លោក មូរតុន ក្លា (Morton Sklar) មេធាវីអាមេរិកាំង នឹងដាក់ភស្តុតាងបន្ថែមទៀតនៅតុលាការព្រហ្មទណ្ឌអន្តរជាតិ ដើម្បីគាំទ្របណ្ដឹងរបស់លោកប្រឆាំងនឹងលោកនាយករដ្ឋមន្ត្រី ហ៊ុន សែន ពីបទឧក្រិដ្ឋកម្មប្រឆាំងនឹងមនុស្សជាតិ។
ក្រុមមេធាវីអន្តរជាតិអះអាងថា ពាក្យបណ្ដឹងនៅតុលាការអន្តរជាតិ មិនពាក់ព័ន្ធនឹងនយោបាយនៅកម្ពុជាទេ ហើយវិបត្តិនយោបាយនៅកម្ពុជា ក៏មិនអាចកែប្រែបណ្ដឹងនេះបានឡើយ។
លោកមេធាវី មូរតុន ក្លា បញ្ជាក់ថា លោកបានសហការនឹងអង្គការការពារសិទ្ធិអន្តរជាតិ (Amnesty International) ស្វែងរកឯកសារបន្ថែមទៀត ដើម្បីពន្លឿនពាក្យបណ្ដឹងប្រឆាំងរដ្ឋាភិបាលរបស់លោក ហ៊ុន សែន។ លោកបន្តទៀតថា បច្ចុប្បន្ន តុលាការកំពុងសិក្សាលើពាក្យបណ្ដឹងនេះ ក្រោយពេលតុលាការទទួលបានពាក្យបណ្ដឹងដែលបានដាក់កាលពីថ្ងៃទី១៧ ខែមីនា។ ភស្តុតាងថ្មីនោះ រួមមានការប្រើប្រាស់ហិង្សាបង្ក្រាបលើបាតុករ កម្មករ ពលរដ្ឋមានជម្លោះដីធ្លី ដែលបណ្ដាលឲ្យមានការចាប់ឃាត់ខ្លួន និងស្លាប់មនុស្សជាច្រើននាក់។
លោកមេធាវី មូរតុន ក្លា អះអាងថា ការបញ្ចប់វិបត្តិនយោបាយនៅកម្ពុជា មិនប៉ះពាល់ដល់ពាក្យបណ្ដឹង និងដំណើរការរបស់ព្រះរាជអាជ្ញាតុលាការព្រហ្មទណ្ឌអន្តរជាតិឡើយ។ លោកថា បទចោទប្រកាន់ស្ដីពីឧក្រិដ្ឋកម្មប្រឆាំងនឹងមនុស្សជាតិប្រឆាំងនឹងរដ្ឋាភិបាលលោក ហ៊ុន សែន បានធ្វើឡើងរួចហើយ ដូច្នោះតាមច្បាប់អន្តរជាតិទាមទារឲ្យតុលាការព្រហ្មទណ្ឌអន្តរជាតិ ពិនិត្យមើលបទចោទប្រកាន់នេះ៖ «យើងមិនមានជាប់ពាក់ព័ន្ធនឹងគណបក្សនយោបាយឡើយ យើងទទួលដំណឹងពីតុលាការថា ពាក្យបណ្ដឹងកំពុងមានដំណើរការទៅមុខ»។
កាលពីខែមីនា ឆ្នាំ២០១៤ ក្រុមមេធាវីតំណាងឲ្យជនរងគ្រោះដែលត្រូវបានកងកម្លាំងប្រដាប់អាវុធរដ្ឋាភិបាលបាញ់សម្លាប់ កាលពីចុងឆ្នាំ២០១៣ និងដើមឆ្នាំ២០១៤ នឹងដាក់ពាក្យបណ្ដឹងប្រឆាំងលោក ហ៊ុន សែន ចោទប្រកាន់ពីបទឧក្រិដ្ឋកម្មប្រឆាំងនឹងមនុស្សជាតិនៅតុលាការព្រហ្មទណ្ឌអន្តរជាតិ (ICC)។ ពាក្យបណ្ដឹងនោះ ផ្ដោតលើការប្រើប្រាស់អំពើហិង្សាជាប្រព័ន្ធទៅលើពលរដ្ឋស្លូតត្រង់ និងសកម្មជនសិទ្ធិមនុស្សដែលចូលរួមការតវ៉ានយោបាយ និងបាតុកម្មប្រឆាំងនឹងការបង្ខំបណ្ដេញចេញពីផ្ទះសម្បែង និងទាមទារដំឡើងប្រាក់ខែកម្មករជាដើម។
