មន្ត្រីសិទ្ធិមនុស្សអាដហុក (ADHOC) និងភរិយារបស់អគ្គលេខាធិការរង គ.ជ.ប នៅតែគ្មានជំនឿថា ពួកគេនឹងទទួលបានយុត្តិធម៌ពីតុលាការ។ ការលើកឡើងបែបនេះ នៅពេលសាលាឧទ្ធរណ៍នៅតែចាត់ទុកសាលក្រមតុលាការក្រុងភ្នំពេញ ថាជាបានការ ដោយមិនអនុញ្ញាតឲ្យមន្ត្រីសិទ្ធិមនុស្សអាដហុក ៤នាក់ និងអគ្គលេខាធិការរង គ.ជ.ប ម្នាក់ នៅក្រៅឃុំបណ្ដោះអាសន្នតាមការស្នើសុំ។
ទាំងមុនពេលចូលបន្ទប់សវនាការ និងពេលចេញពីបន្ទប់សវនាការនៅសាលាឧទ្ធរណ៍ ក្រុមមន្ត្រីសិទ្ធិមនុស្សអាដហុក បង្ហាញជំហរគ្មានជំនឿថា តុលាការជាន់ខ្ពស់មួយនេះសម្រេចឲ្យពួកគេនៅក្រៅឃុំបណ្ដោះអាសន្នបានឡើយ។
មេធាវីការពារក្ដីឲ្យមន្ត្រីសិទ្ធិមនុស្សអាដហុក ទាំង ៤រូប និងអគ្គលេខាធិការរង គ.ជ.ប គឺលោក សំ សុគង់ ឲ្យដឹងក្រោយសវនាការថ្ងៃនេះថា មូលហេតុដែលសាលាឧទ្ធរណ៍បដិសេធមិនឲ្យកូនក្ដីរបស់លោកនៅក្រៅឃុំនោះ ដោយហេតុផលបីយ៉ាង។ ទី១ ប្រធានក្រុមប្រឹក្សាភិបាលសភាស៊ើបសួរសាលាឧទ្ធរណ៍ចាត់ទុកថា ករណីសូកប៉ាន់សាក្សីជាបទឧក្រិដ្ឋ ទី២ ដោយសារតែខ្លាចអ្នកទាំង ៥នាក់ ក្រោយពេលឲ្យនៅក្រៅឃុំ ត្រូវរ៉ូវគ្នាជាមួយសាក្សីធ្វើឲ្យរំខានដល់ការស៊ើបសួរ និងទី៣ ករណីនេះកំពុងស្ថិតក្នុងការស៊ើបអង្កេត៖ «ខ្ញុំយល់ឃើញថា បើយើងពិនិត្យអំពីលក្ខខណ្ឌដែលលើកឡើងរបស់សាលាឧទ្ធរណ៍មិនទាន់មានលក្ខណៈត្រឹមត្រូវដើម្បីផ្ដល់យុត្តិធម៌ដល់កូនក្តីខ្ញុំទេ កូនក្ដីខ្ញុំពេលលើកឡើងក្នុងសវនាការគឺគាត់មានភស្តុតាង ក៏ដូចជាមានលក្ខខណ្ឌមួយចំនួនដែលអាចអោយតុលាការពិចារណាអាចឲ្យនៅក្រៅឃុំ»។
ក្នុងចំណោមអ្នកទាំង ៥រូប ដែលត្រូវឆ្មាំពន្ធនាគារនាំខ្លួនមកជំនុំជម្រះនៅសាលាឧទ្ធរណ៍ មន្ត្រីសិទ្ធិមនុស្សអាដហុក ម្នាក់ គឺលោក ណៃ វ៉ង់ដា ដែលទឹកមុខមើលទៅស្លេកស្លាំង ប្រាប់ថា បេះដូងលោកមានបញ្ហា ហើយលោកកំពុងឡើងជាតិអាស៊ីដ។ នៅពេលបញ្ចប់ការជំនុំជម្រះ មន្ត្រីសិទ្ធិមនុស្សអាដហុក រួមមាន លោក យី សុខសាន្ត លោក នី សុខា លោក ណៃ វ៉ង់ដា និងអ្នកស្រី លឹម មុន្នី លើកឡើងស្រដៀងគ្នាថា នេះជារឿងអយុត្តិធម៌ដែលតុលាការចាប់ខ្លួនមន្ត្រីសិទ្ធិមនុស្សដាក់គុក។
