មន្ត្រីជំនាញផ្នែកសិទ្ធិមនុស្សរបស់អង្គការសហប្រជាជាតិពីររូប សម្ដែងការព្រួយបារម្ភយ៉ាងខ្លាំងដែលរបបលោក ហ៊ុន សែន ធ្វើវិសោធនកម្មលើរដ្ឋធម្មនុញ្ញ ដែលដើរបញ្ច្រាសពីគោលការណ៍ច្បាប់សិទ្ធិមនុស្សអន្តរជាតិ។
នៅក្នុងសេចក្ដីថ្លែងការណ៍នៅថ្ងៃទី២០ ខែកុម្ភៈ នេះ អ្នករាយការណ៍ពិសេសរបស់អង្គការសហប្រជាជាតិស្ដីពីស្ថានភាពសិទ្ធិមនុស្សនៅប្រទេសកម្ពុជា អ្នកស្រី រ៉ូណា ស្មីត (Rhona Smith) និងអ្នករាយការណ៍ពិសេសរបស់អង្គការសហប្រជាជាតិ ស្ដីពីការលើកកម្ពស់ និងការពារសិទ្ធិបញ្ចេញមតិ លោក ដេវីត ខេ (David Kaye) ថា ច្បាប់ដាក់ទោសទណ្ឌចំពោះអ្នកប្រមាថព្រះមហាក្សត្រ និងសំណើធ្វើវិសោធនកម្មលើរដ្ឋធម្មនុញ្ញមួយចំនួនទៀត ដែលប្រើប្រាស់ពាក្យពេចន៍ក្នុងន័យទូលាយពេកបែបនេះ ធ្វើឲ្យរឹតត្បិតដល់សិទ្ធិសេរីភាពក្នុងការបញ្ចេញមតិ និងប៉ះពាល់ដល់លទ្ធិប្រជាធិបតេយ្យនៅកម្ពុជា។
អ្នកជំនាញទាំងពីរក៏ព្រួយបារម្ភខ្លាំងណាស់ដែរចំពោះនិយមន័យក្នុងច្បាប់ដែលចែងអំពី “ការតម្កល់ផលប្រយោជន៍ជាតិជាធំ” និង “ការប្រឆាំងការជ្រៀតជ្រែកពីបរទេស” ដែលឃ្លាទាំងនេះ គ្មានភាពជាក់លាក់ ដែលនាំឲ្យគ្រោះថ្នាក់ដល់គណបក្សនយោបាយ និងពលរដ្ឋខ្មែរទូទៅ។ អ្នកស្រី រ៉ូណា ស្មីត និងលោក ដេវីត ខេ បន្តទៀតថា វិសោធនកម្មទាំងនេះគឺបើកឱកាសឲ្យមានការរំលោភសិទ្ធិបោះឆ្នោតថែមទៀតផង ព្រោះអាជ្ញាធរអាចព្យួរ ឬដកហូតសិទ្ធិនេះពីបុគ្គល ឬគណបក្សនយោបាយ។
ជាចុងក្រោយ មន្ត្រីជំនាញផ្នែកសិទ្ធិមនុស្ស នៃអង្គការសហប្រជាជាតិទាំងពីររូប បានស្នើឲ្យរដ្ឋាភិបាលកម្ពុជា វាយតម្លៃឡើងវិញ ដោយយកចិត្តទុកដាក់ឲ្យបានហ្មត់ចត់លើសំណើវិសោធនកម្មច្បាប់ទាំងនេះ ដើម្បីធានាយ៉ាងណាថាច្បាប់ទាំងនេះស្របទៅតាមច្បាប់ និងបទដ្ឋានសិទ្ធិមនុស្សអន្តរជាតិ។ ម្យ៉ាងទៀត រដ្ឋាភិបាលគប្បីពិគ្រោះយោបល់ជាសាធារណៈ និងបើកចំហឲ្យមានពេលវេលាគ្រប់គ្រាន់ និងដោយសេរីក្នុងការចូលរួមជជែកលើការកែប្រែច្បាប់ទាំងនេះ។ ការខ្វះការពិគ្រោះយោបល់ជាសាធារណៈបែបនេះ គឺជាការគួរឲ្យព្រួយបារម្ភ។
ប្រតិកម្មរបស់មន្ត្រីអង្គការសហប្រជាជាតិនេះ ធ្វើឡើងស្របពេលដែលព្រឹទ្ធសភាកម្ពុជា នឹងជួបប្រជុំនៅថ្ងៃពុធ ទី២១ ស្អែកនេះ ដើម្បីអនុម័តសេចក្ដីព្រាងច្បាប់នេះ មុននឹងបញ្ជូនទៅព្រះមហាក្សត្រដើម្បីឡាយព្រះហស្តលេខា ប្រកាសឲ្យប្រើប្រាស់ជាផ្លូវការ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។