មេធាវី និងជនសង្ស័យក្នុងសំណុំរឿងកាប់រុករានព្រៃបម្រុងទុកធ្វើជាកម្មសិទ្ធិនៅខេត្ដពោធិ៍សាត់ បានដាក់សាក្សីដោះបន្ទុកចំនួន ៣នាក់បន្ថែមទៀត ក្រោយពីសាក្សីចំនួន ៤នាក់ ត្រូវចៅក្រមសាលាដំបូងខេត្តពោធិ៍សាត់ សាកសួររួចនៅក្នុងសវនាការកាលពីថ្ងៃទី២៩ ខែកញ្ញា ឆ្នាំ២០១៥។ ជនសង្ស័យដែលជាសកម្មជនបក្សប្រឆាំងសង្ឃឹមថា នឹងទទួលបានយុត្តិធម៌ ប្រសិនបើចៅក្រមប្រកាន់នូវគតិយុត្តិធម៌។
ប្រធានក្រុមប្រឹក្សាជំនុំជម្រះនៃសាលាដំបូងខេត្តពោធិ៍សាត់ លោក ម៉ៅ ស៊ីណា ចេញដីកាកោះហៅសាក្សី ៣នាក់ ដើម្បីបំភ្លឺបន្ថែមក្នុងសំណុំរឿងព្រហ្មទណ្ឌលេខ ៣១៦ ដែលចោទលោក សោម សារាវុត ថា បានកាប់រុករានដីព្រៃបម្រុងទុកទៅធ្វើជាកម្មសិទ្ធិ នៅព្រឹកថ្ងៃទី១៩ ខែតុលា ឆ្នាំ២០១៥ ខាងមុខ។
សាក្សីម្នាក់ក្នុងចំណោម ៣នាក់ គឺលោក អ៊ូ ឆាន ដែលបច្ចុប្បន្នមានវ័យ ៦១ឆ្នាំ ឲ្យដឹងនៅថ្ងៃទី១៦ ខែតុលា ថា រូបលោកនឹងចូលខ្លួនទៅបកស្រាយតាមដីកាដោយមិនអល់អែកអ្វីឡើយ ព្រោះលោកដឹងច្បាស់ថា ដូនតា និងឪពុកម្ដាយរបស់ជនសង្ស័យ បានកាន់កាប់ដីនៅតំបន់ដែលអាជ្ញាធរចោទនោះជាច្រើនជំនាន់មកហើយ ប៉ុន្តែលោកមិនដឹងដើមចមនៃបញ្ហាកើតឡើងចុងក្រោយនេះទេ៖ «នេះខ្ញុំអត់ដឹងកិច្ចកលរបស់អាជ្ញាធរដែនដីយ៉ាងម៉េចអីយ៉ាងម៉េចផង! ស្រាប់តែចុងក្រោយមកឮសូរថា ដីហ្នឹងដាក់ជាព្រៃសហគមន៍ ទៅចោទលោក សោម សារាវុត ថាកាប់រានដីព្រៃអីណា។ ដីហ្នឹងវាល មានព្រៃស្រោងអី ដីវាលស្រែតែម្ដង»។
សមាជិកសមាគមគ្រូបង្រៀនកម្ពុជាឯករាជ្យ និងជាអនុប្រធានទី២ នៃគណៈកម្មាធិការប្រតិបត្តិស្រុកក្រគរគណបក្សសង្គ្រោះជាតិ លោក សោម សារាវុត ត្រូវខណ្ឌរដ្ឋបាលព្រៃឈើពោធិ៍សាត់ ដាក់ពាក្យបណ្ដឹងទៅតុលាការកាលពីឆ្នាំ២០១៣ ដោយចោទពីបទកាប់រុករានដីព្រៃបម្រុងទុក។ បណ្ដឹងនេះធ្វើឡើងក្រោយពីរដ្ឋាភិបាលចេញសេចក្ដីជូនដំណឹងកំណត់ដីទំហំ ៥០០ហិកតារ នៅចំណុចអន្សរក្ដាម ធ្វើជាព្រៃសហគមន៍។ ការកំណត់ដីសហគមន៍ដោយផ្អែកលើរបាយការណ៍របស់អាជ្ញាធរមូលដ្ឋាននេះ បានប៉ះពាល់ដល់ដីអ្នកភូមិអន្សរក្ដាម នៃស្នាអន្សា ៦៤គ្រួសារ ប៉ុន្តែបានដោះដូរដីចេញជាបន្តបន្ទាប់។
ចំណែកជនសង្ស័យក្នុងសំណុំរឿងនេះ គឺលោក សោម សារាវុត មានប្រសាសន៍ថា គ្រួសារលោក និងអ្នកភូមិចំនួន ២០គ្រួសារផ្សេងទៀត មានដីប៉ះពាល់ទំហំ ៦៣ហិកតារ មិនព្រមទទួលយកការដោះដូរចេញពីទីតាំងចាស់ឡើយ។
លោកថា ពលរដ្ឋដែលព្រមដោះដូរក្លាយជាជនរងគ្រោះដោយដីដែលអាជ្ញាធរដោះដូរនោះប៉ះលើទីតាំងជាន់គ្នា និងអ្នកខ្លះមិនទទួលបានដីក៏មាន ប៉ុន្តែពួកគាត់ខ្លបខ្លាចមិនហ៊ានតវ៉ា។ ចំពោះលោកមិនដែលគិតថា ខ្លួនមានទោសកំហុសដូចការចោទប្រកាន់របស់អាជ្ញាធរ ដោយគ្រាន់តែត្រួសត្រាយព្រៃតូចៗដើម្បីបង្កបង្កើនផលស្រូវលើទីតាំងចាស់ដែលឪពុកម្ដាយខ្លួនធ្លាប់ធ្វើតាំងពីឆ្នាំ១៩៨៣ នោះទេ៖ «បើរួចផុតពីការចោទប្រកាន់ ខ្ញុំនឹងអាស្រ័យផលនៅលើដីហ្នឹងជាធម្មតាជាមួយបងប្អូនខ្ញុំ ហើយបម្រើការងារជាគ្រូបង្រៀន សមាគម និងការងារជាសកម្មជនក្នុងបក្សសង្គ្រោះជាតិ បន្តទៀត គឺខ្ញុំមិនលះបង់ចោល នេះជាការដែលខ្ញុំគិតទុកសម្រាប់ឧត្ដមគតិខ្លួនខ្ញុំ»។
កាលពីថ្ងៃទី២៩ ខែកញ្ញា ឆ្នាំ២០១៥ សកម្មជនគណបក្សសង្គ្រោះជាតិ និងពលរដ្ឋនៅស្រុកក្រគរ ប្រមាណ ១០០នាក់ នាំគ្នាអមដំណើរលោក សោម សារាវុត ឡើងសវនាការ ដោយអ្នកខ្លះចូលស្ដាប់ក្នុងបន្ទប់សវនាការ និងខ្លះឈខាងមុខសាលាដំបូងខេត្តពោធិ៍សាត់។ សវនាការកាលណោះក្រុមប្រឹក្សាជំនុំជម្រះបានជជីកសួរតែពីប្រវត្តិនៃការចូលកាន់កាប់ដីរបស់លោក សោម សារាវុត ប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។