ភរិយារបស់សមាជិកព្រឹទ្ធសភាខាងគណបក្សប្រឆាំង លោក ហុង សុខហួរ សោកស្ដាយចំពោះការសម្រេចរបស់តុលាការកំពូល ដែលបដិសេធសំណើសុំនៅក្រៅឃុំបណ្ដោះអាសន្នរបស់ស្វាមីអ្នកស្រី ដោយចាត់ទុកថា ជារឿងអយុត្តិធម៌ និងមិនត្រឹមត្រូវ។ ការលើកឡើងនេះ ធ្វើឡើងបន្ទាប់ពីតុលាការបានសម្រេចបន្តឃុំខ្លួនលោក ហុង សុខហួរ បន្តទៀត នៅថ្ងៃទី៤ ខែមីនា។
ចៅក្រមតុលាការកំពូលអះអាងថា ការសម្រេចរក្សាសាលដីការបស់សាលាឧទ្ធរណ៍ក្នុងការបន្តឃុំខ្លួន លោក ហុង សុខហួរ ក្រោមហេតុផលថា ជារឿងឧក្រិដ្ឋ ខ្លាចក្រែងមានភាពវឹកវរក្នុងសង្គម និងហៅការសម្រេចរបស់តុលាការឧទ្ធរណ៍ថាជារឿងត្រឹមត្រូវ។
ការប្រកាសសម្រេចបន្តឃុំខ្លួនសមាជិកព្រឹទ្ធសភាបក្សប្រឆាំង លោក ហុង សុខហួរ ដោយពុំមានវត្តមានរបស់ជនជាប់ចោទនោះឡើយ។
ភរិយារបស់សមាជិកព្រឹទ្ធសភាបក្សប្រឆាំង លោក ហុង សុខហួរ អ្នកស្រី គុណ លំអង សោកស្ដាយចំពោះការសម្រេចរបស់ចៅក្រមតុលាការកំពូល នៅពេលនេះ។ អ្នកស្រីថា ការសម្រេចមិនបានផ្ដល់យុត្តិធម៌ មិនមានភាពត្រឹមត្រូវ ធ្វើឡើងក្រោមហេតុផលមិនច្បាស់លាស់ បើទោះជាប្ដីអ្នកស្រីកំពុងមានបញ្ហាសុខភាព ហើយបានយល់ព្រមដាក់តម្កល់លិខិតឆ្លងដែន រួមនឹងប្រាក់ចំនួន ២០លានរៀល ដើម្បីសុំនៅក្រៅឃុំក៏ដោយ៖ «អ្វីដែលខ្ញុំចង់បានជាទីបំផុត គឺស្វាមីខ្ញុំគាត់កំពុងមានជំងឺលើសឈាម មានស្ថានភាពធ្ងន់ធ្ងរ គាត់មានជំងឺនេះជាង ១០ឆ្នាំហើយ ដែលត្រូវការឲ្យគាត់លេបថ្នាំ ញ៉ាំបាយទាន់ពេល តែពេលគាត់នៅក្នុងពន្ធនាគារ គាត់មិនអាចថែទាំសុខភាពគាត់បានទេ ដូច្នេះតុលាការគួរតែពិចារណាឡើងវិញ ដោះលែងប្ដីខ្ញុំ ដើម្បីឲ្យគាត់អាចធ្វើការបម្រើជាតិ»។
ទន្ទឹមគ្នានេះ មេធាវីការពារក្តីរបស់លោក ហុង សុខហួរ គឺ ជូង ជូងី សោកស្ដាយចំពោះការច្រានចោលរបស់តុលាការ ដែលមិនព្រមផ្ដល់យុត្តិធម៌ដល់កូនក្ដីរបស់លោក ព្រោះការសម្រេចឲ្យកូនក្ដីលោកនៅក្រៅឃុំ នឹងអាចជួយកិច្ចការសង្គមបានច្រើន។ ប៉ុន្តែលោកនឹងជំរុញឲ្យសាលាដំបូងកំណត់ថ្ងៃជំនុំជម្រះ ដើម្បីអាចឲ្យលោកអាចបង្ហាញភស្តុតាងដោះបន្ទុកកូនក្តីលោក៖ «គាត់មិនអាចទៅបង្កអសន្តិសុខនៅក្នុងសង្គមបានទេ គាត់មិនមែនជាទាហាន ជាប៉ូលិស ព្រោះគាត់គឺជាអ្នកច្បាប់។ ខ្ញុំនឹងព្យាយាមឲ្យតុលាការបើកអង្គជំនុំជម្រះរឿងនេះ ដោយឲ្យតុលាការភ្ជាប់បណ្ដាញអ៊ីនធឺណិត ពេលនោះខ្ញុំនឹងបង្ហាញភស្តុតាងពាក់ព័ន្ធរឿងនេះ»។
ក្នុងសវនាការសុំនៅក្រៅឃុំនៅតុលាការកំពូល កាលពីថ្ងៃទី២៦ ខែកុម្ភៈ លោក ហុង សុខហួរ បានស្នើតម្កល់លិខិតឆ្លងដែន និងប្រាក់ចំនួន ២០លានរៀល ជាថ្នូរនឹងការបាននៅក្រៅឃុំ។ លោកថែមទាំងអះអាងថា នឹងអនុវត្តតាមគ្រប់នីតិវិធីដែលតុលាការតម្រូវ។
ចំណែកឯអ្នកគ្រប់គ្រងបច្ចេកទេសការិយាល័យស៊ើបអង្កេតនៃអង្គការលីកាដូ (LICADHO) លោក អំ សំអាត មានប្រសាសន៍ថា ការសម្រេចបន្តឃុំខ្លួនលោក ហុង សុខហួរ គ្មានអ្វីប្លែកនោះទេ វាគឺជារឿងនយោបាយ ព្រោះបើពិនិត្យមើលសំណើរបស់លោក ហុង សុខសួរ ល្មមអាចគ្រប់គ្រាន់ឲ្យលោកអាចនៅក្រៅឃុំបាន៖ «ករណីលោក ហុង សុខហួរ គឺជារឿងនយោបាយដែលលោកថា មិនអាចដោះស្រាយបាននោះទេ ប្រសិនបើការចរចារបស់អ្នកនយោបាយមិនទាន់ត្រូវគ្នា ហេតុនេះបើអ្នកនយោបាយបក្សទាំង២ ចរចាមិនត្រូវគ្នានោះទេ លោក ហុង សុខហួរ និងសកម្មជនបក្សប្រឆាំងច្រើននាក់ទៀតគ្មានថ្ងៃចេញបាននោះទេ»។
លោក ហុង សុខហួរ ត្រូវតុលាការក្រុងភ្នំពេញ ឃុំខ្លួន ក្រោយពីលោកនាយករដ្ឋមន្ត្រី ហ៊ុន សែន បញ្ជាឲ្យចាប់ខ្លួនកាលពីថ្ងៃទី១៤ ខែសីហា ដោយចោទប្រកាន់ថា លោក ហុង សុខហួរ ក្បត់ជាតិ ដែលហ៊ានលួចក្លែងឯកសារសន្ធិសញ្ញាព្រំដែនកម្ពុជា-វៀតណាម ឆ្នាំ១៩៧៩ ដែលថា សន្ធិសញ្ញារំលាយព្រំដែនប្រទេសទាំងពីរ។
លោក ហុង សុខហួរ សមាជិកព្រឹទ្ធសភាគណបក្ស សម រង្ស៊ី រងបទចោទ ៣ករណី ក្នុងនោះរួមមាន បទក្លែងបន្លំឯកសារសាធារណៈ បទប្រើប្រាស់ឯកសារសាធារណៈក្លែង និងបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម។ បទចោទប្រកាន់ទាំងនោះ លោកប្រឈមនឹងការផ្ដន្ទាទោសដាក់ពន្ធនាគារចន្លោះពី ៥ ទៅ ១០ឆ្នាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។