សាលាឧទ្ធរណ៍​បើក​សវនាការ​កំបាំង​មុខ​ករណី​​ចាប់​​ខ្លួន​មនុស្ស​​នៅ​ផ្លូវ​វ៉េងស្រេង

ដោយ​ សុ ជីវី
2016.01.27
កម្មករ ប៉ូលិស ផ្លូវ​វ៉េងស្រេង ៦១០ បាតុករ​ដែល​ត្រូវ​កម្លាំង​ចម្រុះ​ចាប់​ខ្លួន​ក្នុង​ព្រឹត្តិការណ៍​បង្ក្រាប​ដោយ​ហិង្សា​លើ​ក្រុម​កម្មករ​នៅ​តាម​បណ្ដោយ​ផ្លូវ​វ៉េងស្រេង ម្ដុំ​សួន​ឧស្សាហកម្ម​កាណាឌីយ៉ា រាជធានី​ភ្នំពេញ កាល​ពី​ថ្ងៃ​ទី​៣ ខែ​មករា ឆ្នាំ​២០១៤។
RFA/Jeevita

ចៅក្រម​សាលាឧទ្ធរណ៍​បើក​សវនាការ​កាត់ក្ដី​ដោយ​កំបាំង​មុខ​ករណី​បណ្ដឹង​របស់​បុរស​ដែល​ភាគ​ច្រើន​ជា​កម្មករ​ចំនួន ១៣​នាក់ ដែល​ត្រូវ​ចាប់​ខ្លួន​នៅ​ក្នុង​ការ​បង្ក្រាប​កម្មករ​តវ៉ា​នៅ​ផ្លូវ​វ៉េងស្រេង កាល​ពី​ថ្ងៃ​ទី​៣ ខែ​មករា ឆ្នាំ​២០១៤។

ប្រធាន​ក្រុមប្រឹក្សា​ជំនុំ​ជម្រះ លោក​ចៅក្រម ឆាយ ច័ន្ទតារាវណ្ណ បាន​សម្រេច​លើក​ពេល​ប្រកាស​សាលដីកា​សំណុំ​រឿង​នេះ​ទៅ​ថ្ងៃ​ទី​៤ ខែ​កុម្ភៈ។ ចៅក្រម​ក៏​បាន​ប្រកាស​អោយ​ជនជាប់ចោទ​ប្ដឹង​សាទុក្ខ​អោយ​សាលាឧទ្ធរណ៍​បើក​សវនាការ​ឡើង​វិញ ប្រសិន​បើ​ពួកគេ​មិន​ពេញ​ចិត្ត​នឹង​ការ​សម្រេច​នោះ។

ប្រធាន​បច្ចេកទេស​នៃ​អង្គការ​សិទ្ធិមនុស្ស​លីកាដូ (LICADHO) លោក អំ សំអាត ដែល​ឃ្លាំមើល​សវនាការ​លើក​ឡើង​ថា ដើម្បី​អោយ​មាន​ភាព​យុត្តិធម៌​ចៅក្រម​គួរ​តែ​ជ្រើស​រក​ជម្រើស​ផ្សេង​ជា​ជាង​ការ​កាត់​ក្ដី​ដោយ​កំបាំង​មុខ​ជន​ជាប់ចោទ។ លោក​ថា ក្នុង​សវនាការ​មាន​តែ​មន្រ្តី​នគរបាល​ និង​កងរាជអាវុហត្ថ​ដែល​បន្ត​អះអាង​ថា ពុំ​បាន​ប្រើកាំភ្លើង​​ទេ​នៅ​ពេល​បង្រ្កាប​ការ​វ៉ា​ដំឡើង​ប្រាក់​ឈ្នួល​របស់​កម្មករ៖ «មន្រ្តី​កងរាជអាវុធហត្ថ​​​បញ្ជាក់​ថា ខ្លួន​បើក​ប្រតិបត្តិការ​ប្រើតែ​ដំបង និង​ខែល​អត់​មាន​ប្រើអាវុធ​ទេ ហើយ​កម្លាំង​នគរបាល​ថា ខ្លួន​ប្រើ​ដំបង ខែល និង​កាំភ្លើង​ឧស្ម័ន​បង្ហូរ​ទឹក​ភ្នែក។ ប៉ុន្តែ​អ្វី​ដែល​ជា​ធាតុ​ពិត​នៅ​កន្លែង​កើត​ហេតុ​ឃើញ​ថា មាន​មនុស្ស ៤​នាក់​ស្លាប់​ដោយ​គ្រាប់​កាំភ្លើង ហើយ​មាន​មនុស្ស​ជា​ច្រើន​នាក់​បាន​រងរបួស​ដោយ​សារគ្រាប់​កាំភ្លើង។ តើ​គ្រាប់​កាំភ្លើង​នោះ​ក្រុម​ណា​ជា​អ្នក​ប្រើ បើ​ការ​បង្រ្កាប​នោះ​មាន​តែ​កង​រាជអាវុធហត្ថ និង​នគរបាល?»

ហេតុផល​មួយ​ដែល​ចៅក្រម​បាន​លើក​ឡើង​ពី​ការ​កាត់ក្ដី​កំបាំង​មុខ គឺ​មិន​អាច​ស្វែង​រក​ជនជាប់ចោទ។ បើ​ទោះ​ជាយ៉ាង​ណា​ក៏​មាន​មេធាវី​មួយ​ចំនួន​បាន​ស្នើ​សុំ​ពន្យារ​ពេល​សវនាការ​ដែរ។

សាលាដំបូង​រាជធានី​ភ្នំពេញ កាត់​ក្ដី​កាល​ពី​ខែ​ឧសភា ឆ្នាំ​២០១៤ អោយ​អ្នក​ទាំង ១៣​នាក់​មាន​ទោស ប៉ុន្តែ​បាន​ព្យួរទោស។ ក្នុង​នោះ​បុរស ៣​នាក់ ត្រូវ​បាន​តុលាការ​ផ្ដន្ទាទោស​ឲ្យ​ជាប់​ពន្ធនាគារ​ចាប់​ពី ១​ឆ្នាំ ដល់ ៤​ឆ្នាំ។ បុរស ១០​នាក់ ត្រូវ​ផ្ដន្ទាទោស​ឲ្យ​ជាប់​ពន្ធនាគារ​ចន្លោះ​ពី ៣​ឆ្នាំ ទៅ ៤​ឆ្នាំ។ ពួក​គេ​បាន​ដាក់​ពាក្យ​ប្ដឹង​ទាស់​ដោយ​សំអាង​ថា ពួកគេ​ពុំ​មាន​ទោស។

ក្រុម​អង្គការ​សិទ្ធិ​មនុស្ស​រិះគន់​ករណី​ផ្តន្ទាទោស​អ្នក​ទាំង ១៣​នាក់​ថា អយុត្តិធម៌​នៅ​ពេល​ដែល​អ្នក​បាញ់​សម្លាប់​កម្មរ​ចំនួន ៤​នាក់ នៅ​ថ្ងៃ​កើត​ហេតុ​ពុំ​ត្រូវ​បាន​វែក​មុខ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។