អ្នក​កាសែត​៤​នាក់​ត្រូវ​បាន​​បញ្ជូន​ទៅ​តុលាការ​ខេត្ត​រតនគិរី​ជាប់​សង្ស័យ​កំហែង​​ទារ​ប្រាក់

0:00 / 0:00

អយ្យការ​សាលាដំបូង​ខេត្ត​រតនគិរី សម្រេច​ចោទ​ប្រកាន់​អ្នក​កាសែត ៤​នាក់ ពី​បទ​កំហែង​ទារ​ប្រាក់​ដែល​មាន​ចែង​ក្នុង​ក្រមព្រហ្មទណ្ឌ​នៃ​ព្រះរាជាណាចក្រ​កម្ពុជា ដែល​អាច​ប្រឈម​មុខ​ទៅ​នឹង​ទោស​ដាក់​ពន្ធនាគារ​ពី ២​ឆ្នាំ ដល់ ៥​ឆ្នាំ។

មន្ត្រី​កងរាជអាវុធហត្ថ​ខេត្ត​រតនគិរី បាន​បើក​សន្និសីទ​កាសែត​ភ្លាមៗ​មុន​ពេល​បញ្ជូន​អ្នក​កាសែត ៤​រូប​ទៅ​សាលាដំបូង​ខេត្ត​នៅ​ព្រលឹម​ថ្ងៃ​ទី​១៦ ខែ​មិថុនា ដោយ​ចាត់​ទុក​ថា អ្នក​កាសែត​ទាំង ៤​នាក់ មាន​ជាប់​ពាក់ព័ន្ធ​កំហែង​ទារ​ប្រាក់​ពី​រថយន្ត​ដឹក​ជញ្ជូន​ឈើ​ជន្លង់​ដើម​ស្រកានាគ​ពីរ​ករណី​ផ្សេង​គ្នា។

អ្នក​កាសែត​បី​នាក់​មាន​ឈ្មោះ ប៉េង សុខថារៈ អ្នក​យក​ព័ត៌មាន​គេហទំព័រ ភី.ស៊ី.អិន ធីវី​ធូ (PCN TV2)។ ឈ្មោះ ម៉េង ហ៊ុយ អ្នក​យក​ព័ត៌មាន​កាសែត​ដំណឹង​ភ្នំពេញ និង​ស្ត្រី​ឈ្មោះ ច័ន្ទ ណារ៉ា អ្នក​យក​ព័ត៌មាន​ទូរទស្សន៍​អនឡាញ (Online) សង្កេតការណ៍​ត្រូវ​បាន​ចោទ​ពី​បទ​កំហែង​ទារ​ប្រាក់​ចំនួន ៦០០​ដុល្លារ និង​ឈ្មោះ យ៉ន ទិត្យ អ្នក​យក​ព័ត៌មាន​គេហទំព័រ​ឈ្មោះ​យុវជន​ខ្មែរ​ព័ត៌មាន ជាប់​ចោទ​កំហែង​ទារ​ប្រាក់ ៥០០​ដុល្លារ​បាន​សម្រេច​ដូច​គ្នា។

មេបញ្ជាការ​កងរាជអាវុធហត្ថ​ខេត្ត​រតនគិរី លោក គឹម រស្មី ថ្លែង​ថា សមត្ថកិច្ច​បាន​រក​ឃើញ​វត្ថុតាង​ប្រាក់​ដុល្លារ​ដែល​ជន​ឈ្មោះ​ទាំង​ពីរ​ក្រុម​កំហែង​បាន​ពី​ម្ចាស់​រថយន្ត និង​ប្រាក់​ដុល្លារ​ក្លែងក្លាយ​ចំនួន ១.៦០០​ដុល្លារ​ទៀត​នៅ​ជាប់​ខ្លួន​ជនសង្ស័យ ខណៈ​ម្ចាស់​រថយន្ត​ប្ដឹង​សុំ​អន្តរាគមន៍​ពី​កងរាជអាវុធហត្ថ​កាល​ពី​ថ្ងៃ​ទី​១៤ ខែ​មិថុនា៖ «ទាំង ៤​នាក់​នេះ​មាន​សំណុំរឿង​ពីរ​ផ្សេង​គ្នា ខ្ញុំ​អត់​បាន​ហាមឃាត់​គំរាមកំហែង​គាត់​ឲ្យ​ឆ្លើយ​ទេ គាត់​​បាន​ឆ្លើយ គាត់​សារភាព​ទាំង​ពីរ​ក្រុម ម្នាក់ ៥០០​ដុល្លារ ម្ខាង​ទៀត ៦០០​អ៊ីចឹង​មែន។ ពាក្យ​ប្ដឹង​យ៉ាង​​ម៉េច​ពួកគាត់​បាន​ឆ្លើយ​ទាំង​អស់ ពាក្យ​គេ​ប្ដឹង ៦០០ ពេល​ខ្ញុំ​ទៅ​ឃាត់​មក​លុយ ៦០០។ តែ​ខាង យ៉ន ទិត្យ ៥០០ គឺ​គាត់​សារភាព​ថា ៥០០ ទើប​តែ​យក​គេ​អំបាញ់មិញ​នេះ»

