ប្រធានអង្គភាពប្រឆាំងអំពើពុករលួយ (ACU) បដិសេធថា ខ្លួនមិនបានរំលោភច្បាប់ក្នុងការឃាត់ខ្លួនសកម្មជនសិទ្ធិមនុស្សអាដហុក (ADHOC) និងមន្ត្រី គ.ជ.ប ឡើយ។ ប្រតិកម្មនេះ ធ្វើឡើងបន្ទាប់ពីក្រុមមេធាវីរបស់បុគ្គលិកសមាគមសិទ្ធិមនុស្សអាដហុក ប្រកាសថា ACU មិនឲ្យពួកគេជួបកូនក្តីរបស់ខ្លួនក្រោយការឃាត់ខ្លួនរយៈពេល ២៤ម៉ោងដូចច្បាប់កំណត់ ប៉ុន្តែរង់ចាំរហូតដល់ជាង ៦០ម៉ោង ទើបអនុញ្ញាតឲ្យជួបនៅតុលាការតែម្តង។
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ មានប្រសាសន៍ថា លោកមិនបានធ្វើផ្ទុយពីច្បាប់ដូចការចោទប្រកាន់របស់មេធាវី នៅក្នុងដំណើរនីតិវិធីឃាត់ខ្លួនជនសង្ស័យ ៥រូប ដែល ៤រូបជាមន្ត្រីសិទ្ធិមនុស្សនៃសមាគមអាដហុក និង ១រូបទៀតជាអគ្គលេខាធិការរងនៃគណៈកម្មាធិការជាតិរៀបចំការបោះឆ្នោត (គ.ជ.ប) ពាក់ព័ន្ធនឹងការសូកប៉ាន់សាក្សីនោះឡើយ។
លោក ឱម យ៉ិនទៀង អះអាងប្រាប់វិទ្យុអាស៊ីសេរី ថា ក្រុមមេធាវីទាំងនោះកំពុងបង្ខូចឈ្មោះ ACU។ លោកបន្តថា ប្រសិនបើអង្គភាពរបស់លោកធ្វើខុសនីតិវិធី ដោយមិនអនុញ្ញាតឲ្យមេធាវីជួបកូនក្តី ម្ល៉េះមេធាវីទាំងនោះប្ដឹងលោកបាត់ទៅហើយ៖« ខ្ញុំគិតថា គាត់ដើរមួលបង្កាច់ពីក្រោយខ្នងដើម្បីសម្អុយយើងខ្ញុំ។ បើយើងខ្ញុំខុសឆ្គង អ៊ីចឹងគាត់ប្ដឹងខ្ញុំបាត់ហើយ។ យើងខ្ញុំត្រៀមដើម្បីឡើងតុលាការ »។
ក្រមនីតិវិធីព្រហ្មទណ្ឌមាត្រា៩៨ ស្ដីពីជំនួយរបស់មេធាវីនៅក្នុងពេលឃាត់ខ្លួនចែងថាក្នុងរយៈពេល ២៤ម៉ោងបានកន្លងផុតទៅ តាំងពីពេលផ្ដើមនៃការឃាត់ខ្លួនមកនោះ បុគ្គលដែលឃាត់ខ្លួនអាចសុំសន្ទនាជាមួយមេធាវី ឬជាមួយជនណាម្នាក់ដែលខ្លួនជ្រើសរើស កុំឲ្យតែជននេះមានការទាក់ទិននៅក្នុងរឿងជាមួយ។ ជននេះត្រូវបានទទួលដំណឹងពីការស្នើសុំជ្រើសរើសនេះ តាមគ្រប់មធ្យោបាយ និងជាបន្ទាន់។ ជននេះអាចចូលទៅកាន់កន្លែងឃាត់ខ្លួន និងទាក់ទងជាមួយបុគ្គលសាមីខ្លួនបាន ៣០នាទី ក្នុងលក្ខខណ្ឌធានាការសម្ងាត់នៃការសន្ទនានេះ។ ក្រោយការសន្ទនាជននេះ អាចធ្វើកំណត់សម្គាល់ជាលាយលក្ខណ៍អក្សរដែលត្រូវភ្ជាប់ជាមួយសំណុំរឿង។