ដោយឡែក អគ្គលេខាធិការរង គ.ជ.ប លោក នី ចរិយា បដិសេធមិនធ្វើអត្ថាធិប្បាយទេ៖ «ខ្ញុំសុំមិននិយាយអីទេ»។
សាលាឧទ្ធរណ៍នៅព្រឹកថ្ងៃទី១១ ខែវិច្ឆិកា បើកសវនាការករណីបណ្ដឹងសុំនៅក្រៅឃុំរបស់មន្ត្រីសិទ្ធិមនុស្សរបស់សមាគមអាដហុក ៤រូប ព្រមទាំងអគ្គលេខាធិការរងនៃគណៈកម្មាធិការជាតិរៀបចំការបោះឆ្នោត លោក នី ចរិយា។ អ្នកទាំង ៥រូប ត្រូវបានតុលាការក្រុងភ្នំពេញ សម្រេចបញ្ជូនទៅឃុំខ្លួនបណ្ដោះអាសន្ន ក្រោមបទចោទសូកប៉ាន់សាក្សី និងសមគំនិតសូកប៉ាន់សាក្សី កាលពីដើមខែឧសភា ឆ្នាំ២០១៦។
ភរិយាលោក នី ចរិយា គឺលោកស្រី យ៉ែម ចន្ថា ព្រួយបារម្ភពីបញ្ហាសុខភាពស្វាមីរបស់លោកស្រី ខណៈដែលតុលាការសម្រេចបន្តឃុំខ្លួនស្វាមីលោកស្រី។ លោកស្រី យ៉ែម ចន្ថា ប្រាប់ថា ពេលនេះលោកស្រីមានតែបន់ព្រះសំពះទេវតាសុំឲ្យជួយស្វាមីលោកស្រីឲ្យទទួលបានយុត្តិធម៌៖ «មិនដឹងទុកធ្វើអីទៀត ដោះលែងគាត់ឲ្យនៅក្រៅឃុំទៅ យ៉ាងហោចក៏បានជួបជុំគ្រួសារដែរ។ មួយរយៈកន្លងមកហ្នឹង មិនដឹងរំពឹងលើអ្នកណាទេ ចាំមើលសិន មានតែបន់ព្រះសំពះទេវតា រាល់ថ្ងៃមានតែចង់ឲ្យគាត់ទទួលបានយុត្តិធម៌ ប៉ុន្តែមិនដឹងបានពីណាមកទេ ចាំមើលសិនណា»។
មន្ត្រីសិទ្ធិមនុស្ស ៤រូប និងមន្ត្រី គ.ជ.ប ១រូប ត្រូវបានអង្គភាពប្រឆាំងអំពើពុករលួយកោះហៅមកសាកសួរ និងឃាត់ខ្លួនកាលពីចុងខែមេសា រួចបញ្ជូនមកតុលាការ ពាក់ព័ន្ធនឹងអំពើពុករលួយជុំវិញការចោទប្រកាន់របស់អ្នកនាង ខុម ចាន់តារាទី ហៅ ស្រីមុំ។ ក្រុមមន្ត្រីអាដហុក ប្រកាសថា ពួកគេនឹងប្ដឹងទៅតុលាការកំពូលបន្តទៀត ដើម្បីអាចបាននៅក្រៅឃុំ បើទោះបីពួកគេគ្មានជំនឿថា នឹងទទួលបានយុត្តិធម៌ក្តី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។