ស្របពេលសភាបើកកិច្ចប្រជុំពេញអង្គ ពិភាក្សា និងអនុម័តសេចក្ដីព្រាងច្បាប់ស្ដីពីសហជីព នៅក្រៅមន្ទីររដ្ឋសភាក្បែរអគារពុទ្ធសាសនបណ្ឌិត្យ មានការប៉ះទង្គិចគ្នាមួយប្រាវរវាងកងសន្តិសុខ ជាមួយនឹងក្រុមសហជីព ដោយបង្កឲ្យមន្ត្រីសហជីពម្នាក់រងបួស នៅព្រឹកថ្ងៃច័ន្ទ ទី៤ ខែមេសា ឆ្នាំ២០១៦។
ការប៉ះទង្គិចគ្នាឈានដល់បង្ករបួសស្នាមនេះ កើតឡើងបន្ទាប់ពីក្រុមសហជីពប្រមាណជាង ៥០នាក់ នាំគ្នាតវ៉ានៅក្រៅរដ្ឋសភា ដើម្បីសម្ដែងការមិនពេញចិត្តចំពោះការអនុម័តសេចក្ដីព្រាងច្បាប់ស្ដីពីសហជីព ដោយសារតែមានចំណុចមួយចំនួនបង្កផលវិបាកដល់ពួកគេ ក្នុងការតវ៉ារកផលប្រយោជន៍ឲ្យកម្មករ។
ខណៈក្រុមសហជីពស្រែកប្រឆាំងនឹងច្បាប់ដ៏ចម្រូងចម្រាសនេះ មានក្រុមសន្តិសុខខណ្ឌដូនពេញ ចាប់ផ្ដើមផ្លុំកញ្ចែដែលជាសញ្ញាតម្រូវឲ្យអ្នកតវ៉ាចេញពីមុខរនាំងដែក ដែលសមត្ថកិច្ចដាក់កាត់ផ្លូវចូលទៅរដ្ឋសភា។ ភ្លាមៗនោះ ក៏មានការរុញច្រានពីក្រុមសន្តិសុខ ដោយតម្រូវឲ្យក្រុមសហជីពទៅតវ៉ានៅលើចិញ្ចើមថ្នល់វិញ។ ចំណែកការប៉ះទង្គិចគ្នាដោយពាក្យសម្ដី ដោយស្រែកដាក់គ្នាទៅវិញទៅមក ធ្វើឲ្យក្រុមសន្តិសុខតាមវាយ លោក ស៊ុត ចិត្រ ជាមន្ត្រីសហជីពមកពីសម្ព័ន្ធសហជីពចលនាកម្មកររបស់ លោក ប៉ាវ ស៊ីណា។
លោក ស៊ុត ចិត្រ ដែលរងការវាយដំពីខាងកងសន្តិសុខបែកចិញ្ចើមខាងឆ្វេង និយាយថា លោកមិនបាននិយាយប៉ះពាល់ដល់ក្រុមសន្តិសុខទេ៖ « ខ្ញុំគ្រាន់តែចុះដើរទៅ គាត់វ៉ៃខ្ញុំតែម្ដង ខ្ញុំអត់បាននិយាយអីទេ ដៃផងអាយកូមផង » ។
ខណៈកងកម្លាំងសន្តិសុខ ព្យាយាមចាប់ លោក ស៊ុត ចិត្រ ដាក់ឡានបញ្ជូនទៅសាលាខណ្ឌ ប៉ុន្តែមន្ត្រីសហជីពរូបនេះ គេចផុតពីការចាប់ខ្លួនវិញដោយសារតែមានក្រុមសហជីពផ្សេងទៀតព្យាយាមទាញលោកចេញ។
ចំណែកប្រធានសម្ព័ន្ធសហជីពកម្ពុជា អ្នកស្រី យ៉ាង សុភ័ណ្ឌ ដែលត្រូវប្រធានសន្តិសុខខណ្ឌដូនពេញ ច្រានឲ្យដួលទៅនឹងដីនោះ ថ្លែងថា អ្នកស្រីសោកស្ដាយចំពោះទង្វើអាជ្ញាធរដែលប្រើហិង្សាមកលើពួកគាត់ដែលតវ៉ាដោយសន្តិវិធី៖« ពីមុនយើងធ្លាប់មានជំនឿមុតមាំថា យើងបានផ្ដល់សេចក្ដីទុកចិត្តយើង ដល់សិទ្ធិយើងទៅឲ្យគាត់ ព្រោះយើងបានបោះឆ្នោតជូនឲ្យគាត់ការពារពួកយើង ប៉ុន្តែវាផ្ទុយទៅវិញ មិនបានការពារប្រយោជន៍ជូនប្រជាពលរដ្ឋទេ ព្រោះសហជីពជាច្បាប់មួយដែលអនុម័តទៅ ធ្វើឲ្យសហជីពកម្មករបាត់បង់នូវសិទ្ធិ ដល់ពេលយើងមកតវ៉ាដើម្បីទាមទារ យើងបានទទួលសិទ្ធិហ្នឹងមកវិញ បែរជាប្រើអំពើហិង្សាមកលើពួកយើង។ កន្លែងនេះមួយធ្វើឲ្យយើងអស់សង្ឃឹមចំពោះពួកគាត់ណាស់ »។
