តំណាងរាស្ត្របក្សប្រឆាំង លោក អ៊ុំ សំអាន ដែលកំពុងជាប់ឃុំនៅពន្ធនាគារទាំងកំពុងមានអភ័យឯកសិទ្ធិ ប្រាប់ឲ្យពលរដ្ឋឲ្យបោះឆ្នោតទម្លាក់លោក ហ៊ុន សែន។ ការថ្លែងបែបនេះ បន្ទាប់ពីក្រុមប្រឹក្សាជំនុំជម្រះតុលាការកំពូល ច្រានចោលបណ្ដឹងសាទុក្ខរបស់លោក ទាក់ទងនីតិវិធីនៃការចាប់ខ្លួនកន្លងមក។
សវនាការរបស់តុលាការកំពូល គឺជំនុំជម្រះទៅលើបណ្ដឹងរបស់មេធាវីលោក អ៊ុំ សំអាន ដែលស្នើឲ្យតុលាការកំពូលមោឃភាពនីតិវិធីរបស់សាលាដំបូងរាជធានីភ្នំពេញ ដែលក្រុមមេធាវីលោក អ៊ុំ សំអាន ចោទប្រកាន់ថា ការស៊ើបសួរ និងចាប់ខ្លួនលោក អ៊ុំ សំអាន កន្លងមក មិនគោរពទៅតាមច្បាប់។ ការជំនុំជម្រះដែលមានក្រុមប្រឹក្សាចៅក្រមចំនួន ៥រូប អគ្គព្រះរាជអាជ្ញារង ១រូប និងអគ្គក្រឡាបញ្ជីជាអ្នកកត់ត្រា ១រូប។ ក្រុមមេធាវីរបស់លោក អ៊ុំ សំអាន មានពីររូប។ ពួកគេលើកឡើងពីការចាប់ខ្លួនរបស់ក្រុមសមត្ថកិច្ច និងការឃុំខ្លួនទាំងកំពុងមានភ័យឯកសិទ្ធិ ដែលក្រុមមេធាវីចោទប្រកាន់ថា ខុសទៅនឹងច្បាប់រដ្ឋធម្មនុញ្ញ។
លោក អ៊ុំ សំអាន ដែលមានវត្តមាននៅសវនាការដែរនោះ នៅតែបដិសេធមិនឆ្លើយសំណួររបស់ចៅក្រម ឬព្រះរាជអាជ្ញា ប៉ុន្តែលោកសុំបញ្ចេញទស្សនៈលោកថា ការបញ្ចេញទស្សនៈរបស់លោកតាមហ្វេសប៊ុក (Facebook) រហូតដល់ការចោទប្រកាន់ គឺលោកត្រូវតែធ្វើក្នុងនាមជាតំណាងរាស្ត្រដែលលោកថា បើមិនឲ្យលោកនិយាយ លោកសុខចិត្តទៅធ្វើស្រែវិញល្អជាង។
មេធាវីការពារក្តីរបស់របស់ អ៊ុំ សំអាន លោក ជូង ជូងី បានព្យាយាមពន្យល់ទៅក្រុមចៅក្រមថា ការចាប់ខ្លួនលោក អ៊ុំ សំអាន ពីក្រុមសមត្ថកិច្ចនៅលើផ្លូវសាធារណៈ កាលពីជិត ៦ខែមុន មិនមែនជាបទល្មើសជាក់ស្ដែងទេ។ ជាងនេះទៅទៀត លោកមេធាវីនៅតែលើកឡើងថា ការចាប់ខ្លួន ការឃុំខ្លួនលោក អ៊ុំ សំអាន គឺរំលោភរដ្ឋធម្មនុញ្ញមាត្រ៨០ ខណៈអភ័យឯកសិទ្ធិសភារបស់លោក អ៊ុំ សំអាន មិនទាន់ត្រូវបានដកនៅឡើយ។ លោកថា ច្បាប់រដ្ឋធម្មនុញ្ញគ្មានមាត្រណាដែលចែងថា សមាជិកចំនួន ៥០ភាគរយបូកមួយ អាចអនុម័តឲ្យតុលាការបន្តនីតិវិធីនោះទេ។