អ្នកស្រី គា សុផល មេធាវីម្នាក់ក្នុងចំណោមមេធាវី ៦នាក់ មានប្រសាសន៍ប្រាប់វិទ្យុអាស៊ីសេរី កាលពីថ្ងៃទី១ ឧសភា ថា វាជាការពិតដែល ACU មិនអនុញ្ញាតឲ្យក្រុមមេធាវីរបស់អ្នកស្រីជួបកូនក្តី ក្រោយពីរយៈពេល ២៤ម៉ោងបានកន្លងផុត ហើយក្រុមមេធាវីរបស់អ្នកស្រី កំពុងពិចារណាដាក់ពាក្យប្ដឹង ACU ថាបំពាននីតិវិធីក្រមព្រហ្មទណ្ឌ៖« ពួកយើងធ្វើអ្វីក៏ទៅតាមនីតិវិធីដែរ។ យើងមិនសម្អុយបង្ខូចការពិតទេ។ យើងបានគិតហើយ ប៉ុន្តែយើងមិនធ្វើការបកស្រាយទេ។ ហើយអ្វីដែលយើងនិយាយមិនបង្កាច់មួលទេ វាជាការពិត វាខុស វាលើសនីតិវិធីមែន លើសម៉ោងមែន »។
ចំណែកមេធាវីការពារក្តីឲ្យមន្ត្រីសិទ្ធិមនុស្សនៃសមាគមអាដហុក មួយរូបទៀត គឺលោក ហួន ជុនឌី បញ្ជាក់ថា ACU ពិតជាបានបំពានក្រមនីតិវិធីព្រហ្មទណ្ឌមាត្រា៩៨។ លោកថា ACU បានឃាត់ខ្លួនកូនក្តីរបស់លោកនៅថ្ងៃទី២៨ មេសា វេលាម៉ោង ៨ព្រឹក៖« អ៊ីចឹងបើគិតពីថ្ងៃ២៨ ម៉ោង ៨ព្រឹកវិញ មកទល់នឹងថ្ងៃ២៩ ព្រឹកនោះ ប្រហែលជាខ្ទង់ម៉ោង៩ ឬម៉ោង១០ ដែលខ្ញុំទៅអង្គភាពប្រឆាំងអំពើពុករលួយហ្នឹង វាលើស ២៤ម៉ោងហើយ ហើយមាត្រា៩៨ ក្រមនីតិវិធីព្រហ្មទណ្ឌចែងថា មេធាវីអាចចូលជួបកូនក្តីរបស់ខ្លួនដើម្បីសន្ទនាផ្សេងៗក្រោយការឃាត់ខ្លួនក្នុងរយៈពេល ២៤ម៉ោង។ អ៊ីចឹងលើស ២៤ ចាប់ពីពេលចូលទៅក្នុងអង្គភាព គប្បីពួកខ្ញុំមានសិទ្ធិចូលសន្ទនាជាមួយនឹងកូនក្តីហើយ។ ( ប៉ុន្តែ ) គាត់ ( លោក ឱម យ៉ិនទៀង ) បានប្រកាសឃាត់ខ្លួនកូនក្តីរបស់ខ្ញុំហ្នឹងគិតពីម៉ោង ៨យប់វិញ »។
ទោះបីជាយ៉ាងណា ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង នៅតែអះអាងថា មេធាវីទាំងនោះមិនយល់ពីច្បាប់៖ «សុំមើលមាត្រាហ្នឹងឡើងវិញទៅ ហើយនិយាយគ្នាតាំងពីដកឃ្លា តាំងពីខណ្ឌ តាំងពីក្បៀសឡើងវិញទៅ មិនគួរគាត់ធ្វើល្ងង់ ហើយបំភ័ន្តសាធារណមតិរបៀបហ្នឹងទេ »។
