អ្នកភូមិឡពាងគ្រោងប្ដឹងព្រះរាជអាជ្ញារងខេត្តកំពង់ឆ្នាំងចោទមិនចាត់ការបណ្ដឹង
2015.09.05
តំណាងពលរដ្ឋ ៤នាក់នៅឃុំតាជេស ស្រុកកំពង់ត្រឡាច ខេត្តកំពង់ឆ្នាំង កំពុងរៀបចំបណ្ដឹងប្ដឹងព្រះរាជអាជ្ញារងម្នាក់ទៅក្រសួងយុត្តិធម៌ និងស្ថាប័នយុត្តិធម៌ចំនួនពីរផ្សេងទៀត។ គម្រោងប្ដឹង គឺបន្ទាប់ពីព្រះរាជអាជ្ញារងរូបនេះ ចេញលិខិតជូនដំណឹងតម្កល់រឿងទុកឥតចាត់ការ ដែលពួកគាត់ប្ដឹងចោទមន្ត្រីសុរិយោដីស្រុកពីរនាក់ ថាបានកសាងប្លង់ដីធ្លីមិនត្រឹមត្រូវ។
អ្នកភូមិដែលមានតំណាងឈ្មោះ រាជ សីម៉ា សៀង ហេង ម៉ាង យ៉ាវ និង ហុង ដារ៉ូ នឹងពិភាក្សាគ្នា ដើម្បីប្ដឹងប្រឆាំងនឹងព្រះរាជអាជ្ញារង លោក ឡុង ស៊ីថា នៅសប្ដាហ៍ទី២ នៃខែកញ្ញា ឆ្នាំ២០១៥។
តំណាងអ្នកភូមិរិះគន់ថា តុលាការមិនអាចចាត់ការមន្ត្រីសុរិយោដីឈ្មោះ អេង ណារិទ្ធ និងឈ្មោះ ម៉ិល ចន្ថា ដែលឃុបឃិតគ្នារំលោភវាស់ដីពលរដ្ឋទំហំ ៦១២ហិកតារ ទៅឲ្យក្រុមហ៊ុន ខេ.ឌី.ស៊ី (KDC) ព្រោះខ្លាចអំណាចស្វាមីម្ចាស់ក្រុមហ៊ុន គឺលោក ស៊ុយ សែម ជារដ្ឋមន្ត្រីក្រសួងរ៉ែ និងថាមពល។
តំណាងពលរដ្ឋម្នាក់ លោក រាជ សីម៉ា មានប្រសាសន៍ថា រូបលោក និងតំណាងអ្នកភូមិ ៣នាក់ទៀតបានដាក់បណ្ដឹងទៅសាលាឧទ្ធរណ៍ភ្លាមៗ ដើម្បីប្រឆាំងមន្ត្រីភូមិបាលស្រុកដដែល បន្ទាប់ពីតំណាងអយ្យការតម្កល់រឿងនេះទុកឥតចាត់ការ កាលពីថ្ងៃទី៣ ខែកញ្ញា ឆ្នាំ២០១៥។ លោកថា ក្រុមអ្នកភូមិនឹងពិភាក្សាគ្នាទៀតនៅថ្ងៃទី៦ ខែកញ្ញា ថាតើត្រូវប្ដឹងព្រះរាជអាជ្ញារងរូបនោះរបៀបណា៖ «គាត់ (ព្រះរាជអាជ្ញារង លោក ឡុង ស៊ីថា) យល់ឃើញថា ខុសក្នុងមាត្រាច្បាប់ហើយ គឺតាមមាត្រា២៦១ និង២៦៤ គាត់យល់ឃើញថាអ៊ីចឹង គាត់ប្រាប់ខ្ញុំ ប៉ុន្តែគាត់បែរបង្វិល ឬជំរុញឲ្យខ្ញុំទៅប្ដឹងអាជ្ញាធរជាតិដោះស្រាយដីធ្លីទៅវិញ។ ខ្ញុំចង់ឲ្យមន្ត្រីថ្នាក់លើ ដាក់ទោសទណ្ឌមកលើចៅក្រម ឬព្រះរាជអាជ្ញាចឹងៗ»។