តែទោះយ៉ាងណាក្តី អគ្គព្រះរាជអាជ្ញារងអមតុលាការកំពូល លោក ឈួន ចាន់ថា ថ្លែងថា សវនាការនៅពេលនេះ ជជែកទាក់ទងទៅនឹងមាត្រា២៧៩ ប៉ុណ្ណោះ មាត្រាផ្សេងទៀតមិនត្រូវបានលើកយកមកពិនិត្យទេ។ មាត្រានេះ និយាយទាក់ទងភាពមិនអាចទទួលបាននៃពាក្យបណ្ដឹងសុំមោឃកម្ម។
នៅទីបំផុត ប្រធានក្រុមប្រឹក្សាជំនុំជម្រះតុលាការកំពូល លោកចៅក្រម សឹង បញ្ញាវុធ ប្រកាសសាលដីកាថា តុលាការកំពូលពុំអាចពិចារណាលើលទ្ធភាពនៃបទល្មើសបានទេ ដូច្នេះតុលាការកំពូលសម្រេចមិនអាចទទួលយកបណ្ដឹងសាទុក្ខមេធាវីរបស់លោក អ៊ុំ សំអាន បានទេ។ ការសម្រេចបែបនេះ ដូចគ្នាទៅនឹងការសម្រេចរបស់សាលាឧទ្ធរណ៍កាលពីពេលកន្លងទៅដែរ។
មុនត្រូវអនុរក្សពន្ធនាគារនាំខ្លួនទៅឃុំខ្លួននៅពន្ធនាគារវិញ លោក អ៊ុំ សំអាន ចោទប្រកាន់ថា ការសម្រេចរបស់តុលាការ ព្រោះរងឥទ្ធិពលនយោបាយពីរដ្ឋាភិបាលលោក ហ៊ុន សែន។ លោកចោទប្រកាន់លោក ហ៊ុន សែន ថាធ្វើដូចនេះដើម្បីផ្គាប់ចិត្តរដ្ឋាភិបាលក្រុងហាណូយ ប៉ុណ្ណោះ៖ «លោក ហ៊ុន សែន គាត់កំពុងធ្វើបាបអ្នកស្នេហាជាតិ សង្គមស៊ីវិល និងសកម្មជនសិទ្ធិមនុស្ស តាមបញ្ជារបស់រដ្ឋាភិបាលក្រុងហាណូយ ដូច្នេះពលរដ្ឋខ្មែរក្រោកឡើងបោះឆ្នោតទម្លាក់មេដឹកនាំផ្ដាច់ការ មេដឹកនាំដែលបម្រើបរទេស»។
លោក អ៊ុំ សំអាន ត្រូវបានសមត្ថកិច្ចចាប់ខ្លួននៅខេត្តសៀមរាប កាលពីយប់ថ្ងៃទី១១ ខែមេសា ឆ្នាំ២០១៦ បន្ទាប់ពីលោកវិលត្រឡប់មកពីសហរដ្ឋអាមេរិកវិញ។
តុលាការក្រុងភ្នំពេញ ចោទប្រកាន់លោកពីបទញុះញង់នាំឲ្យមានការរើសអើង និងប្រព្រឹត្តបទឧក្រិដ្ឋជាអាទិ៍នៃក្រមព្រហ្មទណ្ឌ។ ការចោទប្រកាន់នេះ បន្ទាប់ពីលោកបានធ្វើការអធិប្បាយនានានៅលើទំព័រហ្វេសប៊ុក អំពីការប្រើប្រាស់ផែនទី និងបោះបង្គោលព្រំដែនកម្ពុជា និងវៀតណាម។
