អយ្យការអមសាលាដំបូងរាជធានីភ្នំពេញ កំពុងពិនិត្យសំណុំរឿងអគ្គនាយកដ្ឋានពន្ធដារប្ដឹងអ្នកគ្រប់គ្រង ៣នាក់នៃក្រុមហ៊ុន បឺណាដ គ្រីស័រ ជីមុសុ (BERNAD KRISHER JIMUSHO CO. LTD) ឬសារព័ត៌មាន ឌឹ ខេមបូឌា ដេលី (The Cambodia Daily)។ អគ្គនាយកដ្ឋានពន្ធដារកាលពីថ្ងៃទី៥ ខែកញ្ញា បានដាក់បណ្ដឹងទៅអយ្យការសាលាដំបូងរាជធានីភ្នំពេញ ប្រឆាំងមនុស្ស ៣នាក់ គឺអ្នកស្រី ដេបូរ៉ា គ្រីស័រ ស្ទៀល (Deborah Krisher-Steele) ជានាយកក្រុមហ៊ុន លោក ឌូគ្លាស អ៊ីរ៉ិច ស្ទៀល (Douglas Eric Steele) ជាបណ្ណាធិការក្រុមហ៊ុន និងលោក បឺណាដ គ្រីស័រ (Bernard Krisher) ជាចាងហ្វាងសារព័ត៌មាន ឌឹ ខេមបូឌា ដេលី។
ព្រះរាជអាជ្ញារងនៃសាលាដំបូងរាជធានីភ្នំពេញ លោក លី សុផាណា ឲ្យដឹងតាមបណ្ដាញទំនាក់ទំនងតេឡេក្រាម (Telegram) នៅថ្ងៃទី៦ ខែកញ្ញា ថា ខាងលោកបានទទួលពាក្យបណ្ដឹងរួចហើយ និងកំពុងពិនិត្យតាមនីតិវិធី។
ពាក្យបណ្ដឹងរបស់អគ្គនាយកដ្ឋានពន្ធដារមានចំនួនពីរដាច់ពីគ្នា ក្នុងនោះបណ្ដឹងមួយសំដៅទៅអ្នកស្រី ដេបូរ៉ា គ្រីស័រ ស្ទៀល ដោយស្នើឲ្យតុលាការចោទប្រកាន់អ្នកស្រីពីបទបរិហារកេរ្តិ៍ និងទាមទារសំណងជំងឺចិត្តចំនួន ៨០០លានរៀល ដែលប្រហែល ២០ម៉ឺនដុល្លារ។ អ្នកស្រីក៏ត្រូវប្ដឹងក្នុងបណ្ដឹងដាច់ដោយឡែកមួយទៀតជាមួយមនុស្ស ២នាក់ទៀត គឺលោក ឌូគ្លាស អ៊ីរ៉ិច ស្ទៀល (Douglas Eric Steele) ជាបណ្ណាធិការក្រុមហ៊ុន និងលោក បឺណាដ គ្រីស័រ (Bernard Krisher) ជាចាងហ្វាងសារព័ត៌មាន ឌឹ ខេមបូឌា ដេលី។ ក្នុងបណ្ដឹងនោះ អ្នកទាំងបីត្រូវប្ដឹងពីបទគេចវេះពន្ធ និងប្រព្រឹត្តអំពើរាំងស្ទះដល់ការអនុវត្តបទប្បញ្ញត្តិស្ដីពីពន្ធដារ។
អាស៊ីសេរី នៅមិនទាន់អាចសុំការឆ្លើយតបពីអ្នកគ្រប់គ្រងក្រុមហ៊ុនកាសែត ឌឹ ខេមបូឌា ដេលី ដែលត្រូវអគ្គនាយកដ្ឋានពន្ធដារប្ដឹងនេះបានទេនៅថ្ងៃទី៦ ខែកញ្ញា។
ក្នុងបណ្ដឹងដោយឡែកចំពោះអ្នកស្រី ដេបូរ៉ា គ្រីស័រ ស្ទៀល ពីបទបរិហារកេរ្តិ៍បានលើកអំណះអំណាងថា អ្វីដែលអ្នកស្រីបានឆ្លើយឆ្លងតាមសារអេឡិចត្រូនិកជាមួយវិទ្យុអាស៊ីសេរី ថាការលើកឡើងពីការជំពាក់ពន្ធ គឺជាចេតនានយោបាយចង់បិទកាសែតរបស់អ្នកស្រីចោល និងការចោទប្រកាន់ថា មន្ត្រីអគ្គនាយកដ្ឋានពន្ធដារធ្វើឲ្យបែកធ្លាយព័ត៌មានពីការកំណត់ពន្ធឡើងវិញនោះ ថាជាបរិហារប្រមាថយ៉ាងធ្ងន់ធ្ងរធ្វើឲ្យប៉ះពាល់ដល់កិត្តិយស សេចក្ដីថ្លៃថ្នូររបស់ស្ថាប័នរដ្ឋ។