បច្ចុប្បន្ន ព្រះរាជអាជ្ញាកំពុងសិក្សាលើបណ្ដឹងដើម្បីកំណត់ថា តើតុលាការមានយុត្តាធិការកាត់ក្តីករណីនេះ ឬទេ។ តុលាការឧក្រិដ្ឋកម្មអន្តរជាតិ ជាតុលាការអចិន្ត្រៃយ៍មួយដែលត្រូវបានបង្កើតឡើងពីលក្ខន្តិកៈទីក្រុងរ៉ូម ដើម្បីផ្ដន្ទាទោសបុគ្គលទាំងឡាយណាដែលទទួលខុសត្រូវចំពោះបទប្រល័យពូជសាសន៍ ឧក្រិដ្ឋកម្មសង្គ្រាម និងមនុស្សជាតិ និងឧក្រិដ្ឋកម្មនៃការឈ្លានពាន។ តុលាការនេះមិនអាចជំនួសតុលាការនៃប្រទេសជាសមាជិកទេ ប៉ុន្តែអាចស៊ើបអង្កេត និងផ្ដន្ទាទោសបុគ្គលណាដែលជាប់សង្ស័យពីបទឧក្រិដ្ឋកម្ម ប្រសិនបើតុលាការនៅប្រទេសសាមីនោះ មិនអាចធ្វើបាន ឬគ្មានឆន្ទៈក្នុងការស៊ើបអង្កេត។
មន្ត្រីនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន អះអាងថា ពាក្យបណ្ដឹងរបស់មេធាវីបរទេសនៅពេលនេះគ្មានទម្ងន់ដែលអាចឲ្យតុលាការលើកករណីនេះមកជំនុំជម្រះឡើយ។ លោកថា បណ្ដឹងនេះមានចរិតជាបណ្ដឹងបរិហារតែប៉ុណ្ណោះ៖ «អាបណ្ដឹងអាបរិហារកេរ្តិ៍ ការប្រមាថសម្ដេចមិនមែនជាលើកទីមួយទេ ជាច្រើនដងហើយ ក៏ប៉ុន្តែប្រជាប្រិយរបស់សម្ដេចនៅតែមានបន្តទាំងក្នុងស្រុកនិងក្រៅស្រុក»។
ចំណែកអ្នកនាំពាក្យគណបក្សសង្គ្រោះជាតិ លោក យឹម សុវណ្ណ អះអាងថា គណបក្សសង្គ្រោះជាតិ មិនជាប់ពាក់ព័ន្ធទៅនឹងបណ្ដឹងប្រឆាំងលោក ហ៊ុន សែន ឡើយ ប៉ុន្តែគណបក្សប្រឆាំងគាំទ្រការផ្ដន្ទាទោសប្រឆាំងនឹងការរំលោភសិទ្ធិមនុស្ស និងឧក្រិដ្ឋកម្មផ្សេងៗ៖ «បណ្ដឹងគឺជនរងគ្រោះគេឈឺចាប់ គេប្ដឹងជារឿងជនរងគ្រោះ។ បទល្មើសព្រហ្មទណ្ឌអំពើអយុត្តិធម៌ធ្វើយ៉ាងម្ដេចដើម្បីរកយុត្តិធម៌ឲ្យជនរងគ្រោះ»។
ក្រៅពីការដាក់ភស្តុតាងបន្ថែមរបស់មេធាវីអាមេរិកនោះ។ មេធាវីជនជាតិអង់គ្លេស លោក រីឆាដ រ៉ចជើរ (Richard Rogers) នៃក្រុមហ៊ុនមេធាវី Global Diligence ក៏គ្រោងនឹងដាក់បណ្ដឹងបន្ថែមមួយទៀតប្រឆាំងលោក ហ៊ុន សែន ពីបទឧក្រិដ្ឋកម្មប្រឆាំងនឹងមនុស្សជាតិដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។