អាជ្ញាធរខណ្ឌមួយចំនួនក្នុងរាជធានីភ្នំពេញ បាននាំគ្នាធ្វើយុទ្ធនាការហែក្បួនផ្សព្វផ្សាយការអនុវត្តច្បាប់ចរាចរណ៍ថ្មី ដោយអប់រំឲ្យពលរដ្ឋមានការយល់ដឹងពីច្បាប់នេះ នឹងផ្ដោតការយកចិត្តទុកដាក់ស្រលាញ់អាយុជីវិតខ្លួនឯង និងអ្នកដទៃ តាមរយៈការអនុវត្តច្បាប់។ យុទ្ធនាការនេះ ធ្វើឡើងនៅចំថ្ងៃដែលរដ្ឋាភិបាលប្រកាសយកថ្ងៃទី១ ខែមករា ឆ្នាំ២០១៦ ជាថ្ងៃរឹតបន្តឹងការផាកពិន័យ និងអនុវត្តច្បាប់ចរាចរណ៍ផ្លូវគោកថ្មី។
មន្ត្រីខណ្ឌសែនសុខ យុវជនកាយរឹទ្ធិ កាកបាទក្រហម និងប្រជាពលរដ្ឋ បានដើរក្បួននៅលើតាមផ្លូវហាណូយ ផ្សព្វផ្សាយឲ្យប្រជាពលរដ្ឋយល់ដឹងអំពីច្បាប់ចរាចរណ៍ផ្លូវគោកថ្មី។
នាយករដ្ឋបាលខណ្ឌសែនសុខ លោក ឡាយ ឧត្ដម មានប្រសាសន៍នៅថ្ងៃទី១ ខែមករា ថា នេះជាយុទ្ធនាការផ្សព្វផ្សាយអំពីច្បាប់ចរាចរណ៍ផ្លូវគោកដោយជំរុញឲ្យគ្រប់គ្នាត្រូវតែគោរពច្បាប់ចរាចរណ៍ និងស្រលាញ់អាយុជីវិតខ្លួនឯងនិងអ្នកដទៃ។
លោកថា យុទ្ធនាការបែបនេះនឹងបន្តធ្វើទៀត៖ «កន្លងមកក៏យើងផ្សព្វផ្សាយដែរ ប៉ុន្តែសម្រាប់ឆ្នាំ២០១៦ នេះជាលើកទី១ហើយ ជាទ្រង់ទ្រាយធំ។ យើងក៏ចែកជាសៀវភៅឲ្យគាត់យកទៅមើលដែរ យើងផ្សព្វផ្សាយតាមមេក្រូផង ចែកជាសៀវភៅតូចៗ ឲ្យគាត់យកទៅអង្គុយអាន ឲ្យគាត់យកទៅពន្យល់គ្នាគាត់បន្តទៀត ហើយគាត់លក់ដូរអ៊ីចឹង គាត់យកមកពិភាក្សាគ្នាទៅវាងាយយល់ជាង។ សៀវភៅនេះយើងសង្ខេប»។
ក្រៅអំពីការហែក្បួនស្រែកផ្សព្វផ្សាយបានឧបករណ៍បំពងសំឡេង ពួកគេបានលើកបដាពាក្យស្លោកដែលសរសេរថា "គោរពច្បាប់ចរាចរណ៍គឺគោរពអាយុជីវិតខ្លួនឯងនិងអ្នកដទៃ" "ពិសាគ្រឿងស្រវឹងប្រឈមនឹងការផាកពិន័យ"។ ទន្ទឹមនឹងគ្នានេះ ពួកគេបានចែកសៀវភៅតូចស្ដើងដែលសរសេរសង្ខេបពីទោសប្បញ្ញត្តិនៃច្បាប់ស្ដីពីចរាចរណ៍ផ្លូវគោក និងអនុក្រឹត្យស្ដីពីការពិន័យអន្តរការណ៍។