ជនជាប់ចោទ​ស្ត្រី​ឈ្មោះ ច័ន្ទ ណារ៉ា បញ្ជាក់​ប្រាប់​អាស៊ីសេរី​ថា ប្រាក់ ៦០០​ដុល្លារ​គឺ​ម្ចាស់​រថយន្ត​បាន​ដាក់​ក្នុង​ហោប៉ៅ​អាវ​របស់​ខ្លួន ខណៈ​អ្នក​យក​ព័ត៌មាន​ចុះ​ថត​រថយន្ត​ដឹក​ឈើ។ ចំណែក​បុរស​​​ឈ្មោះ យ៉ន ទិត្យ បញ្ជាក់​ថា ខ្លួន​មិន​បាន​កំហែង​ទារ​ប្រាក់​ដូច​ការ​ចោទ​នោះ​ឡើយ គឺ​ម្ចាស់​ឡាន​ឈើ​បាន​យក​លុយ​មក​បោះ​ក្នុង​ឡាន​ឲ្យ​លោក​ទើប​សមត្ថកិច្ច​មក​ដល់។

នៅ​ព្រឹក​ថ្ងៃ​ទី​១៦ ខែ​មិថុនា កង​អាវុធហត្ថ​ប្រមាណ ១០​នាក់ បាន​នាំ​ខ្លួន​អ្នក​កាសែត​ទាំង ៤​នាក់​ទៅ​ប្រគល់​ជូន​អយ្យការ​សាលាដំបូង​ខេត្ត​ដើម្បី​ធ្វើការ​សាកសួរ​ជុំវិញ​ការ​ចោទ​ប្រកាន់​នេះ។

អាស៊ីសេរី មិន​អាច​ទាក់ទង​អ្នកនាំពាក្យ​អយ្យការ​សុំ​អធិប្បាយ​បញ្ហា​នេះ​បាន​ទេ នៅ​ថ្ងៃ​ទី​១៦ ខែ​មិថុនា ក៏ប៉ុន្តែ​មន្ត្រី​សាលាដំបូង​ខេត្ត​មួយ​រូប​សុំ​មិន​បញ្ចេញ​ឈ្មោះ​ឲ្យ​ដឹង​ថា មន្ត្រី​អយ្យការ​សម្រេច​ចោទ​ប្រកាន់​អ្នក​កាសែត​ទាំង​បួន​នាក់ ពី​បទ​កំហែង​ទារ បន្ទាប់​ពី​សាកសួរ​អង្គហេតុ​ពួកគេ​រួច​មក។ មន្ត្រី​ដដែល​ឲ្យ​ដឹង​ថា សំណុំរឿង​ចោទ​អ្នក​កាសែត​ចែក​ជា​ពីរ​សំណុំរឿង និង​បាន​បញ្ជូន​ទៅ​ចៅក្រម​
​ស៊ើប​សូរ​ដើម្បី​ចាត់​ការ​បន្ត។

លោក​មេធាវី ម៉ៅ សារី ដែល​ការពារ​ក្ដី​ឲ្យ​ជនជាប់ចោទ​បី​រូប គឺ​ឈ្មោះ ប៉េង សុខថារៈ ឈ្មោះ ម៉េង ហ៊ុយ និង​ស្ត្រី​ឈ្មោះ ច័ន្ទ ណារ៉ា ទទួល​ស្គាល់​ថា កូន​ក្ដី​លោក​ពិត​ជា​ត្រូវ​បាន​ចោទ​ប្រកាន់​ពី​អយ្យការ​រួច​​ហើយ។ លោក​ថា កូន​ក្ដី​លោក​ទទួល​ស្គាល់​ថា បាន​ទទួល​ប្រាក់​ពី​ម្ចាស់​ឈើ​ដែល​មាន​លក្ខណៈ​ព្រមព្រៀង​មិន​មែន​កំហែង​ទារ​ដូច​ការ​ចោទ​នោះ​ទេ៖ «ឥឡូវ​មក​ដល់​ដំណាក់កាល​ចៅក្រម​ស៊ើបសួរ ហើយ​រហូត​មក​ដល់​ម៉ោង​នេះ​មិន​ដឹង​ចៅក្រម​​ស៊ើបសួរ​គាត់​សម្រេច​យ៉ាង​ណា​ទេ។ គាត់​ឆ្លើយ​អង្គហេតុ​ដែល​កើត​ឡើង​មិន​មាន​ទាក់ទង​ការ​ជំរិត ឬ​គំរាមកំហែង​យក​ទេ គឺ​ជា​ការ​ជជែក​គ្នា​រវាង​គាត់ និង​អ្នក​ទំនាក់ទំនង​គ្នា​ជាមួយ​គាត់»

ទោះ​បី​ជា​យ៉ាង​នេះ​ក្តី រហូត​មក​ទល់​នឹង​រសៀល​ថ្ងៃ​ទី​១៦ ខែ​មិថុនា អ្នក​កាសែត​ទាំង ៤​នាក់ ត្រូវ​បាន​​​ចៅក្រម​ស៊ើបសួរ​សម្រេច​ឃុំ​ខ្លួន​បណ្ដោះអាសន្ន​នៅ​ពន្ធនាគារ​ខេត្ត​ដើម្បី​បន្ត​ការ​ស៊ើប​អង្កេត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។