ក្រមនីតិវិធីព្រហ្មទណ្ឌមាត្រា៩៨ ស្ដីពីជំនួយរបស់មេធាវីនៅក្នុងពេលឃាត់ខ្លួនចែងថា « ក្នុងរយៈពេល ២៤ម៉ោងបានកន្លងផុតទៅ តាំងពីពេលផ្ដើមនៃការឃាត់ខ្លួនមកនោះ បុគ្គលដែលឃាត់ខ្លួនអាចសុំសន្ទនាជាមួយមេធាវី ឬជាមួយជនណាម្នាក់ដែលខ្លួនជ្រើសរើស កុំឲ្យតែជននេះមានការទាក់ទិននៅក្នុងរឿងជាមួយ។ ជននេះត្រូវបានទទួលដំណឹងពីការស្នើសុំជ្រើសរើសនេះ តាមគ្រប់មធ្យោបាយ និងជាបន្ទាន់។ ជននេះអាចចូលទៅកាន់កន្លែងឃាត់ខ្លួន និងទាក់ទងជាមួយបុគ្គលសាមីខ្លួនបាន ៣០នាទី ក្នុងលក្ខខណ្ឌធានាការសម្ងាត់នៃការសន្ទនានេះ។ ក្រោយការសន្ទនាជននេះ អាចធ្វើកំណត់សម្គាល់ជាលាយលក្ខណ៍អក្សរដែលត្រូវភ្ជាប់ជាមួយសំណុំរឿង »។
កាលពីថ្ងៃទី២៨ មេសា វេលាម៉ោង ៨ព្រឹក អង្គភាពប្រឆាំងអំពើពុករលួយ បានឃាត់ខ្លួនមន្ត្រីសមាគមសិទ្ធិមនុស្សអាដហុក ចំនួន ៤រូប ក្នុងនោះមានលោក នី សុខា លោក យី សុខសាន្ត លោក ណៃ វ៉ង់ដា អ្នកស្រី លឹម មុន្នី និងអគ្គលេខាធិការរង គ.ជ.ប លោក នី ចរិយា ពាក់ព័ន្ធនឹងលិខិតចំហរបស់អ្នកនាង ខុម ចាន់តារាទី ហៅ ស្រីមុំ ដែលបានចោទថា មន្ត្រីសមាគមសិទ្ធិមនុស្សអាដហុក បានបង្គាប់ឲ្យនាងនិយាយកុហកអាជ្ញាធរ នៅពេលនាងទៅពឹងពាក់សមាគមឲ្យជួយពីរឿងដែលអាជ្ញាធរចោទថា នាងជាស្រីកំណាន់របស់លោក កឹម សុខា អនុប្រធានគណបក្សសង្គ្រោះជាតិ។ នៅថ្ងៃជាមួយគ្នានោះ ACU ក៏បានចេញលិខិតកោះហៅមន្ត្រីនៃការិយាល័យឧត្ដមស្នងការអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា គឺលោក សឺន សាលី ប៉ុន្តែរហូតមកដល់ពេលនេះ អង្គការសហប្រជាជាតិ មិនបានបញ្ជូនបុគ្គលិករបស់ខ្លួនឲ្យចូលតាមការកោះនោះទេ។ បញ្ហានេះ បណ្ដាលឲ្យ ACU គំរាមថានឹងចេញដីកានាំខ្លួន ហើយលោកនាយករដ្ឋមន្ត្រី ហ៊ុន សែន កាលពីថ្ងៃទី១ ឧសភា ពីក្រុងព្រះសីហនុ គំរាមថា អភ័យឯកសិទ្ធិមានតែសម្រាប់បុគ្គលិកបរទេសនៃអង្គការសហប្រជាជាតិ តែប៉ុណ្ណោះ។ មួយថ្ងៃបន្ទាប់ពីលោកនាយករដ្ឋមន្ត្រី ហ៊ុន សែន មានប្រសាសន៍បែបនោះ ព្រះរាជអាជ្ញាសាលាដំបូងរាជធានីភ្នំពេញ បានចោទប្រកាន់មន្ត្រីសិទ្ធិមនុស្សសមាគមអាដហុក ៤រូបពីបទសូកប៉ាន់សាក្សី និងចោទអគ្គលេខាធិការរង គ.ជ.ប លោក នី ចរិយា ព្រមទាំងមន្ត្រីការិយាល័យឧត្ដមស្នងការអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា គឺលោក សឺន សាលី ពីបទសមគំនិត នៅថ្ងៃទី២ ឧសភា ហើយបញ្ជូនចូលពន្ធនាគារឃុំខ្លួនបណ្ដោះអាសន្ន។