វិទ្យុអាស៊ីសេរី មិនទាន់អាចរកប្រភពទាក់ទងព្រះរាជអាជ្ញារង លោក ឡុង ស៊ីថា ដើម្បីឆ្លើយតបជុំវិញបញ្ហានេះបានទេនៅថ្ងៃទី៥ ខែកញ្ញា។
យ៉ាងណា តំណាងពលរដ្ឋបញ្ជាក់ថា លោក ឡុង ស៊ីថា ធ្លាប់ហៅពួកគាត់ទៅជួបពិភាក្សា និងជំរុញឲ្យពួកគាត់ប្ដឹងទៅអាជ្ញាធរជាតិដោះស្រាយវិវាទដីធ្លីវិញ។
អាជ្ញាធរខេត្តកំពង់ឆ្នាំង ធ្លាប់បញ្ជាក់ថា ជម្លោះដីធ្លីដ៏រ៉ាំរ៉ៃនេះពិបាកដោះស្រាយ គឺដោយសារភាគីក្រុមហ៊ុនមានប្លង់រឹង រីឯក្រុមពលរដ្ឋវិញពុំមានឯកសារកាន់កាប់លើដី ដែលខ្លួនកំពុងតវ៉ាទាមទារនោះទេ។
តំណាងអ្នកភូមិនៃឃុំតាជេស លោក រាជ សីម៉ា បានដាក់បណ្ដឹងប្រឆាំងមន្ត្រីសុរិយោដីស្រុកកំពង់ត្រឡាច លោក អេង ណារិទ្ធ និងលោក ម៉ិល ចន្ថា ទៅសាលាដំបូងខេត្តកំពង់ឆ្នាំង កាលពីថ្ងៃទី១៣ ខែតុលា ឆ្នាំ២០១៤។ លោក រាជ សីម៉ា បញ្ជាក់ថា ការបង្កជម្លោះរវាងប្រជាពលរដ្ឋ និងក្រុមហ៊ុនយ៉ាងក្ដៅគគុកកន្លងទៅ ព្រោះតែការចេញប្លង់មិនត្រឹមត្រូវនេះ ហើយលោកសង្ឃឹមថានឹងមានយុត្តិធម៌នាថ្ងៃអនាគត៖ «ដោយសារប្លង់នេះឯងកសាងឡើងដោយគ្មានផ្លូវជាតិ ប្រព័ន្ធធារាសាស្ត្រ និងផ្លូវចូលភូមិឡពាង ហើយគ្មានសាក្សីព្រំប្រទល់ណាមួយ ដែលផ្ដិតស្នាមមេដៃប្លង់របស់ក្រុមហ៊ុន ខេ.ឌី.ស៊ី ចំនួន ១០៥ប័ណ្ណហ្នឹងទេ។ គាត់ (មន្ត្រីសុរិយោដីស្រុក) ទៅវាល់តែចុងមួយ និងដើមមួយ ហើយគាត់មកអង្គុយអង្កន់នៅក្រោមម្លប់ឈើ ហើយគាត់ថាប្លង់ហ្នឹងត្រឹមត្រូវ»។
ជម្លោះដីធ្លីអូសបន្លាយរយៈពេលជាង ១០ឆ្នាំ រវាងពលរដ្ឋនៅឃុំតាជេស ជាមួយនឹងក្រុមហ៊ុន ខេ.ឌី.ស៊ី ភាគីពលរដ្ឋបានប្ដឹងភាគីក្រុមហ៊ុនទៅសាលាដំបូង សាលាឧទ្ធរណ៍ និងតុលាការកំពូល ជាង ៦០បណ្ដឹង ក្នុងនោះតុលាការចាត់ការបានតែមួយបណ្ដឹងប៉ុណ្ណោះ៕