មេធាវីការពារក្ដី លោក អ៊ុំ សំអាន គឺលោក ហែម សុជាតិ ឲ្យដឹងថា ក្រុមមេធាវីនៅតែគិតគូររឿងមោឃភាពនីតិវិធីដែលប្ដឹងទៅក្រុមប្រឹក្សាធម្មនុញ្ញឲ្យបកស្រាយទាក់ទងបទល្មើសជាក់ស្ដែង តាមមាត្រា៨៦ នៃក្រមព្រហ្មទណ្ឌ។ លោកមេធាវីថា ការសម្រេចរបស់តុលាការនៅពេលនេះ មិនបានគិតពីមាត្រា៨០ នៃរដ្ឋធម្មនុញ្ញ ដែលចែងពីអភ័យឯកសិទ្ធិតំណាងរាស្ត្រ៖ «ជាការគួរឲ្យសោកស្ដាយដែលតុលាការកំពូលលើកឡើងថា ខ្លួនអត់មានសមត្ថភាព អត់មានសមត្ថកិច្ចក្នុងការពិនិត្យមោឃភាពនៃនីតិវិធីទេ ដោយតុលាការកំពូលលើកឡើងថា អ្វីដែលចាត់ការដោយតុលាការដំបូងក្រុងភ្នំពេញ ដោយសភាស៊ើបសួររបស់សាលាឧទ្ធរណ៍ គឺធ្វើឡើងត្រឹមត្រូវ»។
តំណាងរាស្ត្រគណបក្សសង្គ្រោះជាតិ លោក លិម គិមយ៉ា ដែលតាមដានដំណើររឿងនេះប្រាប់ថា គណបក្សសង្គ្រោះជាតិ បានជូនសេចក្ដីទុកចិត្តលើរឿងនេះដល់មេធាវី ខណៈការចរចានយោបាយមិនទាន់កើតមានរវាងគណបក្សសង្គ្រោះជាតិ និងគណបក្សប្រជាជនកម្ពុជា។ ដោយឡែកតំណាងរាស្ត្រ និងជាមន្ត្រីជាន់ខ្ពស់នៃគណបក្សប្រជាជនកម្ពុជា លោក ឈាង វុន ថា លោកមិនឆ្លើយតបជាមួយលោក អ៊ុំ សំអាន ដែលជាទណ្ឌិតនោះទេ៖ «ខ្ញុំឆ្លើយខ្លីទេ អត់មានអីត្រូវនិយាយទេ ព្រោះជាសម្ដីអ្នកទោស ពលរដ្ឋខ្មែរមិនល្ងង់ធ្វើតាមសម្ដីអ្នកទោសទេ»។
មជ្ឈដ្ឋានទូទៅតែងរិះគន់ប្រព័ន្ធតុលាការនៅកម្ពុជា ជាពិសេសទាក់ទងករណីនយោបាយ ប្រសិនបើសាលាដំបូងសម្រេចបែបណាហើយ គេកម្រឃើញតុលាការថ្នាក់ផ្សេងកែប្រែការចោទប្រកាន់នោះណាស់។
ក្រុមមេធាវីលោក អ៊ុំ សំអាន ស្នើរដ្ឋសភាប្រជុំដកអភ័យឯកសិទ្ធិលោក អ៊ុំ សំអាន ដូចដែលព្រឹទ្ធសភាប្រជុំដកអភ័យឯកសិទ្ធិសមាជិកព្រឹទ្ធសភាគណបក្ស សម រង្ស៊ី អ្នកស្រី ថាក់ ឡានី មុននឹងប្រគល់រឿងនេះទៅស្ថាប័នតុលាការ។
ប្រធានក្រុមតំណាងរាស្ត្រគណបក្សប្រឆាំង លោក សុន ឆ័យ កាលពីថ្ងៃ២០ ខែកញ្ញា បង្ហាញក្តីរំពឹងថា មន្ត្រី និងសកម្មជនរបស់ខ្លួននឹងត្រូវដោះលែងក្នុងពេលខាងមុខក្រោយដោះស្រាយវិបត្តិនយោបាយ។ ការលើកឡើងបែបនេះ បន្ទាប់ពីលោកប្រកាសថា តំណាងរាស្ត្រគណបក្សប្រឆាំងនឹងវិលចូលសភាវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។