អនុប្រធានផ្នែកសិទ្ធិមនុស្សរបស់សមាគមការពារសិទ្ធិមនុស្សអាដហុក (ADHOC) លោក ណៃ វ៉ង់ដា ដែលឃ្លាំមើលហេតុការណ៍នេះយល់ថា កម្ពុជា មានស្តង់ដារពីរចំពោះការតវ៉ា។ ស្តង់ដារទី១ គឺមានការសម្របសម្រួលចរាចរណ៍ពីខាងសមត្ថកិច្ច ដូចជារឿង លោក ស្រី ចំរើន ដាក់ញត្តិនៅសភា ហើយដង្ហែក្បួនទៅស្រែកនៅមុខផ្ទះ លោក កឹម សុខា និងទីស្នាក់ការគណបក្សសង្គ្រោះជាតិ។ រីឯស្តង់ដារទី២ រាល់ការតវ៉ាពីខាងសហគមន៍រងគ្រោះដីធ្លី ការតវ៉ាពីក្រុមកម្មករ លោក ណៃ វ៉ង់ដា សង្កេតឃើញមានការពង្រាយសមត្ថកិច្ចតាមឃ្លាំមើលយ៉ាងដិតដល់ និងការរារាំងពីអាជ្ញាធរ៖« យើងឃើញថា សន្តិសុខខណ្ឌដូនពេញ នៅតែមានអាកប្បកិរិយាសាហាវយង់ឃ្នងទៅលើអ្នកតវ៉ាដោយសន្តិវិធីដដែល។ យើងសូមថ្កោលទោស និងអំពាវនាវឲ្យសហគមន៍អន្តរជាតិ ពិនិត្យមើលឡើងវិញទាក់ទងនឹងបញ្ហាផ្ដល់ជំនួយដល់រដ្ឋាភិបាលមួយនេះ ដោយសារតែសកម្មភាពបង្ក្រាបទៅសហជីព និងមានការគំរាមកំហែងទៅការងារសិទ្ធិមនុស្ស »។
បើទោះបីជាមានហិង្សាយ៉ាងនេះក្តី អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ និយាយថា ការដែលមានហិង្សាកើតឡើងនោះ ដំបូងឡើយគឺដោយសារតែក្រុមស្ត្រីខាងសហជីពចាប់កអាវខាងសន្តិសុខ។ លោកមិនជឿថា ក្រុមសន្តិសុខអាចទៅបង្កហិង្សាដោយគ្មានមូលហេតុនោះទេ៖« វាមិនដែលសុខៗ សន្តិសុខទៅប្រើអំពើហិង្សាភ្លាមៗនោះមិនរួចទេ ចឹងខ្ញុំគិតថា អ្វីដែលខុសច្បាប់ អ្វីដែលមិនច្បាប់អនុញ្ញាត អ្វីដែលមានច្បាប់អនុញ្ញាត យើងគិតគូររឿងហ្នឹងឲ្យបានថ្លឹងថ្លែង សាលាក្រុងតែងតែបញ្ជាក់ហើយ រាល់គោលបំណងធ្វើបាតុកម្ម ធ្វើការតវ៉ាអ្វី ត្រូវតែមានការអនុញ្ញាតជាមុនសិន »។
កាលពីពេលថ្មីៗនេះ ក្នុងដំណើរទស្សនកិច្ចរបស់អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា អ្នកស្រី រ៉ូណា ស្មីត (Rhona Smith) សម្ដែងក្ដីបារម្ភថា ប្រទេសកម្ពុជា កំពុងខិតទៅជិតចំណុចកំពូលនៃគ្រោះថ្នាក់ហើយ។ អ្នកស្រីថា មេដឹកនាំដែលចេញពីការបោះឆ្នោតទាំងអស់មានទំនួលខុសត្រូវក្នុងការធ្វើសកម្មភាព ដើម្បីជាប្រយោជន៍ដល់អ្នកដែលពួកគេតំណាងឲ្យ។ ទន្ទឹមនឹងមានអំណាច ក៏មានការទទួលខុសត្រូវក្នុងការគោរពសេចក្ដីថ្លៃថ្នូរ និងសិទ្ធិមនុស្សទាំងអស់។
រីឯការប៉ះទង្គិចគ្នារវាងក្រុមសន្តិសុខ និងក្រុមសហជីពវិញ ក៏មានអ្នកសារព័ត៌មានជាតិ និងអន្តរជាតិ ថតរូបភាពបានពីការប៉ះទង្គិចគ្នានេះដែរ នៅខណៈសភាកំពុងតែអនុម័តសេចក្ដីព្រាងច្បាប់ដ៏ចម្រូងចម្រាសនេះ។ ទន្ទឹមនឹងនេះ តំណាងរាស្ត្រគណបក្សសង្គ្រោះជាតិ បានចោទសួរទៅរដ្ឋាភិបាលថា ហេតុអ្វីបានជាមានការប៉ះទង្គិចគ្នានៅក្រៅរបងសភា ធ្វើឲ្យសហជីពរងរបួស។ បក្សប្រឆាំង ទាមទារឲ្យរដ្ឋាភិបាលទទួលខុសត្រូវពីសកម្មភាពនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។