ពលរដ្ឋជាអ្នកប្រកបរបរនៅតាមដងផ្លូវហាណូយ ក្នុងខណ្ឌសែនសុខ រាជធានីភ្នំពេញ ដែលបានឃើញការផ្សព្វផ្សាយនេះ បានគាំទ្រឲ្យមានការផ្សព្វផ្សាយបន្ថែម៖ «គាត់ធ្វើអ៊ីចឹងទៅវាជួយកាត់បន្ថយគ្រោះថ្នាក់ចរាចរណ៍ច្រើន ឲ្យមានការយល់ដឹងពីច្បាប់ចរាចរណ៍ច្រើន។ អ្នកខ្លះឃើញភ្លើងស្ដុបគេអត់ឈប់ទេ។ បើសិនជាគេរឹតបន្តឹង គេអត់ហ៊ានទេ។ ខ្ញុំគិតថា ច្បាប់នេះល្អ។ ការពារអាយុជីវិតរបស់យើង។ ចូលរួមអនុវត្តទាំងអស់គ្នាទៅវាក៏ល្អដែរ»។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ មានប្រសាសន៍ថា ស្ទើរតែគ្រប់ខណ្ឌទាំង១២ ក្នុងរាជធានី បានស្នើសុំការហែក្បួនផ្សព្វផ្សាយពង្រឹងការអនុវត្តច្បាប់ចរាចរណ៍ផ្លូវគោកថ្មី។
គេហទំព័រអគ្គស្នងការនគរបាលជាតិបានឲ្យដឹងថា អគ្គស្នងការរងនគរបាលជាតិ លោកឧត្ដមសេនីយ៍ឯក ហ៊ឹម យ៉ាន បានដឹកនាំកងកម្លាំងនគរបាលចរាចរណ៍មួយក្រុម ចុះធ្វើយុទ្ធនាការផ្សព្វផ្សាយ និងពង្រឹងការអនុវត្តច្បាប់ចរាចរណ៍ផ្លូវគោកថ្មីនៅផ្លូវជាតិលេខ១ ស្ថិតក្នុងសង្កាត់ព្រែកឯង ខណ្ឌច្បារអំពៅ រាជធានីភ្នំពេញ។ លោកថា ការផ្សព្វផ្សាយ និងពង្រឹងការអនុវត្តច្បាប់ចរាចរណ៍ផ្លូវគោកថ្មីនេះ សមត្ថកិច្ចនឹងបន្តធ្វើទាំងយប់ ទាំងថ្ងៃ ដើម្បីឲ្យទទួលបានលទ្ធផលល្អ។
លោកបញ្ជាក់ថា ករណីល្មើសភាគច្រើន គឺម៉ូតូដែលអ្នករួមដំណើរមិនបានពាក់មួកសុវត្ថិភាព តាមអនុក្រឹត្យលេខ៨៥ គឺត្រូវពិន័យចំនួន ១៥.០០០រៀលក្នុងម្នាក់ ហើយការផាកពិន័យនេះ មិនត្រូវបង់ប្រាក់នៅនឹងកន្លែងផ្ទាល់នោះទេ គឺសមត្ថកិច្ចគ្រាន់តែចេញប័ណ្ណផាកពិន័យ ហើយត្រូវបង់នៅទីកន្លែងមួយដែលសមត្ថកិច្ចបានកំណត់។ រីឯការមិនបង់ប្រាក់ផាកពិន័យលើសពី ៣០ថ្ងៃ នឹងត្រូវគុណប្រាក់ផាកពិន័យនឹងពីរ បើលើសពី ៦០ថ្ងៃ ត្រូវគុណនឹងបី ហើយក្នុងករណីលើសពី ៩០ថ្ងៃ សមត្ថកិច្ចនឹងកសាងសំណុំរឿងបញ្ជូនទៅតុលាការឲ្យចាត់ការបន្តតាមនីតិវិធី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។