សហជីពស្នើឲ្យក្រសួងការងារ និងបណ្ដុះបណ្ដាលវិជ្ជាជីវៈ មិនត្រូវបញ្ជូនសេចក្ដីព្រាងច្បាប់ស្ដីពីប្រាក់ឈ្នួលអប្បបរមាទៅរដ្ឋសភាអនុម័តលឿនពេកទេ ដោយសារច្បាប់នេះនឹងរឹតត្បិតសិទ្ធិសេរីមេសហជីព និងអ្នកនយោបាយ មិនឲ្យបញ្ចេញមតិរិះគន់ ឬតវ៉ាជុំវិញការសុំដំឡើងប្រាក់ឈ្នួលឲ្យកម្មករឡើយ។ ប៉ុន្តែរដ្ឋមន្ត្រីក្រសួងការងារ បញ្ជាក់ថា ការអនុម័តច្បាប់នេះមិនអាចកែតម្រូវតាមការចង់បានរបស់មតិយោបល់ទាំងអស់នោះទេ។
រដ្ឋមន្ត្រីក្រសួងការងារ បញ្ជាក់ថា សេចក្ដីព្រាងច្បាប់ស្ដីពីប្រាក់ឈ្នួលអប្បបរមា នឹងដាក់ឲ្យរដ្ឋសភាអនុម័តឲ្យបានមុនឆ្នាំ២០១៨ គឺមុនការបោះឆ្នោតជាតិមកដល់ ហើយច្បាប់នេះនឹងអាចមានវិធានការតាមផ្លូវច្បាប់ ចំពោះគណបក្សនយោបាយណាដែលហ៊ានយករឿងប្រាក់ឈ្នួលរបស់កម្មករមកធ្វើជារឿងនយោបាយ ដូចកាលពីក្រោយការបោះឆ្នោតឆ្នាំ២០១៣ កន្លងទៅ។
ទោះជាយ៉ាងណា សហជីពបានស្នើឲ្យពន្យារអនុម័តច្បាប់នេះមួយរយៈពេលសិន និងគួរអនុញ្ញាតឲ្យក្រុមឯករាជ្យមកពីសហជីពសិក្សាស្រាវជ្រាវលើច្បាប់នេះ ដើម្បីឲ្យការបង្កើតច្បាប់មួយធ្វើឡើងស្របទៅតាមស្តង់ដារត្រឹមត្រូវ។
ប្រធានសហភាពចលនាកម្មករកម្ពុជា លោក ប៉ាវ ស៊ីណា ព្រួយបារម្ភថា ច្បាប់ស្ដីពីប្រាក់ឈ្នួលដែលត្រៀមអនុម័តក្នុងរយៈពេលដ៏ខ្លីនេះ នឹងប្រើប្រាស់សម្រាប់ផាកពិន័យ និងចាត់វិធានការផ្លូវច្បាប់ចំពោះមេសហជីព ឬប្រធានអង្គការណាដែលហ៊ានជំទាស់ទៅនឹងការកំណត់ប្រាក់ឈ្នួលរបស់កម្មករក្នុងវិស័យកាត់ដេរ និងសម្លៀកបំពាក់នាពេលខាងមុខ។ លោកបន្តថា ការរកឃើញកំហុសដែលសហជីព និងអង្គការបានប្រព្រឹត្តដោយសារជំទាស់ចំពោះការកំណត់ប្រាក់ឈ្នួលជូនកម្មករនេះ នឹងអាចទាញចូលទៅក្នុងច្បាប់ស្ដីពីអង្គការ និងសហជីព ដែលរដ្ឋាភិបាលមានសិទ្ធិផ្អាក ឬព្យួរការងាររបស់សហជីព និងអង្គការទាំងនោះបាន៖ « អ៊ីចឹងមានន័យថា រាល់ការសម្រេច យើងត្រូវតែឯកភាព និងយល់ស្រប »។
លោក ប៉ាវ ស៊ីណា បញ្ជាក់ថា ដើម្បីឲ្យច្បាប់នេះធ្វើឡើងតាមស្តង់ដារ គួរឲ្យសហជីពមានសិទ្ធិដូចក្រសួងការងារ និងនិយោជក ក្នុងការបង្កើតក្រុមឯករាជ្យផ្ទាល់ខ្លួនដើម្បីសិក្សាស្រាវជ្រាវ និងវាយតម្លៃអំពីច្បាប់នេះ។
