អ្នកវិភាគលើកឡើងថា ព្រះរាជអាជ្ញាត្រូវបើកការស៊ើបអង្កេតជុំវិញករណីបង្ហោះខ្សែអាត់សំឡេងដែលគេសង្ស័យថា ជាតំណាងរាស្ត្ររបស់បក្សប្រឆាំងសន្ទនាជាមួយគូកំណាន់របស់ខ្លួន ទោះបីជាជនរងគ្រោះមិនបានដាក់ពាក្យបណ្តឹងទៅតុលាការក៏ដោយ។
អ្នកវិភាគនយោបាយសង្គម លោកបណ្ឌិត ឡៅ ម៉ុងហៃ បញ្ជាក់ក្នុងវេទិកាអ្នកស្ដាប់វិទ្យុអាស៊ីសេរី កាលពីថ្ងៃសុក្រ ទី៩ ខែកុម្ភៈ ថា ប្រសិនបើជនរងគ្រោះក្នុងករណីបង្ហោះខ្សែអាត់សំឡេងបណ្ដាញសង្គមហ្វេសប៊ុក (Facebook) មិនបានប្ដឹងទៅអាជ្ញាធរនោះទេ សមត្ថកិច្ច និងតុលាការមានតួនាទីត្រូវបើកការស៊ើបអង្កេតករណីល្មើសច្បាប់ព្រហ្មទណ្ឌមួយនេះ ដោយដើរតួជាដើមបណ្តឹង៖ «ព្រះរាជអាជ្ញាហ្នឹងមានតួនាទីឃ្លាំមើលការអនុវត្តច្បាប់។ ឥឡូវនេះមានការរំលោភច្បាប់ ម្លោះហើយបើគាត់បានដឹងរឿងហ្នឹង គឺត្រូវចាត់វិធានការ ពីព្រោះអាហ្នឹងជាបទល្មើសនឹងច្បាប់ ហើយលួចថតលួចអីហ្នឹង គឺមានចែងក្នុងច្បាប់ស្តីពីទូរគមនាគមន៍ផង និងក្រមព្រហ្មទណ្ឌផង»។
ប៉ុន្តែអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ធ្លាប់អះអាងថា ប្រសិនបើតំណាងរាស្ត្របក្សប្រឆាំងយល់ថា ប៉ះពាល់ដល់ផលប្រយោជន៍ផ្ទាល់ខ្លួន នោះពួកគេអាចដាក់ពាក្យបណ្ដឹងទៅតុលាការបាន។
ទោះជាយ៉ាងណាក៏ដោយ លោកបណ្ឌិត ឡៅ ម៉ុងហៃ បញ្ជាក់ថា ពលរដ្ឋទូទៅអាចប្តឹងករណីល្មើសច្បាប់ទាំងឡាយណាដែលប៉ះពាលដល់សង្គមទៅក្រសួងយុត្តិធម៌ ហើយក្រសួងយុត្តិធម៌ អាចប្រើអំណាចស្របច្បាប់ក្នុងការបញ្ជាទៅព្រះរាជអាជ្ញា ដើម្បីធ្វើការស៊ើបអង្កេត។ ជាងនេះទៅទៀត ស្ថាប័នព្រះរាជអាជ្ញាអាចតាំងខ្លួនជាដើមបណ្ដឹងអាជ្ញាតែម្តង។
អាស៊ីសេរីនៅមិនទាន់អាចសុំសេចក្តីអត្ថាធិប្បាយពីក្រុមមន្ត្រីតុលាការ ឬក្រុមមន្ត្រីនៃក្រសួងយុត្តិធម៌ បានទេ ជុំបញ្ហានេះ។
មាត្រា៤០ នៃច្បាប់រដ្ឋធម្មនុញ្ញចែងថា សិទ្ធិរបស់ពលរដ្ឋកម្ពុជា គ្រប់រូបត្រូវបានធានាការពារអាថ៌កំបាំងនៃការឆ្លើយឆ្លងតាមលិខិតតាមសារទូរលេខ ទូរពុម្ព ទូរគមន៍ និងតាមទូរស័ព្ទ។ រីឯមាត្រា៩៧ នៃច្បាប់ស្ដីពីទូរគមនាគមន៍ចែងថា ការលបស្ដាប់ ឬការលបថតការសន្ទនាដោយការប្រើប្រាស់ប្រព័ន្ធទូរគមនាគមន៍ដោយបុគ្គលដែលពុំមែនជាភាគីនៃការសន្ទនា ត្រូវផ្ដន្ទាទោសដាក់ពន្ធនាគារពី ១ខែ ទៅ ១ឆ្នាំ និងទទួលពិន័យជាប្រាក់ពី ១សែនរៀល ទៅ ២លានរៀល។ លើកលែងតែការស្តាប់ ឬការថតការសន្ទនានោះ ធ្វើឡើងដោយមានការយល់ព្រមពីបុគ្គលដែលមានការពាក់ព័ន្ធ ឬដោយមានការអនុញ្ញាតពីអាជ្ញាធរធម្មានុរូប។ ចំណែកមាត្រា៣០១ ក្រមព្រហ្មទណ្ឌក៏ផ្ដន្ទាទោសអ្នកដែលលបថតសំឡេងសន្ទនារបស់គេឲ្យជាប់ពន្ធនាគារដែរ។