ងាកមកពេលវេលានៃការជួបកូនក្តីរបស់ខ្លួនវិញ មេធាវីរបស់មន្ត្រីសមាគមសិទ្ធិមនុស្សអាដហុក អ្នកស្រី គា សុផល ឲ្យដឹងថា ក្រុមមេធាវីរបស់អ្នកស្រីទើបតែបានជួបកូនក្តីរបស់ខ្លួននៅថ្ងៃទី១ ឧសភា គឺនៅពេលឡើងតុលាការហើយ។ អ្នកស្រី គា សុផល បន្តថា ក្នុងការជួបកូនក្តីនៅតុលាការនោះទៀតសោត ភ្នាក់ងារ ACU មិនអនុញ្ញាតឲ្យអ្នកស្រីនិយាយពីច្បាប់ជាមួយកូនក្តីទៀតផង៖« ខ្ញុំព្យាយាមទៅជួបកូនក្តីរបស់ខ្ញុំនៅហ្នឹង (ACU) អត់បានជួប គឺអត់បានជួបទាល់តែសោះ។ ទើបតែបានជួបកូនក្តី គឺនៅចំពោះមុខព្រះរាជអាជ្ញាតែម្តង។ សូម្បីតែពួកគាត់អង្គុយញ៉ាំបាយពេលរង់ចាំនៅតុលាការ យើងដើរទៅសួរនាំពួកគាត់ ត្រូវបានមន្ត្រី អេ . ស៊ី . យូ (ACU) ឈរជិតយើង ហើយគេមិនឲ្យសួរពីផ្លូវច្បាប់អីទាំងអស់ គេថាសួរនាំពីសុខភាពអីបាន តែហាមមិនឲ្យសួររឿងអីក្រៅពីសុខភាព។ គេអត់ឲ្យយើងចង់សួរពីរឿងច្បាប់យ៉ាងម៉េច ចោទប្រកាន់ពីបទអីៗ គេហាមសួរដាច់ខាត។ ខ្ញុំមិនយល់ មកដល់តុលាការ ហើយគាត់មកខារខាំងមេធាវីជួបជាមួយកូនក្តីទៀត។ ខ្ញុំឆ្ងល់នៅកន្លែងហ្នឹង មកដល់តុលាការហើយ ជាការរំលោភបំពានសិទ្ធិរបស់ពួកគាត់តែម្តង។ ខ្ញុំមិនដឹងថា កន្លងមកនីតិវិធីរបស់គាត់តែងតែអនុវត្តអ៊ីចឹង ឬមួយក៏គាត់ទើបតែអនុវត្តជាមួយកូនក្តីរបស់ខ្ញុំ »។
បើទោះបីជាគិតម៉ោងរបស់ ACU ដែលចាប់រាប់ពីថ្ងៃព្រហស្បតិ៍ ទី២៨ មេសា វេលាម៉ោង ៨ល្ងាចមកដល់ព្រឹកថ្ងៃទី១ ឧសភា ថ្ងៃដែល ACU បានបញ្ជូនជនសង្ស័យទាំងប្រាំរូបទៅតុលាការនោះ ការឃាត់ខ្លួននេះក៏មានរយៈពេលជាង ៦០ម៉ោងដែរ។ មានន័យថា វាហួសរយៈពេលកំណត់ដោយក្រមនីតិវិធីព្រហ្មទណ្ឌមាត្រា៩៨ ដែលចែងថា « ក្នុងរយៈពេល ២៤ម៉ោងបានកន្លងផុតទៅ តាំងពីពេលផ្ដើមនៃការឃាត់ខ្លួនមកនោះ បុគ្គលដែលឃាត់ខ្លួនអាចសុំសន្ទនាជាមួយមេធាវី ឬជាមួយជនណាម្នាក់ដែលខ្លួនជ្រើសរើស កុំឲ្យតែជននេះមានការទាក់ទិននៅក្នុងរឿងជាមួយ »៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។