយមកអាជ្ញាធរក្រុងបានសម្រេចឱ្យពលរដ្ឋបន្តការរស់នៅលើដីនេះជាបន្តទៀត ដោយមិនបានចេញប្លង់កម្មសិទ្ធិឱ្យពលរដ្ឋណាម្នាក់នោះទេ។
លោក ណាំ ឡូញ៖ «ពួកខ្ញុំអត់ទាន់មានប្លង់ទេ ពីព្រោះគេមិនទាន់ចេញឱ្យ។ កាលនោះក្រុមយុវជនបម្រុងនឹងវាស់វែង ប៉ុន្តែខាងក្រុងថា កុំទាន់អាលវាស់ ចាំគេធ្វើប្លង់ជាប្រព័ន្ធវិញ។ អ៊ីចឹងបានជាកើតរឿងពួកខ្ញុំអត់មានប្លង់ដល់សព្វថ្ងៃ។ គេ (តុលាការ) សួរមួយទៀតថា ក្រោយពេលមានពាក្យបណ្តឹងហ្នឹងហើយ តើយើងទទួលស្គាល់ពាក្យបណ្ដឹង ឬក៏បដិសេធចោល? ខ្ញុំក៏ឆ្លើយថា បដិសេធចោល»។
វិទ្យុអាស៊ីសេរី មិនអាចទាក់ទងសុំការបំភ្លឺពីភាគីដើមបណ្ដឹង លោកស្រី អែម វណ្ណា បានទេ នៅថ្ងៃទី២០ មករា ដោយទូរស័ព្ទចូលជាច្រើនដងតែមិនមានអ្នកទទួល។ ចំណែកមន្ត្រីសាលាខេត្តកែប ក៏មិនអាចទាក់ទងបានដូចគ្នា។
មន្ត្រីស៊ើបអង្កេតសមាគមអាដហុក (ADHOC) ប្រចាំខេត្តកំពត លោក ហេង ភារៈ ដែលបានតាមដានរឿងនេះបញ្ជាក់ថា ដីដែលពលរដ្ឋទាំង ១៨គ្រួសារកំពុងរស់នៅ គឺជាប្រភេទដីភ្នំ ជាសម្បត្តិសាធារណៈរបស់រដ្ឋ ដែលគ្មានអ្វីសំអាងថាជាដីរបស់លោកស្រី អែម វណ្ណា នោះទេ។
លោក ហេង ភារៈ កត់សម្គាល់ថា វាអាចនឹងមានភាពមិនប្រក្រតីកើតឡើងនៅក្នុងរឿងនេះ ព្រោះប្រជាពលរដ្ឋបានមកតាំងទីលំនៅរយៈពេលច្រើនឆ្នាំមកហើយ ប៉ុន្តែលោកស្រី អែម វណ្ណា មិនបានចេញមុខតវ៉ាអ្វីឡើយ ទើបតែពេលនេះបែរជាលោកស្រីហ៊ានអះអាងថា ដីនេះជាកម្មសិទ្ធិរបស់ខ្លួនទៅវិញ៖ «ការរស់នៅរបស់ពួកគាត់ហ្នឹង វាមានរយៈពេលយូរ អ៊ីចឹងអាជ្ញាធរ និងប្រមុខរាជរដ្ឋាភិបាលសម្តេច ហ៊ុន សែន គួរតែពិចារណាផ្តល់ជាកម្មសិទ្ធិជូនពួកគាត់ ដើម្បីឱ្យមានសិទ្ធិរស់នៅលើដីដោយស្របច្បាប់ ពីព្រោះអ្វីដែលពួកគាត់រស់នៅហ្នឹង មានរយៈពេលជាង ១០ឆ្នាំហើយ»។
ក្រុមពលរដ្ឋសំណូមពរដល់ដើមបណ្ដឹង គឺលោកស្រី អែម វណ្ណា ឱ្យដកពាក្យបណ្ដឹងវិញ ហើយក៏សំណូមពរដល់អាជ្ញាធរខេត្តកែប ចេញប្លង់កម្មសិទ្ធិដីឱ្យពួកគេផងដែរ ដើម្បីពួកគេអាចបន្តរស់នៅ និងប្រកបមុខលក់ដូរនៅលើដីនេះតទៅទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។