នៅក្នុងមាត្រា២ នៃសេចក្ដីព្រាងច្បាប់ស្ដីពីប្រាក់ឈ្នួលបានកំណត់ថា បង្កើតក្រុមប្រឹក្សាជាតិប្រាក់ឈ្នួលអប្បបរមាដើម្បីជាយន្តការត្រីភាគីសម្រាប់សិក្សាស្រាវជ្រាវ និងផ្ដល់អនុសាសន៍អំពីប្រាក់ឈ្នួលអប្បបរមា និងអត្ថប្រយោជន៍ផ្សេងៗរបស់ជនទាំងឡាយដែលស្ថិតនៅក្រោមបទប្បញ្ញត្តិនៃច្បាប់ស្ដីពីការងារ។ រីឯមាត្រា៥ ក៏បានកំណត់ថា ប្រាក់ឈ្នួលយ៉ាងតិចណាស់ក៏ត្រូវឲ្យស្មើនឹងប្រាក់ឈ្នួលអប្បបរមា ដែលជាប្រាក់ឈ្នួលកម្រិតទាបបំផុតស្របច្បាប់ និងត្រូវបានកំណត់ដោយប្រកាសរបស់រដ្ឋមន្ត្រីក្រសួងទទួលបន្ទុកវិស័យការងារ។
ប៉ុន្តែលោក ប៉ាវ ស៊ីណា បញ្ជាក់ថា សូម្បីតែក្រុមប្រឹក្សាជាតិប្រាក់ឈ្នួល ប្រហែលមិនអាចជំទាស់ការកំណត់ប្រាក់ឈ្នួលរបស់កម្មករដែរ។
ពាក់ព័ន្ធនឹងរឿងនេះ អង្គការអន្តរជាតិខាងការងារ (ILO) បានចេញផ្សាយព័ត៌មាននៅថ្ងៃទី២២ សីហា នេះដែរថា ថ្វីត្បិតតែមានការកែសម្រួលមាត្រាមួយចំនួនឲ្យមានភាពច្បាស់លាស់ក្ដី ប៉ុន្តែបានស្នើឲ្យការពិនិត្យសាឡើងវិញតាមរយៈការពិភាក្សាបន្ត និងកិច្ចសន្ទនាត្រីភាគី មាត្រា១០ ១២ ១៦ ជាដើម ព្រោះបទប្បញ្ញត្តិទាំងនេះធ្វើឲ្យមានការរឹតត្បិត និងប៉ះពាល់សិទ្ធិបញ្ចេញមតិ និងការតស៊ូមតិអំពីបញ្ហាពាក់ព័ន្ធនឹងប្រាក់ឈ្នួលអប្បបរមា។ បន្ថែមពីហានិភ័យទាំងនេះ ក៏ធ្វើឲ្យប៉ះពាល់ប្រសិទ្ធភាព និងតម្លាភាពនៃដំណើរការពិគ្រោះយោបល់ និងផ្ទុយពីបទដ្ឋានសិទ្ធិសេរីភាពសមាគម។
ថ្វីត្បិតតែយ៉ាងនេះក្ដី រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ិត សំហេង ថ្លែងនៅក្នុងសិក្ខាសាលាពិគ្រោះយោបល់ស្ដីពីសេចក្ដីព្រាងច្បាប់ស្ដីពីប្រាក់ឈ្នួលអប្បបរមា នៅព្រឹកថ្ងៃទី២២ សីហា នៅឯសណ្ឋាគារភ្នំពេញថា ការបង្កើតច្បាប់មួយមិនអាចបំពេញចិត្តមនុស្សគ្រប់គ្នាបានឡើយ។ លោកអះអាងថា ច្បាប់នេះ គឺប្រើដើម្បីតាមដាន និងផ្ទៀងផ្ទាត់ឲ្យបានហ្មត់ចត់នូវការកំណត់ប្រាក់ឈ្នួល និងមានបំណងលើកកម្ពស់ជីវភាពសមរម្យជូនកម្មករក្នុងវិស័យកាត់ដេរសម្លៀកបំពាក់ និងស្បែកជើង និងជំរុញឲ្យបរិយាកាសវិនិយោគនៅកម្ពុជា កាន់តែល្អប្រសើរឡើង៖ « ក្រោយការបោះឆ្នោតឆ្នាំ២០១៣ មក ប្រាក់ឈ្នួលអប្បបរមា ត្រូវតវ៉ាលាយឡំជាមួយរឿងនយោបាយ។ អ៊ីចឹងទេ តាំងពីហ្នឹងមក យើងបានបង្កើតឲ្យមាននីតិវិធី និងយុទ្ធនាការសម្រាប់ដោះស្រាយអប្បបរមានេះ »។