អគ្គនាយកដ្ឋានពន្ធដារ អះអាងថា បានជូនដំណឹងពីការកំណត់ពន្ធឡើងវិញទៅកាសែត ឌឹ ខេមបូឌា ដេលី កាលពីដើមខែសីហា។
ចំណែកបណ្ដឹងមួយទៀតបានចោទអ្នកទាំង៣ គឺអ្នកស្រី ដេបូរ៉ា គ្រីស័រ ស្ទៀល (Deborah Krisher Steele) លោក ឌូគ្លាស អ៊ីរ៉ិច ស្ទៀល (Douglas Eric Steele) និងលោក បឺណាដ គ្រីស័រ (Bernard Krisher) ថាបានរៀបចំកិច្ចសន្យាទិញលក់ក្រុមហ៊ុនកាសែត ឌឹ ខេមបូឌា ដេលី កាលពីខែមេសា ក្នុងភាពមិនប្រក្រតី បង្ហាញឲ្យឃើញពីចេតនាគេចវេះពន្ធ និងរាំងស្ទះការអនុវត្តបទប្បញ្ញត្តិស្ដីពីពន្ធដារ។ កាសែត ឌឹ ខេមបូឌា ដេលី បានបិទការផ្សាយរបស់ខ្លួនកាលពីថ្ងៃទី៤ ខែកញ្ញា ដែលជាថ្ងៃឱសានវាទដាក់ដោយអគ្គនាយកដ្ឋានពន្ធដារតម្រូវឲ្យបង់ពន្ធចំនួនជាង ៦លានដុល្លារ ដោយចោទថាស្ថាប័នកាសែតនេះជំពាក់ក្នុងរយៈពេលដំណើរការចំនួនជាង ២៤ឆ្នាំកន្លងទៅនេះ។
និពន្ធនាយកកាសែត ឌឹ ខេមបូឌា ដេលី អ្នកស្រី ចូឌី ដឺជុង (Jodie DeJonge) បានថ្លែងមួយថ្ងៃមុនបិទកាសែតនេះថា រឿងនេះពាក់ព័ន្ធនឹងការរឹតត្បិតសេរីភាពសារព័ត៌មាន៖ « វាមិនអាចទៅរួចទេដែលកាសែត ដេលី ត្រូវបង់ពន្ធនោះ ហើយ ដេលី បញ្ជាក់យ៉ាងច្បាស់ថាមិនបានជំពាក់ពន្ធនោះទេ។ ខ្ញុំយល់ថារឿងនេះមិនមែនរឿងពន្ធទេ វាជារឿងសេរីភាពសារព័ត៌មាន។ ដូច្នេះកាសែត ដេលី មិនព្រមបង់ពន្ធដើម្បីមិនឲ្យគេបិទនោះទេ។ រដ្ឋាភិបាលរករឿងកាសែត ដេលី តាមរយៈការប្រកាសជាសាធារណៈតាមហ្រ្វែសញូវ អំពីរឿងពន្ធ ដែលតាមច្បាប់ ការដោះស្រាយបញ្ហាពន្ធត្រូវធ្វើដោយសម្ងាត់ » ។
នៅមុនការបិទការិយាល័យរបស់ខ្លួន ថ្នាក់ដឹកនាំកាសែត ឌឹ ខេមបូឌា ដេលី បានប្រកាសឲ្យនាយកដ្ឋានពន្ធដារចុះមកធ្វើសវនកម្មកាសែតរបស់ខ្លួន ហើយបើឃើញថាត្រូវបង់ពន្ធ កាសែតនេះនឹងបង់ពន្ធ។
ទោះជាយ៉ាងណាក៏ដោយចុះ អ្នកសិក្សាការអភិវឌ្ឍសង្គម និងអ្នកសង្កេតការណ៍ជាតិ និងអន្តរជាតិមួយចំនួនយល់ឃើញថា ករណីនេះ គឺជាការព្យាយាមបំបិទសំឡេងសារព័ត៌មានឯករាជ្យនៅមុនពេលបោះឆ្នោតជិតចូលមកដល់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។