កាលពីពេលថ្មីៗនេះ គណនីហ្វេសប៊ុក (Facebook) ឈ្មោះ "សីហា" បានបន្តទម្លាយខ្សែអាត់សំឡេងសន្ទនារឿងស្នេហាសន្ទនាសម្ងាត់តាមទូរស័ព្ទដែលគេសង្ស័យថា ជាសំឡេងរបស់ក្រុមតំណាងរាស្ត្របក្សប្រឆាំង រួមទាំងគេបង្ហោះរូបថតតំណាងរាស្ត្រទាំងនោះមួយចំនួនផង រួមមានលោក រៀល ខេមរិន្ទ្រ លោក យ៉ែម បុញ្ញឫទ្ធិ លោក ឡុង រី លោក ហូរ វ៉ាន់ លោក ចាន់ ចេង អ្នកស្រី ពត ពៅ លោក យឹម សុវណ្ណ និងលោក អេង ឆៃអ៊ាង ជាដើម និងការទម្លាយរឿងទំនាស់បែងចែកអំណាចផ្ទៃក្នុងបក្សផងដែរ។
ក្រុមតំណាងរាស្ត្របក្សសង្គ្រោះជាតិ ទាំងនេះអះអាងថា ពួកគេប្រកាន់គោលការណ៍មិនឈ្លោះ មិនឆ្លើយ មិនឆ្លង និងមិនតប។
រហូតមកទល់ពេលនេះ គេនៅមិនទាន់ឃើញសមត្ថកិច្ចទីក្រុងភ្នំពេញ បើកការស៊ើបអង្កេតករណីនេះនៅឡើយទេ។
កាលពីដើមសប្តាហ៍នេះ មន្ត្រីអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) លោក ប្រ៊ែដ អាដាម (Brad Adams) បានប្រាប់អាស៊ីសេរី តាមទូរស័ព្ទថា គ្មាននរណាក្រៅពីក្រុមគណបក្សប្រជាជនកម្ពុជាទេ ដែលជាអ្នកនៅពីក្រោយនៃការបញ្ចេញខ្សែអាត់សំឡេងទាំងនេះដើម្បីបំផ្លាញប្រជាប្រិយភាព និងដើម្បីកម្ទេចបក្សប្រឆាំងនៅមុនការបោះឆ្នោតឃុំ សង្កាត់ ខាងមុខ។
លោកបន្តថា អំពើទាំងនេះមិនត្រឹមតែរំលោភដល់រដ្ឋធម្មនុញ្ញនៃប្រទេសរបស់ខ្លួនប៉ុណ្ណោះទេ តែវាក៏បានរំលោភដល់គោលការណ៍ច្បាប់អន្តរជាតិផងដែរ៖ «ជាការពិតណាស់ អំពើទាំងនេះគឺគណបក្សប្រជាជនកម្ពុជា ជាអ្នកធ្វើក្នុងការឈ្លានពានភាពឯកជនរបស់ពលរដ្ឋតាមការប្រើប្រាស់ មធ្យោបាយដ៏កខ្វក់ និងខុសច្បាប់ក្នុងការលួចថតសំឡេងសន្ទនាតាមទូរស័ព្ទរបស់មនុស្ស។ ក្រុមគណបក្សកាន់អំណាចគួរតែមានសេចក្ដីខ្មាសអៀនដោយខ្លួនចំពោះទង្វើរបស់ខ្លួនដែលលាតត្រដាង ការសន្ទនាតាមទូរស័ព្ទដូច្នេះ។ ប្រសិនបើកម្ពុជា ប្រព័ន្ធច្បាប់ យុត្តិធម៌មែន នោះជនដៃដល់ទាំងនោះនឹងត្រូវយកមកផ្ដន្ទាទោសតាមផ្លូវច្បាប់ជាមិនខាន»។
លោកបន្តថា លោកគ្មានការផ្ញាក់ផ្អើលទេ ពីព្រោះអ្នកណាក៏ដឹងដែរថា រដ្ឋាភិបាលកម្ពុជា បានលបស្ដាប់សំឡេងសន្ទនាទាំងខុសច្បាប់ ដោយសារពួកគេបញ្ជារឲ្យក្រុមហ៊ុនទូរស័ព្ទអាចផ្តល់សិទ្ធិដល់រដ្ឋាភិបាលធ្វើដូច្នេះបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។