លោករដ្ឋមន្ត្រីបន្ថែមថា មុនសេចក្ដីព្រាងច្បាប់ស្ដីពីប្រាក់ឈ្នួលអប្បបរមា ត្រូវដាក់ឲ្យពិគ្រោះយោបល់ក្នុងសិក្ខាសាលាលើកទីពីរ នៅថ្ងៃទី២២ សីហា នេះ ក្រសួងការងារ សហការជាមួយក្រសួងផែនការ ចុះស្រាវជ្រាវប្រមូលព័ត៌មានផ្ទាល់ពីកម្មករក្នុងវិស័យកាត់ដេរសម្លៀកបំពាក់ និងស្បែកជើងចំនួន ១.៥០០នាក់ពីរោងចក្រទាំង ៧៥ នៅទូទាំងរាជធានីភ្នំពេញ និងខេត្តកណ្ដាល ព្រមទាំងសហការជាមួយអង្គការអន្តរជាតិខាងការងារ (ILO) បង្កើតកិច្ចពិគ្រោះយោបល់ជាបន្តបន្ទាប់ជាមួយអ្នកពាក់ព័ន្ធដែរ។
ទោះជាយ៉ាងណាក្ដី រយៈពេលកន្លងទៅ សហជីពតែងតវ៉ា និងរិះគន់ចំពោះការកំណត់ប្រាក់ឈ្នួលជូនកម្មកររបស់រដ្ឋាភិបាល ថានៅមានកម្រិតទាបនៅឡើយ ហើយប្រាក់ឈ្នួលនេះមិនអាចផ្គត់ផ្គង់លើការចំណាយរបស់កម្មករ ស្របពេលពួកគេកំពុងប្រឈមនឹងទំនិញគ្រប់មុខឡើងថ្លៃ។ សហជីពជាច្រើនសង្ស័យទៀតថា ប្រាក់ឈ្នួលក្នុងកម្រិតទាបនេះ បានបង្ខំឲ្យមានការបំពេញការងារថែមម៉ោងជ្រុល បូកផ្សំទាំងបរិយាកាស និងបញ្ហាអនាម័យមិនសូវល្អក្នុងរោងចក្រខ្លះ ហើយការហូបចុកអាហារមិនមានសុខភាពផង គឺជាបញ្ហាមិនត្រូវបានដោះស្រាយ និងបានធ្វើឲ្យកម្មករជាច្រើនត្រូវដួលសន្លប់បាត់ស្មារតី និងកម្មករខ្លះទៀតដួលស្លាប់ភ្លាមៗពេលកំពុងបំពេញការងារ ជាដើម។
ផ្ទុយទៅវិញ សហជីពគាំទ្ររដ្ឋាភិបាល និងជាប្រធានក្រុមប្រឹក្សាភិបាលសហជីពជាតិកម្ពុជា លោក សោម អូន យល់ថា ច្បាប់កំណត់ប្រាក់ឈ្នួលនេះមិនមានការរឹតត្បិតសិទ្ធិសេរីឡើយ ព្រោះលោកថា សហជីពក៏មានសិទ្ធិនិយាយអំពីប្រាក់ឈ្នួលដែរ ប្រសិនបើមានការស្នើសុំទៅរដ្ឋមន្ត្រីក្រសួងការងារ។ លោក សោម អូន បញ្ជាក់ថា ច្បាប់នេះនឹងជួយឲ្យការនិយាយអំពីប្រាក់ឈ្នួលធ្វើឡើងតាមបច្ចេកទេសសុទ្ធសាធ និងមិនអាចជាប់ពាក់ព័ន្ធនឹងរឿងនយោបាយទៀតទេ។
នៅក្នុងសិក្ខាសាលាពិគ្រោះយោបល់ស្ដីពីសេចក្ដីព្រាងច្បាប់ស្ដីពីប្រាក់ឈ្នួលអប្បបរមានៅថ្ងៃទី២២ សីហា អគ្គលេខាធិការសហព័ន្ធសហជីពកម្មករសំណង់ និងព្រៃឈើកម្ពុជា លោក យ៉ាន ធី ក៏បានស្នើឲ្យក្រសួងការងារ កំណត់ប្រាក់ឈ្នួលជូនកម្មករសំណង់ដែលជាវិស័យសំខាន់ទីពីរ ជួយជំរុញសេដ្ឋកិច្ចជាតិ ដូចកម្មករក្នុងវិស័យកាត់ដេរសម្លៀកបំពាក់ និងស្បែកជើងដែរ។ លោកថា កម្មករសំណង់ប្រហែល ២០ម៉ឺននាក់ដែលកំពុងបម្រើការក្នុងវិស័យមិនទទួលបានលក្ខខណ្ឌការងារនេះ ត្រូវថៅកែបង្ខំឲ្យធ្វើការលើសម៉ោងគ្មានប្រាក់បន្ថែម ហើយថែមទាំងមិនបានការគិតគូរអំពីសុខភាព និងសុវត្ថិភាពការងារ ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។