បេក្ខនារីលេខរៀងទី១ ឈរឈ្មោះបោះឆ្នោតជ្រើសរើសជាចៅសង្កាត់មកពីគណបក្សសង្គ្រោះជាតិ ខេត្តប៉ៃលិន ម្នាក់ទៀត ត្រូវបានតុលាការកោះហៅចូលបំភ្លឺពីបទបរិហារកេរ្តិ៍តាមបណ្ដឹងរបស់ពលរដ្ឋ។ ដីកាកោះនេះ ធ្វើឡើងបន្ទាប់ពីបេក្ខនារីរូបនេះ បានប្ដឹងទៅក្រុមប្រឹក្សាសង្កាត់ឲ្យលុបឈ្មោះជនជាតិវៀតណាម ចំនួន ៨នាក់ចេញពីបញ្ជីបោះឆ្នោតកាលពីខែមករា កន្លងទៅ។
សកម្មជនគណបក្សប្រឆាំងនៅក្រុងប៉ៃលិន បានចូលខ្លួនបំភ្លឺតាមពេលកំណត់ដូចដីកាកោះរបស់ព្រះរាជអាជ្ញារងអមសាលាដំបូងខេត្តប៉ៃលិន។
បេក្ខនារីលេខរៀងទី១ ឈរឈ្មោះបោះឆ្នោតជ្រើសរើសចៅសង្កាត់ទួលល្វា ក្រុងប៉ៃលិន គណបក្សសង្គ្រោះជាតិ អ្នកស្រី រៀម ណាម៉ុន ឲ្យដឹងនៅថ្ងៃទី១៥ កុម្ភៈ ថា ព្រះរាជអាជ្ញារងអមសាលាដំបូងខេត្តប៉ៃលិន កោះហៅអ្នកស្រីទៅបំភ្លឺនេះ គឺជារឿងនយោបាយ ដោយសារអ្នកស្រីបានប្ដឹងជនជាតិវៀតណាម ចំនួន ៨នាក់ទៅក្រុមប្រឹក្សាសង្កាត់ទួលល្វា ដើម្បីឲ្យលុបឈ្មោះអ្នកទាំងនោះចេញពីបញ្ជីឈ្មោះបោះឆ្នោតកាលពីខែមករា កន្លងទៅ។
បេក្ខនារីវ័យក្មេងរូបនេះអះអាងថា អ្នកស្រីគ្មានទំនាស់អ្វីជាមួយពលរដ្ឋទាំងនោះទេ ក្រៅអំពីបានប្ដឹងឲ្យលុបឈ្មោះចេញពីបញ្ជីឈ្មោះបោះឆ្នោតនោះ៖ « ដោយសារតែគាត់រស់នៅជិតផ្ទះខ្ញុំ ហើយប្រជាពលរដ្ឋដែលស្គាល់នៅជុំវិញនោះគាត់ដឹងថា អ្នកទាំង ៨នាក់នោះជាជនបរទេស។ ដូច្នេះហើយបានជានាងខ្ញុំដាក់ពាក្យប្ដឹងទៅគណៈកម្មការជាតិរៀបចំការបោះឆ្នោត ឲ្យលុបឈ្មោះចេញពីបញ្ជីបោះឆ្នោត ប្រសិនបើរកឃើញថា ពួកគាត់មិនមានឯកសារសញ្ជាតិ ដើម្បីមានសិទ្ធិបោះឆ្នោតបាន »។
អាស៊ីសេរី ពុំអាចទាក់ទងអ្នកនាំពាក្យសាលាដំបូងខេត្តប៉ៃលិន ដើម្បីសុំអត្ថាធិប្បាយជុំវិញបញ្ហានេះបានទេ នៅថ្ងៃទី១៥ កុម្ភៈ។
ដីកាកោះចុះថ្ងៃទី២ កុម្ភៈ ដែលចុះហត្ថលេខាដោយព្រះរាជអាជ្ញារងសាលាដំបូងខេត្តប៉ៃលិន លោក ថុល គឹមហ៊ឹង បង្គាប់ឲ្យអ្នកស្រី រៀម ណាម៉ុន ចូលបំភ្លឺតុលាការនៅរសៀលថ្ងៃទី១៥ កុម្ភៈ តាមពាក្យបណ្ដឹងរបស់ពលរដ្ឋ ២នាក់ ពីបទបរិហារកេរ្តិ៍ ប្រព្រឹត្តទៅនៅសង្កាត់ទួលល្វា ក្រុងប៉ៃលិន។
ទោះជាយ៉ាងនេះក្ដី អ្នកស្រី រៀម ណាម៉ុន អះអាងថា ពលរដ្ឋទាំង ២នាក់នោះក្នុងចំណោមពលរដ្ឋ ៨នាក់ដែលអ្នកស្រីបានប្ដឹងឲ្យក្រុមប្រឹក្សាសង្កាត់ទួលល្វា លុបឈ្មោះចេញពីបញ្ជីឈ្មោះបោះឆ្នោត បន្ទាប់ពីរកឃើញថា អ្នកទាំងនោះជាជនបរទេសមករស់នៅក្នុងស្រុកខ្មែរ។ អ្នកស្រីសង្កត់ធ្ងន់ថា សំណុំរឿងនេះមានអ្នកនៅពីក្រោយជួយជំរុញអ្នកទាំងពីរ ឲ្យប្ដឹងអ្នកស្រីទៅតុលាការ។
មន្ត្រីស៊ើបអង្កេតអង្គការលីកាដូ (LICADHO) ប្រចាំខេត្តបាត់ដំបង លោក ហេង សាយហុង មើលឃើញថា បញ្ហានេះជារឿងនយោបាយសុទ្ធសាធ ព្រោះបេក្ខនារីដែលមកពីគណបក្សប្រឆាំងរូបនេះមានប្រជាប្រិយភាព ដែលជាឆ្អឹងទទឹងករបស់គណបក្សដៃគូប្រកួតម្ខាងទៀត សម្រាប់ការប្រកួតប្រជែងការបោះឆ្នោតជ្រើសរើសក្រុមប្រឹក្សាឃុំ-សង្កាត់៖ « បញ្ហានេះវាអាចមានផលប៉ះពាល់សម្រាប់បេក្ខជនដែលគេប្ដឹងចោទប្រកាន់ ប្រសិនបើការប្ដឹងនេះមានសភាពកាន់តែធ្ងន់ធ្ងរ ដែលធ្វើឲ្យប៉ះពាល់ដល់ការងារបោះឆ្នោតរបស់គាត់នៅពេលខាងមុខជាពុំខាន »។
នេះគឺជាបេក្ខនារីទីពីរហើយរបស់គណបក្សសង្គ្រោះជាតិ នៅខេត្តប៉ៃលិន បន្ទាប់ពីបេក្ខជនឈរឈ្មោះបោះឆ្នោតជ្រើសរើសក្រុមប្រឹក្សាសង្កាត់ប៉ៃលិន ម្នាក់ទៀត លោក ឈុន ចាន់ដា ដែលតុលាការកោះហៅឲ្យចូលបំភ្លឺនៅថ្ងៃទី២០ កុម្ភៈ ពីបទបរិហារកេរ្តិ៍ដូចគ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។